RSS

Category Archives: ಈ ವಾರ

ಬಿಜೆಪಿ ಕಾರ್ಯಕಾರಿಣಿ : ಕರಾಳ ಮುಖ ಮುಚ್ಚಿಕೊಳ್ಳುವ ಕಸರತ್ತು

ಈ ವಾರ – ಎಸ್.ವೈ. ಗುರುಶಾಂತ್
ಸಂಪುಟ ೯, ಸಂಚಿಕೆ ೧೬, ೧೯ ಏಪ್ರಿಲ್ ೨೦೧೫

ಇದೇ ೨೦೧೫ರ ಎಪ್ರಿಲ್ ೩ ಮತ್ತು ೪ರಂದು ಬೆಂಗಳೂರಿನಲ್ಲಿ ಜರುಗಿದ ಭಾರತೀಯ ಜನತಾ ಪಕ್ಷದ ರಾಷ್ಟ್ರೀಯ ಕಾರ್ಯಕಾರಿಣಿ ಸಭೆ ಒಂದು ಪ್ಲಾಪ್ ಶೋ ಎಂದೇ ಹೇಳಬೇಕಾಗುತ್ತದೆ. ಬಿಜೆಪಿ ನೇತೃತ್ವದ ಸರಕಾರ ಕೇಂದ್ರದಲ್ಲಿ ಅಧಿಕಾರಕ್ಕೆ ಬಂದು ವರುಷವಾಗುತ್ತಿದೆ. ಮೋದಿ ಸರಕಾರದ ನೀತಿಗಳು ಹಾಗೂ ಕೈಗೊಳ್ಳುತ್ತಿರುವ ಹಾನಿಕಾರಕ ಕ್ರಮಗಳು ಜನತೆಯಲ್ಲಿ ಸಾಕಷ್ಟು ಆಕ್ರೋಶವನ್ನು ಹುಟ್ಟಿಸಿವೆ. ಅಧಿಕಾರರೂಢ ಪಕ್ಷವಾಗಿ ದೇಶದ ಜನತೆಗೆ ಉತ್ತರವನ್ನು ನೀಡಬೇಕಾದ ಹೊಣೆಗಾರಿಕೆ ಬಿಜೆಪಿ ಕಾರ್ಯಕಾರಿಣಿಯ ಮೇಲೆ ಇತ್ತು. ಮೇಲಾಗಿ ಜನತೆಯ ಮನೋಭಾವವನ್ನು ಅರಿತು ತನ್ನ ಪಕ್ಷದ ಸರಕಾರವನ್ನು ಸರಿದಾರಿಗೆ ತರುವ ಕ್ರಮಗಳನ್ನು ಕೈಗೊಳ್ಳಬೇಕಿತ್ತು. ಆದರೆ ವರ್ತಮಾನದ ಯಾವುದೇ ಪ್ರಮುಖ ವಿಷಯಗಳ ಮೇಲೆ ಚರ್ಚಿಸಿ, ಗಂಭೀರ ಕ್ರಮ ವಹಿಸುವ ಕಾಳಜಿ ಲವಲೇಶವೂ ಅಲ್ಲಿ ಕಾಣಲಿಲ್ಲ. ಮಾತ್ರವಲ್ಲ, ಭೂಸ್ವಾಧೀನ ಕಾಯ್ದೆಯ ತಿದ್ದುಪಡಿಗಳ ಕರಾಳ ಸುಗ್ರೀವಾಜ್ಞೆ, ಕೋಮುವಾದೀ ಧಾಳಿಗಳು ಮತ್ತು ಜನವಿರೋಧಿ ನೀತಿಗಳ ಜಾರಿಯನ್ನು ಮರೆ ಮಾಚುವ ವಂಚಕತನವೇ ಎದ್ದು ಕಂಡಿತು. ತಮ್ಮದು ಸಾಮೂಹಿಕ ನಾಯಕತ್ವವೆಂದೆಲ್ಲಾ ಹೇಳಿಕೊಳ್ಳುತ್ತಿದ್ದ ಬಿಜೆಪಿಯು ಕಾರ್ಪೋರೇಟ್ ಮೋದಿಯ ವಿಜೃಂಭಣೆಗೇ ಜೋತು ಬಿದ್ದಿರುವುದು ಎದ್ದು ಕಂಡಿತು. ಈ ಸ್ತುತಿಯ ಎದುರಲ್ಲಿ ಅದ್ವಾನಿಯಂತಹ ಹಿರಿಯ ನಾಯಕರು ಮುಖ ಭಂಗ ಅನುಭವಿಸುತ್ತಾ ಸಮಾರೋಪದಲ್ಲಿ ಮೋದಿ-ಷಾ ಜೋಡಿಯ ಭಾಷಣ ಕೇಳಿ ಕೈ ಮುಗಿದು ತಲೆ ತಗ್ಗಿಸಿ ಹೊರ ನಡೆಯಬೇಕಾಯ್ತು.

Read the rest of this entry »

 
 

Tags: , , , ,

ರಾಜ್ಯಪಾಲರ ನಿಷ್ಠೆ ಯಾವುದಕ್ಕೆ?

ಈ ವಾರ – ಎಸ್.ವೈ. ಗುರುಶಾಂತ್

ಸಂಪುಟ ೯ ಸಂಚಿಕೆ ೧೫ – ೧೨ ಎಪ್ರಿಲ್ ೨೦೧೫

ರಾಷ್ಟ್ರಪತಿಯವರ ಪ್ರತಿನಿಧಿಯಾಗಿ, ಭಾರತದ ಸಂವಿಧಾನದ ರಕ್ಷಣೆಯ ಹೊಣೆಗಾರಿಕೆಯಿರುವ ರಾಜ್ಯಪಾಲರಿಗೆ ತಮ್ಮ ಸ್ಥಾನ-ಮಾನದ ಘನತೆಯ ಪರಿವೆಯಿಲ್ಲವೇ?

ಕರ್ನಾಟಕದ ’ಘನವೆತ್ತ’ ರಾಜ್ಯಪಾಲರು ನೇಮಕವಾದ ಹೊಸತರಲ್ಲಿ ’ಮೌನಿ ಬಾಬಾ’ನಂತಿದ್ದವರು ಇದೀಗ ಸಿಕ್ಕ ಯಾವುದೇ ಸಾರ್ವಜನಿಕ ವೇದಿಕೆಗಳಲ್ಲೂ ’ಮನ್ ಕಿ ಬಾತ್’ನ್ನು ಮುಕ್ತವಾಗಿ ಆಡತೊಡಗಿದ್ದಾರೆ. ತಮ್ಮ ಅಂತರಂಗದ ವಿಚಾ(ಕಾ)ರ ಲಹರಿಯನ್ನು ಹರಿಸುವಾಗ ಜವಾಬ್ದಾರಿಯನ್ನೇ ಮರೆಯುವಂತಿದೆ. ತಾವು ಹೊಂದಿರುವ ಸ್ಥಾನ-ಮಾನದ ಪರಿವೆಯೂ ಇಲ್ಲದೇ ಲಾಠಿ ತಿರುಗಿಸುವ ಸಂಘಪರಿವಾರದ ಸ್ವಯಂ ಸೇವಕನಂತೆ ವರ್ತಿಸುತ್ತಿರುವುದು ಮುಂಬರುವ ದಿನಗಳ ಅಪಾಯದ ಸೂಚನೆಯೆಂದೇ ಹೇಳಬೇಕಾಗುತ್ತದೆ.

IndiaTve60527_vajubhai

 

Read the rest of this entry »

 
Comments Off on ರಾಜ್ಯಪಾಲರ ನಿಷ್ಠೆ ಯಾವುದಕ್ಕೆ?

Posted by on 07/04/2015 in ಈ ವಾರ

 

Tags: , , , , , ,

ಸಂತೇಮರಳ್ಳಿ : ದಲಿತರ ಜೋಡಿ ಕಗ್ಗೊಲೆಗೆ ಕಾರಣವೇನು?

ಈ ವಾರ – ಎಸ್.ವೈ. ಗುರುಶಾಂತ್

ಸಂಪುಟ ೯ – ಸಂಚಿಕೆ ೧೪ – ೦೫ ಏಪ್ರಿಲ್ ೨೦೧೫

20070824510009104

ಕಳೆದ ವಾರವೂ ಐ.ಎ.ಎಸ್. ಅಧಿಕಾರಿ ಡಿ.ಕೆ. ರವಿಯವರ ಸಾವಿನ ಸುತ್ತಲಿನದೇ ಸುದ್ದಿ. ಪ್ರಕರಣವನ್ನು ಸಿ.ಬಿ.ಐ.ಗೆ ಒಪ್ಪಿಸದಿದ್ದರೆ ನ್ಯಾಯ ಸಿಗುವುದಾರೂ ಹೇಗೆ ಎನ್ನುವಷ್ಟು ಮಾಧ್ಯಮಗಳ ವರಾತ! ಹೀಗೆ ಎರಡೂ ವಾರಗಳಲ್ಲಿನ ’ರಾಜಕಾರಣ’ದಲ್ಲಿ ಮುಳುಗಿದ ಮಾಧ್ಯಮಗಳಿಗೆ ಒಬ್ಬರದಲ್ಲ, ಇಬ್ಬರು ಕೂಲಿಕಾರ ದಲಿತರ ರುಂಡ ಚೆಂಡಾಡಿದ ಕಗ್ಗೊಲೆಯ ಸುದ್ದಿ ಕಿವಿ ಬಾಯಿಗೆ ತಟ್ಟಲೇ ಇಲ್ಲ. ಹೊಟ್ಟೆ ಬಟ್ಟೆಗೂ ಸಾಲದೇ ಕೂಲಿ ನಾಲಿ ಮಾಡಿ ಬದುಕುವವರು ಎಂದೋ ಸತ್ತು ಹೋಗಿದ್ದಾರಲ್ಲವೇ? ಇಂತಹವರು ಟಿ.ವಿ.-ಪತ್ರಿಕೆಗಳ ಹೈಟೆಕ್ ಸುದ್ದಿಗೆ ಅರ್ಹರಾಗಬೇಕೆಂದರೆ ಒಂದು ಸಾಮಾಜಿಕ ಸ್ಥಾನ-ಮಾನ, ’ಸ್ಟೇಟಸ್’ ಮಾತ್ರವಲ್ಲ ರೋಚಕತೆ ಬೇಡವೇ?

Read the rest of this entry »

 
Comments Off on ಸಂತೇಮರಳ್ಳಿ : ದಲಿತರ ಜೋಡಿ ಕಗ್ಗೊಲೆಗೆ ಕಾರಣವೇನು?

