ಪಿಣರಾಯಿ ವಿಜಯನ್ ಕೇರಳದ ನೂತನ ಮುಖ್ಯಮಂತ್ರಿ

ಸಿಪಿಐ(ಎಂ) ಪಾಲಿಟ್ ಬ್ಯೂರೋ ಸದಸ್ಯರಾದ ಪಿಣರಾಯಿ ವಿಜಯನ್ ಅವರನ್ನು ನೂತನ ಎಲ್‍ಡಿಎಫ್ ಸರ್ಕಾರದ ಮುಖ್ಯಮಂತ್ರಿಯಾಗಿ ಆರಿಸಲಾಗಿದೆ ಎಂದು ಈ ಸಂಚಿಕೆ ಮುದ್ರಣಕ್ಕೆ ಹೋಗುವ ವೇಳೆಗೆ ತಿಳಿದು ಬಂದಿದೆ. ಇದನ್ನು ಸಿಪಿಐ(ಎಂ) ಪ್ರಧಾನ ಕಾರ್ಯದರ್ಶಿ ಸೀತಾರಾಮ್ ಯೆಚೂರಿಯವರು ಮೇ 20 ರಂದು ನಡೆಸಿದ ಪತ್ರಿಕಾ ಸಮ್ಮೇಳನದಲ್ಲಿ ಪ್ರಕಟಿಸಿದ್ದಾರೆ. ಸಿಪಿಐ(ಎಂ) ಕೇರಳ ರಾಜ್ಯ ಕಾರ್ಯದರ್ಶಿ ಕೊಡಿಯೇರಿ ಬಾಲಕೃಷ್ಣನ್ ಮತ್ತು ಹಿಂದಿನ ಎಲ್‍ಡಿಎಫ್ ಸರ್ಕಾರದಲ್ಲಿ ಮುಖ್ಯಮಂತ್ರಿಯಾಗಿದ್ದ ವಿ.ಎಸ್ ಅಚ್ಯುತಾನಂದನ್ ರವರು ಈ ಪತ್ರಿಕಾ ಸಮ್ಮೇಳನದಲ್ಲಿ ಹಾಜರಿದ್ದರು.

janashakthi pdf 8

Advertisements

`ನೀಟ್’ ಜಾರಿಗೆ ಪೂರ್ವ ಸಿದ್ಧತೆ ಅಗತ್ಯ

ಸಂಪುಟ: 10 ಸಂಚಿಕೆ: 20 May 8, 2016
neet

ಶಿಕ್ಷಣ ಕ್ಷೇತ್ರವಿಂದು ಗೊಂದಲಗಳ ಗೂಡಾಗಿದೆ. ಒಂದೆಡೆ ಆಳುವವರು ತೆಗೆದುಕೊಳ್ಳುವ ನಿರ್ಧಾರಗಳು, ಶಿಕ್ಷಣ ಕ್ಷೇತ್ರದಲ್ಲಿ ಭಾರೀ ಹಿಡಿತ ಹೊಂದಿರುವ ಖಾಸಗಿ ಶಿಕ್ಷಣೋದ್ಯಮಿಗಳು. ಕಾಲಕಾಲಕ್ಕೆ ನ್ಯಾಯಾಲಯಗಳ ತೀರ್ಪುಗಳು ಹೀಗೆ ಅವುಗಳನ್ನು ಗೋಜಲುಗೊಳಿಸುತ್ತಲೇ ಇರುತ್ತವೆ. ಅದೆಷ್ಟೋ ಬಾರಿ ಸಮಸ್ಯೆಗಳಿಗೆ ಸೂಚಿಸುವ ಪರಿಹಾರಗಳೂ ಸಹ ಸಾಂದರ್ಭಿಕ ಕಾಲ ಮಿತಿಗಳಿಂದಾಗಿ ಅರಗಿಸಿಕೊಳ್ಳಲಾಗದ ಅನ್ನವಾಗಿಯೂ ಬಿಡುತ್ತವೆ.

ಈಗ ದೇಶದಲ್ಲಿ, ನಮ್ಮ ರಾಜ್ಯದಲ್ಲಿಯೂ ವ್ಯಾಪಕ ಚರ್ಚೆ ನಡೆಯುತ್ತಿರುವುದು ವೈದ್ಯಕೀಯ, ಮತ್ತಿತ್ತರ ಕೋರ್ಸ್‍ಗಳಿಗೆ ಪ್ರವೇಶಾವಕಾಶ ಕುರಿತ (ನೀಟ್) ಸುಪ್ರಿಂಕೋರ್ಟ್‍ನ ಆದೇಶದ ಸುತ್ತ. ಇದೇ ಏಪ್ರಿಲ್ 28 ರಂದು ಮೆಡಿಕಲ್, ಡೆಂಟಲ್ ಶಿಕ್ಷಣದ ಪ್ರವೇಶಾತಿಗೆ `ರಾಷ್ಟ್ರೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆ’ (ಎನ್.ಇ.ಇ.ಟಿ) ಕಡ್ಡಾಯ ಮತ್ತು ಇಡೀ ದೇಶದಲ್ಲಿನ ಪ್ರಕ್ರೀಯೆಗೆ ಅದೊಂದೇ ಕ್ರಮ ಅನುಸರಿಸಬೇಕು ಎಂಬ ಆದೇಶವನ್ನು ಸುಪ್ರೀಂಕೋರ್ಟ್‍ನ ಐದು ನ್ಯಾಯ ಮೂರ್ತಿಗಳ ಪೀಠ (ನ್ಯಾ. ಅನಿಲ್ ದವೆ ನೇತೃತ್ವದ ಸಂವಿಧಾನ ಪೀಠ) ತೀರ್ಪು ನೀಡಿತ್ತು.

ಈಗ ನಿಗದಿಯಾದಂತೆ ಮೊದಲ ಹಂತದ ಪರೀಕ್ಷೆಗಳನ್ನು 2016 ರ ಮೇ 1 ರಂದು ನಡೆಸಬೇಕೆಂದೂ, ಹೊಸದಾಗಿ ಬರೆಯಬೇಕಿರುವವರಿಗೆ ಜುಲೈ 24, 2016 ರಂದು ದಿನಾಂಕಗಳನ್ನು ಸೂಚಿಸಿತು. ಈ ಏಕರೂಪದ ಪರೀಕ್ಷೆಯೇ ದೇಶದ ಎಲ್ಲ ಸರ್ಕಾರಿ, ಖಾಸಗಿ ಶಿಕ್ಷಣ ಸಂಸ್ಥೆಗಳ ಪ್ರವೇಶಕ್ಕೆ ಅನಿವಾರ್ಯ, ಕಡ್ಡಾಯ ಅದನ್ನು ಪಾಲಿಸಬೇಕೆಂದು ಕಠಿಣವಾದ ನಿರ್ದೇಶನವನ್ನು ನೀಡಿತು.

ಪರೀಕ್ಷೆ ತೀರಾ ಹತ್ತಿರವಿರುವಾಗ, ರಾಜ್ಯಗಳು ಸಿಇಟಿ, ಕಾಮೆಡ್-ಕೆ. ಯಂತಹ ತನ್ನದೇ ಪರೀಕ್ಷೆಗಳನ್ನು ನಡೆಸಲು ಸಿದ್ಧವಾಗಿರುವಾಗ, ತಮಿಳುನಾಡಿನಲ್ಲಿ ಇಂತಹ ಪರೀಕ್ಷೆಗಳೆ ಇಲ್ಲದೆ, ಮಂಡಳಿಯ ಪರೀಕ್ಷೆಯ ಅಂಕಗಳನ್ನೇ ಆಧಾರವಾಗಿ ಇರಿಸಿಕೊಂಡು ಅರ್ಹತೆಯ ಆಯ್ಕೆ ಮಾಡುತ್ತಿರುವಾಗ, ಅದೆಲ್ಲವನ್ನು ರದ್ದುಗೊಳಿಸಿ `ನೀಟ್’ ಪರೀಕ್ಷೆಯೊಂದನ್ನೇ ಅನುಸರಿಸಬೇಕೆಂಬುದು ಬಹುತೇಕ ಎಲ್ಲರಲ್ಲಿ, ಮುಖ್ಯವಾಗಿ ಪೋಷಕರು, ವಿದ್ಯಾರ್ಥಿಗಳಲ್ಲಿ ಆತಂಕ, ತಲ್ಲಣಗಳನ್ನೂ ಸೃಷ್ಟಿಸಿರುವುದು ನಿಜ. ಆದರೆ ನ್ಯಾಯಾಲಯ ತನ್ನ ಬಿಗಿ ನಿಲುವು ಸಡಿಲಗೊಳಿಸುವುದು ಅಸಾಧ್ಯವೆಂದು ಮುಂದಿನ ಮನವಿ ಕುರಿತ ಸಂದರ್ಭದಲ್ಲಿ ಸ್ವಷ್ಟಪಡಿಸಿದೆ.

2016 ರ ಈ ತೀರ್ಪು ತನ್ನ ಹಿಂದಿನ 2013ರ ಬಹುತೇಕ ತೀರ್ಪಿನ್ನು ಅನೂರ್ಜಿತಗೊಳಿಸಿದಂತೆ ಆಗಿದೆ. 2013 ರಲ್ಲಿ ಮುಖ್ಯ ನ್ಯಾಯಮೂರ್ತಿಗಳಾಗಿದ್ದ ನ್ಯಾ. ಅಲ್ತಮಸ್ ಕಬೀರ್ ರವರ ಮೂರು ನ್ಯಾಯಮೂರ್ತಿಗಳ ಪೀಠ ಬಹುಮತದಿಂದ ನೀಟ್ ಪದ್ಧತಿಯನ್ನು ನಿರಾಕರಿಸಿ ರಾಜ್ಯಗಳಲ್ಲಿ ಅವರದೇ ರೀತಿಯ ಪರೀಕ್ಷೆಗಳನ್ನೂ ನಡೆಸಲು ಆದೇಶಿಸಿತ್ತು. ಮಹಾನಗರಗಳಲ್ಲಿ ಬೆಳೆದ ಮಕ್ಕಳು ಮತ್ತು ಗ್ರಾಮೀಣ ಪರಿಸರದ ಮಕ್ಕಳ ನಡುವೆ ಜ್ಞಾನದ ಕಲಿಕೆಯಲ್ಲಿ ಅಪಾರ ವ್ಯತ್ಯಾಸವಿದೆ. ರಾಜ್ಯಗಳ ಹಾಗೂ ಅಲ್ಪ ಸಂಖ್ಯಾತರ ಸಂವಿಧಾನಿಕ ಹಕ್ಕುಗಳನ್ನು ಮಾನ್ಯ ಮಾಡಬೇಕಾಗುತ್ತದೆ ಎಂದು ತನ್ನ ತೀರ್ಪಿಗೆ ಸಮರ್ಥನೆಯನ್ನು ನೀಡಿತ್ತು. ಈ ತೀರ್ಪು ಬಹುಮತದಿಂದ ತೆಗೆದುಕೊಂಡದ್ದಾಗಿತ್ತಲ್ಲದೆ, ನ್ಯಾ. ಅಲ್ತಮಸ್ ರವರು ನಿವೃತ್ತಿ ಹೊಂದುವ ಹಿಂದಿನ ದಿನ ತೀರ್ಪು ಪ್ರಕಟಿಸಿದ್ದನ್ನ ಪ್ರಶ್ನಿಸಲಾಗಿತ್ತು. ಈಗಲೂ ನ್ಯಾ. ದವೆ ಯವರ ನೇತೃತ್ವದ ಪೀಠ ಈ ಪ್ರಶ್ನೆಯನ್ನು ಪ್ರಸ್ತಾಪಿಸಿದೆ.

2016ರ ಏಪ್ರಿಲ್ 28 ರ ತನ್ನ ತೀರ್ಪಿನಲ್ಲಿ ಈ ವಾಸ್ತವಗಳನ್ನು ಗಮನಿಸಿದಾಗ್ಯೂ ಈ ಅವಕಾಶವನ್ನೇ ಬಳಸಿ ಖಾಸಗಿ ಶಿಕ್ಷಣ ಸಂಸ್ಥೆಗಳು ವಿದ್ಯಾರ್ಥಿ-ಪೋಷಕರಿಂದ ವಿಪರೀತ ಹಣವನ್ನು ಸುಲಿಯುತ್ತಿವೆ. ಮಾತ್ರವಲ್ಲ, ಅವರವರದ್ದೇ ಪರೀಕ್ಷಾ ಪದ್ಧತಿಗಳು ಇರುವುದರಿಂದಾಗಿ ವಿದ್ಯಾರ್ಥಿಗಳು ಹಲವಾರು ಪರಿಕ್ಷೆಗಳನ್ನು ಬರೆಯಬೇಕಾದ ವಿಪರೀತ ಒತ್ತಡದಲ್ಲಿದ್ದಾರೆ, ಮಾನಸಿಕ ಹಿಂಸೆ ಅನುಭವಿಸುತ್ತಾರೆ. ಇದು ತೊಲಗಿ ಒಂದು ಏಕರೂಪದ ಪರೀಕ್ಷಾ ವ್ಯವಸ್ಥೆ ಅನಿವಾರ್ಯ, ಅಗತ್ಯವೆಂದು ಈಗಿನ ಪೀಠ ಪ್ರತಿಪಾದಿಸಿತು.

ಎತ್ತಲಾದ ಹಲವು ಪ್ರಶ್ನೆಗಳಿಗೆ ಸ್ವಷ್ಟನೆ ನೀಡುತ್ತಾ ಪೀಠವು ರಾಜ್ಯದ ನೀಟ್ ಹಂಚಿಕೆ ಕೋಟಾ 85% ರಷ್ಟು ಈಗಿರುವಂತೆ ಮುಂದುವರಿಯುತ್ತದೆಂದೂ ಕೇಂದ್ರಕ್ಕೆ 15% ಹಂಚಿಕೆ ಈಗಿರುವಂತೆ ಲಭ್ಯವೆಂದೂ ಹೇಳಿ ರಾಜ್ಯಗಳ, ಪ್ರಾದೇಶಿಕ, ಸಂವಿಧಾನಾತ್ಮಕ ಹಾಗೂ ಮೀಸಲಾತಿಗಳನ್ನು ನಿರಾಕರಿಸುವುದಿಲ್ಲ, ಪಾಲಿಸಲೇಬೇಕು ಎಂದೂ ಹೇಳಿದೆ. ಹಾಗೇ ಕ್ಯಾಪಿಟೇಶನ್, ಡೋನೇಷನ್ ಸುಲಿಗೆಗೆ ನಿಯಂತ್ರಣದ ಬಗ್ಗೆಯೂ ಸೂಚಿಸಿದೆ. ಭಾರೀ ಅವ್ಯವಹಾರಗಳ ಆಗರವಾಗಿದೆಯೆಂಬ ಆರೋಪವಿರುವ ಮೆಡಿಕಲ್ ಕೌನ್ಸಿಲ್ ಆಫ್ ಇಂಡಿಯಾದ ಆಡಳಿತ ನಿರ್ವಹಣೆಯನ್ನು ತೀವ್ರವಾಗಿ ಟೀಕಿಸಿ ಕೇಂದ್ರ ಸರ್ಕಾರ ಪರ್ಯಾಯವಾಗಿ ಮುಂದಿನ ಕಾನೂನು – ವ್ಯವಸ್ಥೆಯನ್ನು ಮಾಡುವವರೆಗೆ ನಿಗಾ ಸಮಿತಿಯನ್ನು ರಚಿಸಿ ಕಣ್ಗಾವಲು ಇರಿಸಿದೆ.

ಈ ಒಟ್ಟು ತೀರ್ಪಿನಲ್ಲಿ ಹಲವಾರು ಸಕಾರಾತ್ಮಕ ಅಂಶಗಳಿವೆ. ಶಿಕ್ಷಣದ ವ್ಯಾಪಾರೀಕರಣ, ಅದರಲ್ಲೂ ವೃತ್ತಿ ಶಿಕ್ಷಣದ ಭಾರೀ ದಂಧೆಯಲ್ಲಿ ಹಣದ ಲೂಟಿಗೆ ಕಡಿವಾಣ ಹಾಕುವುದು ಸ್ವಾಗತಾರ್ಹ. ಆದರೆ ಇಂತಹ ಅತ್ಯಂತ ಮಹತ್ವದ ತೀರ್ಪನ್ನು ಜಾರಿಗೊಳಿಸಬೇಕಾದರೆ ಕಾಲಾವಾಕಾಶ ಬೇಕಾಗುತ್ತದೆ. ಹಲವಾರು ಪ್ರಶ್ನೆಗಳಿಗೆ ಪ್ರಾಯೋಗಿಕವಾದ ಉತ್ತರಗಳನ್ನು ಕಂಡು ಕೊಳ್ಳಬೇಕಾಗುತ್ತದೆ, ಜಾರಿವಿಧಾನಗಳನ್ನು ರೂಪಿಸಬೇಕಾಗುತ್ತದೆ.

ಆದ್ದರಿಂದ 2016 ಏಪ್ರೀಲ್ 28 ರ ಸುಪ್ರಿಂ ಕೋರ್ಟ್‍ನ ತೀರ್ಪನ್ನು 2017-18ರ ಶೈಕ್ಷಣಿಕ ವರ್ಷದಿಂದ ಜಾರಿಗೊಳಿಸುವುದು ಅತ್ಯಗತ್ಯ.

ಇದರೊಂದಿಗೆ ಹಲವು ಸಮಸ್ಯೆಗಳೂ ಇವೆ. ಹಿಂದೆ ನ್ಯಾಯಾಲಯ ಗಮನಿಸಿದಂತೆ, ಇಡೀ ರಾಷ್ಟ್ರಕ್ಕೆ ಏಕರೂಪ ಪರೀಕ್ಷೆಯಾದಾಗ ಬಹುತೇಕ ರಾಜ್ಯಗಳಲ್ಲಿ ಆ ಮಟ್ಟದ ಕಲಿಕೆ, ತರಬೇತಿಗಳು ಇಲ್ಲ. ಹಾಗೂ ಇನ್ನೂ ನೀಡುವ ಕೋಚಿಂಗ ಸೆಂಟರ್, ಶಿಕ್ಷಣ ಸಂಸ್ಥೆಗಳು ವಿಪರೀತ ಹಣವನ್ನು (1.5 ಲಕ್ಷದಿಂದ 2 ಲಕ್ಷ ಪ್ರತಿ ವರ್ಷ) ಸುಲಿಯುತ್ತವೆ. ಕಾಲೇಜು ಪೀಜ್ ಕಟ್ಟಲೇ ಅಸಾಧ್ಯವಿರುವವರು ಆರ್ಥಿಕವಾಗಿ ಸಾಮಾಜಿಕವಾಗಿ ದುರ್ಬಲರು ಹೇಗೆ ತರಬೇತಿ ಪಡೆಯಲು ಸಾಧ್ಯ? ಅಲ್ಲದೆ ಆಯಾ ರಾಜ್ಯಗಳಲ್ಲಿ ಒಂದೊಂದು ರೀತಿಯ ಪಠ್ಯಕ್ರಮವೂ ಇರುತ್ತದೆ. ಪ್ರಾದೇಶಿಕ ಭಿನ್ನತೆ ಇರುತ್ತದೆ. ಹೀಗಿರುವಾಗ `ಮುಂದುವರಿದ’ ವಿಭಾಗಗಳು `ನೀಟ್’ ನ ಲಾಭ ಬಾಚಿಕೊಳ್ಳಲಾರರೇ? ಹಾಗಾಗಿ ನಮ್ಮ ರಾಜ್ಯಗಳಲ್ಲಿಯೂ ಕೆಳಹಂತದಿಂದ ಮೇಲಿನ ವರೆಗೆ ಪಠ್ಯಕ್ರಮದಲ್ಲಿ ಗುಣಮಟ್ಟದ ಸುಧಾರಣೆ, ಶಿಕ್ಷಣ ನೀಡಿಕೆ, ಮೂಲಭೂತ ಸೌಲಭ್ಯಗಳನ್ನು ಉನ್ನತೀಕರಿಸುವುದು ಅನಿವಾರ್ಯ, ಅತ್ಯಗತ್ಯ.

ಅದೇ ಹೊತ್ತಿನಲ್ಲಿ ಶಿಕ್ಷಣ ಮತ್ತು ಪ್ರವೇಶಾತಿಗಳನ್ನು ವಿಪರೀತವಾಗಿ ಕೇಂದ್ರೀಕರಿಸುವುದು ಸರಿಯಲ್ಲ. ಕಾರ್ಪೋರೇಟ್ ಧಾಳಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಪ್ರಜಾಪ್ರಭುತ್ವೀಕರಣದ ಮೂಲ ನೀತಿಗಳನ್ನು ಬದ್ಧತೆಯಿಂದ ಪಾಲಿಸಲು ಹೆಚ್ಚಿನ ಗಮನ ನೀಡಬೇಕಿದೆ.

ಹೀಗಾಗಿ `ನೀಟ್’ ಜಾರಿಯನ್ನು ಮುಂದಿನ ವರ್ಷದಿಂದ ಸಕಲ ಸಿದ್ಧತೆ ಮಾಡಿ ನಡೆಸುವುದು ವಾಸ್ತವದ ಕ್ರಮವಾಗುವುದು. ನಿಜ, ಇಂದು ಖಾಸಗೀ ಸಂಸ್ಥೆಗಳ ಲೂಟಿ. ಹಲವು ಪರೀಕ್ಷೆಗಳ ಹೆಸರಿನಲ್ಲಿ (ಸಿಇಟಿ, ಕಾಮೆಡ್-ಕೆ ಮತ್ತು ಆಯಾ ಸಂಸ್ಥೆಗಳೇ ನಡೆಸುವ ಪರೀಕ್ಷೆಗಳು ಕೊನೆಗೆ ಎಲ್ಲಾ ನಿಯಮಗಳನ್ನು ಉಲ್ಲಂಘಿಸಿ ಕೋಟಿಗಳಿಗೆ ಮಾರುವುದು). ಹಣ ದೋಚುವ, ಶಿಕ್ಷಣ ದಂಧೆಗೆ ಕಡಿವಾಣ ಹಾಕಲೇಬೇಕು. `ಶಿಕ್ಷಣದ ಸೇವೆ’ಗೆಂದೇ ಜನಿಸಿದೆವೆಂದು ಘೋಷಿಸಿರುವ ಶಿಕ್ಷಣೋದ್ಯಮಗಳು `ಸೇವೆ’ ಮಾಡಿದರೆ ಅಷ್ಟೇ ಸಾಕು!

ಇಂತಹ ಸ್ಥಿತಿಯಲ್ಲಿ ರಾಜ್ಯ ಸರ್ಕಾರವೂ ಈ ಕ್ಷೇತ್ರದ ತಜ್ಞರೊಂದಿಗೆ, ಪೋಷಕರು, ವಿದ್ಯಾರ್ಥಿಗಳೊಂದಿಗೆ ಸಮಾಲೋಚಿಸಿ ಸೂಕ್ತ ನಿಲುವು, ಕ್ರಮ ವಹಿಸುವುದು ಅಗತ್ಯವಾಗಿದೆ.

– ಎಸ್.ವೈ. ಗುರುಶಾಂತ

ಬರಗಾಲ ಜನಗಳಿಗೆ ಸಂಕಷ್ಟ ! ಸರಕಾರಗಳಿಗೆ ಇಷ್ಟ!

ಸಂಪುಟ: 10 ಸಂಚಿಕೆ: 20 May 8, 2016

ಒಟ್ಟಾರೆ, ಇದೆಲ್ಲವೂ ಬರಗಾಲ ಗಂಭಿರವಾಗಿರುವುದನ್ನು ಹೇಳುತ್ತಿದೆ. ಕೆಲ ತಜ್ಞರು ಇಂತಹ ಬರದ ಭೀಕರತೆ ಕಳೆದ 73 ವರ್ಷಗಳ ಹಿಂದೆ ಕಂಡು ಬಂದಿತ್ತೆಂದು ಹೇಳುತ್ತಿದ್ದಾರೆ. ಯಾಕೀ ಪರಿಸ್ಥಿತಿ? ಈ ಎರಡೂ ಸರಕಾರಗಳಿಗೆ ಮತ್ತು ಗ್ರಾಮೀಣ ಪಟ್ಟಭದ್ರರಿಗೆ ಇಂತಹ ಬರಗಾಲಗಳು ಬೇಕಾಗಿವೆ. ಗ್ರಾಮೀಣ ಭೂಮಾಲಕರು ಮತ್ತು ಬಡ್ಡಿವ್ಯಾಪಾರಿ ಪಟ್ಟಭದ್ರರಿಗಂತೂ ಈ ಬರಗಾಲಗಳು ಖಂಡಿತಾ ಸುಗ್ಗಿಯಾಗಿವೆ. ಸರಕಾರಗಳಿಗೂ ಬೇಕಾಗಿದೆ. ಅದು ಅವುಗಳ ಜಾಗತೀಕರಣದ ನೀತಿಯ ಭಾಗವಾಗಿದೆ.

ಯೆಡಿಯೂರಪ್ಪನವರು ಮುಖ್ಯಮಂತ್ರಿಗಳಾಗಿದ್ದ ಕಾಲ 2010ರಲ್ಲಿ ರೂಪಿಸಿದ ಸರಕಾರದ ಕರ್ನಾಟಕದ ದೂರದೃಷ್ಟಿ 2020 ಅದನ್ನು ಸ್ಪಷ್ಠಪಡಿಸುತ್ತಿದೆ. ಅದರಂತೆ, 2020ರೊಳಗೆ ಗ್ರಾಮೀಣ ಪ್ರದೇಶದ ಅರ್ಧದಷ್ಟು ದುಡಿಯುವ ಜನತೆಯನ್ನು ವ್ಯವಸಾಯದಿಂದ ಮತ್ತು ಗ್ರಾಮಗಳಿಂದ ಹೊರದಬ್ಬುವುದು ಅದರ ಗುರಿಯಾಗಿದೆ. ಇದಕ್ಕಾಗಿಯೇ ಅಲ್ಲವೇ, ಆತ್ಮಹತ್ಯೆ ಮಾಡಿಕೊಳ್ಳುವ ಮತ್ತು ಸಾಲಬಾಧಿತ ರೈತರ ಜಮೀನುಗಳನ್ನು ಖರೀದಿಸಲು, ಭೂಮಾಲಕರು ಮತ್ತು ವಾರ್ಷಿಕ 25 ಲಕ್ಷ ಆದಾಯ ಉಳ್ಳವರಿಗೆ ಜಮೀನನ್ನು ಹೊಂದಲು ಸಾದ್ಯವಾಗುವಂತೆ ಭೂ ಸುಧಾರಣಾ ಕಾಯ್ದೆ – 1961 ಕ್ಕೆ ಈಚೆಗೆ ರಾಜ್ಯ ಸರಕಾರ, ತಿದ್ದುಪಡಿ ಮಾಡಿದುದು. ಹಾಗೆಂದೂ ಇಂತಹ ಭೀಕರ ಬರಗಾಲದಲ್ಲಿ ಸರಕಾರಗಳು ಸುಮ್ಮನಿದ್ದರೇ, ಜನಗಳು ಸುಮ್ಮನಿರುವರೇ? ಆದ್ದರಿಂದ ಬರಗಾಲ ನಿವಾರಣೆಗೆ ಭಾರೀ ಕಾಳಜಿ ಇದೆಯೆಂದು ತೋರಿಸಿಕೊಂಡು ರಾಜಕೀಯ ಲಾಭ ಮಾಡಿಕೊಳ್ಳಲೇ ಈ ಅಸಮರ್ಪಕ ಅರೆಬರೆ ಬರ-ಪರಿಹಾರದ ಕೆಲಸ.

ಇದೀಗ ಮುಖ್ಯಮಂತ್ರಿಗಳು ಬರ ಪರಿಹಾರದ ಸಮೀಕ್ಷೆಗಾಗಿ ರಾಜ್ಯದ ಪ್ರವಾಸದಲ್ಲಿ ತೊಡಗಿರುವುದು ಮತ್ತು ವಿರೋಧ ಪಕ್ಷವು ಅದರಲ್ಲಿ ತೊಡಗುವ ಮೂಲಕ ರಾಜ್ಯದ ಬರ ಪರಿಸ್ಥಿತಿ ಮರಳಿ ಮುನ್ನೆಲೆಗೆ ಬಂದಿದೆ. ಮುಖ್ಯಮಂತ್ರಿಗಳು ಅಲ್ಲಲ್ಲಿ ಅಧಿಕಾರಿಗಳ ಮೇಲೆ ಹರಿಹಾಯುತ್ತಾ ಕೆಲವರನ್ನು ಅಮಾನತುಗೊಳಿಸುತ್ತಾ ಅಗತ್ಯ ಬರ ಪರಿಹಾರ ನೀಡದಿರುವುದರ ಕುರಿತು ಕೇಂದ್ರ ಸರಕಾರದ ಮೇಲೆ ವಾಗ್ದಾಳಿಯಲ್ಲಿ ತೊಡಗಿದರೇ, ವಿರೋಧ ಪಕ್ಷದ ಯಡೆಯೂರಪ್ಪನವರು ರಾಜ್ಯ ಸರಕಾರದ ವಿಫಲತೆಯ ಕಡೆ ಬೆರಳು ಮಾಡುತ್ತಾ ಇಬ್ಬರೂ ಬರಗಾಲದ ರಾಜಕೀಯ ಲಾಭದೋಚಿಕೊಳ್ಳಲು ಯತ್ನಿಸುತ್ತಿದ್ದಾರೆ. ವಾಸ್ತವದಲ್ಲಿ ಕಾಂಗ್ರೆಸ್ ಮತ್ತು ಬಿಜೆಪಿ ಎರಡೂ ಪಕ್ಷಗಳು ಮತ್ತು ಕೇಂದ್ರ ಹಾಗೂ ರಾಜ್ಯ ಸರಕಾರಗಳು ಬರದಿಂದ ಜನತೆಯನ್ನು ರಕ್ಷಿಸಲು ಗಂಭೀರವಾಗಿಲ್ಲದಿರುವುದು ಸ್ಪಷ್ಠವಿದೆ. ಇವರು ಅನುಸರಿಸುತ್ತಿರುವ ಆರ್ಥಿಕ ನೀತಿಗಳೇ ಈ ದುಸ್ಥಿತಿಯ ಮೂಲವಾಗಿವೆ.

bara karnaraka

ಬರದ ಗಾಂಭೀರ್ಯತೆ ;

ಕರ್ನಾಟಕ ರಾಜ್ಯ 2015-16 ನೇ ವರ್ಷದಲ್ಲಿ ಮುಂಗಾರು ಹಾಗೂ ಹಿಂಗಾರು ಮಳೆಯ ವೈಫಲ್ಯದಿಂದಾಗಿ ತೀವ್ರ ಬರ ಪೀಡಿತ ಪ್ರದೇಶವಾಗಿದೆ. ರಾಜ್ಯದ ಒಟ್ಟು ಸಾಗುವಳಿ ಭೂಪ್ರದೇಶದ ಮುಂಗಾರಿನಲ್ಲಿ ಶೇ65ರಷ್ಟು ಮತ್ತು ಹಿಂಗಾರಿನಲ್ಲಿ ಶೇ 90 ರಷ್ಟು ಭೂ ಪ್ರದೇಶ ಬೆಳೆಯನ್ನು ಕಾಣಲಿಲ್ಲ. ನಗರ ತಾಲೂಕುಗಳನ್ನು ಹೊರತು ಪಡಿಸಿದರೇ ಉಳಿದೆಲ್ಲಾ 137 ತಾಲೂಕುಗಳು ಬರ ಪೀಡಿತವೇ ಆಗಿವೆ. ಈ ಕಾರಣದಿಂದ ಈ ವರ್ಷ ಭಾರೀ ದೊಡ್ಡ ಪ್ರಮಾಣದಲ್ಲಿ ನಗರ ಪ್ರದೇಶಗಳ ಕಡೆ ಗುಳೆಹೊರಟ ಜನತೆಯನ್ನು ಕಾಣುತ್ತಿದ್ದೇವೆ. ಪ್ರತಿ ಎಕರೆಗೆ ರೈತರು ಸರಾಸರಿ 25,000 ರೂಗಳಷ್ಟು ಬೆಳೆ ನಷ್ಠವನ್ನು ಅನುಭವಿಸಿದ್ದಾರೆ. ಆದಾಯವಿಲ್ಲದೇ ರಾಜ್ಯದ ಬಹುತೇಕ ಗ್ರಾಮೀಣ ಕುಟುಂಬಗಳು ಹಲವು ದಶ ಸಾವಿರ ರೂಪಾಯಿಗಳಷ್ಟು ಜೀವನ ವೆಚ್ಚದ ಸಾಲದ ಹೊರೆಯನ್ನು ಹೊತ್ತಿವೆ. ಇಲ್ಲವೇ ಇದ್ದ ಬದ್ದ ಸಣ್ಣ ಪುಟ್ಟ ಆಸ್ತಿಗಳನ್ನು ಇರುವ ಚಿಕ್ಕಪುಟ್ಟ ಬಂಗಾರದೊಡವೆಗಳನ್ನು ಭೂಮಾಲಕ ಬಡ್ಡಿ ಸಾಹುಕಾರರುಗಳಿಗೆ ಮಾರಾಟ ಮಾಡಿಕೊಂಡಿದ್ದಾರೆ.

ಪಶ್ಚಿಮ ಘಟ್ಟಗಳಲ್ಲಿ ಸುರಿಯುವ ಮಳೆಯೇ, ರಾಜ್ಯದ ತುಂಗಭದ್ರ, ಭೀಮಾ, ಕಾವೇರಿ ಮುಂತಾದ ಬಹುತೇಕ ನದಿಗಳಿಗೆ, ಆಣೆಕಟ್ಟುಗಳಿಗೆ ಆಧಾರವಾಗಿದ್ದು ಶೇ 40 ಸಾಗುವಳಿ ಪ್ರದೇಶದ ನೀರಾವರಿ ಜಮೀನುಗಳಿಗೆ ಮತ್ತು ರಾಜ್ಯದ ದೊಡ್ಡ ದೊಡ್ಡ ನಗರ/ ಪಟ್ಟಣಗಳಿಗೆ ನೀರು ಒದಗಿಸುತ್ತಿತ್ತು. ಕಳೆದ ವರ್ಷ ಅಲ್ಲಿಯೂ ಮಳೆ ಕ್ಷೀಣಗೊಂಡುದರಿಂದ ಮಲೆನಾಡು ಮತ್ತು ಕರಾವಳಿ ಪ್ರದೇಶವೂ ಬರಗಾಲಕ್ಕೆ ತುತ್ತಾಗ ಬೇಕಾಯಿತು. ಆಣೆಕಟ್ಟುಗಳಲ್ಲಿ ಸಂಗ್ರಹಿಸಲ್ಪಟ್ಟ ನೀರು ಕೇವಲ ಒಂದು ಬೆಳೆಗೆ ನೀರು ಒದಗಿಸಲಷ್ಠೇ ಸಫಲವಾಯಿತಲ್ಲದೇ ಮತ್ತೊಂದು ಬೆಳೆಗೆ ನೀರು ಒದಗಿಸದೇ ಹೋದುದು ಮತ್ತು ಆಣೆಕಟ್ಟುಗಳು ಮತ್ತು ನದಿಗಳು ಬತ್ತುವಂತಾದುದು ರಾಜ್ಯದ ಬರದ ಬೇಗೆಯನ್ನು ತೀವ್ರಗೊಳಿಸಿತು. ನದಿಗಳ ಮೂಲದಿಂದ ಪಂಪ್‍ಗಳ ಮತ್ತು ಏತ ನೀರಾವರಿ ಮೂಲಕ ನೀರು ಸಾಗಿಸಿಕೊಂಡು ವ್ಯವಸಾಯದಲ್ಲಿ ತೊಡಗಿದ್ದ ಹಲವು ದಶಲಕ್ಷಾಂತರ ಎಕರೆ ಪ್ರದೇಶದ ರೈತರು ಬೆಳೆ ನಷ್ಠವನ್ನು ಅನುಭವಿಸುವಂತಾಯಿತು. ಅದೇ ರೀತಿ, ಇದರಿಂದಾಗಿ ನದಿಗಳ ಇಕ್ಕೆಲಗಳಲ್ಲಿನ ನೂರಾರು ಗ್ರಾಮಗಳಿಗೆ ಕುಡಿಯುವ ನೀರಿನ ತೊಂ ದರೆ ಬಂದಿತು ಮತ್ತು ನಗರ/ಪಟ್ಟಣಗಳ ಜನತೆಗೆ ಕುಡಿಯುವ ನೀರಿನ ಸಮಸ್ಯೆಯನ್ನು ಅದು ಉಲ್ಬಣಗೊಳಿಸಿ 10-12 ದಿನಗಳಿಗೊಮ್ಮೆ ನೀರು ಪಡೆಯುವಂತಹ ದುಸ್ಥಿತಿಯನ್ನು ತಂದಿತು.

ಬಹುತೇಕ ಮಳೆಯಾಧಾರಿತ ಪ್ರದೇಶವು ಮಾತ್ರವಲ್ಲ, ಅಂತರ್‍ಜಲದ ಕೊರತೆಯಿಂದಾಗಿ ಕೊಳವೇ ಬಾವಿ ನೀರಾವರಿ ಪ್ರದೇಶದ ಬೆಳೆಗಳನ್ನು ನಾಶ ಮಾಡಿದೆ. ಇದೆಲ್ಲವೂ ಸಾಲ ಭಾಧಿತ ರೈತರನ್ನು ಹತಾಶೆಗೀಡುಮಾಡಿತಲ್ಲದೇ, ಇದರೊಂದಿಗೆ ಬೆಲೆ ಕುಸಿತವೂ ಸೇರಿ ಈ ಅವಧಿಯಲ್ಲಿ 11 ಸಾವಿರಕ್ಕಿಂತಲೂ ರೈತರು ಆತ್ಮಹತ್ಯೆಯಲ್ಲಿ ತೊಡಗುವಂತಾಯಿತು. ರಾಜ್ಯದ ದಶ ಸಾವಿರಗಟ್ಟಲೆ ಗ್ರಾಮಗಳಲ್ಲಿ ಕುಡಿಯುವ ನೀರಿನ ತತ್ವಾರ ಉಂಟಾಗಿದೆ. ಚಿಕ್ಕಬಳ್ಳಾಪುರ, ಕೋಲಾರ, ಬೆಂಗಳೂರು ಗ್ರಾಮಾಂತರ ಮತ್ತು ತುಮುಕೂರು ಮುಂತಾದ ಜಿಲ್ಲೆಗಳಲ್ಲಿ ಸಾವಿರಾರು ಅಡಿ ಅಳಕ್ಕೆ ಕೊರೆದರೂ ಕುಡಿಯುವ ನೀರು ಸಿಗುತ್ತಿಲ್ಲ. ಈಗಲೂ ಸರಕಾರದ ಹಲವು ಪ್ರಯತ್ನಗಳ ನಡುವೆಯೂ ಫ್ಲೋರೈಡ್ ಮಿಶ್ರಿತ ವಿಷದ ನೀರೇ ಅಲ್ಲಿನ ಜನಗಳಿಗೆ ಆಧಾರವಾಗಿದೆ.

ಮಳೆಯಾಶ್ರಿತ ಪ್ರದೇಶದ ಬರ ಪೀಡಿತ ಜನತೆಗೆ ನೀರಾವರಿ ಪ್ರದೇಶವೂ ಕನಿಷ್ಠ ಒಂದೆರಡು ತಿಂಗಳಾದರೂ ಉದ್ಯೋಗ ಒದಗಿಸುವ ಪ್ರಸಂಗವಿತ್ತು. ಈ ಭಾರೀ ನದಿಗಳು, ಕೆರೆಗಳು ಮತ್ತು ಆಣೆಕಟ್ಟುಗಳು ಬತ್ತಿಹೋದುದು ಇವರಿಗೆ ನೀರಾವರಿ ಪ್ರದೇಶದಲ್ಲಿ ಉದ್ಯೋಗವಿಲ್ಲದಂತಾಯಿತು. ಮಾತ್ರವಲ್ಲಾ, ನೀರಾವರಿ ಪ್ರದೇಶದ ಕೂಲಿಕಾರರು ಮತ್ತು ಕಸುಬುದಾರರು ಮತ್ತಿತರೇ ಬಡವರು ಕೂಡ ಗ್ರಾಮಗಳನ್ನು ತೊರೆದು ಹೋಗುವಂತಾಗಿದೆ. ಕಳೆದ ದಿನಗಳಲ್ಲಿ ಮಳೆಯಾಶ್ರಯದ ಪ್ರದೇಶದಿಂದ ವಲಸೆ ಅಥವಾ ಗುಳೆ ಹೋಗುವ ಒಟ್ಟು ಜನತೆಯಲ್ಲಿ ಶೇ 60 ರಷ್ಟು ಜನತೆ ನೀರಾವರಿ ಪ್ರದೇಶದಲ್ಲಿ ಮತ್ತು ಕೃಷಿಯೇತರ ಕೆಲಸಗಳಲ್ಲಿ ಆಶ್ರಯ ಪಡೆದಿದ್ದರೇ ಈಗ ಶೇ 100ರಷ್ಟು ಜನತೆ ನಗರ/ಪಟ್ಟಣಗಳ ಕಡೆ ನಡೆಯುವಂತಾಗಿದೆ. ಮಾತ್ರವಲ್ಲಾ ನೀರಾವರಿ ಪ್ರದೇಶದಿಂದಲೂ ವಲಸೆ/ ಗುಳೆಯನ್ನು ಹೆಚ್ಚಿಸಿದೆ.

ಜಾನುವಾರುಗಳು, ಪಕ್ಷಿಗಳು ಮತ್ತು ಕಾಡು ಪ್ರಾಣಿಗಳು ಮೇವಿನ ಮತ್ತು ಕುಡಿಯುವ ನೀರಿನ ಸಮಸ್ಯೆಯನ್ನು ಎದುರಿಸುತ್ತಿವೆ.

ಕಳೆದ ವರ್ಷದ ಮಳೆಯ ಅಭಾವ ಮತ್ತು ಮಹಾರಾಷ್ಠ್ರ, ತೆಲಂಗಾಣ ಹಾಗೂ ಆಂದ್ರ ಪ್ರದೇಶಗಳಲ್ಲಿ ಬೀಸುತ್ತಿರುವ ಬಿಸಿಗಾಳಿಯು ರಾಜ್ಯದ ತಾಪಮಾನವನ್ನು ಅಗಾಧವಾಗಿ ಹೆಚ್ಚಿಸಿದೆ. ಇದರಿಂದಾಗಿ ಕಲಬುರಗಿಯ ಯುವ ವಕೀಲರೊಬ್ಬರು ಬಿಸಿಲಿನ ತಾಪಕ್ಕೆ ಬಲಿಯಾದ ವರದಿ ಬಂದಿದೆ.

ಒಟ್ಟಾರೆ, ಇದೆಲ್ಲವೂ ಬರಗಾಲ ಗಂಭಿರವಾಗಿರುವುದನ್ನು ಇದು ಹೇಳುತ್ತಿದೆ. ಕೆಲ ತಜ್ಞರು ಇಂತಹ ಬರದ ಭೀಕರತೆ ಕಳೆದ 73 ವರ್ಷಗಳ ಹಿಂದೆ ಕಂಡು ಬಂದಿತ್ತೆಂದು ಹೇಳುತ್ತಿದ್ದಾರೆ.
ಸರಕಾರಗಳ ಅಸಮರ್ಪಕ ಕ್ರಮಗಳು :

ಗ್ರಾಮೀಣ ಪ್ರದೇಶವೂ ಅಲ್ಲಿನ ದುಡಿಯುವ ಜನತೆಗೆ ಇದರಿಂದಾಗಿ ಭೀಕರವಾಗಿರುವಾಗ, ಕೇಂದ್ರ ಹಾಗೂ ರಾಜ್ಯ ಸರಕಾರಗಳು ಅದನ್ನು ಅಷ್ಠೇನು ಗಂಭಿರವಾಗಿ ಪರಿಗಣಿಸದಿರುವುದನ್ನು ಕಾಣುತ್ತಿದ್ದೇವೆ. ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ಮತ್ತು ಬಿಜೆಪಿಯ ಯಡಿಯೂರಪ್ಪನವರೂ ಏನೆಲ್ಲಾ ತಾವು ಕ್ರಮಕೈಗೊಂಡಿರುವುದಾಗಿ ಕೊಚ್ಚಿಕೊಂಡು ಪರಸ್ಪರರ ಮೇಲೆ ಆರೋಪಿಸಿಕೊಂಡರೂ ಅದು ಕೇವಲ ಬೂಟಾಟಿಕೆ ಎಂಬುದು ಸ್ಪಷ್ಠವಿದೆ. ಗ್ರಾಮೀಣ ದುಡಿಯುವ ಜನತೆ ಬರದಿಂದಾಗಿ ತೀವ್ರ ನಷ್ಟ ಕ್ಕೊಳಗಾಗುತ್ತಿರುವುದು ಇದ್ದ ಬದ್ದ ಆಸ್ತಿಗಳನ್ನೆಲ್ಲ ಮಾರಾಟಮಾಡುತ್ತಿರುವುದು, ಸಾಲಭಾಧಿತರಾಗುತ್ತಿರುವುದು ಮತ್ತು ಗ್ರಾಮೀಣ ಪ್ರದೇಶದಿಂದ ನಗರಗಳೆಡೆ ಗುಳೆ ಹೋಗುತ್ತಿರುವುದು ಸ್ಪಷ್ಟವಾಗಿದ್ದರೂ ಅದನ್ನು ತಡೆಯುವ ಯಾವುದೇ ಗಂಭೀರ ಪ್ರಯತ್ನಗಳನ್ನು ಅವು ಮಾಡುತ್ತಿಲ್ಲ. ರೈತರು ಈ ಅವಧಿಯಲ್ಲಿ ದೊಡ್ಡ ಪ್ರಮಾಣದಲ್ಲಿ ಆತ್ಮಹತ್ಯೆಗಳನ್ನು ಮಾಡಿಕೊಂಡರೂ ಅವುಗಳನ್ನು ನಿಲ್ಲಿಸುವ ಗಂಭೀರ ಹೆಜ್ಜೆಗಳನ್ನು ಇಡಲು ಅವು ನಿರಾಕರಿಸುತ್ತಿವೆ. ಉದ್ಯೋಗ ಖಾತ್ರಿಯಂತಹ ಯೋಜನೆಯನ್ನು ಪರಿಣಾಮಕಾರಿಯಾಗಿ ಬಳಸಿ ಗ್ರಾಮೀಣ ವಲಸೆಯನ್ನು ತಡೆಯಬಹುದಿತ್ತು. ಸರಕಾರಗಳು ಅದನ್ನು ಮಾಡದೇ ಗ್ರಾಮೀಣ ಪಟ್ಟಭದ್ರರೂ ಲೂಟಿ ಮಾಡಲು ಬಿಡುತ್ತಿವೆ. ಇದರಿಂದಾಗಿ ಸಾವಿರಾರು ಕೋಟಿ ಹಣವು ಗ್ರಾಮೀಣ ಪಟ್ಟಭದ್ರರರ ಪಲಾಗಿದೆ. ಮುಖ್ಯಮಂತ್ರಿಗಳು ಕಳೆದ ಒಂದು ವಾರದಿಂದ ರಾಜ್ಯದ ಪ್ರವಾಸದಲ್ಲಿದ್ದಾರೆ ಇಂತಹ ಬರಗಾಲದಲ್ಲಿ ಎಲ್ಲಿಯಾದರೂ ಸಾವಿರಾರು ಸಂಖ್ಯೆಯಲ್ಲಿ ಜನತೆ ಉದ್ಯೋಗ ಖಾತ್ರಿಯಲ್ಲಿ ತೊಡಗಿದುದುನ್ನು ಕಂಡರೇ? ಯಾಕೆ ಕಾಣಲಿಲ್ಲ.

ಅದೇ ರೀತಿ, ಬರಗಾಲದಿಂದ ಮುಕ್ತಿಯನ್ನು ಪಡೆಯಲು ಮಹದಾಯಿ ನೀರಿಗಾಗಿ ಉತ್ತರ ಕರ್ನಾಟಕದಲ್ಲಿ ನೂರಾರು ದಿನಗಳೀಂದ ನಡೆದಿರುವ ಮತ್ತು ಮದ್ಯ ಹಾಗೂ ದಕ್ಷಿಣ ಕರ್ನಾಟಕದ ಪಶ್ಚಿಮ ಘಟ್ಟಗಳ ನೀರಿಗಾಗಿ ನಡೆದಿರುವ ಹಲವು ವರ್ಷಗಳಿಂದ ನಡೆದಿರುವ ಹೋರಾಟಗಳನ್ನು ಯಾಕೆ ಪರಿಗಣಿಸುತ್ತಿಲ್ಲ?

ಈ ಅವಧಿಯಲ್ಲಿ ಬೆಳೆ ನಷ್ಠ ಮತ್ತು ಜೀವನ ವೆಚ್ಚದಿಂದ ಲಕ್ಷಾಂತರ ರೂಪಾಯಿಗಳ ಸಾಲದ ಹೊರೆಯನ್ನು ರೈತರು ಹೊತ್ತಿದ್ದರೂ, ಅದನ್ನು ಕಡಿಮೆ ಮಾಡಲು ಮುಖ್ಯವಾಗಿ ಬಡ ಹಾಗೂ ಮದ್ಯಮ ರೈತರ ಎಲ್ಲ ರೀತಿಯ ಖಾಸಗೀ ಹಾಗೂ ಸಾರ್ವಜನಿಕ ಹಾಗೂ ಸಹಕಾರಿ ಬ್ಯಾಂಕ್ ಸಾಲಗಳನ್ನು ಮನ್ನಾ ಮಾಡಲು ಅಗತ್ಯ ಕ್ರಮವಹಿಸಲು ಕೇಂದ್ರ ಹಾಗೂ ರಾಜ್ಯ ಸರಕಾರಗಳು ಸರಕಾರಗಳು ಸ್ಪಷ್ಠವಾಗಿ ನಿರಾಕರಿಸುತ್ತಿವೆ. ಹಾಗೂ ಅವುಗಳು ನೀಡಲಾಗುತ್ತದೆಂದು ಹೇಳುತ್ತಿರುವ  ಬೆಳೆ ನಷ್ಠಪರಿಹಾರವು ಕೇವಲ ಮಳೆಯಾಧಾರಿತ ಪ್ರದೇಶಕ್ಕೆ ಸೀಮಿತವಾಗಿದೆ ಮತ್ತು ಅದು ಆ ಪ್ರದೇಶದ ರೈತರ ಮತ್ತು ಕೂಲಿಕಾರರ ಕೂಲಿ ನಷ್ಠದ ಪರಿಹಾರವನ್ನು ಅದು ಘೋಷಿಸಿಲ್ಲ ಮತ್ತು ನೀಡುತ್ತಿರುವ ಪರಿಹಾರವೂ ಭಾರೀ ತಮಾಯದಾಗಿದೆ. ಅದಕ್ಕೆ ಯಾವುದೇ ಮಾನದಂಡಗಳಿಲ್ಲ. ಕೆಲವೆಡೆ ಎಕರೆಗೆ 1000ರೂಗಳಿಗಿಂತಲೂ ಕಡಿಮೆ ನೀಡಿದರೇ ಇನ್ನೂ ಕೆಲವೆಡೆ 1900 ರೂ ಮತ್ತೆ ಕೆಲವರಿಗೆ 3,000 ರೂ ನೀಡಿದೆ. ಕೆಲವರಿಗೆ 100 ರೂಗಿಂತಲೂ ಕಡಿಮೆ ನೀಡಿದ ಪ್ರಕರಣಗಳು ವರದಿಯಾಗಿವೆ. ಅದೇ ರೀತಿ ಹಲವು ಲಕ್ಷ ಮಳೆಯಾಶ್ರಯದ ರೈತಕುಟುಂಬಗಳಿಗೆ ಅದು ಇನ್ನೂ ಕೂಡಾ ತಲುಪಿಲ್ಲ. ಇನ್ನು ನೀರಾವರಿ ನಂಬಿ ನಷ್ಠ ಹೊಂದಿದ ನದಿ ನೀರನ್ನು ಬಳಸಿ ವ್ಯವಸಾಯದಲ್ಲಿ ತೊಡಗಿದ, ಎರಡನೆ ಬೆಳೆಗೆ ನೀರು ದೊರಯದೇ ನಷ್ಠವಾದ ಮತ್ತು ಪಂಪ್‍ಸೆಟ್ ಮೂಲಕ ನೀರಾವರಿ ಮಾಡಿಕೊಂಡು ನಷ್ಟ ಹೊಂದಿದ ದಶಲಕ್ಷಾಂತರ ರೈತರಿಗೆ ಪರಿಹಾರವೆ ಇಲ್ಲಾ!

ಕುಡಿಯುವ ನೀರಿಗಾಗಿ ಎಲ್ಲಾ ಕ್ರಮವಹಿಸಲಾಗಿದೆಯೆಂದು ಕೋಟ್ಯಾಂತರ ಹಣ ಬಿಡುಗಡೆ ಮಾಡಲಾಗಿದೆಯೆಂದು, ಹಣದ ಕೊರತೆ ಇಲ್ಲವೆಂದು ಸರಕಾರ ಹೇಳುತ್ತಿದ್ದರೂ, ಈಗಲೂ ರಾಜ್ಯದ ಜನತೆ ಗಂಭಿರ ಸಮಸ್ಯೆಯನ್ನು ಎದುರಿಸುತ್ತಿದ್ದಾರೆ. ಹುಬ್ಬಳ್ಳಿ ತಾಲೂಕಿನ ಬಂಡಿಹಳ್ಳಿಯಲ್ಲಿ ಇಂತಹ ಭಾರೀ ತಾಪಮಾನದಲ್ಲಿ ತಲಾ ರೇಷನ್ ಕಾರ್ಢಗೆ ಎರಡು ಕೊಡ ನೀರು ನೀಡಲಾಗುವುದೆಂದು ಹೇಳಲಾಗಿದೆ. ನಗರಗಳ ಜನತೆ ನೀರಿಗಾಗಿ ಕೆಲಸವನ್ನು ಬಿಟ್ಟು ಅಲೆಯಬೇಕಾದ ಪರಿಸ್ಥಿತಿ ಮುಂದುವರೆದಿದೆ. ಭೀಮಾ ನದಿ ಇಕ್ಕೆಲಗಳ ನೂರಾರು ಗ್ರಾಮಗಳಿಗೆ ನದಿಗಳು ಬತ್ತಿಹೋಗಿರುವುದರಿಂದ ಟ್ಯಾಂಕ್‍ಗಳ ಮೂಲಕ ನೀರು ಸರಬರಾಜು ಮಾಡಲಾಗುತ್ತಿಲ್ಲವೆಂದು ಮಹಾರಾಷ್ಠ್ರ ಸರಕಾರಕ್ಕೆ ಸದರಿ ನದಿಗೆ ಅಲ್ಲಿನ ಆಣೆಕಟ್ಟೆಗಳಿಂದ ನೀರು ಬಿಡುವಂತೆ ಸರಕಾರ ಮನವಿ ಮಾಡಿದೆ. ಇಂತಹದ್ದೇ ಪರಿಸ್ಥಿತಿ ಇತರೇ ನದಿಗಳ ದಂಡೆಗಳ ಮೇಲಿನ ಗ್ರಾಮಗಳದ್ದು ಆಗಿದೆ.

ಯಾಕೀ ಪರಿಸ್ಥಿತಿ?