Posted by on 01/04/2015 in ಈ ವಾರ

 

Tags: , ,

ಐ.ಎ.ಎಸ್. ಅಧಿಕಾರಿ ಡಿ.ಕೆ. ರವಿ ಸಾವು : ನಿಷ್ಟುರ, ನಿಷ್ಪಕ್ಷಪಾತ ತನಿಖೆಯಾಗಲಿ ಸಂಕುಚಿತ ರಾಜಕಾರಣಕ್ಕೆ ಬಳಕೆಯಾಗದಿರಲಿ

ಈ ವಾರ – ಎಸ್.ವೈ. ಗುರುಶಾಂತ್
ಸಂಪುಟ ೯ – ಸಂಚಿಕೆ ೧೩ – ೨೯ ಮಾರ್ಚ್ ೨೦೧೫

ಆತನಿಗೆ ೩೬ ವರ್ಷಗಳು. ಅದು ಸಾಯುವ ವಯಸ್ಸಲ್ಲ. ಅಧಿಕಾರಿಯಾಗಿ ಸೇರಿದ ೩-೪ ವರ್ಷಗಳಲ್ಲೇ ಪಡೆದ ಜನಪ್ರಿಯತೆಯೂ ಕಡಿಮೆಯೇನಲ್ಲ. ಆತ ಇನ್ನಿಲ್ಲ ಎಂದು ಗೊತ್ತಾದಾಗ ಇಡೀ ರಾಜ್ಯದಲ್ಲಿ ಜನ ಮಮ್ಮಲ ಮರುಗುತ್ತಾರೆಂದರೆ, ತಮ್ಮ ಕುಟುಂಬದ ಒಬ್ಬ ಸದಸ್ಯನನ್ನು ಕಳೆದುಕೊಂಡವರಂತೆ ರೋಧಿಸುತ್ತಾರೆಂದರೆ ಆತನ ಜನ ಸಂಬಂಧ, ಗಳಿಸಿದ ಪ್ರೀತಿ ಎಂಥವರಿಗೂ ಅರ್ಥವಾಗುವಂತಹುದು. ಸಾಧಾರಣವಾಗಿ ಐ.ಎ.ಎಸ್., ಐ.ಪಿ.ಎಸ್.ನಂತಹ ಉನ್ನತ ಹುದ್ದೆಯಲ್ಲಿರುವ ‘ಬಿಳಿಯಾನೆ’ ಅಧಿಕಾರಿಗಳು ಆಡಳಿತ ಯಂತ್ರದಲ್ಲಿ ಅತ್ಯಂತ ಪ್ರಮುಖವಾಗಿ ಕಾರ್ಯ ನಿರ್ವಹಿಸುವರು. ಆಳುವ ವರ್ಗದ ಆಡಳಿತ ಯಂತ್ರದ ಹಲ್ಲುಗಳಾಗಿ, ಪ್ರಭುತ್ವದ ಜನ ಪೀಡಕರಾಗಿ, ಭ್ರಷ್ಟ ವ್ಯವಸ್ಥೆಯ ಭಾಗವಾಗಿ ಒಟ್ಟಾರೆ ‘ಅಧಿಕಾರಶಾಹಿ’ಯಾಗಿ ಮೆರೆಯುವವರು. ಹೀಗಾಗಿಯೇ ಜನ ತಮ್ಮ ಬಗ್ಗೆ ಮಿಡಿಯುವ, ಸ್ಪಂದಿಸುವ, ಪ್ರಜೆಗಳನ್ನು ಮನುಷ್ಯರಂತೆ ಕಾಣುವ ಯಾರೇ ಒಬ್ಬರು ಅಧಿಕಾರಿ ಕಾಣ ಸಿಕ್ಕರೆ ಅವರ ಬಗ್ಗೆ ಭಾವುಕರಾಗುವುದು ಸಹಜವೇ. ಅಂತಹ ಗುಣಗಳಿಗೆ ಬದ್ಧರಾದವರೆಂದರಂತೂ ಭಾವಾತಿರೇಕದ ಚಿಮ್ಮು.

Read the rest of this entry »

 
Comments Off on ಐ.ಎ.ಎಸ್. ಅಧಿಕಾರಿ ಡಿ.ಕೆ. ರವಿ ಸಾವು : ನಿಷ್ಟುರ, ನಿಷ್ಪಕ್ಷಪಾತ ತನಿಖೆಯಾಗಲಿ ಸಂಕುಚಿತ ರಾಜಕಾರಣಕ್ಕೆ ಬಳಕೆಯಾಗದಿರಲಿ

Posted by on 01/04/2015 in ಈ ವಾರ

 

Tags: , , ,

ರೈಲ್ವೆ ಬಜೆಟ್: ಕರ್ನಾಟಕದ ಜನರ ನಿರೀಕ್ಷೆಗೆ ದ್ರೋಹ

ಈ ವಾರ – ಎಸ್.ವೈ. ಗುರುಶಾಂತ್
ಸಂಪುಟ – ೯, ಸಂಚಿಕೆ – ೧೦, ೮ ಮಾರ್ಚ್ ೨೦೧೫

stock-footage-makalidurga-karnataka-india-jan-a-freight-goods-train-starts-at-makalidurga-station

   ಕೇಂದ್ರ ಸರಕಾರದ ಬಹು ನಿರೀಕ್ಷಿತ ಬಜೆಟ್‌ಗಳು ಮಂಡಿಸಲ್ಪಡುತ್ತಿವೆ. ಮೋದಿ ಸರಕಾರ ಅಧಿಕಾರಕ್ಕೆ ಬಂದ ನಂತರ ಬಜೆಟ್‌ಗಳು ಮಂಡಿಸಲಾಗಿತ್ತಾದರೂ ಅವಧಿ ಕಡಿಮೆ ಇರುವುದರಿಂದ ಅಪೂರ್ಣವೆಂದೇ ಹೇಳಿಕೊಳ್ಳಲಾಗಿತ್ತು. ಹೀಗಾಗಿ ಈಗಿನವು ಪೂರ್ಣ ಪ್ರಮಾಣದ ಬಜೆಟ್‌ಗಳು ಎಂದೂ ’ಮೋದಿಯ ಮೋಡಿಯನ್ನು ನೋಡಿ’ ಎಂದೂ ಹೇಳಲಾಗುತ್ತಿತ್ತು. ಇದೀಗ ರೈಲ್ವೆ ಸಚಿವ ಸುರೇಶ್ ಪ್ರಭು ನಿನ್ನೆ (ಫೆಬ್ರವರಿ ೨೭, ೨೦೧೫ರಂದು) ಮಂಡಿಸಿದ ಬಜೆಟ್ ಮೋದಿಯವರ ಮಾತಿನ ಮಂಟಪದಂತೆಯೇ ಇದೆ ಹೊರತು ಜನಸಮಾನ್ಯರ ಅಪಾರ ನಿರೀಕ್ಷೆಗಳನ್ನು ಕಿಂಚಿತ್ತಾದರೂ ಪೂರೈಸುವ ಕನಿಷ್ಠ ಕಾಳಜಿಯೇ ಇಲ್ಲ.

   ವಿಶೇಷವಾಗಿ ಹಿಂದೆ ಸಂಕ್ಷಿಪ್ತ ಅವಧಿಗೆಂದು ಸದಾನಂದಗೌಡರು ಮಂಡಿಸಿದ್ದ ಬಜೆಟ್‌ನ ಭರವಸೆಗಳನ್ನೂ ಈಡೇರಿಸುವ ಹೊಣೆಗಾರಿಕೆಯನ್ನು ಈಗಿನ ಬಜೆಟ್ ಸಂಪೂರ್ಣ ನಿರ್ಲಕ್ಷಿಸಿದೆ. ಅದರಲ್ಲೂ ಕರ್ನಾಟಕ ರಾಜ್ಯದ ಹಲವಾರು ಅಪೂರ್ಣಗೊಂಡಿರುವ ಯೋಜನೆಗಳು, ರೈಲ್ವೆ ಕ್ಷೇತ್ರದಲ್ಲಿ ಆಗಲೇಬೇಕಾದ ಅನಿವಾರ್ಯತೆಯ ಹೊಸ ಯೋಜನೆಗಳನ್ನು, ಅಗತ್ಯವಾಗಿರುವ ರೈಲುಗಳ ಆರಂಭವನ್ನು, ನೆನೆಗುದಿಗೆ ಬಿದ್ದ ಹತ್ತಾರು ಅಭಿವೃದ್ದಿ ಕಾಮಗಾರಿಗಳನ್ನು ಪೂರ್ಣವಾಗಿ ನಿರ್ಲಕ್ಷಿಸಿದೆ. ಈ ಬಜೆಟ್ ಕರ್ನಾಟಕದ ಜನರ ನಿರೀಕ್ಷೆಗಳಿಗೆ, ಅಭಿವೃದ್ದಿಗೆ ವಂಚನೆ ಮಾಡಿರುವುದರಲ್ಲಿ ಅನುಮಾನವೇ ಇಲ್ಲ.

   ನಿಜ, ರೈಲ್ವೆ ಬಜೆಟ್ ದೇಶದ ಅಗತ್ಯಗಳನ್ನು ಗಮನದಲ್ಲಿ ಇರಿಸುವುದು ಆದ್ಯತೆಯಾಗಿದೆ. ಆದರೆ ಒಂದು ಯೋಜನೆ, ಅದಕ್ಕೆ ಹಣ ನೀಡಿಕೆ ಎಂದಾಗ ಅದು ರಾಜ್ಯಗಳ ಜನರ ಬೇಕು ಬೇಡಗಳನ್ನು ಪರಿಗಣಿಸಿಯೇ ಆಗಬೇಕು ಎಂಬುದೂ ಅಷ್ಟೇ ನಿಜ.

   ೨೦೧೪ ರಲ್ಲಿ ಮಧ್ಯಂತರ ಬಜೆಟ್‌ನ್ನು ಮಂಡಿಸಿದ್ದ ಯು.ಪಿ.ಎ.-೨ ಸರಕಾರದ ಸಚಿವ ಕರ್ನಾಟಕದ ಮಲ್ಲಿಕಾರ್ಜುನ ಖರ್ಗೆಯವರು ರಾಜ್ಯಕ್ಕೆ ಸಂಬಂಧಿಸಿದಂತೆ ಹನ್ನೊಂದು ಹೊಸ ರೈಲುಗಳು, ಹೊಸ ಮಾರ್ಗಗಳ ಐದು ಸಮೀಕ್ಷೆಗಳು ಹಾಗೂ ಮೂರು ರೈಲುಗಾಡಿಗಳ ಸಂಚಾರದ ದಿನಗಳ ಹೆಚ್ಚಳ ಮಾಡುವ ಪ್ರಸ್ತಾಪಗಳನ್ನು ಮಧ್ಯಂತರ ರೈಲ್ವೆ ಬಜೆಟ್ನಲ್ಲಿ ನೀಡಿದ್ದರು. ಸಹಜವಾಗಿ, ಖರ್ಗೆಯವರಿಂದ ಕರ್ನಾಟಕದ ಜನತೆ ಇನ್ನೂ ಹೆಚ್ಚಿನ ನಿರೀಕ್ಷೆ ಇಟ್ಟುಕೊಂಡಿದ್ದರು. ೩ ದಶಕಗಳಿಂದಲೂ ನೆನೆಗುದಿಗೆ ಬಿದ್ದಿರುವ ಬೆಂಗಳೂರು ಸಬರ್ಬನ್ ರೈಲು ಯೋಜನೆಯ ಪ್ರಸ್ತಾಪವನ್ನೂ ಮಾಡಿರಲಿಲ್ಲ. ಆದರೆ ಸದಾನಂದಗೌಡರು ಮದ್ಯಂತರ ಬಜೆಟ್‌ನಲ್ಲಿ ಭರವಸೆಯನ್ನೇನೋ ನೀಡಿದ್ದರು. ಆದರೆ ಈಗ ಅದರ ಪ್ರಸ್ತಾಪವೇ ಇಲ್ಲವಾಗಿದೆ. ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಬೆಂಗಳೂರಿಗೆ, ಅದರಲ್ಲೂ ದುಡಿಯುವ ಜನರ ಪ್ರಮಾಣ ಹೆಚ್ಚಿದ್ದು ದೂರದ ಪ್ರದೇಶಗಳಿಗೆ ಹೋಗಲು ಅಧಿಕ ಹಣ ಮತ್ತು ಸಮಯವನ್ನು ಕಳೆದುಕೊಳ್ಳುತ್ತಿರುವಾಗ ಈ ಯೋಜನೆಯ ಜಾರಿ ಅಗತ್ಯವಾಗಿತ್ತು. ಬೆಂಗಳೂರಿನಿಂದ ಇತರ ಭಾರತದ ಮತ್ತು ರಾಜ್ಯದ ವಿವಿಧ ಪ್ರದೇಶಗಳಿಗೆ ಹೊಸ ರೈಲುಗಳ ಸಂಚಾರವೂ ತುರ್ತಿನದ್ದಾಗಿತ್ತು. ಇನ್ನು ಉತ್ತರ ಕರ್ನಾಟಕದ ೭ ದಶಕಗಳ ಬೇಡಿಕೆಯಾದ ಹುಬ್ಬಳ್ಳಿ-ಅಂಕೋಲಾ ರೈಲು ಮಾರ್ಗ, ಗದಗ-ಸೊಲ್ಲಾಪುರ ಬ್ರಾಡ್ಗೇಜ್ ಡಬ್ಬಲ್ ಲೈನ್, ಶೇಡಬಾಳ-ಯಾದಗೀರ್ ರೈಲು ಮಾರ್ಗದ ನಿರೀಕ್ಷೆ ಈ ಸಲವೂ ಹುಸಿಯಾಗಿದೆ. ಹರಿಹರ-ಕೊಟ್ಟೂರು ರೈಲು ಮಾರ್ಗ ನಿರ್ಮಾಣವಾಗಿದ್ದರೂ ಸಂಚಾರ ಆರಂಭವಾಗಿಲ್ಲ. ದಾವಣಗೆರೆ-ತುಮಕೂರು ನೇರ ರೈಲು ಮಾರ್ಗ, ಶಿವಮೊಗ್ಗ-ಹರಿಹರ ನೂತನ ಮಾರ್ಗ ನಿರ್ಮಾಣ, ತಾಳಗುಪ್ಪದಿಂದ ಕೊಂಕಣ ರೈಲ್ವೆಗೆ ಸಂಪರ್ಕ ಮುಂತಾದ ಮಧ್ಯ ಕರ್ನಾಟಕದ ಯೋಜನೆಗಳ ಪ್ರಸ್ತಾಪವೂ ಇಲ್ಲವಾಗಿದೆ!

   ಕರ್ನಾಟಕ ರಾಜ್ಯದಲ್ಲಿ ಹೊಸ ಮಾರ್ಗಗಳಾಗಲೀ, ಜೋಡಿ ಮಾರ್ಗವಾಗಲೀ, ಹಳಿಪರಿವರ್ತನೆಯಾಗಲೀ ಹೆಚ್ಚು ಇಲ್ಲವೇ ಇಲ್ಲ. ಯಶವಂಪುರ-ಗುಲ್ಬರ್ಗಾ-ಸೊಲ್ಲಾಪುರ ಮಾರ್ಗದಲ್ಲಿ ಇನ್ನಷು ರೈಲುಗಳ ಅವಶ್ಯಕತೆಯಿದೆ.. ಈಗ ಓಡಿಸುತ್ತಿರುವ ಕೆಲವು ರೈಲುಗಳನ್ನು ವಾರಕ್ಕೆ ೩ ದಿನಗಳಿಗೆ ಸೀಮಿತಗೊಳಿಸಿದ್ದು ಸಾಲದು. ಬೀದರ್, ಗುಲ್ಬರ್ಗ, ರಾಯಚೂರು ಮತ್ತು ಆಸುಪಾಸಿನ ಜಿಲ್ಲೆಗಳಿಂದ ಲಕ್ಷಾಂತರ ಕೂಲಿಕಾರರು, ಕಾರ್ಮಿಕರು ಬೆಂಗಳೂರಿಗೆ ನಿತ್ಯವೂ ವಲಸೆ ಹೋಗುತ್ತಿರುವ ಹಿನ್ನೆಲೆಯಲ್ಲಿ ‘ಕೂಲಿ ಎಕ್ಸಪ್ರೆಸ್ ರೈಲು ಆರಂಭಿಸಬೇಕಿತ್ತು. ಈ ಬಗ್ಗೆ ಪ್ರಾಂತ ಕೃಷಿಕೂಲಿಕಾರರ ಸಂಘ-ರೈತ ಸಂಘ ನಿರಂತರವಾಗಿ ಒತ್ತಾಯ ಮಾಡುತ್ತಲೇ ಬಂದಿದೆ. ಕಾರವಾರ-ಮಂಗಳೂರು ನಡುವೆ ಇಂಟರ್ಸಿಟಿ ರೈಲು ಆರಂಭಿಸಬೇಕೆಂದೂ, ಕಾರವಾರ-ಬೆಂಗಳೂರು ನಡುವೆ ಪ್ರತಿದಿನ ಹಗಲು ಹೊತ್ತು ರೈಲು ಸಂಚರಿಸಬೇಕು ಮತ್ತು ಸಂಚಾರದ ಅವಧಿಯನ್ನು೧೦ ತಾಸುಗಳಿಗೆ ಇಳಿಸಬೇಕೆಂದೂ ಜನತೆ ಒತ್ತಾಯಿಸಿದ್ದರು. ಆದರೆ ಈ ಯೋಜನೆಗಳು ಇನ್ನೂ ಜಾರಿಗೆ ಬಂದಿಲ್ಲ. ನೆನೆಗುಂದಿಗೆ ಬಿದ್ದಿರುವ ಹುಬ್ಬಳ್ಳಿ-ಅಂಕೋಲಾ ರೈಲು ಮಾರ್ಗ ಏನೊಂದೂ ಪ್ರಗತಿಯಿಲ್ಲದೇ ಸ್ಥಗಿತವಾಗಿದೆ.

   ಇನ್ನು ಹುಬ್ಬಳ್ಳಿ ಮೂಲಕ ಬೆಂಗಳೂರು-ಮುಂಬೈ, ಹೊಸಪೇಟೆ-ಬೆಂಗಳೂರು ಇಂಟರ್ ಸಿಟಿ, ಗುಲಬರ್ಗಾದಿಂದ ಬಳ್ಳಾರಿ ಮೂಲಕ ಬೆಂಗಳೂರಿಗೆ ರೈಲು ಮಾರ್ಗ, ಬೆಂಗಳೂರು-ಮಂಗಳೂರು-ಕಾರವಾರ ರೈಲಿನ ವೇಗ ಹೆಚ್ಚಳ ಮತ್ತು ಹೊಸ ರೈಲುಗಳ ಓಡಾಟ, ಹಾಸನ-ಬೆಂಗಳೂರು ಮಾರ್ಗದ ನಿರ್ಮಾಣ ಕಾರ್ಯ ಮುಗಿಸುವುದು, ಯಲಹಂಕ-ವಿಧುರಾಶ್ವಥ, ಕೋಲಾರ-ಕದ್ರಿ, ಕೋಲಾರದ ಮೂಲಕ ತಿರುಪತಿಗೆ, ಗುಲಬರ್ಗಾ-ಬೀದರ್ ಕಾಮಗಾರಿ ಮುಗಿಸುವುದು, ಚಿಕ್ಕಬಳ್ಳಾಪುರ- ಬೆಂಗಳೂರು ವಿಸ್ತರಣೆ, ಹೀಗೆ ಪ್ರಕಟಿತ ಯೋಜನೆಗಳು ಹಾಗೇ ಇವೆ. ಮೇಲಾಗಿ ಬ್ರಾಡ್‌ಗೇಜ್‌ಗೆ ಪರಿವರ್ತನೆ, ಡಬಲ್ ಟ್ರಾಕ್ ನಿರ್ಮಾಣದ ಹಲವು ಮಾರ್ಗಗಳು ಕುಂಟುತ್ತಲೇ ಇವೆ. ಹೀಗಿರುವಾಗ ಅಗತ್ಯವಿರುವ ಹಣ, ಸಂಪನ್ಮೂಲಗಳನ್ನು ನೀಡದೇ ಕೇಂದ್ರದ ಮೋದಿ ಸರಕಾರ ರಾಜ್ಯದ ಅಭಿವೃದ್ಧಿಯನ್ನು ಕಡೆಗಣಿಸಿದೆ.

   ಈ ಬಗ್ಗೆ ಹಿಂದೆ ಕಾಂಗ್ರೆಸ್ ಸರಕಾರದ ವಿರುದ್ಧ ಹಾರಾಡುತ್ತಿದ್ದ ಬಿಜೆಪಿ ನಾಯಕರು ಈಗ ನಾಚಿಕೆಯಿಲ್ಲದೇ ಕರ್ನಾಟಕಕ್ಕೇ ಬಗೆದಿರುವ ದ್ರೋಹವನ್ನು ಸಮರ್ಥಿಸಿಕೊಳ್ಳುತ್ತಿದ್ದಾರೆ. ರೈಲ್ವೆ ರಾಷ್ಟ್ರದ್ದಾಗಿದ್ದು ರಾಜ್ಯದ ಬಗ್ಗೆ ತಲೆ ಕೆಡಿಸಿಕೊಳ್ಳಬಾರದು, ರಾಷ್ಟ್ರದ ಬೆಳವಣಿಗೆಯಲ್ಲಿ ರಾಜ್ಯವೂ ಇದೆಯಲ್ಲವೇ ಎಂದೂ ಹೇಳುತ್ತಿದ್ದಾರೆ. ಹಿಂದೆಲ್ಲಾ ಪ್ರಾದೇಶಿಕವಾಗಿ ಮಾತ್ರ ಬೇಡಿಕೆಗಳನ್ನು ಈಡೇರಿಸಲಾಗುತ್ತಿತ್ತೆಂದೂ ಈಗ ರಾಷ್ಟ್ರೀಯ ಪರಿಗಣನೆಯೇ ಮುಖ್ಯವೆನ್ನಲಾಗುತ್ತಿದೆ. ಅಂದರೆ ರಾಜ್ಯಗಳು, ಪ್ರಾದೇಶಿಕ ಬೆಳವಣಿಗೆಯಾಗದೇ ರಾಷ್ಟ್ರವು ಬೆಳೆಯುವುದು ಸಾಧ್ಯವೇ? ಹೀಗೆಂದರೆ ಏನರ್ಥ. ಪ್ರಜಾಪ್ರಭುತ್ವ, ಒಕ್ಕೂಟದ ತತ್ವಕ್ಕೆ ತಿಲಾಂಜಲಿ ನೀಡಿ ಏಕಸ್ವಾಮ್ಯದ ಕೇಂದ್ರೀಕೃತ ವ್ಯವಸ್ಥೆಯನ್ನೇ ಸಮರ್ಥಿಸುವ, ಆ ದಿಕ್ಕಿನಲ್ಲೇ ಅಭಿವೃದ್ಧಿ ಆಗಲೇಬೇಕು ಎನ್ನುವ ಅಪಾಯಕಾರಿ ನಿಲುವು ಇದು. ಇದನ್ನು ಪ್ರಶ್ನಿಸಿದರೆ ಈ ಎಲ್ಲಾ ಬೇಡಿಕೆಗಳನ್ನು ಪೂರಕ ಬಜೆಟ್‌ನಲ್ಲಿ ಪರಿಗಣಿಸಲಾಗುವುದು ಎಂದು ಹೇಳುವುದು ವಂಚನೆಯಲ್ಲವೇ?