ಯಾಕೆಂದರೇ ಎರಡೂ ಸರಕಾರಗಳಿಗೆ ಮತ್ತು ಗ್ರಾಮೀಣ ಪಟ್ಟಭದ್ರರಿಗೆ ಇಂತಹ ಬರಗಾಲಗಳು ಬೇಕಾಗಿವೆ. ಗ್ರಾಮೀಣ ಭೂಮಾಲಕರು ಮತ್ತು ಬಡ್ಡಿವ್ಯಾಪಾರಿ ಪಟ್ಟಭದ್ರರಿಗಂತೂ ಈ ಬರಗಾಲಗಳು ಖಂಡಿತಾ ಸುಗ್ಗಿಯಾಗಿವೆ. ಆದ್ದರಿಂದ ಅವುಗಳು ಇರಬೇಕೆಂಬುದೇ ಅವರ ಅಭಿಲಾಷೆಯಾಗಿದೆ. ಸರಕಾರಗಳಿಗೂ ಬೇಕಾಗಿದೆ. ಅದು ಅವುಗಳ ಜಾಗತೀಕರಣದ ನೀತಿಯ ಭಾಗವಾಗಿದೆ. ರೈತರೂ ಭೂಮಿಗಳನ್ನು ತೊರೆಯುವುದು ಮತ್ತು ಬೀದಿಪಾಲಾದ ರೈತ ಕುಟುಂಬಗಳು ಮತ್ತು ಕೂಲಿಕಾರರು, ಕಸುಬುದಾರರು ಗ್ರಾಮಗಳನ್ನು ತೊರೆಯುವಂತೆ ಮಾಡುವುದು ಈ ಎರಡು ಸರಕಾರಗಳ ಯೋಜನೆಯಾಗಿದೆ.  ವ್ಯವಸಾಯವನ್ನು ರೈತರು ಮತ್ತು ಕಸುಬುದಾರರು ಹಾಗೂ ಕೃಷಿಕೂಲಿಕಾರರಿಂದ ಕಸಿದು ಅದನ್ನು ಬಹುರಾಷ್ಠ್ರೀಯ ಸಂಸ್ಥೆಗಳ ಹೆಗಲಿಗೆ ಹಾಕುವ ಹುನ್ನಾರದ ಭಾಗವಾಗಿದೆ.

ಯೆಡಿಯೂರಪ್ಪನವರು ಮುಖ್ಯಮಂತ್ರಿಗಳಾಗಿದ್ದ ಕಾಲ 2010ರಲ್ಲಿ ರೂಪಿಸಿದ ಸರಕಾರದ ಕರ್ನಾಟಕದ ದೂರದೃಷ್ಟಿ 2020 ಅದನ್ನು ಸ್ಪಷ್ಠಪಡಿಸುತ್ತಿದೆ. ಅದರಂತೆ, 2020ರೊಳಗೆ ಗ್ರಾಮೀಣ ಪ್ರದೇಶದ ಅರ್ಧದಷ್ಟು ದುಡಿಯುವ ಜನತೆಯನ್ನು ವ್ಯವಸಾಯದಿಂದ ಮತ್ತು ಗ್ರಾಮಗಳಿಂದ ಹೊರದಬ್ಬುವುದು ಅದರ ಗುರಿಯಾಗಿದೆ. ಇದಕ್ಕಾಗಿಯೇ ಅಲ್ಲವೇ, ಆತ್ಮಹತ್ಯೆ ಮಾಡಿಕೊಳ್ಳುವ ಮತ್ತು ಸಾಲಬಾಧಿತ ರೈತರ ಜಮೀನುಗಳನ್ನು ಖರೀದಿಸಲು, ಭೂಮಾಲಕರು ಮತ್ತು ವಾರ್ಷಿಕ 25ಲಕ್ಷ ಆದಾಯ ಉಳ್ಳವರಿಗೆ ಜಮೀನನ್ನು ಹೊಂದಲು ಸಾದ್ಯವಾಗುವಂತೆ ಭೂ ಸುಧಾರಣಾ ಕಾಯ್ದೆ – 1961 ಕ್ಕೆ ಈಚೆಗೆ ರಾಜ್ಯ ಸರಕಾರ, ತಿದ್ದುಪಡಿ ಮಾಡಿದುದು. ಅದೂ ರಾಜ್ಯ ಭೀಕರ ಬರಗಾಲದಲ್ಲಿ ಮತ್ತು ರೈತರು ದೊಡ್ಡ ಪ್ರಮಾಣದಲ್ಲಿ ಆತ್ಮಹತ್ಯೆಯಲ್ಲಿ ತೊಡಗಿದ್ದಾಗ ಅವುಗಳ ಕಡೆ ಗಮನ ಹರಿಸದೇ ತರಾತುರಿಯಲ್ಲಿ ತಿದ್ದುಪಡಿ ತಂದಿದ್ದು

ಹೀಗಾಗಿ, ಬರಗಾಲವೆಂದರೇ ಕೇವಲ ಭೂಮಾಲಕ ಪಟ್ಟಭದ್ರರಿಗೆ ಮಾತ್ರವೇ ಇಷ್ಟವಲ್ಲ, ಅದು ಕೇಂದ್ರ ಹಾಗೂ ರಾಜ್ಯ ಸರಕಾರಗಳಿಗೂ ಇಷ್ಠವಾಗಿದೆ. ಹಾಗೆಂದೂ ಇಂತಹ ಭೀಕರ ಬರಗಾಲದಲ್ಲಿ ಸರಕಾರಗಳು ಸುಮ್ಮನಿದ್ದರೇ, ಜನಗಳು ಸುಮ್ಮನಿರುವರೇ? ಆದ್ದರಿಂದ ಬರಗಾಲ ನಿವಾರಣೆಗೆ ಭಾರೀ ಕಾಳಜಿ ಇದೆಯೆಂದು ತೋರಿಸಿಕೊಂಡು ರಾಜಕೀಯ ಲಾಭ ಮಾಡಿಕೊಳ್ಳಲೇ ಈ ಅಸಮರ್ಪಕ ಅರೆಬರೆ ಕೆಲಸ

ಚಳುವಳಿಯೊಂದೇ ದಾರಿ

ಕೇಂದ್ರ ಹಾಗೂ ರಾಜ್ಯ ಸರಕಾರಗಳು ಬರಗಾಲವನ್ನು ಶಾಶ್ವತವಾಗಿ ನಿವಾರಿಸಲು ದುರುದ್ದೇಶದಿಂದಲೇ ಕ್ರಮವಹಿಸದಿರುವಾಗ ಗ್ರಾಮೀಣ ಪ್ರದೇಶದ ದುಡಿಯುವ ಜನತೆಗೆ ಚಳುವಳಿಯನ್ನು ಇನ್ನಷ್ಠು ತೀವ್ರಗೊಳಿಸುವುದೊಂದೇ ಮಾರ್ಗವಾಗಿದೆ. ಇದಕ್ಕಾಗಿ ಐಕ್ಯ ಹಾಗೂ ಸುಸಂಘಟಿತ ಚಳುವಳಿಯ ಅಗತ್ಯವಿದೆ. ಬರ ಪರಿಹಾರಕ್ಕೆ ಕೈಗೊಳ್ಳ ಬೇಕಾದ ಕ್ರಮಗಳಿವೆ. ಇವುಗಳಿಗಾಗಿ ಹೋರಾಡಬೇಕಷ್ಠೇ!

  1. ಬರ ಪೀಡಿತ ಎಲ್ಲಾ ಪ್ರದೇಶದ ರೈತರು ಹಾಗೂ ಕಸಬುದಾರರು ಮತ್ತು ಕೂಲಿಕಾರರ ಪ್ರತಿ ಕುಟುಂಬಕ್ಕೆ  ತಲಾ 25 ಕೇಜಿ ಉಚಿತವಾಗಿ ಅಕ್ಕಿಯನ್ನು ಒದಗಿಸಬೇಕು. ಈ ಪ್ರದೇಶದ ಎಲ್ಲಾ ಶಾಲೆಗಳಲ್ಲೂ ರಾತ್ರಿ ಊಟವನ್ನು ಆರಂಭಿಸಬೇಕು.
  2. ಪ್ರತಿ ಕುಟುಂಬಕ್ಕೆ ನಿಜವಾದ ಅರ್ಥದಲ್ಲಿ ಪ್ರತಿದಿನ ಕನಿಷ್ಠ 500 ರೂಗಳ ಕೂಲಿಯಂತೆ 200 ದಿನಗಳ ಉದ್ಯೋಗ ಖಾತ್ರಿ ಕೆಲಸವನ್ನು ಒದಗಿಸಬೇಕು. ಅಲ್ಲಿನ ಭ್ರಷ್ಠಾಚಾರವನ್ನು ನಿಗ್ರಹಿಸಲು ಕಠಿಣ ಕ್ರಮಗಳನ್ನು ಅನುಸರಿಸಬೇಕು.
  3. ಪ್ರತಿ ಗ್ರಾಮದಲ್ಲಿ ಅಗತ್ಯ ಕುಡಿಯುವ ನೀರನ್ನು ಒದಗಿಸಲು ಕ್ರಮವಹಿಸಬೇಕು. ಫ್ಲೋರೈಡ್ ವಿಷದಿಂದ ಮುಕ್ತ ಗೊಳಿಸಬೇಕು. ಪ್ರತಿ ಗ್ರಾಮ ಪಂಚಾಯತಿಯಲ್ಲಿ ಮೇವಿನ ಬ್ಯಾಂಕ್ ತೆರೆಯಬೇಕು
  4.  ಬೆಳೆ ನಷ್ಠ ಪರಿಹಾರವನ್ನು ತಲಾ ಎಕರೆಗೆ ಕನಿಷ್ಟ 25 ಸಾವಿರ ರೂ. ನೀಡಬೇಕು. ಇದನ್ನು ನೀರಾವರಿ ಪ್ರದೇಶದಲ್ಲಾದ ನಷ್ಠಕ್ಕೂ ಅನ್ವಯಿಸಬೇಕು.
  5. ರೈತರ ಎಲ್ಲಾ ರೀತಿಯ ಸಾಲ ಮನ್ನಾಮಾಡಲು, ಕೇರಳದ ಈ ಹಿಂದಿನ ಎಡ ಮತ್ತು ಪ್ರಜಾಸತ್ತಾತ್ಮಕ ರಂಗದ ಸರಕಾರ ಜಾರಿಗೆ ತಂದ ಋಣಮುಕ್ತ ಕಾಯ್ದೆಯನ್ನು ಕರ್ನಾಟಕದಲ್ಲೂ ಜಾರಿಗೆ ತರಬೇಕು. ಎಲ್ಲ ರೈತರು, ಕೂಲಿಕಾರರು ಮತ್ತು ಕಸಬುದಾರರಿಗೂ ಅಗತ್ಯದಷ್ಟು ಹೊಸ ಸಾಲವನ್ನು ನೀಡಲು ಕ್ರಮವಹಿಸಬೇಕು.
  6. ಬರಗಾಲದಿಂದ ಶಾಶ್ವತವಾಗಿ ಮುಕ್ತಿ ಹೊಂದಲೂ ಶಾಶ್ವತನೀರಾವರಿ ಯೋಜನೆಗಳಿಗೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳಬೇಕು.
  7. ಬೆಳೆ ವಿಮೆಯು ಸಮಯ ಬಧ್ಧವಾಗಿ ಸಿಗುವಂತೆ ಮತ್ತು ಒಟ್ಟು ಬೆಳೆಯ ನಷ್ಠವನ್ನು ತುಂಬಿಕೊಡುವಂತೆ ಸರಿಪಡಿಸಿ, ಪ್ರತಿಯೊಬ್ಬ ರೈತನಿಗೂ ಅದು ದೊರೆಯುವಂತೆ ಬೆಳೆ ವಿಮೆ ಯೋಜನೆಯನ್ನು ಜಾರಿಗೆ ತರಬೇಕು
  8. ಈ ಪ್ರದೇಶದ ವಿದ್ಯಾರ್ಥಿಗಳಿಗೆ ಎಲ್ಲಾ ಹಂತದ ಶಾಲಾ ಕಾಲೇಜುಗಳಲ್ಲೂ ಉಚಿತವಾದ ಪ್ರವೇಶ ನೀಡಬೇಕು.

ಯು. ಬಸವರಾಜು

ರೇಗಾ ಮತ್ತು ಬರ

ಸಂಪುಟ: 10 ಸಂಚಿಕೆ: 20 May 8, 2016

ಈ ವರ್ಷ ಬರಗಾಲವು ಇನ್ನಷ್ಟು ಭೀಕರವಾಗಿರುವುದರಿಂದ ನಮ್ಮ ಕೆಲಸ ವ್ಯಾಪ್ತಿಯನ್ನು ವಿಸ್ತರಿಸಿಕೊಂಡಿರುವೆವು. ನೀರಿನ ಅಂತರ್ಜಲಮಟ್ಟ ಕುಸಿದಿರುವುದರಿಂದ ನಾವು ದುಡಿವ ಜನರ ಕೈಗೆ ಕೆಲಸ, ಮಾಡಿದ ಕೆಲಸಕ್ಕೆ ಕೂಲಿ ಮತ್ತು ನೀರಿನ ಅಂತರ್ಜಲ ಮಟ್ಟ ಹೆಚ್ಚಿಸುವುದು. ಹೀಗೆ ಮುಖ್ಯ ಗುರಿಯನ್ನಿಟ್ಟುಕೊಂಡು ಕೆಲಸ ಮಾಡಲು ನಿರ್ಣಯಿಸಿದೆವು. ಕೆರೆಗಳು ಎಲ್ಲೆಲ್ಲಿ ಇವೆಯೋ ಅಲ್ಲೆಲ್ಲ ಹಳ್ಳಿಗಳ ಜನರತ್ತ ನಮ್ಮ ನಡಿಗೆ ಎಂದು ನಿರ್ಧರಿಸಿ ಕಳೆದ ಒಂದುವರೆ ತಿಂಗಳಿಂದ ಕೆರೆ ಕೇಂದ್ರೀಕರಿಸಿ ಕೆಲಸ ಆರಂಭಿಸಿದ್ದೇವೆ. ಇದರ ಪ್ರತಿ ಫಲವಾಗಿ ಮಾರ್ಚ್ 26ರಂದು ಆಳಂದ ತಾಲ್ಲೂಕಿನ ನರೋಣ ಕ್ಷೇತ್ರ ಪಾಳ್ಯದಲ್ಲಿ ಸುಮಾರು ಮೂರುವರೆ ಸಾವಿರಕ್ಕೂ ಅಧಿಕ  ಮಹಿಳೆಯರು ಅಂತರರಾಷ್ಟ್ರೀಯ ದಿನವನ್ನು ‘ಕೆಲಸದ ಹಕ್ಕಿಗಾಗಿ ಮತ್ತು ನೀರು ಸಂರಕ್ಷಣೆ’ ಗಾಗಿ ಆಚರಿಸಿದರು. ಈಗ ನಮ್ಮ ಸಂಘಟನೆಯ ಶ್ರಮದ ಭಾಗವಾಗಿ ಎಂಟು ಕೆರೆಗಳಲ್ಲಿ ಕಾಮಗಾರಿ ಆರಂಭವಾಗಿದೆ. ಸರಿ ಸುಮಾರು ನಾಲ್ಕು ಸಾವಿರಕ್ಕೂ ಅಧಿಕ ಕಾರ್ಮಿಕರು ಕೆಲಸದಲ್ಲಿ ತೊಡಗಿದ್ದಾರೆ.

ಹೌದು. ನಾವು ಹೀಗೆ ಕೆಲಸ ಮಾಡಲು ಮನಸು ಮಾಡಿದೆವು. ದಿನಗಳೆದಂತೆ ಎಲ್ಲವನ್ನೂ ಆಪೋಷನಗೈಯುವಂತೆ ರಾಚುವ ಬೆಂಕಿ ಬಿಸಿಲು. ನಗರಗಳಲ್ಲಿ ಬಿಕೋ ಎನ್ನುವ ರಸ್ತೆಗಳು. ಹಳ್ಳಿಗಳಲ್ಲಿ ಹರಕು ರಸ್ತೆಗಳು ಬಿಕೋ ಅಂದರೂ ಪ್ರತಿ ಮನೆ ಗುಡಿಸಲುಗಳಲ್ಲಿ ಸಂಕಟದ ಮೌನ. ಊಟಕ್ಕೆ ಒದಗಿ ಬರುವ ದವಸ ಧಾನ್ಯಗಳು ದಿನಸಿಗಳು ಖಾಲಿಯಾಗುತ್ತಿದ್ದು, ಮುಂದೇನು? ಎನ್ನುವಂಥ ಆಳದ ಚಿಂತೆ, ಒಳ-ಒಳಗೆ ಬಿಕ್ಕುವ ಮನಸು ಕ್ರಮೇಣ ಹತಾಶೆಯ ಪಾಶದಲ್ಲಿ ಸಿಲುಕಿಕೊಂಡು ಒದ್ದಾಡುತ್ತಿತ್ತು.. ಏನು ಮಾಡುವುದು? ಯಾವ ರಸ್ತೆಗೆ ಹೊಲಗದ್ದೆ ಪಕ್ಕದಿಂದ ಹಾದರೂ ಎರಡೆರಡು ಕೊಡಹೊತ್ತ ಹೆಂಗಸರು ಮಕ್ಕಳು ಉಸ್ಸೆನ್ನುತ್ತ ಹಾದಿ ಸವೆಸುತ್ತಿರುವರು. ಕೈಯ್ಯಲ್ಲಿ ಕೆಲಸವಿಲ್ಲ. ಹಿಂದೆಲ್ಲ ಮಾಡಿದ ಕೆಲಸಕ್ಕೆ ಕೂಲಿ ಕೊಡದ ಉದ್ಯೋಗ ಖಾತ್ರಿಯ ಮೇಲೆ ವಿಶ್ವಾಸವೇ ಇಲ್ಲದಂತಹ ಪರಿಸ್ಥಿತಿ.

ಎಷ್ಟೊ ಹಳ್ಳಿಗಳಲ್ಲಿ ಸಾವಿರಾರು ಉದ್ಯೋಗ ಚೀಟಿಗಳು ಗೆದ್ದವರ ಇದ್ದವರ ಕೈ ಸೇರಿ ವರ್ಷಗಳೇ ಆಗಿವೆ. ‘ನಮ್ಮ ರೊಕ್ಕ ನಿಮ್ಮ ಅಕೌಂಟಿಗೆ ಬರ್ತದೆ. ಐದು ನೂರು ಇಟ್ಕೊಂಡು ಉಳಿದಿದ್ದು ವಾಪಸ್ ಕೊಡ್ರಿ…’ ಎಂದು ಮುಗ್ಧ ಜನರನ್ನು ಯಾಮಾರಿಸಿ ಅವರ ಕೈಯಿಂದಲೇ ಅವರದೇ ಹೆಸರಿನ ಹಣವನ್ನು ನುಂಗಿ ನೀರು ಕುಡಿದವರು ಕಟ್ಟೆಯ ಮೇಲೆ ಇಸ್ಪೇಟಾಡುತ್ತ ಕುಳಿತಿರುವರು. ರೇಗಾದಡಿಯಲ್ಲಿ ಜನರ ಅಕೌಂಟಿಗೆ ಎನ್ ಎಂ ಆರ್ ತೆಗೆದು ಕೆಲಸ ಮಾಡಿರುವರೆಂದು ಸುಳ್ಳು ಬಿಲ್ಲು ಮಾಡಿಸಿ ಅವರ ಅಕೌಂಟಿಗೆ ಬಂದ ಹಣವನ್ನು ಸುಳ್ಳು ಹೇಳಿಯೇ ಲೂಟಿ ಮಾಡಿರುವರು.ಇದು ಹಗಲು ದರೋಡೆ. ತನ್ಮೂಲಕ ಜನರನ್ನು ಕರಪ್ಟ್ ಮಾಡಿರುವರು. ಈಗಲೂ ಸಾಮಾನ್ಯ ಜನರಿಗೆ ಕೆಲಸ ಸಿಗದಂತೆ ಮಾಡಿ ಉದ್ಯೋಗ ಚೀಟಿಯನ್ನು ತಮ್ಮಲ್ಲಿಯೇ ಇಟ್ಟುಕೊಂಡವರು ಸಾವಿರಗಟ್ಟಲೆ ಜನರು ಪ್ರತಿ ತಾಲ್ಲೂಕಿನಲ್ಲಿ ಸಿಗುವರು. ಬರಗಾಲದ ಹೊತ್ತಿನಲ್ಲಿಯೂ ಕರುಣೆಯಿಲ್ಲದ ಈ ಕಟುಕರು ಶ್ರಮಿಕರ ಸಂಕಟ ಕಂಡು ಅಟ್ಟಹಾಸ ಮಾಡುತ್ತಿರುವಂತೆ ಭಾಸವಾಗುವುದು.

ಇನ್ನು ಸರಕಾರದ ಸಿಬ್ಬಂದಿಗಳಿಗೆ ಈ 45-47 ಡಿಗ್ರಿ ಬಿಸಿಲಿನಲ್ಲಿ ಹಳ್ಳಿ ಸುತ್ತಾಡಿ ಜನರ ಕೈಗೆ ಕೆಲಸ ಕೊಡುವುದು ಬೇಕಿಲ್ಲ. ಸರಿ ಏನು ಮಾಡುವುದು? ಈ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿ ಕಾಯ್ದೆಯು ಆರಂಭವಾದ ವರ್ಷ 2005-6ರ ಹೊತ್ತಿನಲ್ಲಿ ಬೀದರ ಜಿಲ್ಲೆಯಲ್ಲಿ ಹೀಗೆ ಹುಚ್ಚು ಹಿಡಿದವರಂತೆ ಹಳ್ಳಿಗಳನ್ನು ಸುತ್ತಾಡಿ ಕೆಲಸ ಮಾಡಿದ್ದೆವು. ನಿರಂತರ ಹೋರಾಟ, ಸಮಾವೇಶ, ಜಾಗೃತಿ ಜಾತಾ, ಅನೇಕ ಘೇರಾವ್, ಪಂಚಾಯತ್ ಕಚೇರಿಗಳಿಗೆ ಕೀಲಿ ಜಡಿಯುವಂತಹ ಸಂಘರ್ಷಗಳ ಜೊತೆಗೆ ಸಾವಿರಾರು ಕೂಲಿ ಕಾರ್ಮಿಕರು, ಬಡರೈತರು ಉದ್ಯೋಗ ಖಾತ್ರಿಯ ನೆರವಿನೊಂದಿಗೆ ಕೊಂಚ ನೆಮ್ಮದಿಯ ಬದುಕು ಕಂಡಿದ್ದು ನನಗೀಗಲು ನೆನಪಾಗುವುದು. ಬರೆದರೆ ದೊಡ್ಡ ಗ್ರಂಥವೇ ಆಗುವಂತಹ ಹೋರಾಟದ ಗಾಥೆಯದು. ಸತತ ಮೂರು ವರ್ಷ ಬೆನ್ನು ಹತ್ತಿದ್ದಾಯ್ತು…

regha

ಅರಳಿ ನಿಂತ ಆಜಾದಪುರ ಕೆರೆ

ಕಳೆದ ವರ್ಷವೂ ಬರವಿತ್ತು. ಆದರೆ ನಾವಾಗ ಮೈಕ್ರೊ ಸಿಸ್ಟಮ್ ಕೆಲಸ ಮಾಡುವ ಪ್ರಯೋಗಕ್ಕೆ ಒಡ್ಡಿಕೊಳ್ಳಲು ತೀರ್ಮಾನ ಮಾಡಿದ್ದೇವು. ಹೀಗಾಗಿ ಕಲಬುರಗಿ ನಗರದ ಹತ್ತಿರವಿರುವ ಕುಸನೂರು ಗ್ರಾಮಪಂಚಾಯತಿಯ ಆಜಾದಪುರ ಗ್ರಾಮದ ಕೆರೆಯಲ್ಲಿ ಸುಮಾರು ಮುನ್ನೂರರಷ್ಟು ಕೃಷಿ ಕೂಲಿ ಕಾರ್ಮಿಕರು ಮತ್ತು ಬಡರೈತರಿಗೆ ರೇಗಾ ಅಡಿಯಲ್ಲಿ ಸತತ ನೂರು ದಿನ ಕೆಲಸ ಕೊಡಿಸಲು ಸಾಧ್ಯವಾಗಿತ್ತು. ಅಂತೆಯೇ ಪುಟ್ಟ ಕೆರೆಯೊಂದು ಇಂದು ಅರಳಿ ನಿಂತಿದೆ. ಕೆರೆ ಪೂರ್ತಿ ಕಟ್ಟಬೇಕೆಂದು ಅನೇಕ ಬಾರಿ ಹೋರಾಟವೂ ನಡೆಸಿದೆವು.

ಆದರೆ ಈ ವರ್ಷ ಬರಗಾಲವು ಇನ್ನಷ್ಟು ಭೀಕರವಾಗಿರುವುದರಿಂದ ನಮ್ಮ ಕೆಲಸ ವ್ಯಾಪ್ತಿಯನ್ನು ವಿಸ್ತರಿಸಿಕೊಂಡಿರುವೆವು. ನೀರಿನ ಅಂತರ್ಜಲಮಟ್ಟ ಕುಸಿದಿರುವುದರಿಂದ ನಾವು ದುಡಿವ ಜನರ ಕೈಗೆ ಕೆಲಸ, ಮಾಡಿದ ಕೆಲಸಕ್ಕೆ ಕೂಲಿ ಮತ್ತು ನೀರಿನ ಅಂತರ್ಜಲ ಮಟ್ಟ ಹೆಚ್ಚಿಸುವುದು. ಹೀಗೆ ಮುಖ್ಯ ಗುರಿಯನ್ನಿಟ್ಟುಕೊಂಡು ಕೆಲಸ ಮಾಡಲು ನಿರ್ಣಯಿಸಿದೆವು. ನೀರಿಲ್ಲವೆಂದರೆ ನಾಳೆಯಿಲ್ಲ. ನಿಜಾಮ ಆಳ್ವಿಕೆಯ ಪ್ರದೇಶದಲ್ಲಿ ಕೆರೆ ಮತ್ತು ಬಾವಿಗಳು ಹೇರಳವಾಗಿವೆ. ಇದಕ್ಕಾಗಿ ನಿಜಾಮನಿಗೆ ಧನ್ಯವಾದ ಹೇಳಲೇಬೇಕು. 1972 ರ ಹೊತ್ತಿಗೆ ಬಿದ್ದ ಭೀಕರ ಬರದ ಹೊತ್ತಿನಲ್ಲಿ ಪ್ರತಿ ಹಳ್ಳಿಯಲ್ಲಿ ಕೆರೆ ಹೂಳೆತ್ತುವ ಕಾಮಗಾರಿ ಕೈಗೆತ್ತಿಕೊಂಡು ಜನರ ಕೈಗೆ ಕೆಲಸ ಕೊಡಲಾಗಿತ್ತು. ಅಂದಿಗೆ ಹೂಳೆತ್ತಲ್ಪಟ್ಟ ಕೆರೆಗಳು ಹೂಳು ತುಂಬಿಕೊಂಡು ನೆಲಸಮವಾಗಿವೆ. ರೇಗಾ ಅಡಿಯಲ್ಲಿ ಅವುಗಳ ಹೂಳು ತೆಗೆಸಬೇಕಿತ್ತು. ಸರಕಾರವಾಗಲಿ ಸರಕಾರಿ ಯಂತ್ರವಾಗಲಿ ಇದಕ್ಕೆ ಮನಸು ಮಾಡಲೇಯಿಲ್ಲ. ಈ ಕಾರಣದಿಂದಲೂ ನೀರಿನ ಅಂತರ್ಜಲಮಟ್ಟ ಕುಸಿದಿದೆ.

ನಾವೀಗ ಎಚ್ಚೆತ್ತುಕೊಳ್ಳದಿದ್ದರೆ ಇನ್ನು ಸಂಕಟದ ದಿನಗಳು ನಮ್ಮ ಮುಂದಿವೆ ಎಂದು ನಮಗೆ ಅನಿಸಿತು. ಇಷ್ಟಕ್ಕೂ ಹಳ್ಳಿಯಲ್ಲಿ ಜನರು ಬರದ ಬೆಂಕಿಯಲ್ಲಿ ಬೇಯುವಾಗ ಕೂದಲು ಸೀಳುವ ತರ್ಕಕ್ಕೆ ಅಕ್ಷರಗಳನ್ನು ನಲುಗಿಸುತ ಕೂಡಿವುದರಲ್ಲಿ ಅರ್ಥವಿಲ್ಲ ಎನಿಸಿತು. ಎಂದಿನಂತೆ ಮತ್ತೆ ಹಳ್ಳಿಗಳತ್ತ ಹೊರಡಲು ತೀರ್ಮಾನಿಸಿದೆವು. ಕಳೆದ ವರ್ಷ ಐದು ಗ್ರಾಮ ಪಂಚಾಯತ್ ವ್ಯಾಪ್ತಿಯಲ್ಲಿ ರೇಗಾ ಪ್ರಚಾರ ಮಾಡಿದ್ದೆವು. ಮತ್ತು ಪಾಳಾ ಕೆರೆಯಲ್ಲಿ ಕೆಲಸ ಆರಂಭಿಸಿದ್ದೆವು. ಮೂರು ಥಾಂಡಾ ಮತ್ತು ಒಂದು ಹಳ್ಳಿಯ ಜನರು ಕೆರೆಯಲ್ಲಿ ಕೆಲಸ ಮಾಡಿರುವರು.