   ಎಲ್ಲವನ್ನೂ ಕಾರ‍್ಪೋರೇಟ್ ಕಂಪನಿಗಳಿಗೆ ಮಾರುವ ಮೋದಿ ಸರಕಾರದ ಈ ವಂಚನೆಗಳ ವಿರುದ್ಧ ಧ್ವನಿಯೆದೇ ಬೇರೇನು ಮಾರ್ಗವಿದೆ?.

 
Comments Off on ರೈಲ್ವೆ ಬಜೆಟ್: ಕರ್ನಾಟಕದ ಜನರ ನಿರೀಕ್ಷೆಗೆ ದ್ರೋಹ

Posted by on 02/03/2015 in ಈ ವಾರ

 

Tags: , , , , ,

ಭಗವದ್ಗೀತೆಯ ಹೆಗಲ ಮೇಲೆ ಪ್ರತಿಗಾಮಿಗಳ ಕೋವಿ

ಈ ವಾರ – ಎಸ್.ವೈ. ಗುರುಶಾಂತ್
ಸಂಪುಟ ೯, ಸಂಚಿಕೆ ೯, ೦೧ ಮಾರ್ಚ್ ೨೦೧೫

   ರಾಜಧಾನಿ ದೆಹಲಿಯಲ್ಲಿ ಸೋತು ನೆಲ ಕಚ್ಚಿರುವ ಸಂಘಪರಿವಾರ ಯಾವುದರಿಂದಲೂ ತಾನು ಬುದ್ದಿ ಕಲಿಯುವುದಿಲ್ಲವೆಂಬುದನ್ನು ಮತ್ತೊಮ್ಮೆ ಸಾರುತ್ತಿದೆ. ಫ್ಯಾಶಿಸ್ಟ್ ಮಾದರಿಯ ತನ್ನ ’ಹಿಂದುತ್ವ’ದ ಅಜೆಂಡಾ ಜಾರಿಗೆ ನಿರಂತರ ಪ್ರಯತ್ನಗಳನ್ನು ನಡೆಸುತ್ತಲೇ ಇದೆ. ತನ್ನ ಪಕ್ಷ ಅಥವಾ ಬೇರಾವುದೇ ಪಕ್ಷ ಕೇಂದ್ರದಲ್ಲಾಗಲೀ, ಇಲ್ಲ ರಾಜ್ಯಗಳಲ್ಲಾಗಲೀ ಇರಲಿ ಅದು ತನ್ನ ಕೃತ್ಯಗಳನ್ನು ನಿಲ್ಲಿಸಿಲ್ಲ, ನಿಲ್ಲಿಸುವುದೂ ಇಲ್ಲ.

   ನೀವೇ ನೋಡಿ, ಈ ವಾರದಲ್ಲಿ ಮೈಸೂರಿನಲ್ಲಿ ಸರಕಾರಿ ನೌಕರರ ಸಂಘವೊಂದು ಆಯೋಜಿಸಿದ ’ಭಗವದ್ ಗೀತೆ: ಭಾರತೀಯ ಪರಿಕಲ್ಪನೆ, ಮತಾಂತರ ಮತ್ತು ಇತರೆ ವಿಷಯಗಳು’ ಎಂಬ ವಿಚಾರ ಗೋಷ್ಠಿಯಲ್ಲಿ ತಮ್ಮ ಅಭಿಪ್ರಾಯ ಹಂಚಿಕೊಂಡ ವಿಚಾರವಾದಿ ಪ್ರೊ.ಕೆ.ಎಸ್.ಭಗವಾನ್ ರವರ ಮೇಲೆ ಹಾಗೂ ಅಲ್ಲಿ ಮಾತನಾಡಿದ ಚಿಂತಕ ಡಾ.ಅರವಿಂದ ಮಾಲಗತ್ತಿಯವರ ಮೇಲೆ ಕ್ರಿಮಿನಲ್ ಮೊಕದ್ದಮೆಯನ್ನು ವಿಶ್ವ ಹಿಂದೂ ಪರಿಷತ್ ಹೂಡಿದೆ. ಅಲ್ಲಿದ್ದ ಸಚಿವ ಶ್ರೀನಿವಾಸ ಪ್ರಸಾದ್‌ರವರನ್ನೂ ದಂಡಿಸುವ ಮಾತನ್ನಾಡುತ್ತಿದೆ. ಹಾಗೇ ಮಂಡ್ಯದಲ್ಲಿ ಮಾತನಾಡಿದ ಡಾ.ಬಂಜಗೆರೆ ಜಯಪ್ರಕಾಶ್‌ರವರ ಮೇಲೂ ಕೇಸ್ ಹಾಕಲಾಗಿದೆ. ಮಾತ್ರವಲ್ಲ, ಭಗವಾನ್‌ರವರಿಗೆ ಕೊಲೆಯ ಬೆದರಿಕೆಯನ್ನೂ ಒಡ್ಡಲಾಗಿದೆ.

   ಮೇಲಾಗಿ ಭಗವದ್ಗೀತೆಯ ಬಗೆಗಿನ ವ್ಯಾಖ್ಯಾನಗಳು, ಅದನ್ನು ವಿಶ್ಲೇಷಿಸುವ ರೀತಿ, ವಿವಿಧ ಆಯಾಮಗಳಿಂದ ಅದರಲ್ಲಡಗಿದ ಹಿತಾಸಕ್ತಿಗಳನ್ನು ಪರಿಶೀಲಿಸುವ, ಶ್ಲಾಘಿಸುವ, ನಿಷ್ಟುರ ವಿಮರ್ಶೆ-ಟೀಕೆಗಳ ಪ್ರಯತ್ನಗಳು ಬಹು ಹಿಂದಿನಿಂದಲೇ ನಡೆದು ಬಂದಿವೆ. ಅದು ಈ ಗ್ರಂಥ ಹುಟ್ಟಿದ ಕಾಲದಷ್ಟೇ ಹಳೆಯದು. ಯಾವುದೇ ಒಂದು ಗ್ರಂಥ ಸಾರ್ವಜನಿಕವಾದರೆ ಅದು ಈ ಮಥನಕ್ಕೆ ಈಡಾಗಲೇ ಬೇಕಾಗುತ್ತದೆ. ಅದು ಅನಿವಾರ್ಯ. ಭಾರತೀಯ ತತ್ವ ಪರಂಪರೆಯಲ್ಲಿ ಹಿಂದೆ ಗೀತೆಯನ್ನು ಚಾರ್ವಾಕರು ಪ್ರಶ್ನಿಸುತ್ತಲೇ ಬಂದಿದ್ದಾರೆ. ಆಧುನಿಕ ಕಾಲದಲ್ಲಿಯೂ ಡಾ.ಬಿ.ಆರ್.ಅಂಬೇಡ್ಕರ್ ರವರು, ವಿದ್ವಾಂಸರಾದ ಡಿ.ಡಿ. ಕೊಸಾಂಬಿ, ದೇವಿಪ್ರಸಾದ್ ಚಟ್ಟೋಪಾಧ್ಯಾಯ, ಎಸ್.ಜಿ.ಸರದೇಸಾಯಿ, ಮುಂತಾದವರು ಅತ್ಯಂತ ವಿದ್ವತ್‌ಪೂರ್ಣವಾಗಿ ವಿಮರ್ಶಿಸಿದ್ದಾರೆ.

   ಆ ಸಭೆಯಲ್ಲಿ ಪ್ರೊ.ಭಗವಾನ್‌ರವರು ’ಇದು ಅಪಾಯಕರ ಗ್ರಂಥವೆಂದು, ಅದನ್ನು ಸಭಾಧ್ಯಕ್ಷರು ಪರವಾನಗಿ ಕೊಟ್ಟರೆ ಸುಟ್ಟು ಬಿಡುವುದಾಗಿ’ ಹೇಳಿದ್ದಾರೆ ಎಂದು ವರದಿಯಾಗಿದೆ. (ಹಿಂದೆ ಅಂಬೇಡ್ಕರ್‌ರವರು ಮನುಸ್ಮೃತಿಯನ್ನು ಸುಟ್ಟು ಜಾಗೃತಿ ಮೂಡಿಸಿದ್ದಾರೆ) ಮಾಲಗತ್ತಿಯವರು ’ಇದು ವೈಧಿಕರಿಗೆ ಮಾತ್ರ ಪವಿತ್ರ ಗ್ರಂಥ, ಎಲ್ಲಾ ಭಾರತೀಯರಿಗೆ ಅಲ್ಲ, ಮಹಿಳೆ, ಶೂದ್ರರನ್ನು ಕೀಳಾಗಿ ಕಾಣುವ ಇದು ಪಾರ್ಶ್ವವಾಯು ರೋಗದಿಂದ ನರಳುತ್ತಿದೆ. ಇದಕ್ಕೆ ರಾಷ್ಟ್ರೀಯ ಗ್ರಂಥದ ಅರ್ಹತೆ ಇಲ್ಲ’ವೆಂದು ಹೇಳಿದ್ದಾರೆ. ಸಚಿವ ಶ್ರೀನಿವಾಸ ಪ್ರಸಾದ್‌ರವರು ’ಭಗವದ್‌ಗೀತೆಯನ್ನು ರಾಷ್ಟ್ರೀಯ ಧರ್ಮಗ್ರಂಥವಾಗಿ ಒಪ್ಪಲು ಸಾಧ್ಯವೇ ಇಲ್ಲ. ಭಾರತದ ಸಂವಿಧಾನವೇ ನಿಜವಾದ ರಾಷ್ಟ್ರೀಯ ಪವಿತ್ರ ಗ್ರಂಥ’ ಎಂದಿದ್ದಾರೆ. ಬಂಜಗೆರೆಯವರೂ ಸಹ ’ಗೀತೆ ಮನುಷ್ಯರ ನಡುವೆ ಭೇಧ, ಜಾತೀಯತೆ ಅಂಶಗಳನ್ನು ಎತ್ತಿ ಹಿಡಿಯುತ್ತದೆ. ಗೀತೆ ರಾಷ್ಟ್ರೀಯ ಗ್ರಂಥವಾಗಬೇಕು ಎನ್ನುವವರಿಗೆ ಮತಿಭ್ರಮಣೆಯಾಗಿದೆ.’ ಎಂದಿದ್ದಾರೆ. ಈ ಹೇಳಿಕೆಗಳನ್ನು ಗಮನಿಸಿದರೆ ಮಾತನಾಡಿದವರೆಲ್ಲಾ ಅತ್ಯಂತ ಗಂಭೀರವಾದ ವಿಷಯಗಳನ್ನೇ ಎತ್ತಿರುವುದರಲ್ಲಿ ಅನುಮಾನವಿಲ್ಲ.

   ಈ ಸುತ್ತಿನಲ್ಲಿ ಇಂತಹ ಚರ್ಚೆ-ವಿವಾದ ಹುಟ್ಟಿಕೊಂಡಿದ್ದೇ ಸಂಘಪರಿವಾರದಿಂದಲೇ. ದೆಹಲಿಯಲ್ಲಿ ಭಗವದ್ಗೀತೆಯ ೫೧೫೧ನೇ ವರ್ಷಾಚರಣೆ (?) ಸಂದರ್ಭದಲ್ಲಿ ಕೇಂದ್ರ ಸಚಿವೆ ಸುಷ್ಮಾ ಸ್ವರಾಜ್ ಈ ಗ್ರಂಥವನ್ನು ರಾಷ್ಟ್ರೀಯ ಗ್ರಂಥವನ್ನಾಗಿಸಬೇಕು ಎಂಬ ಹೇಳಿಕೆ ನೀಡಿ ಕಿಡಿ ಹೊತ್ತಿಸಿದರು. ಈ ಹೇಳಿಕೆ ಅಕಸ್ಮಿಕವೇನಲ್ಲ, ಅದು ಪ್ರಜ್ಞಾಪೂರ್ವಕ. ಆ ಹೊತ್ತಿನಲ್ಲೇ ಮೋದಿ ಅಮೇರಿಕಾದ ಭೇಟಿಗೆ ಹೋದಾಗ ಆ ದೇಶದ ಅಧ್ಯಕ್ಷ ಬರಾಕ್ ಒಬಾಮಾರವರಿಗೆ ಭಗವದ್ಗೀತೆ ಗ್ರಂಥ ನೀಡಿದ್ದು ಅಂತರಾಷ್ಟ್ರೀಯವಾಗಿ ಬ್ರಾಂಡ್ ಮಹತ್ವ ಸೃಷ್ಟಿಸುವ ಲೆಕ್ಕಾಚಾರದಲ್ಲೇ.(ಇದು ಆರೆಸ್ಸೆಸ್ ಆದೇಶವೂ ಇರಬಹುದು) ದೆಹಲಿಯಲ್ಲಿ ಸುಷ್ಮಾರ ಹೇಳಿಕೆಯ ಬಳಿಕ ದೇಶ್ಯಾದ್ಯಂತ ವಿವಾದ ಸೃಷ್ಟಿಯಾಗಿ ಅದನ್ನೇ ನೆಪವಾಗಿಸಿಕೊಂಡು ಇಡೀ ಸಂಘಪರಿವಾರ ಜನ ಮಾನಸಕ್ಕೆ ಮಂಕುಬೂದಿ ಎರಚಲು ತೊಡಗಿದ್ದು ಗಮನಿಸಬೇಕಾದ್ದು.

   ಭಗವದ್ಗೀತೆಯಲ್ಲಿ ಇರುವ, ಇಲ್ಲದ ಗುಣಗಳನ್ನು ತಮ್ಮ ಮೂಗಿನ ನೇರಕ್ಕೆ ಹೇಳುತ್ತಾ ಪ್ರಭಾವಿಸಲು ಸಂಘಪರಿವಾರ ಮತ್ತು ಅದರ ಪ್ರಭಾವದಲ್ಲಿರುವ ಫಲಾನುಭವಿಗಳು ಪ್ರಯತ್ನಿಸುತ್ತಲೇ ಇದ್ದಾರೆ. ಹಿಂದುಗಳೆಲ್ಲಾ ಒಂದು ಎಂದು ಬೊಗಳೆ ಬಿಡುವ ಸಂಘಪರಿವಾರಕ್ಕೂ ಗೊತ್ತಿರುವ ಒಂದು ಅಂಶವೆಂದರೆ ಅಂತಹ ‘ಒಂದು ಹಿಂದೂ ಧರ್ಮ’ವೆಂಬುದು ಇತರೆ ಧರ್ಮಗಳಂತೆ ಇಲ್ಲಿ ಇಲ್ಲ, ಈ ಧರ್ಮದಲ್ಲಿ ಜಾತಿ ವ್ಯವಸ್ಥೆಯೇ ಮೂಲ ಲಕ್ಷಣ ಎಂಬುದು. ಹೀಗಾಗಿ ಜಾತಿ ತಾರತಮ್ಯಗಳನ್ನು ಕಾಪಾಡಿಕೊಳ್ಳುತ್ತಾ, ಇನ್ನೊಂದೆಡೆ ಒಂದು ದೇವರು, ಒಂದು ಧರ್ಮಗ್ರಂಥವನ್ನು ಜನರಿಗೆ ಒಪ್ಪಿಸಿದರೆ ಮಾತ್ರ ತಮ್ಮ ’ಹಿಂದುತ್ವದ ರಾಜಕೀಯ ಅಜೆಂಡಾ’ದ ಕೊಡೆಯ ಅಡಿ ಜನರನ್ನು ಸೆಳೆಯಲು ಸುಲಭವೆಂದು ಸಂಘಪರಿವಾರ ನಂಬಿದೆ.

   ಭಗವದ್ಗೀತೆಯ ಬಗ್ಗೆ ಸಾಮಾನ್ಯವಾಗಿ ಇರುವ ಅಭಿಪ್ರಾಯಗಳೇನು? ಈ ಗ್ರಂಥ ಕೆಲವು ಉದಾತ್ತವೆನಿಸುವ ಕೆಲ ಅಂಶಗಳನ್ನು ಒಳಗೊಂಡಿದ್ದರೂ ಹಲವು ವಿಪರ್ಯಾಸಗಳನ್ನು ಒಡಲಲ್ಲಿ ಇರಿಸಿಕೊಂಡಿದೆ. ಮುಖ್ಯವಾಗಿ ಅದು ಮಹಿಳೆ, ದಲಿತರ, ಶೂದ್ರರ ವಿರೋಧಿ, ಜಾತೀಯತೆ-ಚಾತುವರ್ಣ ವ್ಯವಸ್ಥೆಯ ಪ್ರತಿಪಾದಕ, ಸಮಾನತೆಯ ವಿರೋಧಿ, ಯುದ್ಧ ಪ್ರಚೋದಕ. ಅಮಾನವೀಯತೆಯ ಈ ಗ್ರಂಥ, ಮಾನವ ವಿರೋಧಿಯೂ ಕೂಡ ಎಂದು ಹಲವಾರು ವಿದ್ವಾಂಸರು ಪ್ರತಿಪಾದಿಸಿದ್ದಾರೆ. ಇದೆಲ್ಲಾ ವೈಧಿಕಶಾಹಿಗೆ ಅತೀ ಆಪ್ತ. ಇವರೇ ಶೂದ್ರನಾದ ಕೃಷ್ಣನ ಬಾಯಿಂದಲೇ ಗೀತೋಪದೇಶ ಬಂತು ಅಂತಾ ಕಟ್ಟು ಕಥೆ ಕಟ್ಟಿ ಶೂದ್ರ ಜನರನ್ನು ಯಾಮಾರಿಸಲು ಹೊರಟಿದ್ದಾರೆ. ಯಾಕೆಂದರೆ ಈ ಗ್ರಂಥ ರಚನೆಯಾದ ಕಾಲ ಬುದ್ಧನ ನಂತರದಲ್ಲಿ, ಶಾಲೆಗೆ ಧರ್ಮಕ್ಕೆ ಸವಾಲೆಸೆದ ಬೌಧ್ಧ ಧರ್ಮವನ್ನು ದಮನಿಸಲು ಹುಟ್ಟು ಹಾಕಿದ್ದು ಎಂಬುದನ್ನು ಡಾ.ಅಂಬೇಡ್ಕರ್ ಸಾಧಾರವಾಗಿ ತೆರೆದಿಟ್ಟಿದ್ದಾರೆ. ಕೊಸಾಂಬಿಯವರೂ ಸಹ ಗುಪ್ತರ ಸಾಮ್ರಾಜ್ಯದಲ್ಲಿ ಕ್ರಿ.ಶ.೩೨೦ರ ಸುಮಾರಿಗೆ ಈ ಗ್ರಂಥ ರಚನೆಯಾದ ಬಗ್ಗೆ ಹಲವಾರು ದಾಖಲೆಗಳ ಮೂಲಕ ವಾದ ಮಂಡಿಸಿದ್ದಾರೆ.

   ತಕರಾರು ಇರುವುದು ಇಲ್ಲಿ ಮಾತ್ರವಲ್ಲ, ೨೦೧೧ ರಲ್ಲಿ ರಶಿಯಾದ ಸೈಬೀರಿಯಾದ ತೊಮ್‌ಸ್ಕ್ ಸ್ಟೇಟ್ ಯೂನಿವರ್ಸಿಟಿ ಭಕ್ತಿವೇದಾಂತಸ್ವಾಮಿ ಅನುವಾದಿತ, ವ್ಯಾಖ್ಯಾನಿತ ಭಗವದ್ಗೀತೆಯನ್ನು ನಿಷೇಧಿಸಿತ್ತು. ಅದು ನ್ಯಾಯಾಲಯದ ಮೆಟ್ಟಿಲೂ ಹತ್ತಿತ್ತು. ವಿಶ್ವವಿದ್ಯಾಲಯದ ಅಭಿಪ್ರಾಯದಲ್ಲಿ ಈ ಗ್ರಂಥ ಧಾರ್ಮಿಕ ಉಗ್ರಗಾಮಿತ್ವವನ್ನು ಪ್ರತಿಪಾದಿಸುವುದಾಗಿದ್ದು, ಧಾರ್ಮಿಕ- ಸಾಮಾಜಿಕ ಅಸಹಿಷ್ಣುತೆಯನ್ನು ತರುತ್ತದೆ ಎಂಬುದಾಗಿದೆ.