ಕೆರೆಗಳತ್ತ ನಮ್ಮ ನಡಿಗೆ

ಆದರೀಗ ಕೆರೆಗಳು ಎಲ್ಲೆಲ್ಲಿ ಇವೆಯೋ ಅಲ್ಲೆಲ್ಲ ಹಳ್ಳಿಗಳ ಜನರತ್ತ ನಮ್ಮ ನಡಿಗೆ ಎಂದು ನಿರ್ಧರಿಸಿ ಕಳೆದ ಒಂದುವರೆ ತಿಂಗಳಿಂದ ಕೆರೆ ಕೇಂದ್ರೀಕರಿಸಿ ಕೆಲಸ ಆರಂಭಿಸಿದ್ದೇವೆ. ಇದರ ಪ್ರತಿ ಫಲವಾಗಿ ಮಾರ್ಚ್ 26ರಂದು ಆಳಂದ ತಾಲ್ಲೂಕಿನ ನರೋಣ ಕ್ಷೇತ್ರ ಪಾಳ್ಯದಲ್ಲಿ ಸುಮಾರು ಮೂರುವರೆ ಸಾವಿರಕ್ಕೂ ಅಧಿಕ  ಮಹಿಳೆಯರು ಅಂತರರಾಷ್ಟ್ರೀಯ ದಿನವನ್ನು ‘ಕೆಲಸದ ಹಕ್ಕಿಗಾಗಿ ಮತ್ತು ನೀರು ಸಂರಕ್ಷಣೆ’ ಗಾಗಿ ಆಚರಿಸಿದರು. ಈಗ ನಮ್ಮ ಸಂಘಟನೆಯ ಶ್ರಮದ ಭಾಗವಾಗಿ ಎಂಟು ಕೆರೆಗಳಲ್ಲಿ ಕಾಮಗಾರಿ ಆರಂಭವಾಗಿದೆ. ಸರಿ ಸುಮಾರು ನಾಲ್ಕು ಸಾವಿರಕ್ಕೂ ಅಧಿಕ ಕಾರ್ಮಿಕರು ಕೆಲಸದಲ್ಲಿ ತೊಡಗಿದ್ದಾರೆ.

ಕ್ರಮೇಣ ಈ ಕೆಲಸಕ್ಕೆ ಕೈ ಜೋಡಿಸಿದವರು ಕಲಬುರಗಿಯ ವ್ಹಿ.ಜಿ.ಮಹಿಳಾ ಮಹಾವಿದ್ಯಾಲಯ, ರಜೆಯ ದಿನಗಳಲ್ಲಿ ಮಸ್ತಿ-ಮೋಜಿಗೆ ಹೋಗದೆ ಹಳ್ಳಿಗಳ ಜನತೆಯೊಂದಿಗೆ ನಾವಿದ್ದೇವೆ ಎಂದು ಆದರ್ಶ ಶಿಕ್ಷಕರಾಗಿರುವ ನಿಂಗಣ್ಣ ಮುಂಗೊಂಡಿ ನೇತೃತ್ವದಲ್ಲಿ ಆರು ಜನ ಶಿಕ್ಷಕರು ಹಳ್ಳಿಗಳಿಗೆ ಪಯಣ ಹೊರಟಿದ್ದಾರೆ. ಸಿದ್ದಲಿಂಗ ಸಿ ಸುಣಗಾರ, ಮಲ್ಲಿಕಾರ್ಜುನ ಜಿ ಓಕಳಿ, ಶಂಭುಲಿಂಗ, ರವೀಂದ್ರ ರುದ್ರವಾಡಿ ಮತ್ತು ಅಪ್ಪಾಸಾಹೇಬ ತೀರ್ಥ ಎಂಬುವವರೇ ಈ ಆರು ಜನ ಶಿಕ್ಷಕರು ಸೂಟಿಯ ದಿನಗಳನ್ನು ಹಳ್ಳಿಗರ ಸಂಕಟ ನಿವಾರಣೆಗಾಗಿ ಮೀಸಲಿಟ್ಟಿದ್ದಾರೆ. ಕೇಂದ್ರೀಯ ವಿಶ್ವ ವಿದ್ಯಾಲಯದ ಎಂ.ಎಸ್.ಡಬ್ಲು.ಡಿ. ವಿದ್ಯಾರ್ಥಿಗಳನ್ನು ತೊಡಗಿಸುವುದಾಗಿ ಆಶ್ವಾಸನೆ ಬಂದಿದೆ. ಈಗಾಗಲೇ ಮಾರ್ಚ್ 26ರಂದು ಮಹಿಳಾ ದಿನಾಚರಣೆಗೆ ಬಂದು ಕಾರ್ಮಿಕರಿಗೆ ಅರ್ಜಿ ತುಂಬಿಸುವಲ್ಲಿ ಈ ವಿದ್ಯಾರ್ಥಿಗಳು ತಮ್ಮ ಜವಾಬ್ದಾರಿ ನಿಭಾಯಿಸಿರುವರು. ಮುಂದೆಯೂ ಜೊತೆ ಬರುವ ಭರವಸೆ ನೀಡಿರುವರು. ಅಕ್ಷರ ಲೋಕದಲ್ಲಿ ಲೀನವಾದ ಜನತೆ ಒಂದೆಡೆ, ಬುದ್ಧ, ಬಸವ, ಅಂಬೇಡ್ಕರ್, ಮಾಕ್ರ್ಸ್, ಲೆನಿನ್, ಗಾಂಧಿ ಮುಂತಾದವರನ್ನು ಹಂಚಿಕೊಳ್ಳಲು ದಿನವೂ ತರ್ಕದ ಬೆನ್ನೇರಿದವರು ಇನ್ನೊಂದೆಡೆ ಇವರ ಇವರುಗಳ ಮದ್ಯದಲ್ಲಿಯೇ ಒಂದಿಷ್ಟು ಜನರು ಹಳ್ಳಿಗಳತ್ತ ಹೆಜ್ಜೆ ಹಾಕಿದ್ದು ನಮಗಂತೂ ಹಿಡಿಸಲಾರದ ಹಿಗ್ಗು ಅಭಿಮಾನ ತಂದಿದೆ. ಅರ್ಜಿ ತುಂಬುವುದರಿಂದ ಹಿಡಿದು ಕೆಲಸ ದೊರಕಿಸುವವರೆಗೆ ಬಿರು ಬಿಸಿಲಿನಲ್ಲಿ ನಡೆದಾಡುವ ನಿಂಗಪ್ಪ ಮಾಸ್ತರ್‍ರ ಛಲ ನಮ್ಮ ಶಕ್ತಿಯೇ ಹೌದು. ಅವರ ಬಾಳ ಸಂಗಾತಿ ನಂದಾ ಮನೆಗೆಲಸ ಮುಗಿಸಿಕೊಂಡು ಒಂದು ಹಳ್ಳಿಯಿಂದ ಮತ್ತೊಂದು ಹಳ್ಳಿಗೆ ಓಡಾಡಿ ಶ್ರಮಿಕರ ಋಣ ತೀರಿಸುವ ಪರಿಗೆ ಬೆರಗಾಗಿದ್ದೇವೆ. ಇವರ ಸಾಗರದಂತ ಬದ್ಧತೆಯ ಮುಂದೆ ಕೊಂಚವಾದರೂ ಸಾರ್ಥಕವಾಗುವಂಥ ಕೆಲಸ ಎಡೆಬಿಡದೆ ಮಾಡುವ ದಿಕ್ಕಿನತ್ತ ಎಲ್ಲರೂ ತೊಡಗಿಸಿಕೊಂಡಿದ್ದೇವೆ. ಇದೇ ರೀತಿಯ ಇನ್ನಷ್ಟು ಮನಸುಗಳು ಎಲ್ಲ ಹಳ್ಳಿಗಳಿಗೆ ನುಗ್ಗಲಿ ಮತ್ತು ಬರದ ಬೇಗೆಯಲ್ಲಿ ಬೇಯುತ್ತಿರುವ ಜನತೆಗೆ ಕೆಲಸ ದೊರಕಿಸಲು ನೆರವಾಗಲೆಂದು ಬಯಸುತ್ತೇವೆ.

ಹಾಂ ಬಿಸಿಲಿದೆ. ಏನು ಮಾಡುವುದು…? ಸೂರ್ಯನೊಂದಿಗೂ ಕದನ ಹೂಡುತ್ತ ಹಳ್ಳಿ ತಾಂಡಾಗಳಲ್ಲಿ ಸುತ್ತಾಡುತ್ತಿದ್ದೇವೆ. ಜನತೆಯ ಮುಗ್ಧತೆ, ತಾಯ್ತನದಂತಹ ಹೃದಯಕ್ಕೆ ಶರಣಾಗಿದ್ದೇವೆ. ಇದೊಂದು ಹುಚ್ಚೇ ಅನ್ನಬಹುದು. ಹುಚ್ಚಿಲ್ಲದಿದ್ದರೆ ಕೆಲಸದಲ್ಲಿ ಆನಂದ ಸಿಗಲಾರದು. ಈ ಆನಂದದಲ್ಲಿ ಪಾಲ್ಗೊಳ್ಳುವವರ ಪಟ್ಟಿ ಬೆಳೆಯಲೆನಿಸುವುದು. ಮುನ್ನಳ್ಳಿಯ ವಿಜಯಲಕ್ಷ್ಮಿ, ಸುದೇವಿ ತಮ್ಮೂರಲ್ಲದೆ ಸುತ್ತೆಲ್ಲ ಹಳ್ಳಿಗಳಿಗೂ ಸುತ್ತಾಡಿ ಜನರ ಕೈಗೆ ಕೆಲಸ ದೊರಕಿಸಲು ಶ್ರಮಿಸುತ್ತಿರುವರು…. ನಮ್ಮ ದೇವದಾಸಿ ಅಕ್ಕಂದಿರರು ಕೆಲವು ಹಳ್ಳಿಗಳ ಪಟ್ಟಿ ಮಾಡಿಕೊಂಡು ಅಲ್ಲೆಲ್ಲ ತಮ್ಮ ಶ್ರಮ ಹಾಕುತ್ತಿರುವರು..

ವಿದ್ಯಾರ್ಥಿಗಳೂ ಅಧಿಕಾರಿಗಳೂ ಬೆಂಬಲಕ್ಕೆ

ವಿದ್ಯಾರ್ಥಿಗಳೂ ಈ ಹೊತ್ತಿನಲ್ಲಿ ಹಳ್ಳಿಗಳತ್ತ ಬರಲಿ…ಕೆರೆ ಬಾವಿ ಚೆಕ್ ಡ್ಯಾಮ್, ಗೋಕಟ್ಟಾ, ಕೃಷಿಹೊಂಡಾ ನಿರ್ಮಾಣವಾದರೆ, ಹೂಳೆತ್ತಿದರೆ ಬರುವ ಮಳೆಗಾಲದಲ್ಲಿ ನೀರು ತುಂಬಿಕೊಳ್ಳಲು ಸಾಧ್ಯವಿದೆ. ಸುರಿದ ಮಳೆನೀರು ಹಿಡಿದಿಟ್ಟುಕೊಳ್ಳಲು ಏನೂ ಇಲ್ಲದಿದ್ದರೆ ಹರಿದು ಹೋಗುವುದು ಖಾತ್ರಿ. ಏನು ಪ್ರಯೋಜನ? ಹೀಗಾಗಿ ಕೆರೆ ಹೂಳೆತ್ತಿಸೋಣ, ಈ ಕೆಲಸಕ್ಕೆ ರೇಗಾ ಅಡಿಯಲ್ಲಿ ದಿನಕ್ಕೆ ರೂ.234 ಕೂಲಿ ಇದೆ. (ರೂ.224 ಕೂಲಿ, ರೂ10 ಬುಟ್ಟಿ ಸಲಿಗೆ, ಗುದ್ದಲಿಯ ಬಾಡಿಗೆ) ಜನರ ಕೈಗೆ ಕೆಲಸವಾಯ್ತು, ಕೆರೆ ಹೂಳೆತ್ತಿದ್ದಕ್ಕೆ ಮುಂದಕ್ಕೆ ಮಳೆ ನೀರು ತುಂಬಿಕೊಂಡು ನೀರಿನ ಅಂತರ್ಜಲಮಟ್ಟ ಹೆಚ್ಚಲು ಕಾರಣವೂ ಆಯ್ತು… ಮತ್ತು ಕೆಲಸವಿಲ್ಲದ್ದಕ್ಕಾಗಿ ಗುಳೆ ಹೋಗುವ ಜನರು ತಮ್ಮೂರಲ್ಲಿಯೇ ಉಳಿದು ಕೆಲಸ ಪಡೆಯಲು ಸಾಧ್ಯವಾಗುವುದು .

ಇನ್ನೊಂದು ಮಾತು ಇಲ್ಲಿ ಹೇಳಲೇಬೇಕು.. ನಮ್ಮ ಈ ಕೆಲಸಕ್ಕೆ ಸಾಮಾನ್ಯವಾಗಿ ಅಧಿಕಾರಿಗಳು ಕೈ ಜೋಡಿಸುವುದು ಕಡಿಮೆ. ಬೆಂಬಲಿಸಿದರೂ ಕಾಟಾಚಾರಕ್ಕೆ. ಆದರೆ ಕಲಬುರಗಿ ಜಿಲ್ಲೆಯ ಜಿಲ್ಲಾ ಪಂಚಾಯತ್‍ನ ಕಾರ್ಯ ನಿರ್ವಾಹಕ ಅಧಿಕಾರಿಯಾದ ಅನಿರುದ್ಧ ಶ್ರವಣ ಅಂತರಂಗ ಸಾಕ್ಷಿಯಾಗಿ ದುಡಿಯುವ ಜನತೆಯ ಪರ ಬದ್ಧತೆಯಿಂದ ನಿಂತು ಮನರೇಗಾ ಜಾರಿಗಾಗಿ ಶ್ರಮಿಸುತ್ತಿರುವುದು ಮತ್ತು ನಮ್ಮ ಹುಚ್ಚಿಗೆ ಇಂಬಾಗಿ ನಿಂತಿರುವುದು ಹೆಮ್ಮೆಯ ಸಂಗತಿಯೇ..

ಆದರೆ ಸಂಕಟದ ಮಾತೊಂದು ನಿಮ್ಮೊಂದಿಗೆ ಹಂಚಿಕೊಳ್ಳಲೇಬೇಕು… ಕೆಲಸವೇನೋ ದೊರಕಿಸಬಹುದು, ಆದರೆ ಕಡೆ ಪಕ್ಷ ಹದಿನೈದು ದಿನಕ್ಕೊಮ್ಮೆ ಕೂಲಿ ಪಾವತಿಯಾಗುತ್ತಿಲ್ಲ. ಇದರಿಂದ ತುಂಬ ಸಮಸ್ಯೆಯಾಗಿದೆ. ಇದಕ್ಕೆ ಕಾರಣವೇನು ಗೊತ್ತೇ? ಕೇಂದ್ರ ಸರಕಾರವು ಎಲೆಕ್ಟ್ರಾನಿಕ್ ಫಂಡ್ ಮ್ಯಾನೇಜ್ಮೆಂಟ್ ಸಿಸ್ಟಮ್ ಎಂದು ಹೊಸ ಪದ್ಧತಿಯೊಂದು ಪರಿಚಯಿಸಿದೆ. ತಾನೇ ನೇವಾಗಿ  ಬ್ಯಾಂಕ್ ಖಾತೆಗಳಿಗೆ ಹಣ ಜಮಾ ಮಾಡುವ ಕೇಂದ್ರೀಕರಣ ವ್ಯವಸ್ಥೆಯೊಂದು ತಂದಿದೆ. ಆದರೆ ಈ ಹೊಸ ಪದ್ಧತಿಯು ಕೂಲಿ ಪಾವತಿಸುವಲ್ಲಿ ಪೂರ್ತಿ ತಾಂತ್ರಿಕ ಸಮಸ್ಯೆಯಾಗಿ ಕರ್ನಾಟಕ ರಾಜ್ಯದಲ್ಲಿ ಈಗಾಗಲೇ ಕೆಲಸ ಮಾಡಿದ ಕೂಲಿ ಕಾರ್ಮಿಕರ ಕೂಲಿ ರೂ.246 ಕೋಟಿ ರೂಪಾಯಿ ಬಾಕಿ ಇದೆ. ಬರಗಾಲದಂತಹ ಸಂದರ್ಭದಲ್ಲಿಯೂ ಹೀಗೆ ತಿಂಗಳಾನುಗಟ್ಟಲೆಕೂಲಿ ಬಾಕಿ ಉಳಿಸಿಕೊಳ್ಳುವುದು ಕಟುಕತನವಲ್ಲದೆ ಮತ್ತೇನು? ತಾಂತ್ರಿಕದೋಷ ಸರಿಪಡಿಸುವವರೆಗೆ ಜನರು ಉಪವಾಸ ಇರಲು ಸಾಧ್ಯವೇ? ಕೇಂದ್ರ ಸರಕಾರವಾಗಲಿ ರಾಜ್ಯ ಸರಕಾರವಾಗಲಿ ಕೂಡಲೇ ಪರ್ಯಾಯ ವ್ಯವಸ್ಥೆ ಮಾಡುವ ಜವಾಬ್ದಾರಿ ಹೊರಬೇಕಲ್ಲವೇ? ರಾಜ್ಯ ಸರಕಾರವೇನೋ ತಾನು ಪರ್ಯಾಯ ವ್ಯವಸ್ಥೆ ಮಾಡುವುದಾಗಿ ಹೇಳಿದೆ. ಈ ಹಿಂದೆಯೂ ರೂ.700 ಕೋಟಿಯಷ್ಟು ಹಣ ಕೊಟ್ಟಿದೆ. ಆದರೆ ಬರಗಾಲದಲ್ಲಿ ಜನರು ಎಲ್ಲ ರೀತಿಯ ಸಂಕಟ ಸಮಸ್ಯೆಗಳನ್ನು ಎದುರಿಸುವಾಗ ಕೂಡಲೇ ಪರಿಹಾರೋಪಾಯ ಕಲ್ಪಿಸಬೇಕು. …. ಇಂದಿಗೆ ಇಷ್ಟು ಬರೆದಿರುವೆವು… ಗ್ರಾಮಗಳಲ್ಲಿನ ಇನ್ನಷ್ಟು ಅನುಭವಗಳನ್ನು ಮತ್ತೆ ನಿಮ್ಮೊಂದಿಗೆ ಹಂಚಿಕೊಳ್ಳುವೆವು..

-ನೀಲಾ ಕೆ., ಡಾ.ಮೀನಾಕ್ಷಿ ಬಾಳಿ, ಡಾ. ಪ್ರಭು ಖಾನಾಪುರೆಮ ಗಣಪತಿ ಕೋಡ್ಲೆ

ಒಣಗಿದ ಭೂಮಿ, ಈಡೇರದ ಭರವಸೆಗಳು….

ಸಂಪುಟ: 10 ಸಂಚಿಕೆ: 20 May 8, 2016

ಮಹಾರಾಷ್ಟ್ರದ ಬರಪೀಡಿತ ಮರಾಠವಾಡಾ ಪ್ರದೇಶದಲ್ಲಿ ಕಿಸಾನ್ ಸಭಾ ವಿಪರೀತ ಕರ್ಷಕ ಸಂಕಟದ ಪ್ರಶ್ನೆಯ ಮೇಲೆ ನಡೆಸುತ್ತಿರುವ ಪ್ರಚಾರಾಂದೋಲನದಲ್ಲಿ ಭಾಗವಹಿಸಲು ಹೋಗಿದ್ದ ಸಿಪಿಐ(ಎಂ) ಪೊಲಿಟ್‍ಬ್ಯುರೊ ಸದಸ್ಯೆ ಬೃಂದಾ ಕಾರಟ್ 15-20 ಹಳ್ಳಿಗಳಲ್ಲಿ ಸಂಚರಿಸಿದರು, ಔರಂಗಾಬಾದ್, ಬೀಡ್ ಮತ್ತು ಜಾಲ್ನಾ ಜಿಲ್ಲೆಗಳಲ್ಲಿ ರೈತರನ್ನು ಮತ್ತು ರೇಗಾ ಕಾರ್ಮಿರಕನ್ನು ಭೇಟಿಯಾದರು. ನಂತರ ಸಿಪಿಐ(ಎಂ) ಕೇಂದ್ರ ಕಾರ್ಯಕಾರಿ ಮಂಡಳಿಯ ಸದಸ್ಯ ಅಶೋಕ ಧವಳೆ ಮತ್ತಿತರ ಮುಖಂಡರೊಂದಿಗೆ ಔರಂಗಾಬಾದ್ ಜಿಲ್ಲಾ ಕಮಿಶನರ್ ಅವರನ್ನು ಭೇಟಿ ಮಾಡಿ ಅವರಿಗೆ ಮನವಿ ಪತ್ರ ಸಲ್ಲಿಸಿದರು.
ಲೋಕಸಭೆ ಮತ್ತು ವಿಧಾನಸಭೆ ಚುನಾವಣೆಗಳ ವೇಳೆ ಪ್ರಧಾನಿ ನರೇಂದ್ರ ಮೋದಿ ಮರಾಠವಾಡ ರೈತರು ಮತ್ತು ಜನರಿಗೆ ಭರವಸೆಗಳ ಮಹಾಪೂರವನ್ನೇ ಹರಿಸಿದ್ದರು. ಅವುಗಳಲ್ಲ್ಲಿ ಯಾವುದೂ ಈಡೇರಿಲ್ಲ. ಮೋದಿಯವರು ವಿದೇಶ ಪ್ರವಾಸಕ್ಕೆ ಸ್ವಲ್ಪ ಬಿಡುವು ಕೊಟ್ಟು ಇಲ್ಲಿನ ಪರಿಸ್ಥಿತಿಯ ಅಧ್ಯಯನಕ್ಕಾಗಿ ಇಲ್ಲಿಗೆ ಭೇಟಿ ಕೊಡುವುದು ಅಗತ್ಯ. ಸರಕಾರದ ಹೇಳಿಕೆಗಳು ಅಪ್ಪಟ ಸುಳ್ಳು ಎಂದು ಜನಾಬಾಯಿ ಮತ್ತು ಭುಮ್ರೆ ಯಾಕೆ ಹೇಳುತ್ತಾರೆ ಎನ್ನುವುದನ್ನು ತಿಳಿಯಲು ಮೋದಿಯವರಿಗೆ ಇದು ನೆರವಾಗುತ್ತದೆ ಎನ್ನುತ್ತಾರೆ ಬೃಂದಾ ಕಾರಟ್ ಈ ಭೇಟಿಯ ಆಧಾರದಲ್ಲಿ ಬರೆದಿರುವ ಈ ಲೇಖನದಲ್ಲಿ. 

maratavada

ಪಾಲಿಟ್ ಬ್ಯೂರೋ ಸದಸ್ಯರಾದ ಕಾಂ. ಬೃಂದಾ ಕಾರಟ್

ಭಾರತದಾದ್ಯಂತ ವಿವಿಧ ರಾಜ್ಯಗಳಲ್ಲಿ ಹರಡಿರುವ 257 ಜಿಲ್ಲೆಗಳಲ್ಲಿನ ಗಂಭೀರ ಬರ ಪರಿಸ್ಥಿತಿಯನ್ನು ನಿಭಾಯಿಸಲು ಕೇಂದ್ರ ಸರಕಾರ ಸಾಧ್ಯವಾದುದೆಲ್ಲವನ್ನೂ ಮಾಡುತ್ತಿದೆ ಎಂದು ರಾಜ್ಯಸಭೆಯಲ್ಲಿ ಸರಕಾರ ಹೇಳಿರುವುದಕ್ಕೆ ಜನಾಬಾಯಿ ಕೊರ್ಡೆ ಅಥವಾ ಪ್ರಭಾಕರ ಭುನ್ರೆ ಹೇಗೆ ಪ್ರತಿಕ್ರಿಯಿಸಬಹುದು? ಈ ಇಬ್ಬರೂ ಮಹಾರಾಷ್ಟ್ರದ ಮರಾಠವಾಡಾ ಪ್ರದೇಶದ ಬೀಡ್ ಮತ್ತು ಜಾಲ್ನಾದ ನಿವಾಸಿಗಳು. ಈ ಪ್ರದೇಶದಲ್ಲಿ ಎಂಟು ಜಿಲ್ಲೆಗಳಿದ್ದು ಅಲ್ಲಿ ಕಳೆದ ಮೂರು ವರ್ಷಗಳಿಂದ ತಾಂಡವವಾಡುತ್ತಿರುವ ಬರಗಾಲ ಇದೀಗ ಪರಾಕಾಷ್ಠೆ ಮುಟ್ಟಿದೆ.

ಜನಾಬಾಯಿ ಕೊರ್ಡೆ ಬೀಡ್‍ನ ಒಂದು ಗ್ರಾಮದ ಸರಪಂಚರು. ಮರಾಠವಾಡ ಪ್ರದೇಶದಲ್ಲಿ ಕಿಸಾನ್ ಸಭಾದ ಪ್ರಚಾರಾಂದೋಲನದ ವೇಳೆ ಮಹಾತ್ಮಾ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯ (ರೇಗಾ) ಕೆಲಸದ ಸ್ಥಳಗಳಲ್ಲಿ ಕಾರ್ಮಿಕರೊಂದಿಗೆ ಸಂವಾದಿಸುತ್ತಿದ್ದಾಗ ನಮ್ಮ ತಂಡ ಜನಾಬಾಯಿ ಅವರನ್ನು ಭೇಟಿ ಮಾಡಿತ್ತು. ಕೃಷಿ ಸಂಬಂಧಿ ಕೆಲಸಗಳು ಪೂರ್ಣ ಸ್ಥಗಿತ ಗೊಂಡಿರುವುದರಿಂದ ಇಲ್ಲಿ ರೇಗಾ ಒಂದೇ ಉಳಿದಿರುವ ಜೀವನ ಮಾರ್ಗವಾಗಿದೆ. ಎಲ್ಲಾ ಬರಪೀಡಿತ ಪ್ರದೇಶಗಳಲ್ಲಿ ರೇಗಾ ಕೆಲಸದ ಅವಧಿಯನ್ನು ನೂರು ದಿನಗಳಿಂದ 150 ದಿನಗಳಿಗೆ ವಿಸ್ತರಿಸುವುದಾಗಿ ಕೇಂದ್ರ ಸರಕಾರ ಘೊಷಿಸಿದೆ. ಆದರೆ ಅದು ಇನ್ನೂ ಜಾರಿಯಾಗಿಲ್ಲ. ಗ್ರಾಮೀಣಾಭಿವೃದ್ಧಿ ಸಚಿವಾಲಯದ ವೆಬ್ ಸೈಟ್‍ನಲ್ಲಿ ಲಭ್ಯವಿರುವ ಮಾಹಿತಿ ಪ್ರಕಾರ 2015-16ರಲ್ಲಿ ಮರಾಠವಾಡ ಪ್ರದೇಶದ ಎಂಟು ಜಿಲ್ಲೆಗಳ ಪೈಕಿ ಐದರಲ್ಲಿ-ಔರಂಗಾಬಾದ್, ಜಾಲ್ನಾ, ನಾಂದೇಡ್, ಒಸ್ಮಾನಾಬಾದ್ ಮತ್ತು ಹಿಂಗೋಲಿ-ಪ್ರತಿ ಜಿಲ್ಲೆಯಲ್ಲಿ ಸರಾಸರಿ ಕೆಲಸದ ದಿನಗಳು ಕೇವಲ 47 ದಿನಗಳು ಅಥವಾ ಅದಕ್ಕಿಂತಲೂ ಕಡಿಮೆ ಆಗಿದ್ದವು. ಲಾತುರ್‍ನಲ್ಲಿ 72 ದಿನಗಳು ಹಾಗೂ ಬೀಡ್‍ನಲ್ಲಿ 81 ದಿನಗಳು.