   ಮುಖ್ಯ ಪ್ರಶ್ನೆಯೆಂದರೆ ಹಲವು ವಿಭಿನ್ನ ಧರ್ಮ, ಭಾಷೆ, ಸಂಸ್ಕೃತಿ, ಆಚರಣೆ, ನಂಬಿಕೆಗಳನ್ನು ಹೊಂದಿರುವ ಭಾರತದಂತಹ ವೈವಿಧ್ಯತೆಯ ದೇಶಕ್ಕೆ ಅತ್ಯಂತ ಸಂಕುಚಿತ ಹಿತಾಸಕ್ತಿಗಳನ್ನು ಪ್ರತಿಪಾದಿಸುವ ಭಗವದ್ಗೀತೆ ಹೇಗೆ ರಾಷ್ಟ್ರೀಯ ಗ್ರಂಥವಾಗಲು ಸಾಧ್ಯ? ಹಿಂದೂ ಧರ್ಮದಲ್ಲಿದ್ದಾರೆ ಎಂದು ಹೇಳಲಾಗುವ ವಿವಿಧ ಜನಾಂಗಗಳೂ ಇದನ್ನೇ ತಮ್ಮ ಧರ್ಮಗ್ರಂಥ ಎಂದು ಹೇಗೆ ಒಪ್ಪಿಯಾರು? ಭಾರತದಲ್ಲಿನ ಎಲ್ಲರನ್ನೂ ಒಟ್ಟಿಗೆ ಕೊಂಡೊಯ್ಯುವ ಯಾವ ಲಕ್ಷಣ, ಸಾಮರ್ಥ್ಯ, ಅರ್ಹತೆಯೂ ಈ ಗ್ರಂಥಕ್ಕೆ ಇಲ್ಲ. ಅದೇನಿದ್ದರೂ ಹಲವು ಮಿತಿಗಳ ನಡುವೆಯೂ ಶಕ್ತಿ, ಸಾಮರ್ಥ್ಯವಿರುವುದು ನಮ್ಮ ಭಾರತದ ಪ್ರಜಾಸತ್ತಾತ್ಮಕ ಗಣರಾಜ್ಯದ ಸಂವಿಧಾನಕ್ಕೆ. ಒಂದು ಜನಾಂಗದ ಶ್ರೇಷ್ಠತೆಯನ್ನು, ಮತೀಯವಾದವನ್ನು ತಿರಸ್ಕರಿಸುವ ಈ ಸೆಕ್ಯುಲರ್, ಪ್ರಜಾಸತ್ತಾತ್ಮಕ ಸಂವಿಧಾನದ ಮೇಲೆ ಸದಾ ಹಗೆತನ ಘೋಷಿಸಿ ವಿದ್ವಂಸಗೊಳಿಸಲು ಹಾತೊರೆಯುವ ಪ್ರತಿಗಾಮಿಗಳ ಹುನ್ನಾರ ಭಗವದ್ಗೀತೆಯನ್ನು ರಾಷ್ಟ್ರೀಯ ಗ್ರಂಥ ಎಂದು ಸಾರಬೇಕೆಂಬುವವರ ಪ್ರಯತ್ನದಲ್ಲಿದೆ. ಅಂದರೆ ಧಾರ್ಮಿಕತೆಯ ಲೇಪ ಹಚ್ಚಿ ಜನಸಾಮಾನ್ಯರನ್ನು ನಂಬಿಸಿರುವ ಸಂಘಪರಿವಾರ ಈ ಭಗವದ್‌ಗೀತೆಯ ಹೆಗಲ ಮೇಲೆ ಕೋವಿ ಇಟ್ಟು ಹಾರಿಸುತ್ತಿರುವ ಗುಂಡಿನ ಗುರಿ ಭಾರತದ ಇಂದಿನ ಸಂವಿಧಾನವೇ ಆಗಿದೆ!

   ಆದ್ದರಿಂದ ಈ ಷಡ್ಯಂತ್ರಗಳನ್ನು ಜನತೆ ಅರಿಯಬೇಕಿದೆ. ಇದು ಧರ್ಮದ ಪ್ರಶ್ನೆಯಂತೂ ಅಲ್ಲವೇ ಅಲ್ಲ. ಎಲ್ಲಾ ಧರ್ಮಗಳಿಗೂ ಸಮಾನ ಅವಕಾಶವಿರುವ ಭಾರತದಲ್ಲಿ ಇದು ಭಾರತೀಯತ್ವ ಖಂಡಿತ ಅಲ್ಲ. ಬ್ರಿಟೀಶ್ ವಸಾಹತುಶಾಹಿಗಳ ಸುಲಿಗೆ ವಿರುದ್ಧ ಸ್ವಾತಂತ್ರ್ಯ ಸಂಗ್ರಾಮದಲ್ಲಿ, ಸ್ವಾತಂತ್ರೋತ್ತರದಲ್ಲಿ ಭಾರತೀಯರು ಸಾಧಿಸಿ, ಜತನದಿಂದ ಕಾಪಾಡಿಕೊಂಡು ಬಂದಿರುವ ದೇಶದ ಅಮೋಘ ಐಕ್ಯ ಶಕ್ತಿಯ ವಿರುದ್ಧವಿದು. ಇದು ಮುಗ್ದ ಜನರನ್ನು ವಂಚಿಸುವ ಪ್ರತಿಗಾಮಿಗಳ ರಾಜಕೀಯ ಸಂಚು ಅಷ್ಟೇ.

   ಇಂತಹ ಧಾಳಿಗಳ ವಿರುದ್ಧ ನಮ್ಮ ನಾಡಿನ ವಿಚಾರವಾದಿಗಳ ಹೇಳಿಕೆ ಒಂದು ಸಾಂಕೇತಿಕ ಎಂಬುದನ್ನೂ ಮರೆಯಬಾರದು. ಆದರೆ ಮತಿಗೇಡಿಗಳು ಅರ್ಥೈಸುವುದೇ ಬೇರೆ!

   ಆದ್ದರಿಂದ ಈ ಸಂದರ್ಭದಲ್ಲಿ ಒಂದು ಮಾತನ್ನು ಹೇಳಬೇಕೆನಿಸುತ್ತಿದೆ. ವಿಚಾರವಾದಿಗಳು ತಮ್ಮ ಅನಿಸಿಕೆ, ಅಭಿಪ್ರಾಯಗಳನ್ನು ವ್ಯಕ್ತಪಡಿಸುವಾಗ ಆದಷ್ಟೂ ತಾಳ್ಮೆ, ವಹಿಸುವುದು ಅಗತ್ಯ. ವಿಚಾರ ಮಂಥನದಲ್ಲಿ ಆವೇಶ ಅನಗತ್ಯ. ವಿಚಾರಗಳ ಅಭಿವ್ಯಕ್ತಿ ಜನಮಾನಸವನ್ನು ಹೊಕ್ಕು ಸರಿದಿಕ್ಕಿಗೆ ತರುವ ಪ್ರಯತ್ನವಾಗಿರಬೇಕು, ಮನ ಗೆಲ್ಲಬೇಕು, ಗೊಂದಲಕ್ಕೆ ಅವಕಾಶವಿರಕೂಡದು. ನಮ್ಮ ಗುರಿ ಬಹು ಸಂಸ್ಕೃತಿ, ವಿಶಾಲ ಉನ್ನತ ಪರಂಪರೆ, ಮತನಿರಪೇಕ್ಷತೆ, ಪ್ರಜಾಪ್ರಭುತ್ವವನ್ನು ಪ್ರತಿಪಾದಿಸುವ ಸಂವಿಧಾನದ ಈ ಅಂಶಗಳನ್ನು ರಕ್ಷಿಸುವ, ಸಕಾರಾತ್ಮಕ ಪ್ರತಿಪಾದನೆ ಇರಬೇಕು. ಭಾರತೀಯ ಪ್ರಜೆಗಳಲ್ಲಿ ಈಗಲೂ ಈ ಸ್ಪೂರ್ತಿ, ಮೌಲ್ಯಗಳಿಗೆ ಬದ್ಧತೆ, ದೇಶಪ್ರೇಮ ಸದಾ ಪ್ರವಹಿಸುತ್ತಿದೆ. ಇದು ಕೋಮುವಾದಿ ಫ್ಯಾಶಿಸ್ಟರ, ಮತೀಯ ಮೂಲಭೂತವಾಧಿ ಭಯೋತ್ಪಾ ಧಕರ ವೈರಸ್ ಸೋಂಕಿಗೆ ಬಲಿಯಾಗಬಾರದು. ಈ ಎಚ್ಚರ ವಹಿಸದಿದ್ದರೆ ಸಹಜವಾಗಿರುವ ಆಳುವವರ ಪರ ಮನೋಭಾವ, ಧನ ಬಲ, ಮಾಧ್ಯಮಗಳ ಬಲವಿರುವ ಪ್ರತಿಗಾಮಿಗಳು ಈ ಗೊಂದಲದ ಲಾಭ ಹೊಡೆಯತ್ತಾರೆ.

   ಈ ಸಂದರ್ಭದಲ್ಲಿ ಸಂಘಪರಿವಾರದ ದಮನದ ಕೃತ್ಯಗಳನ್ನು ಪ್ರಜ್ಞಾವಂತರೆಲ್ಲಾ ಖಂಡಿಸಲೇಬೇಕು. ಭಾರತದ ಪರಂಪರೆ, ಸಂವಿಧಾನದ ಉದಾತ್ತ ಮೌಲ್ಯಗಳನ್ನು ಪ್ರತಿಪಾದಿಸಿದ ನಾಡಿನ ಚಿಂತಕರ ಮೇಲೆ ಹೂಡಿರುವ ಮೊಕದ್ದಮೆಗಳನ್ನು ಕೂಡಲೇ ಹಿಂಪಡೆಯಬೇಕು. ಅಭಿವ್ಯಕ್ತಿ ಸ್ವಾತಂತ್ರ್ಯ ಉಳಿಯಬೇಕು. ಅದಕ್ಕಾಗಿ ವ್ಯಾಪಕ ಜಾಗೃತಿ ನಡೆಯಬೇಕು.

 
Comments Off on ಭಗವದ್ಗೀತೆಯ ಹೆಗಲ ಮೇಲೆ ಪ್ರತಿಗಾಮಿಗಳ ಕೋವಿ

Posted by on 24/02/2015 in ಈ ವಾರ

 

Tags: , , , ,

ದ್ವೇಷದ ಕಿಚ್ಚು ಹಚ್ಚುವ ತೊಗಾಡಿಯಾಗೆ ಇನ್ನೆಂತಹ ಸ್ವಾಗತ?

ಈ ವಾರ – ಎಸ್.ವೈ. ಗುರುಶಾಂತ್
ಸಂಪುಟ -೯, ಸಂಚಿಕೆ – ೭, ೧೫ ಫೆಬ್ರವರಿ ೨೦೧೫

   ಫೆಬ್ರವರಿ ೨, ೨೦೧೫ ರಿಂದ ಕರ್ನಾಟಕ ವಿಧಾನ ಸಭೆಯ ಅಧಿವೇಶನ ಆರಂಭಗೊಂಡಿದೆ. ಬಗರ್‌ಹುಕುಂ ಸಾಗುವಳಿದಾರರನ್ನು, ಅತಿಕ್ರಮಣ ಭೂ ಹಿಡುವಳಿದಾರರನ್ನು ಒಕ್ಕಲೆಬ್ಬಿಸುತ್ತಿರುವ ಕುರಿತಂತೆ ಗಹನವಾದ ಚರ್ಚೆ ನಡೆಯಬೇಕಿದೆ. ಆದರೆ ಅಧಿಕೃತ ವಿರೋಧ ಪಕ್ಷವಾದ ಬಿ.ಜೆ.ಪಿ.ಗೆ ಲಕ್ಷಾಂತರ ಸಾಮಾನ್ಯ ರೈತರ, ಭೂಹೀನರ ಬದುಕಿನ ಪ್ರಶ್ನೆಗಿಂತ ರಾಜ್ಯದಲ್ಲಿ ಕೋಮು ದ್ವೇಷದ ಕಿಚ್ಚು ಹಚ್ಚುವ ತೊಗಾಡಿಯಾನನ್ನು ಕರ್ನಾಟಕಕ್ಕೆ ಕರೆದು ತರುವುದೇ ಆದ್ಯತೆಯಾಗಿದೆ. ಹೀಗಾಗಿ ಅವರ ಎಲ್ಲ ನಾಯಕರು ಮನಬಂದಂತೆ ಕೂಗಾಡಿ ಸದನದ ಕಲಾಪಗಳೇ ನಡೆಯದಂತೆ ಬೊಬ್ಬಿಟ್ಟದ್ದು ಬಿಜೆಪಿಯನ್ನು ಬಯಲಾಗಿಸಿದೆ.

securedownload

   ಈ ಸುತ್ತಿನಲ್ಲಿ ವಿಶ್ವ ಹಿಂದೂ ಪರಿಷತ್‌ನ ಅಂತರಾಷ್ಟ್ರೀಯ ಅಧ್ಯಕ್ಷ ಪ್ರವೀಣ್ ಭಾಯಿ ತೊಗಾಡಿಯಾ ರಾಜ್ಯಕ್ಕೆ ಬರುತ್ತಿರುವುದು ಹೊಸತೇನಲ್ಲ. ವಿ.ಹೆಚ್.ಪಿ.ಯ ಸುವರ್ಣ ಮಹೋತ್ಸವದ ಆಚರಣೆಗೆಂದು ಈಗಾಗಲೇ ಕರಾವಳಿಯ ಪುತ್ತೂರಿಗೆ ಜನವರಿ ೧೪ರಂದು ’ಹಿಂದೂ ಹೃದಯ ಸಂಗಮ’ಕ್ಕೆಂದು ಬಂದು ಹೋಗಿಯಾಗಿದೆ. ನಂತರ ಬೀದರ್, ಬಿಜಾಪುರ ಜಿಲ್ಲೆಗಳನ್ನು ಸುತ್ತಿಯಾಗಿದೆ. ಹೋದಲ್ಲೆಲ್ಲಾ ಕೋಮುವಾದದ ಉದ್ರಿಕ್ತ, ಅನ್ಯ ಧರ್ಮೀಯರನ್ನು, ಅಲ್ಪಸಂಖ್ಯಾತರನ್ನು ಅವಹೇಳನ ಮಾಡುವ, ದ್ವೇಷಿಸುವ ’ಹೇಟ್ ಸ್ಪೀಚ್’ಗಳನ್ನು ಎಗ್ಗಿಲ್ಲದೇ ಮಾಡಿಯಾಗಿದೆ. ಪುತ್ತೂರಿನಲ್ಲಂತೂ ಸಮಾವೇಶ ಆದ ಕೆಲವೇ ನಿಮಿಷಗಳಲ್ಲಿ ಅವರ ಊರಿಗೆ ತೆರಳುತ್ತಿದ್ದ ಆರೆಸ್ಸೆಸ್‌ನ ಕಾರ್ಯಕರ್ತರು ಮಸೀದಿ ಕಂಡಲ್ಲಿ ಕಲ್ಲು ತೂರಿ, ಜನರಿಗೆ ಮತ್ತು ಅಂಗಡಿಗಳ ಮೇಲೆ ಆಕ್ರಮಣ ಮಾಡಿದ್ದಾರೆ, ಬೆಂಕಿ ಹಚ್ಚಿದ್ದಾರೆ. ಇದರಲ್ಲಿ ಮುವ್ವತ್ತಕ್ಕೂ ಹೆಚ್ಚು ಜನರಿಗೆ ಗಾಯವಾಗಿ ಆಸ್ಪತ್ರೆ ಸೇರಿದ್ದಾರೆ, ಸುಮಾರು ೩೦ ಮೊಕದ್ದಮೆಗಳನ್ನು ದಾಖಲಿಸಲಾಗಿದೆ. ಈ ಕೃತ್ಯಗಳು ಅದು ಹೇಗೆ ಹಿಂದೂ ಧರ್ಮವನ್ನು, ಹಿಂದೂಗಳನ್ನು ರಕ್ಷಿಸಿ ಸ್ವರ್ಗದ ಬಾಗಿಲು ತೆರೆಸಿ ಮೋಕ್ಷ ಕಾಣಿಸುತ್ತೋ ಅವರೇ ಹೇಳಬೇಕು. ಇಂತಹ ಘನಂಧಾರಿ ಕೃತ್ಯಗಳು ಹಿಂದೂ ಸಮಾಜೋತ್ಸವ ಇತ್ಯಾದಿಗಳು ನಡೆಸುತ್ತಿರುವಲ್ಲೆಲ್ಲಾ ಘಟಿಸುತ್ತಿವೆ. ಮೊನ್ನೆ ತಾನೇ ಈ ಆಚರಣೆಯ ಪೂರ್ವ ಸಿದ್ಧತೆಯಾಗಿ ಕೊಪ್ಪಳದಲ್ಲಿ ಬೈಕ್ ರ‍್ಯಾಲಿ ಮಾಡಲು ಸಿಂಗರಿಸುತ್ತಿರುವಾಗಲೇ ಇಸ್ಲಾಂ ಧರ್ಮದ ಬಾವುಟವನ್ನು ಕಿತ್ತು ಭಗವಾ ಧ್ವಜ ಹಾರಿಸಿ ಗಲಭೆ ಸೃಷ್ಟಿಸಿದ್ದಾರೆ. ಇದು ಇಂದಿನ ಅನುಭವ ಮಾತ್ರವಲ್ಲ, ಹಿಂದಿನಿಂದಲೂ ಸತತವಾಗಿ ಸಂಘಪರಿವಾರ ಸುಸಂಬದ್ಧವಾಗಿ ನಡೆಸುತ್ತಾ ಬಂದ ಕೃತ್ಯಗಳು.

   ಆದರೆ ಚೆಡ್ಡಿ ಪಡೆ ವಿಧಾನಸಭೆ ಮತ್ತು ಹೊರಗೆ ’ಇಂತಹ ಯಾವುದೇ ಅಹಿತಕರ ಘಟನೆಗಳೇ ನಡೆದಿಲ್ಲ, ಶಾಂತಿ, ಸಾಮರಸ್ಯ ಕದಡಿಲ’ವೆಂದು ಹೇಳುತ್ತಿರುವ ನಾಲಿಗೆಯ ಹಿಂದೆ ಎಂತಹ ದುಷ್ಟ ಮನಸ್ಸು ಇದೆಯೆಂದು ಯೋಚಿಸಿದರೆ ನಿಜಕ್ಕೂ ಈ ಸ್ವಯಂಘೋಷಿತ ರಾಷ್ಟ್ರ ಭಕ್ತರ ಬಗ್ಗೆ ಹೆಸಿಗೆ ಹುಟ್ಟುತ್ತದೆ.

   ಈ ವಿಷಯವೀಗ ಸಾರ್ವಜನಿಕವಾಗಿ ಸುದ್ದಿ ಕೇಂದ್ರದ ಸಂಗತಿಯಾಗಿರುವುದು ಬೆಂಗಳೂರಿನಲ್ಲಿ (ಬಸವನಗುಡಿಯ ಮೈದಾನ) ಇದೇ ಫೆಬ್ರವರಿ ೮ರಂದು ಅಂತಹುದೇ ಸಮಾವೇಶ -‘ಬೃಹತ್ ಹಿಂದೂ ಉತ್ಸವ’ ಆಚರಿಸುವ ಹಿನ್ನೆಲೆಯಲ್ಲಿ. ಅದರಲ್ಲೂ ಮುಖ್ಯವಾಗಿ ದೇಶ-ವಿದೇಶಿ ಕುಖ್ಯಾತಿಯ ತೊಗಾಡಿಯಾರನ್ನು ಕರೆಸುವುದಕ್ಕೆ. ಇದರ ಹಿನ್ನೆಲೆಯಲ್ಲಿ ಬೆಂಗಳೂರಿನ ಪೋಲೀಸ್ ಇಲಾಖೆ ತೊಗಾಡಿಯಾ ಫೆ-೫ರಿಂದ ೧೧ರವರೆಗೆ ನಗರ ಪ್ರವೇಶಿಸದಂತೆ ನಿರ್ಬಂಧಿಸಿ ಆದೇಶ ಹೊರಡಿಸಿದೆ. ಇದಕ್ಕೆ ಮುಖ್ಯವಾಗಿ ರಾಜ್ಯ ಗುಪ್ತಚಾರ ಇಲಾಖೆ, ಬೆಂಗಳೂರು ದಕ್ಷಿಣ ಡಿ.ಸಿ.ಪಿ.ಯವರ ವರದಿಗಳನ್ನು ಆಧರಿಸಿದೆ. ನಿರ್ಬಂಧದ ವಿಷಯವನ್ನೇ ಇರಿಸಿಕೊಂಡು ಸದನದ ಕಲಾಪಗಳನ್ನೇ ಬಲಿಯಾಗಿಸಿ ರಾಜಕೀಯವಾಗಿ ಲಾಭ ಹೊಡೆಯಲು ಬಿಜೆಪಿ ಪ್ರಯತ್ನಿಸುತ್ತಿದೆ.

   ಬಿಜೆಪಿ ರಾಜಕೀಯವಾಗಿ, ಸಂಘಟನಾತ್ಮಕವಾಗಿ ದುರ್ಬಲವಾಗಿರುವಾಗ, ಜನರ ನೈಜ ಪ್ರಶ್ನೆಗಳನ್ನು ಮರೆ ಮಾಚಿ ಗಮನ ಬೇರೆಡೆಗೆ ಸೆಳೆಯಲೆಂದೋ, ಇಲ್ಲವೇ ಆಡಳಿತದಲ್ಲಿರುವ ಪಕ್ಷದ ವಿರುದ್ಧ ಜನರಲ್ಲಿ ಅತೃಪ್ತಿ ಹೆಚ್ಚಿದಾಗ ಅದನ್ನು ಬಳಸಲು ಮತೀಯ ವಿಭಜನೆ ಮೂಲಕ ಕ್ರೋಢೀಕರಣಕ್ಕೆಂದೋ ಪ್ರಯತ್ನಿಸುತ್ತಾ ಬಂದಿದೆ. ತೊಗಾಡಿಯಾನ ಮೇಲೆ ೨೦೦೨, ೨೦೦೩ ರಲ್ಲಿ ಚಿಕ್ಕಮಗಳೂರು ಮತ್ತು ಬೆಳಗಾವಿ, ವಿಜಾಪುರದಲ್ಲಿ ಕೋಮು ಭಾವನೆ ಉದ್ರೇಕಿಸಿ ಶಾಂತಿ ಕದಡಿದ ಸಂಬಂಧದ ಕೇಸ್‌ಗಳಿವೆ. ಹಾಗೇ ಅವಿಭಜಿತ ಆಂಧ್ರ, ಮಹಾರಾಷ್ಟ್ರ, ಗುಜರಾತ್, ಮಧ್ಯಪ್ರದೇಶ, ಪ.ಬಂಗಾಳ ರಾಜ್ಯಗಳಲ್ಲಿಯೂ ಕ್ರಿಮಿನಲ್ ಕೇಸ್‌ಗಳಿವೆ. ದೇಶದ ೧೯ ನಗರಗಳಿಗೆ ಪ್ರವೇಶಿಸದಂತೆ ನಿರ್ಬಂಧಗಳಿವೆ. ಸ್ವತಃ ಮೋದಿ ಅಧಿಕಾರದಲ್ಲಿದ್ದ ಗುಜರಾತ್‌ಗೆ ತೊಗಾಡಿಯಾರಿಗೆ ಹಲವು ನಿರ್ಬಂಧಗಳು ಹಾಕಬೇಕಾದ ಮತ್ತು ಪ್ರವೇಶ ನಿರಾಕರಣೆಗಳನ್ನು ಮಾಡಬೇಕಾದ ಅಗತ್ಯ ಬಂದದ್ದನ್ನು ಎಲ್ಲರೂ ಗಮನಿಸಬೇಕು.