ಉದ್ಯೋಗ ಖಾತರಿ ಯೋಜನೆಗೆ ಕಡಿಮೆ ಹಣ

ಲಕ್ಷಾಂತರ ಭೂರಹಿತ ಕೃಷಿ ಕಾರ್ಮಿಕರು, ಕಬ್ಬು ಕಟಾವು ಮಾಡುವವರು ಮತ್ತು ಸಣ್ಣ ರೈತರು ಕೆಲಸಕ್ಕಾಗಿ ಹತಾಶೆಯೊಂದ ಎದುರು ನೋಡುತ್ತಿದ್ದರೂ ಪ್ರತಿ ಜಿಲ್ಲೆಯಲ್ಲಿ ಕಳೆದ ವರ್ಷ ರೇಗಾದಡಿ ಕೆಲಸ ಸಿಕ್ಕಿದ್ದು  70000 ಜನರಿಗೆ ಮಾತ್ರ. ಬೀಡ್ ಮಾತ್ರ ಇದಕ್ಕೆ ಅಪವಾದವಾಗಿದ್ದು ಅಲ್ಲಿ 1.19 ಲಕ್ಷ ಜನರಿಗೆ ಉದ್ಯೋಗ ಸಿಕ್ಕಿದೆ. ಇದೀಗ ಬೇಡಿಕೆ ಪರಾಕಾಷ್ಠೆ ಮುಟ್ಟಿರುವ ಈ ತಿಂಗಳಲ್ಲಿ ಪ್ರತಿ ಜಿಲ್ಲೆಯಲ್ಲಿ ಉದ್ಯೋಗ ಸಿಕ್ಕಿರುವವರ ಸರಾಸರಿ ಸಂಖ್ಯೆ ಕೇವಲ 4000. ಸಾಕಷ್ಟು ಹಣ ಬಿಡುಗಡೆ ಮಾಡಲು ಕೇಂದ್ರ ಸರಕಾರ ನಿರಾಕರಿಸುತ್ತಿರುವುದು ಇದಕ್ಕೆ ಮುಖ್ಯ ಕಾರಣ ಎಂದು ಅಧಿಕಾರಿಗಳು ಅನಧಿಕೃತವಾಗಿ ಹೇಳುತ್ತಾರೆ. ಇಡೀ ಮಹಾರಾಷ್ಟ್ರ ರಾಜ್ಯಕ್ಕೆ ಸಂಬಂಧಿಸಿ ಹೇಳುವುದಾದರೆ, ಬರಗಾಲ-ಪೂರ್ವ ವರ್ಷವಾದ 2012-13ರಲ್ಲಿ ರೇಗಾಕ್ಕೆ ಕೇಂದ್ರ ಮಂಜೂರು ಮಾಡಿದ್ದಕ್ಕಿಂತ 212 ಕೋಟಿ ರೂಪಾಯಿಯಷ್ಟು ಕಡಿಮೆ ಹಣವನ್ನು 2015-16ರಲ್ಲಿ ಮಂಜೂರು ಮಾಡಲಾಗಿದೆ.

ಇನ್ನೂ ಆಘಾತಕರ ಸಂಗತಿಯೆಂದರೆ, ಕೆಲಸ ಸಿಕ್ಕಿದರೂ ಅನೇಕ ಜನರಿಗೆ ಕೂಲಿಯೇ ಸಿಗುವುದಿಲ್ಲ. ಕೆಲಸ ಒದಗಿಸುವಲ್ಲಿ ತುಲನಾತ್ಮಕವಾಗಿ ಉತ್ತಮ ಸ್ಥಿತಿಯಲ್ಲಿರುವ ಬೀಡ್ ಜಿಲ್ಲೆ, ಕೂಲಿ ವಿತರಿಸುವಲ್ಲಿ ತೀರಾ ಕೆಟ್ಟ ಸ್ಥಿತಿಯಲ್ಲಿದೆ. ಕಳೆದ ವರ್ಷ ಈ ಜಿಲ್ಲೆಯಲ್ಲಿ ಸರಕಾರ ರೇಗಾ ಕಾರ್ಮಿಕರಿಗೆ ಕೊಡಬೇಕಾದ ಬಾಕಿ ಕೂಲಿ ಹಣ 5.58 ಕೋಟಿ ರೂಪಾಯಿಗಳು. ನಾವು ಜನಾಬಾಯಿ ಅವರನ್ನು ಭೇಟಿ ಮಾಡಿದ ಆಕೆಯ ಗ್ರಾಮ ತಕರ್ವಾನ್‍ನಲ್ಲಿ ಒಂದುವರೆ ತಿಂಗಳ ಹಿಂದೆ ಕೆಲಸ ಆರಂಭವಾದರೂ ಇದುವರೆಗೂ 150 ಕಾರ್ಮಿಕರಿಗೆ ಒಂದು ಪೈಸೆ ಕೂಲಿಯನ್ನೂ ಕೊಟ್ಟಿಲ್ಲ. ಸುಡು ಬಿಸಿಲಿನಲ್ಲಿ, ಕುಡಿಯಲು ಸಾಕಷ್ಟು ನೀರು ಕೂಡ ಇಲ್ಲದ ಸ್ಥಿತಿಯಲ್ಲಿ ಮಹಿಳೆಯರು ಎಂಟು ಗಂಟೆಗಳ ಒಂದು ಕೆಲಸದ ದಿನದಲ್ಲಿ ನೆಲ ಅಗೆದು 5000 ಕೆಜಿ ಮಣ್ಣನ್ನು ಹೊರಬೇಕು. ಇದಕ್ಕಿಂತ ಅಮಾನವೀಯವಾದ ಕೆಲಸದ ನಿಯಮ ಬೇರೆ ಯಾವುದಾದರೂ ಇದ್ದೀತೇ? ಇದೊಂದು ಅಸಾಧ್ಯ ಕೆಲಸ.

ಬರಗಾಲದಿಂದಾಗಿ ಮಣ್ಣು ಗಟ್ಟಿಯಾಗಿದೆ ಹಾಗೂ ಕಲ್ಲಿನಂತಾಗಿದೆ ಎಂದು ಅಧಿಕಾರಿಗಳೇ ಒಪ್ಪುತ್ತಾರೆ. ಆದರೆ ಕೂಲಿ ದರದಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ. ಇದರ ಪರಿಣಾಮವಾಗಿ ಕಾರ್ಮಿಕರು ಪಡೆಯಬೇಕಾದ ಕನಿಷ್ಟ ಕೂಲಿಗಿಂತ ಶೇಕಡಾ 30ರಷ್ಟು ಕಡಿಮೆ ಕೂಲಿ ಪಡೆಯುವಂತಾಗಿದೆ. ಅವರು 11ರಿಂದ 12 ಗಂಟೆ ಕಾಲ ದುಡಿದರೆ ಮಾತ್ರ ದಿನದ ಕನಿಷ್ಟ ಕೂಲಿ ಸಿಗುತ್ತದೆ. ಜನಾಬಾಯಿ ಈ ಕಾರ್ಮಿಕರ ಪರವಾಗಿ ಹೋರಾಡುತ್ತಿದ್ದಾರೆ. ನಿರ್ಣಾಯಕವಾದ ಆಹಾರ ಭದ್ರತೆ ವಿಷಯವನ್ನೂ ಅವರು ಕೈಗೆತ್ತಿಕೊಂಡಿದ್ದಾರೆ. ಸಾರ್ವಜನಿಕ ವಿತರಣೆ ವ್ಯವಸ್ಥೆ ಮೂಲಕ ಆಹಾರ ಪದಾರ್ಥಗಳನ್ನು ವಿತರಿಸಲು ತುರ್ತು ಕ್ರಮಗಳನ್ನು ಕೈಗೊಳ್ಳಬೇಕಾಗಿದೆ ಎಂದೂ ಜನಾಬಾಯಿ ಹೇಳುತ್ತಾರೆ. ಆದರೆ ಅವರ ಮಾತನ್ನು ಕೇಳುವವರಾರು?.
ದಲಿತರೇ ಹೆಚ್ಚಾಗಿರುವ ಭೂರಹಿತರು ಮತ್ತು ಕೃಷಿಕೂಲಿಗಾರರು ನಿಸ್ಸಂಶಯವಾಗಿಯೂ ಹೆಚ್ಚು ಬಾಧಿತರಾಗಿದ್ದು ರೈತರ ಪರಿಸ್ಥಿತಿ ಕೂಡ ಭಿನ್ನವಾಗಿಯೇನೂ ಇಲ್ಲ.

ರೈತರ ಹತಾಶೆ

ಪ್ರಭಾಕರ ಭುಮ್ರೆ ಜಾಲ್ನಾ ಜಿಲ್ಲೆಯ ಒಬ್ಬ ರೈತ. ಇಲ್ಲಿನ ಅನೇಕ ಜನರಂತೆ ಆತ ಕೂಡ ಹಣ್ಣು ಬೆಳೆಗಾರನಾಗಿದ್ದು 400 ಕಿತ್ತಳೆ ಮರಗಳನ್ನು ಬೆಳೆದಿದ್ದಾನೆ. ಆತ ಕಳೆದ ಎರಡು ವರ್ಷಗಳಲ್ಲಿ ಎರಡು ಲಕ್ಷ ರೂಪಾಯಿ ಸಾಲ ಪಡೆದಿದ್ದ. ನೀರು ಸರಬರಾಜಿಗಾಗಿ ಖಾಸಗಿ ಕಂಪೆನಿಗಳಿಗೆ ಆತ ತುಂಬಾ ಹಣ ನೀಡಿದ್ದರೂ ತನ್ನ ಕಿತ್ತಳೆ ಮರಗಳನ್ನು ಉಳಿಸಿಕೊಳ್ಳಲು ಭುಮ್ರೆಗೆ ಸಾಧ್ಯವಾಗಲಿಲ್ಲ. ಅಂತಿಮವಾಗಿ ಆತ ಆ ಮರಗಳನ್ನು ಕಡಿದು ಹಾಕಿದ. ಇದು ಈ ರೀತಿಯ ಒಂದೇ ಪ್ರಕರಣವಲ್ಲ. ಜಾಲ್ನಾ ಜಿಲ್ಲೆಯಲ್ಲಿ ಕಿತ್ತಳೆ ಮರ ಬೆಳೆಯಲಾಗುವ ಒಟ್ಟು ಪ್ರದೇಶದಲ್ಲಿ ಸುಮಾರು ಮೂರನೇ ಒಂದು ಭಾಗಕ್ಕಿಂತ ಹೆಚ್ಚು ಅಂದರೆ 9000 ಹೆಕ್ಟೇರ್ ಪ್ರದೇಶದಲ್ಲಿನ ಕಿತ್ತಳೆ ಮರಗಳನ್ನು ಕಡಿದುರುಳಿಸಲಾಗಿದೆ. ಆದರೆ ಈ ರೈತರಿಗೆ ಸರಕಾರದಿಂದ ಯಾವುದೇ ಸಹಾಯ ಸಿಕ್ಕಿಲ್ಲ. ಬಹುತೇಕ ಕಿತ್ತಳೆ ಬೆಳೆಗಾರರಿಗೆ ಯಾವುದೇ ಪರಿಹಾರವೂ ಸಿಕ್ಕಿಲ್ಲ. ಇದಕ್ಕೆ ವ್ಯತಿರಿಕ್ತವಾಗಿ, ಸಾಲ ಮರುಪಾವತಿ ಮಾಡುವಂತೆ ಭುಮ್ರೆ ಅವರಂಥ ರೈತರಿಗೆ ಬ್ಯಾಂಕ್‍ಗಳು ನೋಟಿಸ್ ಕಳಿಸುತ್ತಿವೆ. ರೈತರ ಹತಾಶೆ ಎದ್ದು ಕಾಣುತ್ತಿದ್ದು ಈ ಪ್ರದೇಶದಲ್ಲಿ ಇದೇ ವರ್ಷದ ಜನವರಿಯಿಂದೀಚೆಗೆ 325 ರೈತರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಔರಂಗಾಬಾದ್‍ನ ಪಚೋಡ್‍ನಲ್ಲಿನ ದನಗಳ ಸಂತೆಯಲ್ಲಿ ನಾವು ಭುಮ್ರೆಯನ್ನು ಭೇಟಿ ಮಾಡಿದೆವು. ಅಲ್ಲಿ ಆತ ತನ್ನ ಎರಡು ಎತ್ತುಗಳನ್ನು ಮಾರಿದ್ದ. ಹತಾಶರಾದ ರೈತರ ಗುಂಪಿನಲ್ಲಿ ಕುಳಿತಿದ್ದ ಭುಮ್ರೆ ಇನ್ನೇನು ಕಣ್ಣೀರು ಹಾಕುವುದರಲ್ಲಿದ್ದ. ಸುಮಾರು ಒಂದು ವರ್ಷದ ಹಿಂದೆ ಒಂದು ಲಕ್ಷ ರೂಪಾಯಿ ಕೊಟ್ಟು ಖರೀದಿಸಿದ್ದ ತನ್ನ ಪ್ರಾಣಿಗಳನ್ನು ಆತ ಕೇವಲ 20000 ರೂಪಾಯಿಗಳಿಗೆ ಮಾರಿದ್ದ. ಇನ್ನೊಬ್ಬ ರೈತ ಸಾಲಾರ್ ಖಾನ್ ಕತೆಯೂ ಅದೇ ರೀತಿ ಇತ್ತು. ಆತನೂ ಎತ್ತಿನ ಜೋಡಿಯನ್ನು ಖರೀದಿಸಿದ್ದಕ್ಕಿಂತ ಅರ್ಧ ಬೆಲೆಗೆ ಮಾರಾಟ ಮಾಡಿದ್ದ. 90000 ರೂಪಾಯಿ ಸಾಲ ಹೊಂದಿರುವ ಆತನ ಹೆಣ್ಣುಮಕ್ಕಳು ಶಾಲೆಯನ್ನು ತೊರೆಯಬೇಕಾಯಿತು. ಭಾರತೀಯ ಜನತಾ ಪಕ್ಷದ ಸರಕಾರ ಗೋಹತ್ಯೆ ಮೇಲೆ ನಿಷೇಧ ಹೇರಿದ್ದರಿಂದ ರಾಜ್ಯದಾದ್ಯಂತ ಈ ಪ್ರಾಣಿಗಳ ಬೆಲೆ ಪಾತಾಳಕ್ಕೆ ಕುಸಿದಿದೆ. ಮರಾಠವಾಡ ಪ್ರದೇಶದಲ್ಲಿ ಸಾಕಾಣಿಕೆ ವೆಚ್ಚ ಹೆಚ್ಚಿರುವುದರಿಂದ ಪರಿಸ್ಥಿತಿ ಇನ್ನೂ ಗಂಭೀರವಾಗಿದೆ. ದನಗಳ ಸಂತೆಗೆ ಸುಮಾರು 3000 ದನ-ಎತ್ತುಗಳನ್ನು ತರಲಾಗಿತ್ತು. ಹತಾಶೆಯಿಂದ ಸಿಕ್ಕಿದ ಬೆಲೆಗೆ ಮಾರಾಟ ಮಾಡುವುದು ಬದುಕುಳಿಯುವ ಕಟ್ಟಕಡೆಯ ಕಾರ್ಯತಂತ್ರವಾಗಿದೆ. ಅವರಿಗೆ ಅದು ಬಿಟ್ಟು ಅನ್ಯ ಮಾರ್ಗವಿಲ್ಲ.

ಸರಕಾರದ ಯೋಜನೆಯಡಿ ಗೋಶಾಲೆಗಳನ್ನು ನಿರ್ಮಿಸಿದ್ದರೆ ಸ್ವಲ್ಪ ಪರಿಹಾರ ಸಿಗಬಹುದಿತ್ತು. ಆದರೆ ಸರಕಾರ ಅವುಗಳನ್ನು ವಿವಿಧ ನೊಂದಾಯಿತ ಸಹಕಾರಿ ಸಂಘಗಳಿಗೆ ಹೊರಗುತ್ತಿಗೆ ನೀಡಿದೆ. ಬಿಜೆಪಿಯ ದಿವಂಗತ ನಾಯಕ ಗೋಪಿನಾಥ ಮುಂಡೆ ಅವರ ಇಬ್ಬರು ಪುತ್ರಿಯರು ಚುನಾವಣೆಗಳಲ್ಲಿ ಗೆದ್ದು ಹೋಗಿರುವ ಬೀಡ್ ಜಿಲ್ಲೆಯಲ್ಲಿ, ಈ ರೀತಿಯ 137 ಗೋಶಾಲೆಗಳಿವೆ. ಈ ಪ್ರದೇಶದಲ್ಲೇ ಇದು ಹೆಚ್ಚು ಗೋಶಾಲೆಗಳು. ಕೇಜ್ ನಲ್ಲಿರುವ ಒಂದು ಅತಿದೊಡ್ಡ ಗೋಶಾಲೆಯಲ್ಲಿ 1400 ಪ್ರಾಣಿಗಳಿವೆ. ಈ ಗೋಶಾಲೆಯನ್ನು ಜೈ ಬಜರಂಗ ಬಲಿ ಸಂಘ ನಡೆಸುತ್ತಿದೆ. ಮಾರ್ಚ್ ನಲ್ಲಿ ಗೋಶಾಲೆ ಆರಂಭಿಸಿದಾಗಿನಿಂದಲೂ ಸಂಘಕ್ಕೆ ಯಾವುದೇ ಧನಸಹಾಯ ಸಿಕ್ಕಿಲ್ಲ. ಗೋಶಾಲೆಯ ದಿನದ ವೆಚ್ಚ ಸುಮಾರು ಒಂದು ಲಕ್ಷ ರೂಪಾಯಿ ಆಗುತ್ತದೆ ಎಂದು ಸಂಘದ ಸುಪರ್ ವೈಸರ್ ಹೇಳಿದರು. ಹಾಗಾದರೆ ಅದನ್ನು ಹೇಗೆ ನಡೆಸುತ್ತೀರಾ ಎಂಬ ನಮ್ಮ ಪ್ರಶ್ನೆಗೆ ಇನ್ನಷ್ಟು ಸಾಲ ಮಾಡುವ ಮೂಲಕ ಎಂಬ ಉತ್ತರ ದೊರಕಿತು. ಆದರೆ ಬೇರೆ ಕೆಲವರು ಹೇಳುವ ಪ್ರಕಾರ ಈ ನೊಂದಾಯಿತ ಸಂಘಗಳು ರೈತರಿಗೆ ಮೇವಿಗಾಗಿ ಸಿಗಬೇಕಾದ  ನಿಜವಾದ ಮೊತ್ತವನ್ನು ಕೊಡುವುದಿಲ್ಲ. ಸರಕಾರದ ಸಬ್ಸಿಡಿ ವಸ್ತು ರೂಪದಲ್ಲಿರಬೇಕಾಗಿದ್ದು ಮೇವು ಮತ್ತು ನೀರಿಗೆಂದು ದೊಡ್ಡ ಹಸುಗಳಿಗೆ ದಿನಕ್ಕೆ 70 ರೂಪಾಯಿ ಹಾಗೂ ಚಿಕ್ಕ ಹಸುಗಳಿಗೆ 31 ರೂಪಾಯಿ ಎಂದು ನಿಗದಿಪಡಿಸಲಾಗಿದೆ.

ಬಹುತೇಕ ಜಿಲ್ಲೆಗಳಲ್ಲಿ ಗೋಶಾಲೆ ಯೋಜನೆ ಆರಂಭವಾಗಿಲ್ಲ. ಸರಕಾರವೇ ನಿರ್ದಿಷ್ಟ ಸಮಯದ ವರೆಗೆ ದೊಡ್ಡ ಸಂಖ್ಯೆಯಲ್ಲಿ ಗೋಶಾಲೆಗಳನ್ನು ನಡೆಸಬೇಕು ಹಾಗೂ ಕೇಂದ್ರ ಸರಕಾರ ಇದಕ್ಕೆ ನೆರವು ನೀಡಬೇಕು. ಸಂಸತ್ತಿನ ಚರ್ಚೆಯ ವೇಳೆ ಈ ಬಗ್ಗೆ ಯಾವುದೇ ಆಶ್ವಾಸನೆ ನೀಡಲಾಗಿಲ್ಲ.

ನೀರಿನ ರಾಜಕೀಯ

ಲಾತೂರ್‍ಗೆ ಟ್ರೇನ್ ಮೂಲಕ ನೀರನ್ನು ಸಾಗಿಸಿದ್ದು ಭಾರೀ ಪ್ರಚಾರ ಗಿಟ್ಟಿಸಿಕೊಂಡಿತು. ಆದರೆ ಈ ಪ್ರದೇಶಕ್ಕೆ ಪೂರೈಸಿದ 3000 ಟ್ಯಾಂಕರ್ ನೀರು ಏನೇನೂ ಸಾಲದು ಎನ್ನುವುದು ಕಟುವಾಸ್ತವವಾಗಿದೆ. ಖಾಸಗಿ ಕಂಪೆನಿಗಳು ನೀರಿಗೆ ವಿಧಿಸುವ ದರದ ಮೇಲೆ ಯಾವುದೇ ನಿಯಂತ್ರಣವಿಲ್ಲ. 3000 ಲೀಟರ್ ಟ್ಯಾಂಕರ್‍ಗೆ 1000 ರೂಪಾಯಿ ವಿಧಿಸಲಾಗುತ್ತಿದೆ. ಇದು ದೆಹಲಿಯಲ್ಲಿನ ದರಕ್ಕಿಂತ ದುಪ್ಪಟ್ಟು ಆಗಿದೆ. ಈ ಖಾಸಗಿ ನೀರಿನ ಕಂಪೆನಿಗಳ ಪೈಕಿ ಅನೇಕ ಕಂಪೆನಿಗಳು ಈ ಪ್ರದೇಶದ ವಿವಿಧ ರಾಜಕೀಯ ಪಕ್ಷಗಳ ನಾಯಕರ ಜೊತೆ ನಿಕಟ ಸಂಪರ್ಕ ಹೊಂದಿವೆ ಎನ್ನುವುದು ಬಹಿರಂಗ ರಹಸ್ಯವಾಗಿದೆ. ಈ ಕಾರಣಕ್ಕಾಗಿಯೇ ಈ ಕಂಪೆನಿಗಳನ್ನು ಪ್ರಶ್ನಿಸಲು ಯಾರೂ ಹೋಗುವುದಿಲ್ಲ.

ಬಿಜೆಪಿ ನೇತೃತ್ವದ ಸರಕಾರದ ಆದ್ಯತೆಗಳು ಬೇರೆಲ್ಲೋ ಇವೆ. ಮದ್ಯ ತಯಾರಿಸುವ ಬ್ರೂವರಿಗಳು ಮತ್ತು ಡಿಸ್ಟಿಲರಿಗಳಿಗೆ ಸರಬರಾಜು ಮಾಡುವ ನೀರಿನ ಪ್ರಮಾಣವನ್ನು ಕಡಿತಮಾಡಬೇಕೆಂದು ಕೋರಿ ಸಲ್ಲಿಸಲಾಗಿದ್ದ ಅರ್ಜಿಯೊಂದನ್ನು ಬಾಂಬೆ ಹೈಕೋರ್ಟ್ ನ ಔರಂಗಾಬಾದ್ ಪೀಠ ಎಪ್ರಿಲ್ 24ರಂದು ಆಲಿಸಿತು. ಔರಂಗಾಬಾದ್ ಬೀರ್ ತಯಾರಿಕೆಯ ಒಂದು ಪ್ರಮುಖ ಕೇಂದ್ರ. ಈ ಘಟಕಗಳಿಗೆ ಪ್ರತಿದಿನ ಐದು ಮಿಲಿಯ ಲೀಟರ್ ಗಿಂತ ಹೆಚ್ಚಿನ ನೀರು ಬೇಕಾಗುತ್ತದೆ. ವಿಧಾನಸಭೆಯಲ್ಲಿ ಈ ವಿಚಾರ ಪ್ರಸ್ತಾವವಾದಾಗ, ಈ ಘಟಕಗಳಿಗೆ ನೀರು ಸರಬರಾಜು ಕಡಿತಗೊಳಿಸಲು ಸಾಧ್ಯವಿಲ್ಲ ಎಂದು ಗ್ರಾಮೀಣಾಭಿವೃದ್ಧಿ ಖಾತೆ ಸಚಿವೆ ಪಂಕಜಾ ಮುಂಡೆ ಹೇಳಿದರು. ಪಂಕಜಾ ನಿರ್ದೇಶಕರಾಗಿರುವ ಕಂಪೆನಿಯೊಂದು ಡಿಸ್ಟಿಲರಿ ನಡೆಸುತ್ತಿದ್ದು ಜನರ ಹಿತಕ್ಕಿಂತ ಆ ಕಂಪೆನಿಯ ಹಿತವೇ ಅವರಿಗೆ ಮುಖ್ಯವಾಯಿತು ಎಂಬ ಆರೋಪ ಕೇಳಿ ಬಂದಿದೆ. ಜನರಿಗೆ ಕುಡಿಯುವ ನೀರು ಸರಬಾರಜು ಮಾಡಲು ಆದ್ಯತೆ ಕೊಡಬೇಕೆಂದು ಸರಕಾರಕ್ಕೆ  ಹೈಕೋರ್ಟ್ ನಿರ್ದೇಶನ ನೀಡಿದ್ದರೂ ಅದನ್ನು ಅನುಷ್ಠಾನಗೊಳಿಸಲು ಯಾವುದೇ ತುರ್ತುಕ್ರಮಗಳಿಗೆ ಮುಂದಾಗದಿರುವುದು ಎದ್ದು ಕಾಣುತ್ತದೆ.

ಸಾಲ ಮನ್ನಾ, ಬೆಳೆ ನಷ್ಟಕ್ಕೆ ಪರಿಹಾರ, ಕುಡಿಯುವ ನೀರು ಮತ್ತು ದಿನದ 24 ಗಂಟೆಯೂ ವಿದ್ಯುತ್ ಪೂರೈಕೆ … ಈ ರೀತಿಯಾಗಿ ಲೋಕಸಭೆ ಮತ್ತು ವಿಧಾನಸಭೆ ಚುನಾವಣೆಗಳ ವೇಳೆ ಪ್ರಧಾನಿ ನರೇಂದ್ರ ಮೋದಿ ಮರಾಠವಾಡ ರೈತರು ಮತ್ತು ಜನರಿಗೆ ಭರವಸೆಗಳ ಮಹಾಪೂರವನ್ನೇ ಹರಿಸಿದ್ದರು. ಕಾಂಗ್ರೆಸ್ ಮತ್ತು ನ್ಯಾಷನಲಿಸ್ಟ್ ಕಾಂಗ್ರೆಸ್ ಪಕ್ಷ (ಎನ್ ಸಿಪಿ)ದ ಭದ್ರಕೋಟೆ ಎಂದು ಪರಿಗಣಿಸಲಾಗಿದ್ದ ಈ ಪ್ರದೇಶದ ಎಂಟು ಲೋಕಸಭೆ ಸ್ಥಾನಗಳ ಪೈಕಿ ಆರರಲ್ಲಿ ಬಿಜೆಪಿ ಜಯಿಸಿತು. ಅದೇ ರೀತಿ ಅಲ್ಲಿನ ಒಟ್ಟು 46 ವಿಧಾನಸಭೆ ಸ್ಥಾನಗಳಲ್ಲಿ 15ರಲ್ಲಿ ಗೆದ್ದಿತು; ಅದಕ್ಕೂ ಮುನ್ನ ಅದಕ್ಕಿದ್ದಿದ್ದು ಎರಡು ಸ್ಥಾನ ಮಾತ್ರ. ಆದರೆ ಈಗ ಈ ಆಶ್ವಾಸನೆಗಳಲ್ಲಿ ಯಾವುದೂ ಈಡೇರಿಲ್ಲ. ಮೋದಿಯವರು ವಿದೇಶ ಪ್ರವಾಸಕ್ಕೆ ಸ್ವಲ್ಪ ಬಿಡುವು ಕೊಟ್ಟು ಇಲ್ಲಿನ ಪರಿಸ್ಥಿತಿಯ ಅಧ್ಯಯನಕ್ಕಾಗಿ ಇಲ್ಲಿಗೆ ಭೇಟಿ ಕೊಡುವುದು ಅಗತ್ಯ. ಕನಿಷ್ಟ ಪಕ್ಷ ಅಲ್ಪಾವಧಿಯ ಕ್ರಮಗಳಾದರೂ  ಸರಕಾರದ ಹೇಳಿಕೆಗಳು ಅಪ್ಪಟ ಸುಳ್ಳು ಎಂದು ಜನಾಬಾಯಿ ಮತ್ತು ಭುಮ್ರೆ ಯಾಕೆ ಹೇಳುತ್ತಾರೆ ಎನ್ನುವುದನ್ನು ತಿಳಿಯಲು ಮೋದಿಯವರಿಗೆ ಇದು ನೆರವಾಗುತ್ತದೆ.

ಅನು: ವಿಶ್ವ, ಕೋಲಾರ

‘ಬಂಡವಾಳಶಾಹಿಯಿಂದ ಆಜಾದಿ’ ಮೊಳಗಿಸಿದ ಮೇ ದಿನ

ಸಂಪುಟ: 10 ಸಂಚಿಕೆ: 20 May 8, 2016
ajadhi may day

ನಾಡೋಜ ಡಾ|| ಬರಗೂರು ರಾಮಚಂದ್ರಪ್ಪ ಮಾತನಾಡುತ್ತಿರುವುದು

‘ವಾರಕ್ಕೆ 35 ಗಂಟೆ, ದಿನಕ್ಕೆ 4 ಪಾಳಿ ಕೆಲಸಕ್ಕಾಗಿ’

ಬೆಂಗಳೂರು:

ಟೌನ್ ಹಾಲ್ ನಿಂದ ಪ್ರಾರಂಭವಾದ ಸಾವಿರಾರು ಕಾರ್ಮಿಕರ ಆಕರ್ಷಕ ಕೆಂಬಾವುಟದ ಮೆರವಣಿಗೆ ನಡೆದು ಸ್ವಾತಂತ್ರ್ಯ ಉದ್ಯಾನವನದಲ್ಲಿ ಸಮಾವೇಶಗೊಂಡಿತು. ಪ್ರತಿದಿನ ನಾಲ್ಕು ಪಾಳಿ ಕೆಲಸಕ್ಕಾಗಿ, ಕಾರ್ಮಿಕ ಕೆಲಸವನ್ನು ವಾರಕ್ಕೆ 35 ಗಂಟೆಗೆ ಸೀಮಿತಗೊಳಿಸಬೇಕೆಂದು ಒತ್ತಾಯಿಸುವ ದಿನವನ್ನಾಗಿ ಆಚರಿಸಲಾಯಿತು.

ಇದೇ ಸಂದರ್ಭದಲ್ಲಿ ಕನಿಷ್ಟ ಕೂಲಿ ರೂ.18 ಸಾವಿರಕ್ಕೆ ಏರಿಸಬೇಕೆಂದು, ಗುತ್ತಿಗೆ ಕಾರ್ಮಿಕರನ್ನು ಖಾಯಂ ಮಾಡಬೇಕೆಂದು ಆಗ್ರಹಿಸಲಾಯಿತು. ಸಭೆಯಲ್ಲಿ ಸಿಐಟಿಯು ರಾಜ್ಯ ಕಾರ್ಯದರ್ಶಿಗಳಾದ ಮೀನಾಕ್ಷಿ ಸುಂದರಂ, ಕೆ.ಎನ್.ಉಮೇಶ್, ಟಿ.ಲೀಲಾವತಿ, ಬೆಂ.ಉತ್ತರ ಜಿಲ್ಲಾ ಅಧ್ಯಕ್ಷರಾದ ಹೆಚ್.ಎನ್.ಗೋಪಾಲಗೌಡ, ಪ್ರಧಾನ ಕಾರ್ಯದರ್ಶಿ ಪ್ರತಾಪ್ ಸಿಂಹ, ಬೆಂ.ದಕ್ಷಿಣ ಜಿಲ್ಲಾ ಉಪಾಧ್ಯಕ್ಷರಾದ ಕೆ.ಪ್ರಕಾಶ್, ಕಾರ್ಮಿಕ ಮುಖಂಡರಾದ ಕೆ.ಎಸ್.ಸುಬ್ರಮಣಿ, ಮುನಿರಾಜು, ಹನುಮಂತರಾವ್ ಹವಾಲ್ದಾರ್, ರಮೇಶ್, ಹೆಚ್.ಡಿ.ರೇವಪ್ಪ ಮುಂತಾದ ಮುಖಂಡರು ಹಾಜರಿದ್ದರು. ಭೂಮ್ತಾಯಿ ಬಳಗದವರು ಹೋರಾಟದ ಹಾಡುಗಳನ್ನು ಸ್ಫೂರ್ತಿದಾಯಕವಾಗಿ ಹಾಡಿದರು.

‘ಕಾರ್ಮಿಕರ ಒಗ್ಗಟ್ಟು ಒಡೆಯುವ ಪ್ರಯತ್ನ ಹೆಚ್ಚುತ್ತಿದೆ’ – ಚಿಕ್ಕಬಳ್ಳಾಪುರ:

ಅಂಬೇಡ್ಕರ್ ಭವನದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಮಾಜಿ ಶಾಸಕರಾದ ಜಿ.ವಿ.ಶ್ರೀರಾಮರೆಡ್ಡಿರವರು ಮಾತನಾಡಿ, “ಬಂಡವಾಳಶಾಹಿಗಳು ವಿಶ್ವರ ಮೇಲೆ ಹಿಡಿತ ಸಾಧಿಸುತ್ತಿರುವ ಜತೆಗೆ ಕಾರ್ಮಿಕರ ಹಕ್ಕು ಮತ್ತು ಸೌಲಭ್ಯಗಳನ್ನು ಕಸಿದುಕೊಳ್ಳುವ ಹುನ್ನಾರ ನಡೆಸಿದ್ದಾರೆ. ಕಾರ್ಮಿಕರು ನಿತ್ಯವು ಶೋಷಣೆ ಮತ್ತು ದೌರ್ಜನ್ಯಕ್ಕೆ ಒಳಗಾಗುತ್ತಿದ್ದು, ಅವರ ಬದುಕು ಇನ್ನಷ್ಟು ಅಸಹನೀಯ ಮತ್ತು ಆತಂತ್ರಗೊಳ್ಳುತ್ತಿದೆ” ಎಂದು ತಿಳಿಸಿದರು.

ವಿವಿಧ ರೀತಿಯ ನೀತಿ, ನಿಯಮಗಳಿಂದ ಕಾರ್ಮಿಕರಲ್ಲಿ ಒಂದೆಡೆ ಆತಂಕ ಮತ್ತು ಭಯ ಕಾಡುತ್ತಿದ್ದರೆ, ಮತ್ತೊಂದೆಡೆ ಕೋಮುವಾದಿ, ಜಾತಿವಾದಿ ಸಂಘಟನೆಗಳ ಮೂಲಕ ಕಾರ್ಮಿಕರ ಶಕ್ತಿ ಒಡೆಯುವ ಪ್ರಯತ್ನ ನಡೆದಿದೆ. ಕಾರ್ಮಿಕರು ಎಲ್ಲವನ್ನು ಸೂಕ್ಷ್ಮವಾಗಿ ಗಮನಿಸಿ, ಮುನ್ನಡೆಯಬೇಕೆಂದು ಕರೆ ನೀಡಿದರು.

ಮುಖಂಡರಾದ ಎಂ.ಪಿ.ಮುನಿವೆಂಕಟಪ್ಪ, ಸಿದ್ಧಗಂಗಪ್ಪ, ಬಿ.ಎನ್.ಮುನಿಕೃಷ್ಣಪ್ಪ, ಲಕ್ಷ್ಮಿದೇವಮ್ಮ, ಮುಸ್ತಫಾ ಮತ್ತಿತರರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.
‘ಹೊರಾಟದಿಂದ ಮಾತ್ರ ಬೇಡಿಕೆಗೆ ಮನ್ನಣೆ’

ಉಡುಪಿ:

ಬೈಂದೂರಿನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಸಿಐಟಿಯು ರಾಜ್ಯ ಪ್ರಧಾನ ಕಾರ್ಯದರ್ಶಿ ಕಾಂ.ಎಸ್.ವರಲಕ್ಷ್ಮಿ ಮಾತನಾಡಿ “1896 ರಲ್ಲಿ ಕಾರ್ಮಿಕರು ನಡೆಸಿದ ಮೊದಲ ಹೋರಾಟದ ದಿನವನ್ನು ಮೇ ದಿನ ಆಚರಿಸಲಾಗುತ್ತಿದೆ. ಅಂದಿನಿಂದ ಇಂದಿನವರೆಗೂ ದುಡಿಯುವ ವರ್ಗ ತನ್ನ ನ್ಯಾಯಯುತ ಬೇಡಿಕೆಗಳಿಗಾಗಿ ಹೋರಾಟ ನಡೆಸುತ್ತಲೆ ಬಂದಿದೆ ಎಂದು ತಿಳಿಸಿದರು.

ಸಿಐಟಿಯು ಜಿಲ್ಲಾಧ್ಯಕ್ಷರಾದ ಕೆ.ಶಂಕರ್, ತಾಲ್ಲೂಕು ಕಾರ್ಯದರ್ಶಿ ಸುರೇಶ ಕಲ್ಲಾಗರ, ಮಾತನಾಡಿದರು. ಗಣೇಶ ತೊಂಡಿಮಕ್ಕಿ ಸ್ವಾಗತಿಸಿದರು. ವೆಂಕಟೇಶ್ ಕೋಣಿ ನಿರೂಪಿಸಿ ವಂದನಾರ್ಪಣೆ ಮಾಡಿದರು. ಮುಖಂಡರಾದ ದಾಸ ಭಂಡಾರಿ, ಶೀಲಾವತಿ, ಗಣೇಶ ಮೊಗವೀರ, ರಾಧಾಕೃಷ್ಣ, ಸುಶೀಲಾ ನಾಡ, ಜಯಶ್ರೀ, ನಾಗರತ್ನ ನಾಡ, ಶಾರದಾ ಬೈಂದೂರು, ಮಂಜು ಪೂಜಾರಿ ಮುಂತಾದ ಮುಖಂಡರು ಇದ್ದರು.

ಬ್ರಹ್ಮಾವರದಲ್ಲಿ ನಿವೃತ್ತ ಪ್ರಾಧ್ಯ್ಯಾಪಕರಾದ ಭಾಸ್ಕರ್ ಮಯ್ಯ, ಕಾರ್ಮಿಕ ಮುಖಂಡರಾಧ ಸುಭಾಷ್ ನಾಯಕ್, ವಿಠಲ ಪೂಜಾರಿ, ಉದಯಕುಮಾರ್, ಹರಿಪ್ರಸಾದ್, ರಾಮ ಕಾರ್ಕಡ, ಭವಾನಿ ಪೂಜಾರಿ, ಶಂಕರ್ ಕುನಾಲ್ ಸಾಸ್ತಾನ, ಸದಾಶಿವ ಪೂಜಾರಿ, ಕೃಷ್ಣ ಹಿಲಿಯಾಣ, ಭವಾನಿ, ಮುಂತಾದವರು ಭಾಗವಹಿಸಿದ್ದರು.
‘ಆರ್ಥಿಕ ಅವಿವೇಕ ದೇಶವನ್ನು ಆಳುತ್ತಿದೆ’

ತುಮಕೂರು:

ನಗರದ ಟೌನ್‍ಹಾಲ್ ನಲ್ಲಿ ಮೇ ದಿನಾಚರಣೆ ಅಂಗವಾಗಿ ಹಮ್ಮಿಕೊಂಡಿದ್ದ ಬಹಿರಂಗ ಕಾರ್ಯಕ್ರಮಕ್ಕೆ ಆಗಮಿಸಿದ ಹಿರಿಯ ಸಾಹಿತಿ, ನಾಡೋಜ ಡಾ||ಬರಗೂರು ರಾಮಚಂದ್ರಪ್ಪ ನವರು ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿ “ಇಪ್ಪತ್ತೇನೆಯ ಶತಮಾನದ ವಿವೇಕ ಮತ್ತು ಧಾರ್ಮಿಕ ಸಾಮರಸ್ಯವನ್ನು ಇಪ್ಪತೊಂದನೆ ಶತಮಾನದಲ್ಲಿ ಧಾರ್ಮಿಕ ಸಂಘರ್ಷ ಮತ್ತು ಆರ್ಥಿಕ ಅವಿವೇಕ ನಾಶಮಾಡಿದೆ. 20ನೇ ಶತಮಾನ ಆತ್ಮವಿಶ್ವಾಸದ ಶತಮಾನವಾಗಿತ್ತು. 21ನೇ ಶತಮಾನ ಅಸಹಾಯಕತೆಗೆ ದಾರಿ ಮಾಡಿಕೊಟ್ಟಿದೆ. ಸಮಾಜದಲ್ಲಿ ತಲೆ ತಗ್ಗಿಸುವಂತಹ ಕೆಲಸಗಳೇ ಹೆಚ್ಚು ನಡೆಯುತ್ತಿದೆ. ಆತ್ಯಾಚಾರ, ಆತ್ಮಹತ್ಯೆ, ಅಸಹಾಯಕತೆ ವೇಗವಾಗಿ ಬೆಳೆಯುತ್ತಿದೆ. ಆರ್ಥಿಕ ಅವಿಕೇಕ ದೇಶವನ್ನು ಆಳುತ್ತಿದೆ” ಎಂದು ವಿಷಾದ ವ್ಯಕ್ತಪಡಿಸಿದರು.

ಸಿಐಟಿಯು ಜಿಲ್ಲಾಧ್ಯಕ್ಷರಾದ ಸೈಯದ್ ಮುಜೀಬ್ ರವರು ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ಅಂಗನವಾಡಿ ನೌಕರರ ಸಂಘಟನೆಯ ಜಿಲ್ಲಾ ಕಾರ್ಯದರ್ಶಿ ಗುಲ್ಜರ್ ಬಾನು, ಸಿಐಟಿಯು ಪ್ರಧಾನ ಕಾರ್ಯದರ್ಶಿ ಎನ್.ಕೆ.ಸುಬ್ರಮಣ್ಯ, ಕೊಳಗೇರಿ ನಿವಾಸಿಗಳ ಹಿತರಕ್ಷಣಾ ಸಮಿತಿ ಅಧ್ಯಕ್ಷರಾದ ಎ.ನರಸಿಂಹಮೂರ್ತಿ, ಕಟ್ಟಡ ಕಾರ್ಮಿಕ ಸಂಘಟನೆಯ ರಾಜ್ಯ ಕಾರ್ಯದರ್ಶಿ ಬಿ ಉಮೇಶ್, ಜೀವ ವಿಮಾ ನೌಕರರ ಸಂಘದ ಜಗನ್ನಾಥ್, ಅಂಚೆ ನೌಕರರ ಸಂಘದ ಕಾಂತರಾಜು, ಪೌರಕಾರ್ಮಿಕ ಸಂಘದ ನರಸಿಂಹರಾಜು, ಮುಖಂಡರಾದ ಟಿ.ಜಿ.ಶಿವಲಿಂಗಯ್ಯ, ಪುಟ್ಟೇಗೌಡ, ಷಣ್ಮುಗಪ್ಪ, ನಾಗೇಶ್ ಹಾಜರಿದ್ದರು.

ಅಂತರಸನಹಳ್ಳಿ ಕೈಗಾರಿಕಾ ಪ್ರದೇಶದಿಂದ ಆಕರ್ಷಕವಾದ ರಾಲಿ ನಡೆಸಿದರು. ಕಾರ್ಮಿಕ ಮುಖಂಡರಾದ ನೌಷಾದ್ ಸೆಹಗಲ್ ಮತ್ತು ಲಕ್ಷ್ಮಣ್ ಸಂಗಡಿಗರು ಕ್ರಾಂತಿಗೀತಿಗಳನ್ನು ಹಾಡಿದರು.

‘ಮತ್ತೊಂದು ಮಹಾ ಮುಷ್ಕರ ಯಶಸ್ವಿಗೊಳಿಸಿ’ – ಹುಬ್ಬಳ್ಳಿ: 

ಕಾರ್ಮಿಕ ದಿನಾಚರಣೆ ಅಂಗವಾಗಿ ಜಿಲ್ಲೆಯಲ್ಲಿ ಹಮ್ಮಿಕೊಂಡಿದ ಸಭೆಯಲ್ಲಿ ಸಿಐಟಿಯು ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಮಹೇಶ ಪತ್ತಾರ  ಸರಕಾರಕ್ಕೆ ಸಲ್ಲಿಸಿದ 12 ಅಂಶದ ಬೇಡಿಕೆಗಳ ಕುರಿತು ಮೋದಿ ಸರಕಾರ ಯಾವುದೇ ಕಾಳಜಿ ವಹಿಸುತ್ತಿಲ್ಲ ಬದಲಾಗಿ ಅದಕ್ಕೆ ವ್ಯತಿರಿಕ್ತವಾಗಿ ಕಾರ್ಮಿಕ ಹಕ್ಕುಗಳ ಮೇಲೆ ತೀವ್ರತರವಾದ ದಾಳಿ ನಡೆಸುತ್ತಿದೆ. ಕೇಂದ್ರ ಸರಕಾರದ ಈ ಕಾರ್ಮಿಕ-ವಿರೋಧಿ ನೀತಿಗಳನ್ನು ವಿರೋಧಿಸಿ 2016 ಸೆಪ್ಟೆಂಬರ್ 2ರಂದು ಮತ್ತೊಂದು ಕಾರ್ಮಿಕರ ಮಹಾಮುಷ್ಕರ ನಡೆಸಲು ಕೇಂದ್ರ ಕಾರ್ಮಿಕ ಸಂಘಟನೆಗಳು ತಿರ್ಮಾನಿಸಿವೆ. ಮೇ-ದಿನದ ಸ್ಪೂರ್ತಿಯೊಂದಿಗೆ ಮುಷ್ಕರವನ್ನು ಯಶಸ್ವಿಗೊಳಿಸಲು ಮುಂದಾಗೋಣವೆಂದು

ಜವಳಿ ವರ್ತಕರ ಸಂಘದ ಸಭಾ ಭವನದಲ್ಲಿ ನಡೆದ ಸಭೆಯಲ್ಲಿ ಮೇ ದಿನ ಪ್ರಣಾಳಿಕೆ-2016ರ ಕುರಿತು ಕಾಂ.ಬಿ.ಎನ್.ಪೂಜಾರಿ ಮಾತನಾಡಿದರು, ವಿಜಯ ಗುಂಟ್ರಾಳ, ಡಾ.ಇಸಾಬೆಲ್ಲಾ ಝೇವಿಯರ್, ದಾಸ ಮಾತನಾಡಿದರು. ಬಿ.ಐ.ಈಳಿಗೇರ ರವರು ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ಇದಕ್ಕೂ ಮೊದಲು ನಗರದಲ್ಲಿ ಬೃಹತ್ ಮೆರವಣಿಗೆ ನಡೆಸಲಾಯಿತು.

ಧಾರವಾಡ ಜಿಲ್ಲಾ ಎಸ್.ಸಿ./ಎಸ್.ಟಿ. ಪೌರ ಕಾರ್ಮಿಕರ ಹಾಗೂ ನೌಕರರ ಸಂಘದ ನೇತೃತ್ವದಲ್ಲಿ ಕಾರ್ಮಿಕ ದಿನಾಚರಣೆ ಆಚರಿಸಲಾಯಿತು. ಅಂಬೇಡ್ಕರ್ ವೃತ್ತದಿಂದ ಚೆನ್ನಮ್ಮ ವೃತ್ತದವರೆಗೆ ಮೆರವಣಿಗೆ ನಡೆಯಿತು. ಸಂಘದ ಅಧ್ಯಕ್ಷ ವಿಜಯ ಗುಂಟ್ರಾಳ, ಮಹೇಶ್ ಪತ್ತಾರ, ಎಐಟಿಯುಸಿ ಮುಖಂಡರಾದ ದೇವಾನಂದ ಜಗಾಪುರ, ದಲಿತ ಮುಖಂಡ ಪಿತಾಂಬ್ರಪ್ಪ ಭಿಳಾರದ ಮುಂತಾದವರು ಮಾತನಾಡಿದರು.

ಹಾಸನ:

ಹೇಮಾವತಿ ಪ್ರತಿಮೆ ಬಳಿಯಿಂದ ಹೊರಟ ಕಾರ್ಮಿಕರು ನಗರದ ವಿವಿಧ ಬೀದಿಗಳಲ್ಲಿ ಮೆರವಣಿಗೆ ನಡೆಸಿದರು. ನಂತರ ಮಹಾರಾಜ ಪಾರ್ಕ್ ನಲ್ಲಿ ಮೇ ದಿನಾಚರಣೆ ನಡೆಯಿತು. ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಹಿರಿಯ ಕಾರ್ಮಿಕ ಮುಖಂಡರಾದ ಎಂ.ಸಿ.ಡೋಂಗ್ರ ವಹಿಸಿದ್ದರು. ಪ್ರಸ್ಥಾವಿಕವಾಗಿ ಸಿಐಟಿಯು ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಧರ್ಮೇಶ್ ಮಾತನಾಡಿದರು.

ಮುಖ್ಯ ಅಥಿತಿಗಳಾಗಿ ಹಾಸನ ನಗರ ಸಭಾ ಅಧ್ಯಕ್ಷರಾದ ಎಚ್.ಎಸ್.ಅನಿಲ್ ಕುಮಾರ್, ಬ್ಯಾಂಕ್ ನೌಕರರ ಸಂಘದ ಜಿಲ್ಲಾಧ್ಯಕ್ಷರಾದ ಪರಮಶಿವಯ್ಯ, ಸರ್ಕಾರಿ ನೌಕರರ ಒಕ್ಕೂಟದ ಜಿಲ್ಲಾ ಕಾರ್ಯದರ್ಶಿ ಡಿ.ಟಿ. ಶಿವಣ್ಣ, ಗ್ರಾಮೀಣ ಅಂಚೆ ನೌಕರರ ಸಂಘದ ಮುಖಂಡ ಜಗದೀಶ್, ವಿಮಾ ನೌಕರರ ಸಂಘದ ಮಂಜುನಾಥ್, ಕರ್ನಾಟಕ ಪ್ರಾಂತ ರೈತ ಸಂಘದ ಜಿಲ್ಲಾಧ್ಯಕ್ಷ ಎಚ್.ಆರ್.ನವೀನ್ ಕುಮಾರ್, ದಲಿತ ಮುಖಂಡರಾದ ಮರಿಜೋಸೆಫ್, ಅಕ್ಷರ ದಾಸೋಹ ನೌಕರರ ಸಂಘದ ಜಿಲ್ಲಾಧ್ಯಕ್ಷರಾದ ಎಂ.ಬಿ.ಪುಷ್ಪ, ಅಂಗನವಾಡಿ ನೌಕರರ ಸಂಘದ ಚನ್ನಮ್ಮ, ಸಿಐಟಿಯು ಜಿಲ್ಲಾ ಖಜಾಂಚಿ ಜಿ.ಪಿ.ಸತ್ಯನಾರಾಯಣ ಭಾಗವಹಿಸಿದ್ದರು. ಸಿಐಟಿಯು ಹಾಸನ ತಾಲ್ಲೂಕು ಕಾರ್ಯದರ್ಶಿ ಅರವಿಂದ್ ಕಾರ್ಯಕ್ರಮವನ್ನು ನಿರೂಪಿಸಿದರು, ಶಾವೆಲ್ ಹಮೀದ್ ವಂದಿಸಿದರು.

ಬೆಳಗಾವಿ:

ಜಿಲ್ಲೆಯ ರಾಮದುರ್ಗ ತಾಲ್ಲೂಕಿನಲ್ಲಿ ಕಾರ್ಮಿಕ ದಿನಾಚರಣೆ ಅಂಗವಾಗಿ ಜಿಲ್ಲೆಯ ಸಾಧಕರಿಗೆ ಗೌರವ ಸಮರ್ಪಣಾ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು. ಹಿರಿಯ ಸ್ವಾತಂತ್ರ ಹೋರಾಟಗಾರ, ಕಮ್ಯೂನಿಸ್ಟ್ ಪಕ್ಷದ ಹಿರಿಯ ಸಂಗಾತಿ ನರಗುಂದ ಬಂಡಾಯ ಮುಂಚೂಣಿ ನಾಯಕ ಎಸ್.ಎಚ್. ಕಪ್ಪಣ, ಕರ್ನಾಟಕ ಶಾಸನ ಸಭೆಯಲ್ಲಿ ಶಾಸಕರಾಗಿದ್ದ ಸವೋದಯ ನಾಯಕ ಸದಾಶಿವ ಬೋಸ್ಲೇ, ಕೆಎಲ್ ಇ ಸಾಮ್ರಾಜ್ಯದ ವಿರುದ್ಧ ಹೋರಾಟ ಮಾಡುತ್ತಿರುವ ಶ್ರೀಮತಿ ಸಾಯಿಪಾಟೀಲ, ಪರಿಸರ ಹೋರಾಟಗಾರ ಶಿವಾಜಿ ಕಾಂಗೇಣೇಕರ, ದೇವದಾಸಿ ಮಹಿಳೆಯರು ಮತ್ತು ಅವರ ಮಕ್ಕಳ ಕಲ್ಯಾಣಕ್ಕಾಗಿ ದುಡಿಯುತ್ತಿರುವ ಬಿ.ಎಲ್.ಪಾಟೀಲ ಹಾಗೂ ಮೌಢ್ಯಾಚರಣೆ ವಿರುದ್ಧ ಹೋರಾಡುತ್ತಿರುವ ಅಶೋಕ ಅಯ್ಯ ಸೇರಿದಂತೆ ಹಲವು ಸಾಧಕರಿದೆ ಸನ್ಮಾನ ಮಾಡುವ ಮೂಲಕ ದಿನಾಚರಣೆಯನ್ನು ಹಮ್ಮಿಕೊಳ್ಳಲಾಗಿತ್ತು.

ಕಾರ್ಯಕ್ರಮದ ಮುಂಚೆ ಆಕರ್ಷಕವಾದ ಮೆರವಣಿಗೆ ನಡೆಯಿತು. ಮುಖ್ಯ ಭಾಷಣಕಾರರಾಗಿ ಸಿಐಟಿಯು ರಾಜ್ಯ ಕಾರ್ಯದರ್ಶಿ ಕೆ. ಮಹಾಂತೇಶ ಭಾಗವಹಿಸಿದ್ದರು. ಸಭೆಯ ಅಧ್ಯಕ್ಷತೆಯನ್ನು ಕಾರ್ಮಿಕ ಮಖಂಡರಾದ ವಿ.ಪಿ. ಕುಲಕರ್ಣಿ ವಹಿಸಿದ್ದರು. ಜಿಲ್ಲಾ ಕಾರ್ಯದರ್ಶಿ ಗೈಬು ಜೈನೇಖಾನ ನಿರೂಪಿಸಿದರು.

ಉತ್ತರ ಕನ್ನಡ:

ಜಿಲ್ಲೆಯಲ್ಲಿ ಹಲವು ಸಭೆಗಳನ್ನು ನಡೆಸಲಾಯಿತು. ಲೇಖಕ ಎಂ.ಎ.ಖತೀಬ ಮೇ ಡೇ ಹುತಾತ್ಮರಿಗೆ ಗೌರವ ಸಲ್ಲಿಸಿ ಮಾತನಾಡಿದರು.

ಕಲಬುರಗಿ:

ನಗರದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ನಡೆಸಿದರು. ಸಿಐಟಿಯು ರಾಜ್ಯ ಅಧ್ಯಕ್ಷರಾದ ಕಾಂ||ವಿಜೆಕೆ ನಾಯರ್ ಸಭೆಯನ್ನು ಉದ್ಘಾಟಿಸಿದರು. ಅಧ್ಯಕ್ಷತೆಯನ್ನು ಶಾಂತಾ ಘಂಟೆ, ಮುಖ್ಯ ಅತಿಥಿಗಳಾಗಿ ಮಾರುತಿ ಮಾನ್ಪಡೆ ಭಾಗವಹಿಸಿದ್ದರು. ಸಜ್ಜನ್ ರವರು ನಿರೂಪಣೆ ಮಾಡಿದರು.

ದಕ್ಷಿಣ ಕನ್ನಡ, ಮೈಸೂರು, ಬಳ್ಳಾರಿ, ಮಂಡ್ಯ, ಕೋಲಾರ, ಕೊಪ್ಪಳ, ಗದಗ, ಬೆಳ್ತಂಗಡಿ, ಚಿಕ್ಕೋಡಿ, ಚನ್ನರಾಯನಪಟ್ಟಣ, ಶ್ರೀನಿವಾಸಪುರ, ಕರ್ನಾಟಕ ರಾಜ್ಯ ಔಷಧ ಮತ್ತು ಮಾರಾಟ ಪ್ರತಿನಿಧಿಗಳ ಸಂಘಟನೆ, ಕಟ್ಟಡ ಮತ್ತು ಇತರೆ ನಿರ್ಮಾಣ ಕಾರ್ಮಿಕರ ಸಂಘಟನೆ, ಅಂಗನವಾಡಿ, ಅಕ್ಷರ ದಾಸೋಹ, ಆಶಾ, ಹಮಾಲಿ, ಬೀಡಿ ಕಾರ್ಮಿಕ ಸಂಘಟನೆಗಳು, ಸಾರಿಗೆ ನೌಕರರು, ಆಟೋ ರಿಕ್ಷಾ ಚಾಲಕರು ಸೇರಿದಂತೆ ಹಲವು ಸಂಘಟನೆಗಳಿಂದ ಜಿಲ್ಲಾ ತಾಲ್ಲೂಕುಗಳಲ್ಲಿ ಮೇ ದಿನದ ಆಜಾದಿ ರಾಲಿ ನಡೆದ ಹಲವು ವರದಿಗಳು ಬಂದಿವೆ.

ಉದ್ಯೋಗಗಳು ಎಲ್ಲಿವೆ ?!

ಸಂಪುಟ: 10ಸಂಚಿಕೆ: 20 May 8, 2016
udyoga

ಲೋಕಸಭಾ ಚುನಾವಣೆಗಳಲ್ಲಿ ನರೇಂದ್ರ ಮೋದಿ ಮತ್ತು ಬಿಜೆಪಿ ದೊಡ್ಡ ಪ್ರಮಾಣದಲ್ಲಿ ಉದ್ಯೋಗ ನಿರ್ಮಾಣವನ್ನು ತಮ್ಮ ಪ್ರಧಾನ ಚುನಾವಣಾ ಆಶ್ವಾಸನೆಯಾಗಿ ಮಾಡಿದ್ದರು. ಮೋದಿ ಸರಕಾರದ ಎರಡು ವರ್ಷಗಳ ನಂತರ ಉದ್ಯೋಗ ರಂಗದಲ್ಲಿನ ಶೋಚನೀಯ ದಾಖಲೆ ಎದ್ದು ಕಾಣುತ್ತಿದೆ.
ನವ-ಉದಾರವಾದಿ ಬೆಳವಣಿಗೆ ಉದ್ಯೋಗಗಳನ್ನು ನಿರ್ಮಿಸುವುದಿಲ್ಲ, ಬದಲಿಗೆ ಉದ್ಯೋಗಗಳನ್ನು ಕೊಲ್ಲುತ್ತದೆ. ಧೋರಣೆಗಳಲ್ಲಿ ಮೂಲಭೂತ ಬದಲಾವಣೆ ತರದೆ ಕೇವಲ ವ್ಯವಸ್ಥೆಗೆ ಎಷ್ಟೇ ತೇಪೆ ಹಾಕಿದರೂ ನಿರುದ್ಯೋಗದ ಸಮಸ್ಯೆ ಪರಿಹಾರವಾಗುವುದಿಲ್ಲ.
ಈಗ ಬೇಕಾಗಿರುವುದು ಒಂದು ಪರ್ಯಾಯ ಬೆಳವಣಿಗೆಯ ಪಥ, ಎಲ್ಲ ವಲಯಗಳಲ್ಲೂ ಉದ್ಯೋಗಾವಕಾಶಗಳನ್ನು ನಿರ್ಮಿಸಬಲ್ಲ ದಿಕ್ಕು. ಕೃಷಿಯಲ್ಲಿ ಮತ್ತು ಮೂಲರಚನೆಗಳ ಅಭಿವೃದ್ಧಿಯಲ್ಲಿ ಸಾರ್ವಜನಿಕ ಹೂಡಿಕೆಯನ್ನು ಹೆಚ್ಚಿಸಬೇಕಾಗಿದೆ. ಏಕೆಂದರೆ ಇವೇ ಉದ್ಯೋಗಗಳನ್ನು ನಿರ್ಮಿಸುವಂತವು.

ಇತ್ತೀಚೆಗೆ ಕಾರ್ಪೊರೇಟ್ ಮಾಧ್ಯಮಗಳು ದೇಶದಲ್ಲಿ ಹೆಚ್ಚುತ್ತಿರುವ ಉದ್ಯೋಗಹೀನತೆ ಮತ್ತು ಉದ್ಯೋಗಾವಕಾಶ ಬೆಳವಣಿಗೆಯ ಕೊರತೆಯ ಸಮಸ್ಯೆಯನ್ನು ಚರ್ಚಿಸುತ್ತಿವೆ. ಬಹುಶಃ ಲೇಬರ್ ಬ್ಯೂರೊ ನಡೆಸುತ್ತಿರುವ ಎಂಟು ಹೆಚ್ಚಿನ ಉದ್ಯೋಗಾವಕಾಶಗಳು ಬೇಕಾಗುವ ಉದ್ದಿಮೆಗಳ ತ್ರೈಮಾಸಿಕ ಉದ್ಯೋಗ ಸರ್ವೆಯಿಂದ ಇದು ಸ್ಫುರಿಸಿರಬೇಕು. ಜವಳಿ, ಗಾರ್ಮೆಂಟ್, ಆಭರಣ ತಯಾರಿ, ಮಾಹಿತಿ ತಂತ್ರಜ್ಞಾನ, ಚರ್ಮ, ಕೈಮಗ್ಗ, ಲೋಹಗಳು ಮತ್ತು ವಾಹನಗಳು ಈ ಎಂಟು ಉದ್ದಿಮೆಗಳಲ್ಲಿ 2015ರಲ್ಲಿ ಕೇವಲ 1.35 ಲಕ್ಷ ಉದ್ಯೋಗಗಳು ನಿರ್ಮಾಣವಾದವು, 2014ರಲ್ಲಿ ಇದು 4.9ಲಕ್ಷ ಇತ್ತು, 2009ರಲ್ಲಿ 12.5 ಲಕ್ಷ ಇತ್ತು  ಎಂದು ಈ ಸರ್ವೆಗಳು ತೋರಿಸಿವೆ.

ಗ್ರಾಮೀಣ ಉದ್ಯೋಗಗಳಿಗೆ ಸಂಬಂಧ ಪಟ್ಟಂತೆ ಪರಿಸ್ಥಿತಿ ಇನ್ನೂ ಕೆಟ್ಟದಾಗಿದೆ. ದೇಶದ ಒಟ್ಟು ಆಂತರಿಕ ಉತ್ಪನ್ನ(ಜಿಡಿಪಿ)ದಲ್ಲಿ  ಕೃಷಿಯ ಪಾಲು ಇಳಿಮುಖವಾಗುತ್ತಿದೆ. ಗ್ರಾಮೀಣ ಬಡವರು ಮತ್ತು ಯುವಜನತೆಗೆ ಕೃಷಿ ಬಿಟ್ಟು ಬೇರೆ ಉದ್ಯೋಗಗಳನ್ನು ಒದಗಿಸಬಲ್ಲ ಕ್ರಮಗಳಿಲ್ಲ. ಈ ವರ್ಷದ ಮಾರ್ಚ್ ತಿಂಗಳ ಮೂರನೇ ವಾರದ ವರೆಗೆ ಮಹಾತ್ಮ ಗಾಂಧಿ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯಲ್ಲಿ ಉದ್ಯೋಗಕ್ಕೆ ಅರ್ಜಿ ಹಾಕಿದವರ ಸಂಖ್ಯೆ 8.4 ಕೋಟಿ. ಇದು ಗ್ರಾಮೀಣ ನಿರುದ್ಯೋಗ  ಯಾವ ಪ್ರಮಾಣದಲ್ಲಿ ಇದೆ ಎಂಬುದನ್ನು ತೋರಿಸುತ್ತದೆ.

ಹುಸಿಯಾದ ಚುನಾವಣಾ ಆಶ್ವಾಸನೆ

ಲೋಕಸಭಾ ಚುನಾವಣೆಗಳಲ್ಲಿ ನರೇಂದ್ರ ಮೋದಿ ಮತ್ತು ಬಿಜೆಪಿ ದೊಡ್ಡ ಪ್ರಮಾಣದಲ್ಲಿ ಉದ್ಯೋಗ ನಿರ್ಮಾಣವನ್ನು ತಮ್ಮ ಪ್ರಧಾನ ಚುನಾವಣಾ ಆಶ್ವಾಸನೆಯಾಗಿ ಮಾಡಿದ್ದರು. ಮೋದಿ ಸರಕಾರದ ಎರಡು ವರ್ಷಗಳ ನಂತರ ಉದ್ಯೋಗ ರಂಗದಲ್ಲಿನ ಶೋಚನೀಯ ದಾಖಲೆ ಎದ್ದು ಕಾಣುತ್ತಿದೆ. ಸರಕಾರ 7.5ಶೇ. ಜಿಡಿಪಿ ಬೆಳವಣಿಗೆಯಾಗಿದೆ ಎನ್ನುತ್ತದೆ. ಈ ದಾವೆಯೇ ನಂಬಲರ್ಹವಲ್ಲ. ಆದರೂ ಇಂತಹ ನವ-ಉದಾರವಾದಿ ಬೆಳವಣಿಗೆ ಉದ್ಯೋಗಾವಕಾಶ ಗಳನ್ನು ನಿರ್ಮಿಸಲಾರದು ಎಂಬುದು ಸ್ವಯಂವೇದ್ಯ.

ಸರಳ ಸಂಗತಿಯೆಂದರೆ ನವ-ಉದಾರವಾದಿ ಬೆಳವಣಿಗೆ ಉದ್ಯೋಗಗಳನ್ನು ನಿರ್ಮಿಸುವುದಿಲ್ಲ, ಬದಲಿಗೆ ಉದ್ಯೋಗಗಳನ್ನು ಕೊಲ್ಲುತ್ತದೆ. ಧೋರಣೆಗಳಲ್ಲಿ ಮೂಲಭೂತ ಬದಲಾವಣೆ ತರದೆ ಕೇವಲ ವ್ಯವಸ್ಥೆಗೆ ಎಷ್ಟೇ ತೇಪೆ ಹಾಕಿದರೂ ನಿರುದ್ಯೋಗದ ಸಮಸ್ಯೆ ಪರಿಹಾರವಾಗುವುದಿಲ್ಲ.

ಖಾಸಗಿ ಹೂಡಿಕೆ ಮತ್ತು ಖಾಸಗೀಕರಣವನ್ನು ಹೆಚ್ಚೆಚ್ಚು ಅವಲಂಬಿಸುವುದರಿಂದ ಉದ್ಯೋಗಾವಕಾಶಗಳೇನೂ ಹುಟ್ಟಿಕೊಳ್ಳುವುದಿಲ್ಲ. ಏಕೆಂದರೆ ನವ-ಉದಾರವಾದಿ ಅರ್ಥಶಾಸ್ತ್ರ ಹೂಡಿಕೆಗಳು ಬಂಡವಾಳ ಹೆಚ್ಚಾಗಿ ಬೇಕಾಗುವ, ಶ್ರಮ ಉಳಿಸುವ ತಂತ್ರಜ್ಞಾನವನ್ನು ಅವಲಂಬಿಸುವ, ಆಮೂಲಕ ದೊಡ್ಡ ಪ್ರಮಾಣದಲ್ಲಿ ದುಡಿಮೆಗಾರರ ಪಡೆಯ ಅಗತ್ಯವಿಲ್ಲದ ಕ್ಷೇತ್ರಗಳಿಗೆ ಹೋಗುವಂತೆ ಮಾಡುತ್ತದೆ. ಅಲ್ಲದೆ ಉದ್ಯೋಗ ಕಾಂಟ್ರಾಕ್ಟ್ ಆಧಾರದಲ್ಲಿ ಮಾತ್ರವೇ ಲಭ್ಯವಾಗುವಂತೆ ಮಾಡುತ್ತದೆ. ಆಮೂಲಕ ಉದ್ಯೋಗಗಳು ಅಭದ್ರ ಮತ್ತು ಅಲ್ಪಕಾಲದ್ದಾಗಿರುವಂತೆ ಮಾಡುತ್ತದೆ.

ಔದ್ಯೋಗೀಕರಣದ ನಾಶ

ಅನೌಪಚಾರಿಕ ವಲಯ ನಮ್ಮ ದೇಶದಲ್ಲಿ ಅತಿ ಹೆಚ್ಚು ಉದ್ಯೋಗಗಳನ್ನು ಒದಗಿಸುವ ವಲಯ. ಇಲ್ಲಿಯೂ ಕೂಡ ಉದ್ಯೋಗಾವಕಾಶಗಳು 2004-05ರಿಂದ 2011-12ರ ನಡುವೆ 6ಶೇ.ದಷ್ಟು ಇಳಿಮುಖಗೊಂಡವು.

ಹೀಗೆ ನವ-ಉದಾರವಾದಿ ಬೆಳವಣಿಗೆಯ ಆದ್ಯತೆಗಳು ಶ್ರಮ ಹೆಚ್ಚಾಗಿ ಬೇಕಾಗುವ ಉದ್ದಿಮೆಗಳೂ ಅಲ್ಲ, ಸಣ್ಣ ಪ್ರಮಾಣದ ಕೈಗಾರಿಕಾ ಘಟಕಗಳ  ಅಭಿವೃದ್ಧಿಯೂ ಅಲ್ಲ. ವ್ಯಾಪಾರ ಉದಾರೀಕರಣ ವಿದೇಶಗಳಿಂದ ಬರುವ ಕೈಗಾರಿಕಾ ಸರಕುಗಳಿಗೆ ಸುಂಕದರಗಳನ್ನು ಇಳಿಸುತ್ತಿದೆ. ಇದರಿಂದಾಗಿ ಹಲವು ವಲಯಗಳಲ್ಲಿ  ಔದ್ಯೋಗೀಕರಣ ಇಲ್ಲವಾಗುತ್ತಿದೆ.

ನವ-ಉದಾರವಾದಿ ಧೋರಣೆಗಳಲ್ಲಿ ಸರಕಾರ ದೊಡ್ಡ ಕಾರ್ಪೊರೇಟ್‍ಗಳಿಗೆ ಮತ್ತು ಶ್ರೀಮಂತ ವಲಯಗಳುಗೆ ಸಾವಿರಾರು ಕೋಟಿ ರೂ.ಗಳಷ್ಟು ಸಬ್ಸಿಡಿಗಳನ್ನು ಒದಗಿಸುತ್ತದೆ, ವರು ತೆರಬೇಕಾದ ತೆರಿಗೆಗಳನ್ನು ಬಿಟ್ಟುಕೊಡುತ್ತದೆ, ಆದರೆ ಕೈಮಗ್ಗ, ಗೇರು, ನಾರು ಮತ್ತು ಕೈಕಸಬುಗಳಂತಹ ಲಕ್ಷಾಂತರ ದುಡಿಯುವ ಗಂಡಸರು ಮತ್ತು ಹೆಂಗಸರಿಗೆ ಜೀವನಾಧಾರ ಕಲ್ಪಿಸುವ ಮತ್ತು ಉದ್ಯೋಗಗಳನ್ನು ಒದಗಿಸುವ ಪಾರಂಪರಿಕ ಉದ್ದಿಮೆಗಳಿಗೆ ಬೆಂಬಲ ಕೊಡಲು ನಿರಾಕರಿಸುತ್ತದೆ. ಕೃಷಿಯಲ್ಲಿ ಹೂಡಿಕೆಯ ಕಡಿತ ಮತ್ತು ಸಾಮಾಜಿಕ ವಲಯಗಳಿಗೆ-  ಶಿಕ್ಷಣ, ಆರೋಗ್ಯ ಮತ್ತು ಮನರೇಗ-ಹಣನೀಡಿಕೆಯಲ್ಲಿ ತೀವ್ರ ಕಡಿತ ಕೂಡ ದೇಶದಲ್ಲಿ ಉದ್ಯೋಗಾವಕಾಶ ನಿರ್ಮಾಣದ ಸಾಧ್ಯತೆಯನ್ನು ಸಂಕುಚಿತ ಗೊಳಿಸಲು ಕಾರಣವಾಗುತ್ತದೆ.

ಪರ್ಯಾಯ ದಿಕ್ಕು

ಈಗ ಬೇಕಾಗಿರುವುದು ಒಂದು ಪರ್ಯಾಯ ಬೆಳವಣಿಗೆಯ ಪಥ, ಎಲ್ಲ ವಲಯಗಳಲ್ಲೂ ಉದ್ಯೋಗಾವಕಾಶಗಳನ್ನು ನಿರ್ಮಿಸಬಲ್ಲ ದಿಕ್ಕು. ಕೃಷಿಯಲ್ಲಿ ಮತ್ತು ಮೂಲರಚನೆಗಳ ಅಭಿವೃದ್ಧಿಯಲ್ಲಿ ಸಾರ್ವಜನಿಕ ಹೂಡಿಕೆಯನ್ನು ಹೆಚ್ಚಿಸಬೇಕಾಗಿದೆ. ಏಕೆಂದರೆ ಇವೇ ಉದ್ಯೋಗಗಳನ್ನು ನಿರ್ಮಿಸುವಂತವು.

ಶ್ರಮ ಹೆಚ್ಚಾಗಿ ಬೇಕಾಗುವ ಕೈಗಾರಿಕೆಗಳು, ಸಣ್ಣ ಪ್ರಮಾಣದ ಉದ್ದಿಮೆಗಳು ಮತ್ತು ಕೃಷಿ ಸಂಸ್ಕರಣ ಉದ್ದಿಮೆಗಳಿಗೆ ಪ್ರೋತ್ಸಾಹ, ಉತ್ತೇಜಕಗಳನ್ನು  ನೀಡಬೇಕು.

ಶಿಕ್ಷಣ ಮತ್ತು ಆರೋಗ್ಯ ವಲಯಗಳಲ್ಲಿ ಸಾರ್ವಜನಿಕ ಹೂಡಿಕೆಯನ್ನು ಗಮನಾರ್ಹವಾಗಿ ಹೆಚ್ಚಿಸಿದರೆ ಅದರಿಂದ ಸಾರ್ವಜನಿಕ ಶಿಕ್ಷಣ ಮತ್ತು ಆರೋಗ್ಯ ವ್ಯವಸ್ಥೆಗಳು ವಿಸ್ತರಿಸಿ, ಗುಣಾತ್ಮವಾಗಿ ಉತ್ತಮಗೊಂಡು ಉದ್ಯೋಗಾವಕಾಶಗಳು ಸೃಷ್ಟಿಯಾಗುತ್ತವೆ.

ಇದರೊಂದಿಗೆ ಯುವಜನರಿಗೆ ವೃತ್ತಿಪರವಾದ ಮತ್ತು ಕುಶಲತೆಯನ್ನು ಅಭಿವೃದ್ಧಿಗೊಳಿಸುವುದಕ್ಕೆ ಗಮನ ಕೇಂದ್ರೀಕರಿಸುವ ಕಾರ್ಯಕ್ರಮಗಳು ಹೊಸದಾಗಿ ತೆರೆದುಕೊಳ್ಳುವ ವಿಧ-ವಿಧವಾದ ಕೆಲಸಗಳನ್ನು ನಿರ್ವಹಿಸಲು ಅವರನ್ನು ಸಜ್ಜುಗೊಳಿಸುತ್ತದೆ.

– ಪ್ರಕಾಶ ಕಾರಟ್

ಬಂಗಾಲದ ಜನತೆ ನಮಗೆ ಮತ ನೀಡುತ್ತಿದ್ದಾರೆ ಎಂಬ ಸೂಚನೆಗಳು ಸಿಗುತ್ತಿವೆ- ಯೆಚೂರಿ

ಸಂಪುಟ: 10 ಸಂಚಿಕೆ: 20 May 8, 2016
tebhaga

ಈ ಸಂಚಿಕೆ ಮುದ್ರಣಕ್ಕೆ ಹೋಗುವ ವೇಳೆಗೆ ಪಶ್ಚಿಮ ಬಂಗಾಳದಲ್ಲಿ ವಿಧಾನಸಭಾ ಚುನಾವಣೆಗಳಿಗೆ ಮತದಾನದ ಎಲ್ಲ ಹಂತಗಳು ಪೂರ್ಣಗೊಂಡಿವೆ. ಸುಮಾರಾಗಿ ಎಲ್ಲ ಹಂತಗಳಲ್ಲೂ ಮತದಾನ 80ಶೇ.ದಷ್ಟಿತ್ತು. ಮಾಧ್ಯಮ ವರದಿಗಳ ಪ್ರಕಾರ ಮತದಾನದ ಶೇಕಡಾವಾರು ಹೀಗಿದೆ:

ಹಂತ 1ಎ:80.0; 1ಬಿ:79.5; 2:79.7; 3:79.2; 4:78.1;5:81.6 ಮತ್ತು ಹಂತ 6: 84.2

ಚುನಾವಣೆ ಆರಂಭವಾಗುವ ಮೊದಲು ಟಿಎಂಸಿ ಸರಕಾರದ ಕಾರ್ಯವೈಖರಿ ಏನೇ ಇರಲಿ, ಅದು ಮತ್ತೆ ಅಧಿಕಾರಕ್ಕೆ ಬರುತ್ತದೆ, ಬಹುಶಃ ಸಂಖ್ಯಾಬಲ ತುಸು ಇಳಿಯಬಹುದು ಎಂದು ಒಪಿನಿಯನ್ ಪೋಲ್‍ಗಳು ಹೇಳುತ್ತವೆ ಎನ್ನಲಾಗುತ್ತಿತ್ತು. ಆದರೆ ಮತದಾನ ಮುಗಿಯುವ ವೇಳೆಗೆ ಚಿತ್ರ ಬದಲಾದಂತೆ ಕಾಣುತ್ತದೆ. ಮಾಧ್ಯಮಗಳು ಎಡರಂಗ ಮತ್ತು ಕಾಂಗ್ರೆಸ್ ಸರಕಾರ ರಚಿಸುವ ಬಗ್ಗೆ ಮಾತನಾಡುತ್ತಿವೆ. ಕೊಲ್ಕತಾದ ಪ್ರಮುಖ ದೈನಿಕ ‘ದಿ ಟೆಲಿಗ್ರಾಫ್’ ಈ ಬಗ್ಗೆ ಪ್ರಧಾನ ಕಾರ್ಯದರ್ಶಿ ಸೀತಾರಾಮ್ ಯೆಚೂರಿಯವರನ್ನು ಸಂದರ್ಶಿಸಿ ಕೇಳಿದ ಪ್ರಶ್ನೆಗೆ ಉತ್ತರಿಸುತ್ತ “ನಮ್ಮ ವರದಿಗಳು ಜನರು ನಮಗೆ ಮತ ನೀಡುತ್ತಿದ್ದಾರೆ ಎಂದು ಸೂಚಿಸುತ್ತಿವೆ. ಗ್ರಾಮೀಣ ಪ್ರದೇಶಗಳಲ್ಲಿ ಪ್ರಚಾರ ಮಾಡುವಾಗ ಶಾರದಾ ಚಿಟ್‍ಫಂಡ್ ವಿಷಯ ಬಂದಾಗಲೆಲ್ಲ ಆಕ್ರೋಶ ವ್ಯಕ್ತವಾಗುತ್ತಿತ್ತು. ಹಳ್ಳಿಗರಿಗೆ ತಮ್ಮ ಜೀವನಪರ್ಯಂತದ ಉಳಿತಾಯಗಳನ್ನು ಕಳಕೊಳ್ಳುವುದು ಒಂದು ದೊಡ್ಡ ಸಂಗತಿಯೇ ಸರಿ. ನಾರದಾ ಕುಟುಕು ಕಾರ್ಯಾಚರಣೆದ ಪ್ರಭಾವ ಎಷ್ಟಿದೆಯೆಂದು ಹೇಳಲಾರೆ. ಆದರೆ ಶಾರಧಾ ಚಿಟ್‍ಪಂಡ್ ಒಂದು ಪ್ರಶ್ನೆಯಂತೂ ಆಗಿದೆ” ಎಂದರು.

ಸಿಪಿಐ(ಎಂ) ಮುಖಂಡರಾದ ಬುದ್ಧದೇಬ್ ಭಟ್ಟಾಚಾರ್ಯ ಮತ್ತು ಕಾಂಗ್ರೆಸ್ ಮುಖಂಡ ರಾಹುಲ್ ಗಾಂಧಿ ಒಂದೇ ವೇದಿಕೆಯಲ್ಲಿ ಪ್ರಚಾರ ನಡೆಸಿದ್ದರ ಬಗ್ಗೆ ಕೇಳಿದಾಗ “ಇದು ಮುಖ್ಯವಾಗಿ ಕೆಳಗಿನಿಂದ ಉಂಟಾದ ಪ್ರಭಾವದಿಂದಾಗಿ ಸಂಭವಿಸಿತು. ಮೇಲಿನಿಂದ ಯಾರೂ ಇದನ್ನು ಮಾಡಲಿಲ್ಲ. ಜನತೆಯಿಂದ ಎದ್ದು ಬಂದ ಭಾವನೆಗಳಿಂದಾಗಿ ಇದು ಏರ್ಪಟ್ಟಿತು. ಇಲ್ಲವಾದರೆ ಕಾಂಗ್ರೆಸ್‍ನೊಂದಿಗೆ ಬುದ್ಧದಾ ಅವರನ್ನು ಊಹಿಸಿಕೊಳ್ಳಲು ಸಾಧ್ಯವೇ” ಎಂದು ಪ್ರಶ್ನಿಸಿದರು.

ಈ ಸಭೆಯ ವೇಳೆಗೆ ಅದಾಗಲೇ 294ರಲ್ಲಿ 216 ಸ್ಥಾನಗಳಲ್ಲಿ ಚುನಾವಣೆ ಮುಗಿದಿತ್ತು. ಇದನ್ನು ಮೊದಲೇ ಮಾಡಿದ್ದರೆ ಪ್ರಭಾವ ಇನ್ನೂ ಹೆಚ್ಚಾಗುತ್ತಿತ್ತಲ್ಲವೇ ಎಂದು ಕೇಳಿದಾಗ ಯೆಚೂರಿ “ಹಾಗನ್ನುವುದು ಸರಿಯಾಗದು. ವಾಸ್ತವವಾಗಿ ಆಗಲೇ ಪ್ರಭಾವ ಉಂಟಾದ್ದರಿಂದ ಇದು ಸಂಭವಿಸಿತು, ಇದರ ಕೀರ್ತಿ ಬಂಗಾಲದ ಜನತೆಗೆ ಸಲ್ಲಬೇಕು” ಎಂದರು.

ಎಡರಂಗ ಕಾಂಗ್ರೆಸಿನೊಂದಿಗೆ ಸೇರಿ ಸರಕಾರ ರಚಿಸುವ ಬಗ್ಗೆ ಕೇಳಿದಾಗ ಅದಿನ್ನೂ ನಮ್ಮ ಅಜೆಂಡಾದಲ್ಲಿ ಚರ್ಚೆಗೆ ಬಂದಿಲ್ಲ, ನಾವು ಆ ಬಗ್ಗೆ ಯೋಚಿಸಿಲ್ಲ ಈ ಸಮರ ಮುಗಿಯಲಿ ಎಂದರು.

ಕೆಲವು ಪ್ರದೇಶಗಳಲ್ಲಿ ಅಭಿವೃದ್ಧಿಯ ಭಾಗವಾಗಿ ಜಮೀನು ಕಳಕೊಂಡವರಿಗೆ ಜೀವನಾಧಾರ ಕಲ್ಪಿಸಲು ಹುಟ್ಟಿಕೊಂಡ ‘ಸಿಂಡಿಕೇಟ್’ಗಳು ಈಗ ಟಿಎಂಸಿ ಆಳ್ವಿಕೆಯಲ್ಲಿ ಮಾಫಿಯಾಗಳಾಗಿ ಬಿಟ್ಟಿವೆ, ಇದರ ವಿರುದ್ಧ ಕಾಂಗ್ರೆಸ್ ಮುಖಂಡ ರಾಹುಲ್ ಗಾಂಧಿ ಮಾತಾಡಿದ್ದಾರೆ, ಪ್ರಧಾನ ಮಂತ್ರಿಗಳೂ ಮಾತಾಡಿದ್ದಾರೆ, ಸಿಪಿಐ(ಎಂ)ನ ನಿಲುವೇನು ಎಂದು ಕೇಳಿದಾಗ, ಸೀತಾರಾಮ್ ಯೆಚೂರಿಯವರು “ನಾವು ಅದನ್ನು ಎದುರಿಸಿ ನಿಲ್ಲಬೇಕಾಗಿದೆ, ಅದನ್ನು ನಿಲ್ಲಿಸಿ ಬಿಡಬೇಕಾಗಿದೆ. ಅವುಗಳ ಕಾರ್ಯಾಚರಣೆ ಈಗ ಮಾಫಿಯಾದಂತೆಯೇ ಇದೆ. ಎಡರಂಗ ಆಳ್ವಿಕೆಯ ಕೊನೆಯ ಭಾಗದ ವೇಳೆಗೆ ಈ ಪ್ರವೃತ್ತಿಗಳು ಕಾಣಲಾರಂಭಿಸಿದ್ದವು. 20ವರ್ಷಗಳ ನಮ್ಮ ಸರಕಾರದ ನಂತರ ಹಲವು ಮಂದಿ ನಮ್ಮತ್ತ ಬರಲಾರಂಭಿಸಿದ್ದರು, ನಮ್ಮ ಸಿದ್ಧಾಂತದಿಂದಾಗಿ ಅಲ್ಲ,, ಬದಲಾಗಿ, ನಾವು ಅಧಿಕಾರದಲ್ಲಿ ಇದ್ದುದರಿಂದಾಗಿ. ಅವರು ನಿಜವಾಗಿ ಏನು ಮಾಡುತ್ತಿದ್ದಾರೆ ಎಂದು ಅರಿಯಲು ಸಮಯ ಹಿಡಿಯಿತು. ಆದರೆ ಆ ವೇಳೆಗಾಗಲೇ ಕೇಡು ಉಂಟಾಗಿತ್ತು. ಅದಕ್ಕೆ ನಾವು ಬೆಲೆ ತೆತ್ತಿದ್ದೇವೆ. ಅದನ್ನು ಕೈಗೆತ್ತಿಕೊಳ್ಳಲೇಬೇಕು, ಅದೊಂದು ಮಾಫಿಯಾ ಎಂಬ ಕಾರಣಕ್ಕಷ್ಟೇ ಅಲ್ಲ, ಅದು ಪ್ರಜಾಪ್ರಭುತ್ವವನ್ನು ಬುಡಮೇಲು ಮಾಡುವ ಅತಿ ದೊಡ್ಡ ಅಂಶ ಎಂಬ ಕಾರಣಕ್ಕಾಗಿ. ಕಾನೂನು-ವ್ಯವಸ್ಥೆಯನ್ನು ಮತ್ತೆ ತರಲು ಅದನ್ನು ನೇರವಾಗಿ ಎದುರಿಸಲೇ ಬೇಕು” ಎಂದರು.

ಮತ್ತೆ ಅಧಿಕಾರಕ್ಕೆ ಬಂದರೆ ಆದ್ಯತೆಗಳೇನು ಎಂದು ಕೇಳಿದಾಗ ಕೈಗಾರಿಕೀಕರಣವಿಲ್ಲದೆ ಉದ್ಯೋಗಾವಕಾಶ ನಿರ್ಮಾಣ ಮಾಡದೆ ಮುಂನ್ನಡೆ ಸಾಧ್ಯವಿಲ್ಲ. ಅದು ಸರಿಯಾದ ಧೋರಣೆಯಾಗಿತ್ತು ಎಂದು ಭಾವಿಸುತ್ತೇನೆ, ಅದು ಹಾಗೆಯೇ ಮುಂದುವರೆಯುತ್ತದೆ ಎಂದು ಯೆಚೂರಿ ಉತ್ತರಿಸಿದರು. ಈಗ ಬಂಗಾಲದ ಭವಿಷ್ಯಕ್ಕೆ ಉದ್ಯೋಗಗಳ ಸೃಷ್ಟಿ ಬೃಹತ್ ಪ್ರಮಾಣದಲ್ಲಿ ನಡೆಯಬೇಕಾಗಿದೆ, ಬಂಗಾಲದ ಯುವಜನರಿಗೆ ಇಲ್ಲಿ ದಾರಿಗಳನ್ನು ತೆರೆದು ಕೊಡಬೇಕಾಗಿದೆ. ಮತ್ತು ಮಹಿಳೆಯರ ಸುರಕ್ಷಿತತೆಯ ಪ್ರಶ್ನೆಯೂ ಇದೆ. ತಮ್ಮ ವಿದ್ಯಾರ್ಥಿ ದೆಸೆಯ ದಿನಗಳಲ್ಲಿ ಇದೊಂದು ಸಮಸ್ಯೆಯೇ ಆಗಿರಲಿಲ್ಲ ಎಂದು ಹೇಳಿದರು.

‘ಲೋಕಾಯುಕ್ತ’ತಕ್ಕೆ ಇನ್ನೊಂದು ಕಂಟಕ

ಸಂಪುಟ: 10 ಸಂಚಿಕೆ: 20 May 8, 2016

ಲೋಕಾಯುಕ್ತದ ಮೂಲಕ ಭ್ರಷ್ಟಾಚಾರದ (ಅದರಲ್ಲೂ ಉನ್ನತ ವಲಯದ ಭ್ರಷ್ಟಾಚಾರದ) ವಿರುದ್ಧ ಕ್ರಮಗಳಿಗೆ ಉತ್ತಮ ವ್ಯವಸ್ಥೆ ಸ್ಥಾಪಿಸಿ ಮುಖ್ಯಮಂತ್ರಿಯನ್ನು ಜೈಲಿಗೆ ಕಳಿಸಿದ ಕರ್ನಾಟಕ ಈಚಿನ ವರ್ಷಗಳಲ್ಲಿ ಈ ನಿಟ್ಟಿನಲ್ಲಿ ಅಡಿಗಡಿಗೂ ಎಡವುತ್ತಿದೆ. ಆ ವ್ಯವಸ್ಥೆಯನ್ನು ನಾಶ ಮಾಡುವತ್ತ ಸಾಗಿದೆ. ನ್ಯಾ. ಸಂತೋಷ ಹೆಗಡೆ ಅವರ ಪರಿಣಾಮಕಾರಿ ಅವಧಿಯ ನಂತರ ಸೂಕ್ತ ಲೋಕಾಯುಕ್ತರನ್ನು ನೇಮಿಸುವುದರಲ್ಲಿ ಸತತವಾಗಿ ಎಡವುತ್ತಿದೆ. ಲೋಕಾಯುಕ್ತ ವ್ಯವಸ್ಥೆಗೆ ಒಂದರ ಮೇಲೊಂದು ಕಂಟಕಗಳು ಬರುತ್ತಿವೆ. ವಿವಿಧ ಸರಕಾರಗಳು/ಮುಖ್ಯಮಂತ್ರಿಗಳು ಸೂಚಿಸಿದ ವ್ಯಕ್ತಿಗಳ ಮೇಲೆ ವಿವಿಧ ಆಪಾದನೆಗಳು ಬರುತ್ತಿದ್ದು, ಅವರು ಅಥವಾ ಸರಕಾರ ಹಿಂಜರಿಯುವ ಮೂಲಕ ಲೋಕಾಯುಕ್ತರ ನೇಮಕದಲ್ಲಿ ವಿಳಂಬ ಆಗುತ್ತಿದೆ. ನ್ಯಾ. ಭಾಸ್ಕರ ರಾವ್ ಅವರನ್ನು ಲೋಕಾಯುಕ್ತರಾಗಿ ನೇಮಿಸಿದ ನಂತರ ಅವರ ಮಗನಿಂಧ ಅವರ ಸ್ಥಾನದ ದುರುಪಯೋಗ ಲೋಕಾಯುಕ್ತ ವ್ಯವಸ್ಥೆಯನ್ನು ಒಳಗಿನಿಂದಲೇ ಕೊರೆಯಲು ಆರಂಭವಾಗಿತ್ತು. ಆ ಪ್ರಕರಣದಲ್ಲಿ ನ್ಯಾ. ಭಾಸ್ಕರ ರಾವ್ ರಾಜೀನಾಮೆಯ ನಂತರ, ಹೊಸ ಲೋಕಾಯುಕ್ತ ನೇಮಕದಲ್ಲಿ ವಿಳಂಬ, ಸಾಲದ್ದಕ್ಕೆ  ಉಪಲೋಕಾಯುಕ್ರ ಅಡಿ ಅವರ ವಿರುದ್ಧ ದೋಷಾರೋಪಣೆ ಇಡೀ ವ್ಯವಸ್ಥೆಯನ್ನೇ ಅತಂತ್ರವಾಗಿಸಿತ್ತು. ಅದು ಸಾಲದೆಂಬಂತೆ ಆ ನಂತರ, ಲೋಕಾಯುಕ್ತಕ್ಕೆ ಬದಲಿಯಾಗಿ ಎಸಿಬಿ (ಭ್ರಷ್ಟಾಚಾರ ನಿಗ್ರಹ ದಳ) ರಚನೆ ಭ್ರಷ್ಟಾಚಾರ-ವಿರೋಧಿ ಕ್ರಮದ ವ್ಯವಸ್ಥೆಯನ್ನೇ ಬುಡಮೇಲು ಮಾಡಿದೆ.

lok-inn

ಇವೆಲ್ಲದರ ಹಿನ್ನೆಲೆಯಲ್ಲಿ ರಾಜ್ಯ ಸರಕಾರ ಲೋಕಾಯುಕ್ತ ಹುದ್ದೆಗೆ ಹಲವು ವಿವಾದಗಳ ನಡುವೆ ನ್ಯಾ. ಎಸ್. ಆರ್. ನಾಯಕ್ ಅವರ ಹೆಸರನ್ನು ಸೂಚಿಸಿ ರಾಜ್ಯಪಾಲರಿಗೆ ಕಳಿಸಿತ್ತು. ರಾಜ್ಯಪಾಲರು ನ್ಯಾ. ನಾಯಕ್ ಅವರ ಹೆಸರನ್ನು ತಿರಸ್ಕರಿಸಿ ಹಿಂದೆ ಕಳಿಸುವ ಮೂಲಕ ಲೋಕಾಯುಕ್ತ ವ್ಯವಸ್ಥೆಗೆ ಇನ್ನೊಂದು ಕಂಟಕ ಎದುರಾಗಿದೆ. ಭಾರತದ ಸಂವಿಧಾನದ ಪ್ರಕಾರ ರಾಜ್ಯಪಾಲರು ಸಾಮಾನ್ಯವಾಗಿ ಚುನಾಯಿತ ಸರಕಾರದ ಶಿಫಾರಸುಗಳನ್ನು ಮನ್ನಿಸಬೇಕು. ಸರಕಾರ ಸಂವಿಧಾನ ಉಲ್ಲಂಘಿಸಿದ ಅಥವಾ ಅದರ ಸಂವಿಧಾನ-ವಿರೋಧಿ ಕೃತ್ಯಗಳ ಅಪರೂಪದ ಸಂದರ್ಭಗಳಲ್ಲಿ ಮಾತ್ರ ಅವರು ಸರಕಾರದ ಶಿಫಾರಸುಗಳನ್ನು ತಿರಸ್ಕರಿಸಬಹುದು. ಈ ದೃಷ್ಟಿಯಿಂದ ನ್ಯಾ. ಎಸ್. ಆರ್. ನಾಯಕ್ ಅವರ ಸೂಚನೆಯ ಸಾಧಕ-ಬಾಧಕಗಳು ಏನೇ ಇರಲಿ, ರಾಜ್ಯಪಾಲರ ಕ್ರಮ ಸರಿಯಲ್ಲ. ರಾಜ್ಯಪಾಲರು ಎಂದಿನಂತೆ ಕೇಂದ್ರದಲ್ಲಿ ಆಳುವ ಸರಕಾರದ ರಾಜಕೀಯ ಪ್ರತಿನಿಧಿಯಂತೆ ಈ ಕ್ರಮ ಕೈಗೊಂಡಿದ್ದಾರೆ.

ಲೋಕಾಯುಕ್ತ ವ್ಯವಸ್ಥೆಯಿಂದ ಜೈಲುವಾಸ ಕಂಡ ಯೆಡಿಯೂರಪ್ಪನವರನ್ನು ರಾಜ್ಯ ಪಕ್ಷದ ಅಧ್ಯಕ್ಷರನ್ನಾಗಿ ಆರಿಸಿದ ಬಿಜೆಪಿ ಪಕ್ಷ ಲೋಕಾಯುಕ್ತ ವ್ಯವಸ್ಥೆ ಗಟ್ಟಿಗೊಳಿಸುವ ಬಗ್ಗೆ ಎಷ್ಟು ಬದ್ಧವಾಗಿದೆ ಅಥವಾ ಪ್ರಾಮಾಣಿಕವಾಗಿದೆ ಎಂಬುದು ಎಲ್ಲರಿಗೂ ತಿಳಿದಿದೆ. ಇದೇ ರಾಜ್ಯಪಾಲರು ಮಾಜಿ ಮುಖ್ಯಮಂತ್ರಿಗಳ ಮೇಲೆ ಕೇಸು ಹಾಕಲು ಬೇಕಾದ ಅನುಮತಿಯನ್ನು ಹಿಂತೆಗೆಯುವ ಮೂಲಕ ಲೋಕಾಯುಕ್ತ ವ್ಯವಸ್ಥೆಯ ಪ್ರಮುಖ ಪರಿಣಾಮಕಾರಿ ಕ್ರಮದ ಒಂದು ಉದಾಹರಣೆಯನ್ನು ಹೊಸಕಿ ಹಾಕಿದ್ದರು ಎಂದು ಇಲ್ಲಿ ನೆನಪು ಮಾಡಿಕೊಳ್ಳಬೇಕು. ಆದ್ದರಿಂದ ರಾಜ್ಯಪಾಲರ ಈ ಕ್ರಮ ಕಳಂಕರಹಿತರು ಲೋಕಾಯುಕ್ತರಾಗಿರಬೇಕು ಎಂಬ ಕಾಳಜಿಯಿಂದ ತೆಗೆದುಕೊಂಡದ್ದಲ್ಲ. ಒಂದು ಕಡೆ ತಾನು ಲೋಕಾಯುಕ್ತ ವ್ಯವಸ್ಥೆ ಪರ ಎಂದು ಪೋಸು ಕೊಡುತ್ತಾ, ಕಾಂಗ್ರೆಸ್ ಸರಕಾರ ಮತ್ತು ಮುಖ್ಯಮಂತ್ರಿಯನ್ನು ಭ್ರಷ್ಟರೆಂದು ‘ಬದನಾಮ್’ ಮಾಡುತ್ತಾ, ಇನ್ನೊಂದು ಕಡೆ ಲೋಕಾಯುಕ್ತ ವ್ಯವಸ್ಥೆಯನ್ನು ನಿಷ್ಕ್ರಿಯಗೊಳಿಸುವುದರಲ್ಲಿ ಕಾಂಗ್ರೆಸ್ ಜತೆ ಶಾಮೀಲಾಗುವ ಬಿಜೆಪಿಯ ತಂತ್ರವನ್ನು ಜಾರಿ ಮಾಡಲು ರಾಜ್ಯಪಾಲರ ಅಧಿಕಾರವನ್ನು ಬಳಸಲಾಗಿದೆ. 2014 ಚುನಾವಣೆಯಲ್ಲಿ ಕಾಂಗ್ರೆಸ್ ಭ್ರಷ್ಟಾಚಾರದ ವಿರುದ್ಧ ಪ್ರಚಾರ ಮಾಡಿ ಅಧಿಕಾರಕ್ಕೆ ಬಂದ ಬಿಜೆಪಿ ಕೇಂದ್ರದಲ್ಲಿ ಲೋಕಪಾಲ್ ವ್ಯವಸ್ಥೆ ಬಗ್ಗೆ ಎರಡು ವರ್ಷವಾದರೂ ಉಸಿರೆತ್ತಿಲ್ಲ.  ಬಿಜೆಪಿ ಸರಕಾರ ಇರುವ ಹೆಚ್ಚಿನ ರಾಜ್ಯಗಳಲ್ಲೂ ಲೋಕಾಯುಕ್ತದಂತಹ ವ್ಯವಸ್ಥೆ ಜಾರಿಗೆ ತಂದಿಲ್ಲ.

ರಾಜ್ಯದಲ್ಲಿ ಅತ್ಯಂತ ಭ್ರಷ್ಟ ಆಡಳಿತ ಕೊಟ್ಟ ಬಿಜೆಪಿ ಸರಕಾರದಿಂದ ಬೇಸತ್ತ ಜನ ಆರಿಸಿದ ಕಾಂಗ್ರೆಸ್ ಸರಕಾರ ಸಹ ಲೋಕಾಯುಕ್ತ ವ್ಯವಸ್ಥೆಯನ್ನು ಗಟ್ಟಿ ಗೊಳಿಸುವ ಬದಲು ಕಿತ್ತು ಹಾಕುವ ಸರಣಿ ಕ್ರಮಗಳನ್ನು ಕೈಗೊಂಡಿದೆ. ಲೋಕಾಯುಕ್ತ ಹುದ್ದೆಗೆ ಸೂಕ್ತರಾದ ಕಳಂಕರಹಿತ ನ್ಯಾಯಮೂರ್ತಿಗಳು ಲಭ್ಯವಿಲ್ಲ ಎಂದೇನಿಲ್ಲ. ನ್ಯಾ. ನಾಯಕ್ ಅವರನ್ನು ಸೂಚಿಸಿದರೆ ರಾಜ್ಯಪಾಲರು ಅದನ್ನು ತಿರಸ್ಕರಿಸುತ್ತಾರೆ. ಈಗಾಗಲೇ ಹಲ್ಲು ಕಿತ್ತಿರುವ ಲೋಕಾಯುಕ್ತ ವ್ಯವಸ್ಥೆ ಇನ್ನಷ್ಟು ಕಾಲ ಅತಂತ್ರವಾಗಿ ಮುಂದುವರೆಯುತ್ತದೆ ಎಂಬ ಲೆಕ್ಕಾಚಾರದ ಮೇಲೆನೇ ಅವರ ನೇಮಕಕ್ಕೆ ಪಟ್ಟು ಹಿಡಿದಿದ್ದರೂ ಆಶ್ಚರ್ಯವಿಲ್ಲ. ಹೀಗೆ ಲೋಕಾಯುಕ್ತ ವ್ಯವಸ್ಥೆ ಕಾಂಗ್ರೆಸ್-ಬಿಜೆಪಿಗಳ ಸಾರ್ವಜನಿಕ ಪೋಸು ಮತ್ತು ಒಳಹುನ್ನಾರಗಳ ಆಟಕ್ಕೆ ಬಲಿಯಾಗಿದೆ. ಸೂಕ್ತ ಲೋಕಾಯುಕ್ತರನ್ನು ನೇಮಿಸುವ, ಆ ವ್ಯವಸ್ಥೆಯನ್ನು ಗಟ್ಟಿ ಗೊಳಿಸಲು ಸಾರ್ವಜನಿಕ ಒತ್ತಡ ಹೇರಬೇಕಾಗಿದೆ.

ಅದೇ ಸಮಯದಲ್ಲಿ ಮೂಲತಃ ಭ್ರಷ್ಟ ವ್ಯವಸ್ಥೆಯಾಗಿರುವ ಬಂಡವಾಳಶಾಹಿ (ಅದರಲ್ಲೂ ಈಗಿನ ನವ-ಉದಾರವಾದಿ ಹಂತದಲ್ಲಿ) ವ್ಯವಸ್ಥೆಯನ್ನು ಬದಲಾಯಿಸದೆ ಭ್ರಷ್ಟಾಚಾರವನ್ನು ಹೋಗಲಾಡಿಸಲು ಸಾಧ್ಯವಿಲ್ಲ. ಬಂಡವಾಳಶಾಹಿ ಆಳ್ವಿಕೆಯ ಮೂರೂ ಅಂಗಗಳನ್ನು ಆವರಿಸಿರುವ ಭ್ರಷ್ಟಾಚಾರವನ್ನು ಒಂದು ಕಳಂಕರಹಿತ ಲೋಕಾಯುಕ್ತ ತೊಡೆದು ಹಾಕಬಹುದು ಎಂಬುದು ಒಂದು ಭ್ರಮೆ ಎಂದು ತಿಳಿದುಕೊಳ್ಳಬೇಕು. ಆದ್ದರಿಂದ ಭ್ರಷ್ಟಾಚಾರವನ್ನು ನಿಗ್ರಹಿಸಲು ಹತೋಟಿಗೆ ತರಲು ಲೋಕಾಯುಕ್ತ ವ್ಯವಸ್ಥೆ ಸ್ಥಾಪಿಸಲು ಹೋರಾಟವನ್ನು, ಭ್ರಷ್ಟ ಬಂಡವಾಳಶಾಹಿ ವ್ಯವಸ್ಥೆಯ ವಿರುದ್ಧ ಹೋರಾಟದ ಜತೆ ಸಮ್ಮಿಳಿತಗೊಳಿಸುವುದು ದುಡಿಯುವ ವರ್ಗದ ಚಳುವಳಿಯ ಕರ್ತವ್ಯ.

ಪ್ರಗತಿಪರ ಕಲಾವಿದ ಆರ್. ಚೊಕ್ಕಲಿಂಗಂ ಇನ್ನಿಲ್ಲ

ಸಂಪುಟ: 10 ಸಂಚಿಕೆ: 20 May 8, 2016

ಸಮುದಾಯ ಕೆ.ಜಿ.ಎಫ್ಹ್ ಘಟಕದ ಸಂಸ್ಥಾಪಕರಲ್ಲಿ ಒಬ್ಬರಾಗಿದ್ದ ಹಾಗೂ ಸಮುದಾಯ ರಾಜ್ಯ ಸಮಿತಿಯ ಸದಸ್ಯರಾಗಿ ಧೀರ್ಘಕಾಲ ಸೇವೆಸಲ್ಲಿಸಿದ್ದ ಹಿರಿಯ ರಂಗಕಲಾವಿದರಾದ ಆರ್.ಚೊಕ್ಕಲಿಂಗಂರವರು (66ವರ್ಷ) ಕೆಲದಿನಗಳ ಅನಾರೋಗ್ಯದಿಂದಾಗಿ ದಿನಾಂಕ ಮೇ 3 ರಂದು  ಸಂಜೆ 5.30ಕ್ಕೆ ನಿಧನರಾಗಿದ್ದಾರೆ.

chokkalingamma

1971ರಲ್ಲಿ ತಮಿಳುನಾಡಿನ ತಂಜಾವೂರಿನಿಂದ ಬಂದು ಬಿಇಎಂಎಲ್ ನಲ್ಲಿ ಉದ್ಯೋಗಿಯಾಗಿದ್ದ ಇವರು ಹಲವಾರು ಕನ್ನಡ ರಂಗನಾಟಕಗಳು, ಬೀದಿನಾಟಕಗಳಲ್ಲಿ ನಟಿಸಿರುವುದು ಮಾತ್ರವಲ್ಲದೇ, ಹಲವಾರು ನಾಟಕಗಳಿಗೆ ಸಂಗೀತ ನಿರ್ದೇಶನ ಮತ್ತು ಬೆಳಕು ವಿನ್ಯಾಸ ಮಾಡಿರುತ್ತಾರೆ. ಸ್ವತ: ಕವಿಗಳೂ ಆಗಿದ್ದ ಶ್ರೀ ಚೊಕ್ಕಲಿಂಗಂ ರವರು ತಣ್ಣೀರ್ ತಣ್ಣೀರ್, ಸೀರುಂ ಪುಯಲಿನ್ ತಾಲಾಟ್ಟು, ವೈಗರೈ ವೆಳೈಯಿಲೆ, ಮತ್ತಿತರ ಹಲವು ರಂಗ/ಬೀದಿ ತಮಿಳು ನಾಟಕಗಳನ್ನು ನಿರ್ದೇಶಿಸಿ ರಾಜ್ಯ ಮಟ್ಟದ ಸ್ಫರ್ಧೆಗಳಲ್ಲಿ ಪ್ರಶಸ್ತಿಗಳನ್ನು ಪಡೆದಿರುತ್ತಾರೆ.

1981 ರಲ್ಲಿ  17 ದಿನಗಳ ಕಾಲ ಅವಿಭಜಿತ ಕೋಲಾರ ಜಿಲ್ಲೆಯಾದ್ಯಂತ ನಡೆದ “ರೈತನತ್ತ ಸಮುದಾಯದ ಜಾತಾ”ದ ಸಂದರ್ಭದಲ್ಲಿ ಪ್ರಮುಖ ಪಾತ್ರವನ್ನು ವಹಿಸಿರುತ್ತಾರೆ. ಕೆಜಿಎಫ್ಹ್ ಸಮುದಾಯ ಸಂಘಟನೆಗೆ ಕಳೆದ ಮೂರುವರೆ ದಶಕಗಳಿಂದ ನಿರಂತರ ವಾಗಿ ಮಾರ್ಗದರ್ಶನ ನೀಡು ತ್ತಿದ್ದರು. ಸಮುದಾಯದ ರಾಜ್ಯ ಸಮಿತಿ ಸದಸ್ಯರಾಗಿದ್ದ ಸಂದರ್ಭದಲ್ಲಿ ರಾಜ್ಯ ಸಂಘಟನೆಗೂ ಸೂಕ್ತ ಸಲಹೆಗಳು ಅವರಿಂದ ಸಿಗುತ್ತಿತ್ತು. ಇದಲ್ಲದೇ ಸ್ಥಳೀಯ ತಮಿಳು ಮಂಡ್ರಮ್, ಕನ್ನಡ ಮಿತ್ರರು ಸಂಸ್ಥೆಯ ಆಜೀವ ಸದಸ್ಯರಾಗಿಯೂ, ಕನ್ನಡ ಸಾಹಿತ್ಯ ಪರಿಷತ್ತಿನ ಸದಸ್ಯರಾಗಿಯೂ ಸೇವೆ ಸಲ್ಲಿಸಿರುತ್ತಾರೆ.

ಇವರ ಅಗಲಿಕೆಯೂ ಕೋಲಾರ ಜಿಲ್ಲೆಯ ರಂಗಚಳವಳಿಗೆ ತುಂಬಲಾರದ ನಷ್ಟವಾಗಿದೆ. ಸಮುದಾಯ-35 ಜನಸಂಸ್ಕೃತಿ ಉತ್ಸವದ ಈ ಸಂದರ್ಭದಲ್ಲಿ ಸಮುದಾಯ ಘಟಕದ ಸಂಸ್ಥಾಪಕರಲ್ಲಿ ಒಬ್ಬರಾಗಿದ್ದ ಶ್ರೀ ಚೊಕ್ಕಲಿಂಗಂ ರವರ ಅಗಲಿಕೆ ಖೇದಕರವಾದುದು. ಸಮುದಾಯದ ಕಾರ್ಯಕಾರಿ ಸಮಿತಿ ಮತ್ತು ಕೆ.ಜಿ.ಎಫ್. ಸಮುದಾಯ-35 ರ ಉತ್ಸವ ಸಮಿತಿಗಳು ಭಾವಪೂರ್ಣ ಶ್ರದ್ಧಾಂಜಲಿಯನ್ನು ಸಲ್ಲಿಸಿವೆ.