   ಸರಕಾರ ಈ ಮೊದಲೇ ಎಚ್ಚರ ವಹಿಸಿ ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳಬಹುದಿತ್ತು. ಆದಾಗ್ಯೂ ಈಗ ವಹಿಸಿದ ಎಚ್ಚರ ಮತ್ತು ಕ್ರಮಗಳು ಈ ಹಂತಕ್ಕೆ ಸಕಾಲಿಕ. ಇಲ್ಲಿ ವ್ಯಕ್ತಿಯ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ನಿರ್ಬಂಧಿಸಿದಂತೆ ಆಗುವುದಿಲ್ಲವೇ ಎಂಬ ಪ್ರಶ್ನೆಯನ್ನು ಎತ್ತಲಾಗುತ್ತಿದೆ. ಆದರೆ ನಮ್ಮ ಸಂವಿಧಾನ, ಕಾನೂನುಗಳಲ್ಲಿ ಅದಕ್ಕೆ ಕೆಲವು ಚೌಕಟ್ಟುಗಳಿರುವುದನ್ನು ಸಹ ಗಮನಿಸಬೇಕು. ನಮ್ಮ ಸಂವಿಧಾನವು ಶಾಂತಿ, ಸಾಮರಸ್ಯ, ಕೋಮುಸೌಹಾರ್ದತೆ, ಧಾರ್ಮಿಕ ಸ್ವಾತಂತ್ರ್ಯವನ್ನು ಕಾಯ್ದುಕೊಳ್ಳಲು ನಿರ್ದೇಶಿಸುತ್ತದೆ. ಮತನಿರಪೇಕ್ಷತೆ, ಪ್ರಜಾಪ್ರಭುತ್ವವನ್ನು ಎತ್ತಿ ಹಿಡಿಯಲು ಕರೆ ನೀಡಿದೆ. ಆದರೆ ಈ ಮೂಲಭೂತ ಅಂಶಗಳನ್ನೇ ಬುಡಮೇಲುಗೊಳಿಸುವ ಅವಕಾಶ, ಹಕ್ಕು ಯಾರಿಗೂ ಇಲ್ಲ, ಅದು ದಂಡನೀಯ ಅಪರಾಧ. ಹೀಗಾಗಿ ನಮ್ಮ ದೇಶದ ಸಂವಿಧಾನ ಮತ್ತು ಜನ ಪರಂಪರೆ, ಭಾರತೀಯ ಸಂಸ್ಕೃತಿಗೆ ವಿರುದ್ಧವಾಗಿ ವರ್ತಿಸುವವರು ಎಷ್ಟೇ ದೊಡ್ಡವರಿರಲಿ ಅವರು ದಂಡನಾರ್ಹರು. ಅದರಲ್ಲೂ ತೊಗಾಡಿಯಾರಂಥವರಿಗೆ ಎಂತಹ ಸ್ಥಾನ-ಮಾನ ನೀಡಬಹುದು!

   ಇದರ ಜೊತೆಗೆ ಮತ್ತೊಂದು ಬೆಳವಣಿಗೆಯನ್ನು ಗಮನಿಸಬೇಕು. ಮುಸ್ಲಿಂ ಅಲ್ಪಸಂಖ್ಯಾತರಲ್ಲಿ ಉಂಟಾಗುತ್ತಿರುವ ಆತಂಕವನ್ನು ದುರ್ಬಳಕೆ ಮಾಡಲು ಕೆಲವು ಮೂಲಭೂತವಾದಿ ಶಕ್ತಿಗಳು ಯತ್ನಿಸುತ್ತಿರುವುದನ್ನು ಅಷ್ಟೇ ಗಂಭೀರವಾಗಿ ಪರಿಗಣಿಸಬೇಕು. ಇದೀಗ ಎಂ.ಇ.ಎಂ. ಸಂಘಟನೆ ಈಗಾಗಲೇ ದ್ವೇಷಪೂರಿತ ಭಾಷಣ, ಕೃತ್ಯಗಳಿಗಾಗಿ ಹಲವು ಕ್ರಿಮಿನಲ್ ಕೇಸ್‌ಗಳನ್ನು ಎದುರಿಸುತ್ತಿರುವ ಸಂಸದ ಅಸಾದುದ್ದೀನ್‌ರನ್ನು ಬೆಂಗಳೂರಿಗೆ ಕರೆಸುತ್ತಿದೆ. ಬಹುಸಂಖ್ಯಾತ ಕೋಮುವಾದಕ್ಕೆ ಅಲ್ಪಸಂಖ್ಯಾತ ಮತೀಯವಾದ ಉತ್ತರವಲ್ಲ ಎಂಬುದನ್ನು ಜನತೆ ಮುಖ್ಯವಾಗಿ ಅಲ್ಪಸಂಖ್ಯಾತ ಸಮುದಾಯ ಗಮನಿಸಬೇಕು.

   ಇದೇ ಹೊತ್ತಿನಲ್ಲಿ ಬಹು ಮುಖ್ಯವಾದ ಒಂದು ಅಂಶವನ್ನೂ ಗಂಭೀರವಾಗಿ ಪರಿಗಣಿಸಬೇಕು. ಕೋಮುವಾದವನ್ನು, ಕೋಮುವಾದಿಗಳು ಅಥವಾ ಮತೀಯ ಮೂಲಭೂತವಾದಿಗಳನ್ನು ಕೇವಲ ನಿರ್ಬಂಧಗಳಿಂದಲೇ ಎದುರಿಸಿ ಸೋಲಿಸಲು ಸಾಧ್ಯವಿಲ್ಲ. ಆಡಳಿತಾತ್ಮಕ ಕ್ರಮಗಳ ಜೊತೆಗೆ ಮುಖ್ಯವಾಗಿ ರಾಜಕೀಯವಾಗಿ, ಸೈದ್ಧಾಂತಿಕವಾಗಿ ಮುಖಾಮುಖಿಯಾಗುತ್ತಾ ನಿರಂತರ ಕ್ರಮಗಳನ್ನು ತೆಗೆದುಕೊಳ್ಳಬೇಕು. ಸೆಣೆಸಬೇಕು. ಜನತೆಯನ್ನು ಸದಾ ಎಚ್ಚರಿಸುತ್ತಾ, ಅವರ ಕೇಳಿಕೆಗಳಿಗೆ ಸ್ಪಂದಿಸುತ್ತಾ, ಒಂದುಗೂಡಿಸುತ್ತಾ ಶ್ರಮಿಸಬೇಕು. ಇದು ಅತ್ಯಂತ ತಾಳ್ಮೆಯ, ಯೋಜನಾ ಬದ್ಧ ಕೆಲಸ. ಆದರೆ ಎಡಪಕ್ಷಗಳನ್ನು ಹೊರತು ಪಡಿಸಿ ಕಾಂಗ್ರೆಸ್ ಒಳಗೊಂಡು ಇತರೆ ’ಸೆಕ್ಯುಲರ್’ ಪಕ್ಷಗಳಿಗೆ ಅಂತಹ ಎಚ್ಚರ, ಬದ್ಧತೆಯಿಲ್ಲ. ಇಲ್ಲೂ ಅವಕಾಶವಾದವೇ ಮೇಲುಗೈ ಪಡೆಯುತ್ತದೆ. ಈಗಲೂ ಬಸವಕಲ್ಯಾಣದ ಜೆಡಿ(ಎಸ್) ಶಾಸಕರೊಬ್ಬರು ಬಿಜೆಪಿ ಜೊತೆಗೆ ಸದನದಲ್ಲಿ ಸಾಥ್ ನೀಡಿದ್ದು ಅದನ್ನೇ ತೋರಿಸುತ್ತದೆ.

   ಹಾಗೆ ಸಂಘಪರಿವಾರ-ಬಿಜೆಪಿಗಳು ಆಡಳಿತ ಮತ್ತು ಇತರೆ ಪಕ್ಷಗಳಲ್ಲಿರುವ ಭಿನ್ನಮತದ, ಅಧಿಕಾರ ಆಕಾಂಕ್ಷಿಗಳನ್ನು ಸೆಳೆಯಲು, ಅವರನ್ನು ಬಳಸಲು ಭಾರೀ ಪ್ರಯತ್ನಗಳನ್ನು ಮಾಡುತ್ತವೆ. ಕೆಳ ಹಂತಗಳಲ್ಲಿಯೂ ಅವರ ನಾಯಕರು, ಕಾರ್ಯಕರ್ತರನ್ನು ಹಿಂದೂ ಹೆಸರಿನಲ್ಲಿ ಸೆಳೆಯಲು ಷಡ್ಯಂತ್ರ ರೂಪಿಸಿರುತ್ತವೆ. ಈ ಪ್ರಸಂಗದಲ್ಲಿ ಕಾಂಗ್ರೆಸ್ ಪಕ್ಷದಲ್ಲಿರುವ ಒಡಕು ಬಳಸಲೂಬಹುದು. ಆಗ ಆಗುವ ಹಾನಿ ಅಪಾರ. ಹೀಗಾಗಿ ಸಿದ್ಧರಾಮಯ್ಯನವರ ಸರಕಾರದ ಮೇಲೆ ಹಲವು ಗುರುತರ ಹೊಣೆಗಳಿರುವುದನ್ನು ನಿರ್ಲಕ್ಷಿಸಬಾರದು.

   ಇವೆಲ್ಲವುಗಳ ಜೊತೆಗೆ ಜನರ ಎಚ್ಚರ, ಶಾಂತಿ, ಸೌಹಾರ್ದತೆ ಕಾಯುವ ಪಣ ಹೊಣೆ ಎಲ್ಲರದ್ದೂ ಕೂಡ.

 
Comments Off on ದ್ವೇಷದ ಕಿಚ್ಚು ಹಚ್ಚುವ ತೊಗಾಡಿಯಾಗೆ ಇನ್ನೆಂತಹ ಸ್ವಾಗತ?

Posted by on 08/02/2015 in ಈ ವಾರ

 

Tags: , ,

 
Follow

Get every new post delivered to your Inbox.

Join 2,662 other followers

%d bloggers like this: