`ನೀಟ್’ ಜಾರಿಗೆ ಪೂರ್ವ ಸಿದ್ಧತೆ ಅಗತ್ಯ

ಸಂಪುಟ: 10 ಸಂಚಿಕೆ: 20 May 8, 2016
neet

ಶಿಕ್ಷಣ ಕ್ಷೇತ್ರವಿಂದು ಗೊಂದಲಗಳ ಗೂಡಾಗಿದೆ. ಒಂದೆಡೆ ಆಳುವವರು ತೆಗೆದುಕೊಳ್ಳುವ ನಿರ್ಧಾರಗಳು, ಶಿಕ್ಷಣ ಕ್ಷೇತ್ರದಲ್ಲಿ ಭಾರೀ ಹಿಡಿತ ಹೊಂದಿರುವ ಖಾಸಗಿ ಶಿಕ್ಷಣೋದ್ಯಮಿಗಳು. ಕಾಲಕಾಲಕ್ಕೆ ನ್ಯಾಯಾಲಯಗಳ ತೀರ್ಪುಗಳು ಹೀಗೆ ಅವುಗಳನ್ನು ಗೋಜಲುಗೊಳಿಸುತ್ತಲೇ ಇರುತ್ತವೆ. ಅದೆಷ್ಟೋ ಬಾರಿ ಸಮಸ್ಯೆಗಳಿಗೆ ಸೂಚಿಸುವ ಪರಿಹಾರಗಳೂ ಸಹ ಸಾಂದರ್ಭಿಕ ಕಾಲ ಮಿತಿಗಳಿಂದಾಗಿ ಅರಗಿಸಿಕೊಳ್ಳಲಾಗದ ಅನ್ನವಾಗಿಯೂ ಬಿಡುತ್ತವೆ.

ಈಗ ದೇಶದಲ್ಲಿ, ನಮ್ಮ ರಾಜ್ಯದಲ್ಲಿಯೂ ವ್ಯಾಪಕ ಚರ್ಚೆ ನಡೆಯುತ್ತಿರುವುದು ವೈದ್ಯಕೀಯ, ಮತ್ತಿತ್ತರ ಕೋರ್ಸ್‍ಗಳಿಗೆ ಪ್ರವೇಶಾವಕಾಶ ಕುರಿತ (ನೀಟ್) ಸುಪ್ರಿಂಕೋರ್ಟ್‍ನ ಆದೇಶದ ಸುತ್ತ. ಇದೇ ಏಪ್ರಿಲ್ 28 ರಂದು ಮೆಡಿಕಲ್, ಡೆಂಟಲ್ ಶಿಕ್ಷಣದ ಪ್ರವೇಶಾತಿಗೆ `ರಾಷ್ಟ್ರೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆ’ (ಎನ್.ಇ.ಇ.ಟಿ) ಕಡ್ಡಾಯ ಮತ್ತು ಇಡೀ ದೇಶದಲ್ಲಿನ ಪ್ರಕ್ರೀಯೆಗೆ ಅದೊಂದೇ ಕ್ರಮ ಅನುಸರಿಸಬೇಕು ಎಂಬ ಆದೇಶವನ್ನು ಸುಪ್ರೀಂಕೋರ್ಟ್‍ನ ಐದು ನ್ಯಾಯ ಮೂರ್ತಿಗಳ ಪೀಠ (ನ್ಯಾ. ಅನಿಲ್ ದವೆ ನೇತೃತ್ವದ ಸಂವಿಧಾನ ಪೀಠ) ತೀರ್ಪು ನೀಡಿತ್ತು.

ಈಗ ನಿಗದಿಯಾದಂತೆ ಮೊದಲ ಹಂತದ ಪರೀಕ್ಷೆಗಳನ್ನು 2016 ರ ಮೇ 1 ರಂದು ನಡೆಸಬೇಕೆಂದೂ, ಹೊಸದಾಗಿ ಬರೆಯಬೇಕಿರುವವರಿಗೆ ಜುಲೈ 24, 2016 ರಂದು ದಿನಾಂಕಗಳನ್ನು ಸೂಚಿಸಿತು. ಈ ಏಕರೂಪದ ಪರೀಕ್ಷೆಯೇ ದೇಶದ ಎಲ್ಲ ಸರ್ಕಾರಿ, ಖಾಸಗಿ ಶಿಕ್ಷಣ ಸಂಸ್ಥೆಗಳ ಪ್ರವೇಶಕ್ಕೆ ಅನಿವಾರ್ಯ, ಕಡ್ಡಾಯ ಅದನ್ನು ಪಾಲಿಸಬೇಕೆಂದು ಕಠಿಣವಾದ ನಿರ್ದೇಶನವನ್ನು ನೀಡಿತು.

ಪರೀಕ್ಷೆ ತೀರಾ ಹತ್ತಿರವಿರುವಾಗ, ರಾಜ್ಯಗಳು ಸಿಇಟಿ, ಕಾಮೆಡ್-ಕೆ. ಯಂತಹ ತನ್ನದೇ ಪರೀಕ್ಷೆಗಳನ್ನು ನಡೆಸಲು ಸಿದ್ಧವಾಗಿರುವಾಗ, ತಮಿಳುನಾಡಿನಲ್ಲಿ ಇಂತಹ ಪರೀಕ್ಷೆಗಳೆ ಇಲ್ಲದೆ, ಮಂಡಳಿಯ ಪರೀಕ್ಷೆಯ ಅಂಕಗಳನ್ನೇ ಆಧಾರವಾಗಿ ಇರಿಸಿಕೊಂಡು ಅರ್ಹತೆಯ ಆಯ್ಕೆ ಮಾಡುತ್ತಿರುವಾಗ, ಅದೆಲ್ಲವನ್ನು ರದ್ದುಗೊಳಿಸಿ `ನೀಟ್’ ಪರೀಕ್ಷೆಯೊಂದನ್ನೇ ಅನುಸರಿಸಬೇಕೆಂಬುದು ಬಹುತೇಕ ಎಲ್ಲರಲ್ಲಿ, ಮುಖ್ಯವಾಗಿ ಪೋಷಕರು, ವಿದ್ಯಾರ್ಥಿಗಳಲ್ಲಿ ಆತಂಕ, ತಲ್ಲಣಗಳನ್ನೂ ಸೃಷ್ಟಿಸಿರುವುದು ನಿಜ. ಆದರೆ ನ್ಯಾಯಾಲಯ ತನ್ನ ಬಿಗಿ ನಿಲುವು ಸಡಿಲಗೊಳಿಸುವುದು ಅಸಾಧ್ಯವೆಂದು ಮುಂದಿನ ಮನವಿ ಕುರಿತ ಸಂದರ್ಭದಲ್ಲಿ ಸ್ವಷ್ಟಪಡಿಸಿದೆ.

2016 ರ ಈ ತೀರ್ಪು ತನ್ನ ಹಿಂದಿನ 2013ರ ಬಹುತೇಕ ತೀರ್ಪಿನ್ನು ಅನೂರ್ಜಿತಗೊಳಿಸಿದಂತೆ ಆಗಿದೆ. 2013 ರಲ್ಲಿ ಮುಖ್ಯ ನ್ಯಾಯಮೂರ್ತಿಗಳಾಗಿದ್ದ ನ್ಯಾ. ಅಲ್ತಮಸ್ ಕಬೀರ್ ರವರ ಮೂರು ನ್ಯಾಯಮೂರ್ತಿಗಳ ಪೀಠ ಬಹುಮತದಿಂದ ನೀಟ್ ಪದ್ಧತಿಯನ್ನು ನಿರಾಕರಿಸಿ ರಾಜ್ಯಗಳಲ್ಲಿ ಅವರದೇ ರೀತಿಯ ಪರೀಕ್ಷೆಗಳನ್ನೂ ನಡೆಸಲು ಆದೇಶಿಸಿತ್ತು. ಮಹಾನಗರಗಳಲ್ಲಿ ಬೆಳೆದ ಮಕ್ಕಳು ಮತ್ತು ಗ್ರಾಮೀಣ ಪರಿಸರದ ಮಕ್ಕಳ ನಡುವೆ ಜ್ಞಾನದ ಕಲಿಕೆಯಲ್ಲಿ ಅಪಾರ ವ್ಯತ್ಯಾಸವಿದೆ. ರಾಜ್ಯಗಳ ಹಾಗೂ ಅಲ್ಪ ಸಂಖ್ಯಾತರ ಸಂವಿಧಾನಿಕ ಹಕ್ಕುಗಳನ್ನು ಮಾನ್ಯ ಮಾಡಬೇಕಾಗುತ್ತದೆ ಎಂದು ತನ್ನ ತೀರ್ಪಿಗೆ ಸಮರ್ಥನೆಯನ್ನು ನೀಡಿತ್ತು. ಈ ತೀರ್ಪು ಬಹುಮತದಿಂದ ತೆಗೆದುಕೊಂಡದ್ದಾಗಿತ್ತಲ್ಲದೆ, ನ್ಯಾ. ಅಲ್ತಮಸ್ ರವರು ನಿವೃತ್ತಿ ಹೊಂದುವ ಹಿಂದಿನ ದಿನ ತೀರ್ಪು ಪ್ರಕಟಿಸಿದ್ದನ್ನ ಪ್ರಶ್ನಿಸಲಾಗಿತ್ತು. ಈಗಲೂ ನ್ಯಾ. ದವೆ ಯವರ ನೇತೃತ್ವದ ಪೀಠ ಈ ಪ್ರಶ್ನೆಯನ್ನು ಪ್ರಸ್ತಾಪಿಸಿದೆ.

2016ರ ಏಪ್ರಿಲ್ 28 ರ ತನ್ನ ತೀರ್ಪಿನಲ್ಲಿ ಈ ವಾಸ್ತವಗಳನ್ನು ಗಮನಿಸಿದಾಗ್ಯೂ ಈ ಅವಕಾಶವನ್ನೇ ಬಳಸಿ ಖಾಸಗಿ ಶಿಕ್ಷಣ ಸಂಸ್ಥೆಗಳು ವಿದ್ಯಾರ್ಥಿ-ಪೋಷಕರಿಂದ ವಿಪರೀತ ಹಣವನ್ನು ಸುಲಿಯುತ್ತಿವೆ. ಮಾತ್ರವಲ್ಲ, ಅವರವರದ್ದೇ ಪರೀಕ್ಷಾ ಪದ್ಧತಿಗಳು ಇರುವುದರಿಂದಾಗಿ ವಿದ್ಯಾರ್ಥಿಗಳು ಹಲವಾರು ಪರಿಕ್ಷೆಗಳನ್ನು ಬರೆಯಬೇಕಾದ ವಿಪರೀತ ಒತ್ತಡದಲ್ಲಿದ್ದಾರೆ, ಮಾನಸಿಕ ಹಿಂಸೆ ಅನುಭವಿಸುತ್ತಾರೆ. ಇದು ತೊಲಗಿ ಒಂದು ಏಕರೂಪದ ಪರೀಕ್ಷಾ ವ್ಯವಸ್ಥೆ ಅನಿವಾರ್ಯ, ಅಗತ್ಯವೆಂದು ಈಗಿನ ಪೀಠ ಪ್ರತಿಪಾದಿಸಿತು.

ಎತ್ತಲಾದ ಹಲವು ಪ್ರಶ್ನೆಗಳಿಗೆ ಸ್ವಷ್ಟನೆ ನೀಡುತ್ತಾ ಪೀಠವು ರಾಜ್ಯದ ನೀಟ್ ಹಂಚಿಕೆ ಕೋಟಾ 85% ರಷ್ಟು ಈಗಿರುವಂತೆ ಮುಂದುವರಿಯುತ್ತದೆಂದೂ ಕೇಂದ್ರಕ್ಕೆ 15% ಹಂಚಿಕೆ ಈಗಿರುವಂತೆ ಲಭ್ಯವೆಂದೂ ಹೇಳಿ ರಾಜ್ಯಗಳ, ಪ್ರಾದೇಶಿಕ, ಸಂವಿಧಾನಾತ್ಮಕ ಹಾಗೂ ಮೀಸಲಾತಿಗಳನ್ನು ನಿರಾಕರಿಸುವುದಿಲ್ಲ, ಪಾಲಿಸಲೇಬೇಕು ಎಂದೂ ಹೇಳಿದೆ. ಹಾಗೇ ಕ್ಯಾಪಿಟೇಶನ್, ಡೋನೇಷನ್ ಸುಲಿಗೆಗೆ ನಿಯಂತ್ರಣದ ಬಗ್ಗೆಯೂ ಸೂಚಿಸಿದೆ. ಭಾರೀ ಅವ್ಯವಹಾರಗಳ ಆಗರವಾಗಿದೆಯೆಂಬ ಆರೋಪವಿರುವ ಮೆಡಿಕಲ್ ಕೌನ್ಸಿಲ್ ಆಫ್ ಇಂಡಿಯಾದ ಆಡಳಿತ ನಿರ್ವಹಣೆಯನ್ನು ತೀವ್ರವಾಗಿ ಟೀಕಿಸಿ ಕೇಂದ್ರ ಸರ್ಕಾರ ಪರ್ಯಾಯವಾಗಿ ಮುಂದಿನ ಕಾನೂನು – ವ್ಯವಸ್ಥೆಯನ್ನು ಮಾಡುವವರೆಗೆ ನಿಗಾ ಸಮಿತಿಯನ್ನು ರಚಿಸಿ ಕಣ್ಗಾವಲು ಇರಿಸಿದೆ.

ಈ ಒಟ್ಟು ತೀರ್ಪಿನಲ್ಲಿ ಹಲವಾರು ಸಕಾರಾತ್ಮಕ ಅಂಶಗಳಿವೆ. ಶಿಕ್ಷಣದ ವ್ಯಾಪಾರೀಕರಣ, ಅದರಲ್ಲೂ ವೃತ್ತಿ ಶಿಕ್ಷಣದ ಭಾರೀ ದಂಧೆಯಲ್ಲಿ ಹಣದ ಲೂಟಿಗೆ ಕಡಿವಾಣ ಹಾಕುವುದು ಸ್ವಾಗತಾರ್ಹ. ಆದರೆ ಇಂತಹ ಅತ್ಯಂತ ಮಹತ್ವದ ತೀರ್ಪನ್ನು ಜಾರಿಗೊಳಿಸಬೇಕಾದರೆ ಕಾಲಾವಾಕಾಶ ಬೇಕಾಗುತ್ತದೆ. ಹಲವಾರು ಪ್ರಶ್ನೆಗಳಿಗೆ ಪ್ರಾಯೋಗಿಕವಾದ ಉತ್ತರಗಳನ್ನು ಕಂಡು ಕೊಳ್ಳಬೇಕಾಗುತ್ತದೆ, ಜಾರಿವಿಧಾನಗಳನ್ನು ರೂಪಿಸಬೇಕಾಗುತ್ತದೆ.

ಆದ್ದರಿಂದ 2016 ಏಪ್ರೀಲ್ 28 ರ ಸುಪ್ರಿಂ ಕೋರ್ಟ್‍ನ ತೀರ್ಪನ್ನು 2017-18ರ ಶೈಕ್ಷಣಿಕ ವರ್ಷದಿಂದ ಜಾರಿಗೊಳಿಸುವುದು ಅತ್ಯಗತ್ಯ.

ಇದರೊಂದಿಗೆ ಹಲವು ಸಮಸ್ಯೆಗಳೂ ಇವೆ. ಹಿಂದೆ ನ್ಯಾಯಾಲಯ ಗಮನಿಸಿದಂತೆ, ಇಡೀ ರಾಷ್ಟ್ರಕ್ಕೆ ಏಕರೂಪ ಪರೀಕ್ಷೆಯಾದಾಗ ಬಹುತೇಕ ರಾಜ್ಯಗಳಲ್ಲಿ ಆ ಮಟ್ಟದ ಕಲಿಕೆ, ತರಬೇತಿಗಳು ಇಲ್ಲ. ಹಾಗೂ ಇನ್ನೂ ನೀಡುವ ಕೋಚಿಂಗ ಸೆಂಟರ್, ಶಿಕ್ಷಣ ಸಂಸ್ಥೆಗಳು ವಿಪರೀತ ಹಣವನ್ನು (1.5 ಲಕ್ಷದಿಂದ 2 ಲಕ್ಷ ಪ್ರತಿ ವರ್ಷ) ಸುಲಿಯುತ್ತವೆ. ಕಾಲೇಜು ಪೀಜ್ ಕಟ್ಟಲೇ ಅಸಾಧ್ಯವಿರುವವರು ಆರ್ಥಿಕವಾಗಿ ಸಾಮಾಜಿಕವಾಗಿ ದುರ್ಬಲರು ಹೇಗೆ ತರಬೇತಿ ಪಡೆಯಲು ಸಾಧ್ಯ? ಅಲ್ಲದೆ ಆಯಾ ರಾಜ್ಯಗಳಲ್ಲಿ ಒಂದೊಂದು ರೀತಿಯ ಪಠ್ಯಕ್ರಮವೂ ಇರುತ್ತದೆ. ಪ್ರಾದೇಶಿಕ ಭಿನ್ನತೆ ಇರುತ್ತದೆ. ಹೀಗಿರುವಾಗ `ಮುಂದುವರಿದ’ ವಿಭಾಗಗಳು `ನೀಟ್’ ನ ಲಾಭ ಬಾಚಿಕೊಳ್ಳಲಾರರೇ? ಹಾಗಾಗಿ ನಮ್ಮ ರಾಜ್ಯಗಳಲ್ಲಿಯೂ ಕೆಳಹಂತದಿಂದ ಮೇಲಿನ ವರೆಗೆ ಪಠ್ಯಕ್ರಮದಲ್ಲಿ ಗುಣಮಟ್ಟದ ಸುಧಾರಣೆ, ಶಿಕ್ಷಣ ನೀಡಿಕೆ, ಮೂಲಭೂತ ಸೌಲಭ್ಯಗಳನ್ನು ಉನ್ನತೀಕರಿಸುವುದು ಅನಿವಾರ್ಯ, ಅತ್ಯಗತ್ಯ.

ಅದೇ ಹೊತ್ತಿನಲ್ಲಿ ಶಿಕ್ಷಣ ಮತ್ತು ಪ್ರವೇಶಾತಿಗಳನ್ನು ವಿಪರೀತವಾಗಿ ಕೇಂದ್ರೀಕರಿಸುವುದು ಸರಿಯಲ್ಲ. ಕಾರ್ಪೋರೇಟ್ ಧಾಳಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಪ್ರಜಾಪ್ರಭುತ್ವೀಕರಣದ ಮೂಲ ನೀತಿಗಳನ್ನು ಬದ್ಧತೆಯಿಂದ ಪಾಲಿಸಲು ಹೆಚ್ಚಿನ ಗಮನ ನೀಡಬೇಕಿದೆ.

ಹೀಗಾಗಿ `ನೀಟ್’ ಜಾರಿಯನ್ನು ಮುಂದಿನ ವರ್ಷದಿಂದ ಸಕಲ ಸಿದ್ಧತೆ ಮಾಡಿ ನಡೆಸುವುದು ವಾಸ್ತವದ ಕ್ರಮವಾಗುವುದು. ನಿಜ, ಇಂದು ಖಾಸಗೀ ಸಂಸ್ಥೆಗಳ ಲೂಟಿ. ಹಲವು ಪರೀಕ್ಷೆಗಳ ಹೆಸರಿನಲ್ಲಿ (ಸಿಇಟಿ, ಕಾಮೆಡ್-ಕೆ ಮತ್ತು ಆಯಾ ಸಂಸ್ಥೆಗಳೇ ನಡೆಸುವ ಪರೀಕ್ಷೆಗಳು ಕೊನೆಗೆ ಎಲ್ಲಾ ನಿಯಮಗಳನ್ನು ಉಲ್ಲಂಘಿಸಿ ಕೋಟಿಗಳಿಗೆ ಮಾರುವುದು). ಹಣ ದೋಚುವ, ಶಿಕ್ಷಣ ದಂಧೆಗೆ ಕಡಿವಾಣ ಹಾಕಲೇಬೇಕು. `ಶಿಕ್ಷಣದ ಸೇವೆ’ಗೆಂದೇ ಜನಿಸಿದೆವೆಂದು ಘೋಷಿಸಿರುವ ಶಿಕ್ಷಣೋದ್ಯಮಗಳು `ಸೇವೆ’ ಮಾಡಿದರೆ ಅಷ್ಟೇ ಸಾಕು!

ಇಂತಹ ಸ್ಥಿತಿಯಲ್ಲಿ ರಾಜ್ಯ ಸರ್ಕಾರವೂ ಈ ಕ್ಷೇತ್ರದ ತಜ್ಞರೊಂದಿಗೆ, ಪೋಷಕರು, ವಿದ್ಯಾರ್ಥಿಗಳೊಂದಿಗೆ ಸಮಾಲೋಚಿಸಿ ಸೂಕ್ತ ನಿಲುವು, ಕ್ರಮ ವಹಿಸುವುದು ಅಗತ್ಯವಾಗಿದೆ.

– ಎಸ್.ವೈ. ಗುರುಶಾಂತ

ಒಡನಾಡಿಯೊಂದಿಗಿನ ಒಡನಾಟ

ಸಂಪುಟ 10 ಸಂಚಿಕೆ 2 ಜನವರಿ 10-2016    – ಎಸ್.ವೈ. ಗುರುಶಾಂತ್

10294259_1140785685933403_535338857032304454_n

ಈ ಸಾವು ನ್ಯಾಯವೇ? !
ಈ ಪ್ರಶ್ನೆ ಶೂಲದಂತೆ ಮತ್ತೇ ಮತ್ತೇ ಇರಿಯುತ್ತದೆ.
ಹುಟ್ಟಿದ ಎಲ್ಲರೂ, ಎಲ್ಲವೂ ಸಾಯಲೇಬೇಕು, ನಿಜ. ಇದು ನಿಸರ್ಗ ಸಹಜ, ಆದರೆ ಸಾವು ಅಕಾಲಿಕ, ಅನಿರೀಕ್ಷಿತವಾದರೆ? ಅದು ಎಲ್ಲಿಲ್ಲದ ಆಘಾತ! ಅನ್ಯಾಯದೆದುರು ಸಿಡಿದೇಳುವ, ನ್ಯಾಯಕ್ಕಾಗಿ ಬಡಿದಾಡುವ, ಸದಾ ಮಾನವೀಯತೆಯ ತುಡಿತದಲ್ಲಿ ಮಿಡಿವ ಹೃದಯವೊಂದು ಪಟ್ಟನೇ ಬಡಿತ ನಿಲ್ಲಿಸಿ ಬಿಟ್ಟರೇ!

ಡಿಸೆಂಬರ್ 23 ರಂದು (2015) ನಮ್ಮೆಲ್ಲರನ್ನು ಅಗಲಿದ ನನ್ನ ದೀರ್ಘಕಾಲದ ಒಡನಾಡಿ ಪ್ರಸನ್ನ ವಾಯು ವಿಹಾರಕ್ಕೆ ಹೋದಾಗ ಹೃದಯ ಸ್ಥಂಬನದಿಂದ ಕೊನೆಯುಸಿರೆಳೆದ ಅಘಾತ ಭರಿಸಲಾಗುತ್ತಿಲ್ಲ. ಆತನ ವಯಸ್ಸು 50 ದಾಟಿರಲಿಲ್ಲ. ಲೋಕದ ಕಣ್ಣಳತೆಯಲ್ಲಿ ಇನ್ನೂ ಮಧ್ಯ ವಯಸ್ಕ, ಆದರೆ ಕಮ್ಯೂನಿಸ್ಟ್ ಚಳುವಳಿಯಲ್ಲಿ ಈತನದು ಹದಿಹರೆಯ. ಇಷ್ಟರೊಳಗೆ ಕಾಮ್ರೇಡ್ ‘ಪ್ರಸನ್ನ’ ಎಲ್ಲರ ಮನದೊಳಗೆ ನೆಲೆಯಾದ. ದುಡಿಯುವ ವರ್ಗದ ಚಳುವಳಿಯಲ್ಲಿ, ಸಮಸಮಾಜದ ಆಶಯಕ್ಕಾಗಿ ಸಾಮಾಜಿಕ ಬದಲಾವಣೆಯ ಸಶಕ್ತ ಮೂಂಚೂಣಿಯಾದ ಕಮ್ಯುನಿಸ್ಟ್ ಆಂದೋಲನದಲ್ಲಿ ಹಂತ, ಹಂತವಾಗಿ ಮೇಲಕ್ಕೆ ಬೆಳೆದ. ರಾಷ್ಟ್ರದ ಚಳುವಳಿಯ ನಾಯಕತ್ವದ ಭಾಗವಾದ. ಜಗದ ಹಲವು ವೇದಿಕೆಗಳಲ್ಲಿ ಶ್ರಮಜೀವಿಗಳ ಹಕ್ಕು ಪ್ರತಿಪಾದಿಸಿದ.

ಆ ದಿನಗಳು..

ಸಂಗಾತಿ ಪ್ರಸನ್ನ ಅವರೊಂದಿಗಿನ ನನ್ನ ಒಡನಾಟದ ನಂಟು ಅತ್ಯಂತ ದೀರ್ಘ. ಆತ ಬಳ್ಳಾರಿಯಲ್ಲಿ ಪಿಯುಸಿ ವಿದ್ಯಾರ್ಥಿಯಾಗಿರುವಾಗಿನಿಂದ ಅಂದರೆ 1981 ರಿಂದ ಇಲ್ಲಿಯವರೆಗೂ. ನಾನು ಮಾಕ್ರ್ಸ್‍ವಾದಿ ಚಿಂತನೆಗೆ ಆಕರ್ಷಿತನಾದುದು 1978 ರಲ್ಲಿ, ಪಿಯುಸಿ ವಿದ್ಯಾರ್ಥಿಯಾಗಿರುವಾಗ. ಆಗ ಒಂದು ಅಧ್ಯಯನ ವೃಂದವಾಗಿ, ಬಳಿಕ ಸಮುದಾಯ, ಬಂಡಾಯ ಸಾಹಿತ್ಯ ಚಳುವಳಿ ರೂಪುಗೊಳ್ಳುವ ಪ್ರಕ್ರಿಯೆಯ ಭಾಗವಾಗಿದ್ದೆ. ತದನಂತರ 1980 ರಲ್ಲಿ ಭಾರತ ವಿದ್ಯಾರ್ಥಿ ಫೆಡರೇಷನ್ (SFI) ಹೊಸಪೇಟೆಯಲ್ಲಿ ಆರಂಭಗೊಂಡಿತು. ಜಿಲ್ಲೆಯಲ್ಲಿ 1980, 81 ಹಾಗೂ 82 ಎಸ್.ಎಫ್.ಐ ಅತ್ಯಂತ ಕಷ್ಟಕರ ದಿನಗಳನ್ನು ಎದುರಿಸಿದ ವರುಷಗಳು. 1980 ರಲ್ಲಿ ಹೊಸಪೇಟೆಯಲ್ಲಿ ವಿಜಯನಗರ ಕಾಲೇಜ್‍ನಲ್ಲಿ ಎಸ್.ಎಫ್.ಐ. ಆರಂಭಗೊಂಡ ದಿನಗಳಿಂದಲೂ ಸಂಘಟನೆ ಬೆಳೆಯದಂತೆ, ದಮನಿಸಲು ಸ್ಥಾಪಿತ ಹಿತಾಸಕ್ತಿಗಳ ಸತತ ಯತ್ನ. ಅದಕ್ಕೆ ಪೊಲೀಸರ ಮಿಲಾಖತ್. ಹೀಗಾಗಿ 1980 ರಲ್ಲಿ ಹಾಗೂ 1981 ರಲ್ಲಿ ಮುಖ್ಯ ಕಾರ್ಯಕರ್ತರು ಮತ್ತು ಹಿತ್ಯೆಷಿಗಳ ಮೇಲೆ ಅಮಾನವೀಯ ಕ್ರೌರ್ಯ ನಡೆಸಿ ಸಂಘಟನೆಯನ್ನು ಬಗ್ಗು ಬಡಿಯಲು ಪ್ರಯತ್ನಿಸಲಾಯಿತು. 1980 ರಲ್ಲಿ ಎಸ್.ಎಫ್.ಐ. ನಾಯಕತ್ವದಲ್ಲಿ ಕಾಲೇಜಿನ ಪ್ರಶ್ನೆಗಳಿಗಾಗಿ ಹೋರಾಟ ನಡೆಸಲಾಯಿತು. ಅದೇ ಸಂದರ್ಭದಲ್ಲಿ ರಾಜ್ಯದಲ್ಲಿ ಗುಂಡೂರಾಯರ ಸರ್ಕಾರದ ದಮನದ ವಿರುದ್ಧ ಪ್ರತಿಭಟನೆಗಳು ಭುಗಿಲೆದ್ದ ಹಿನ್ನೆಲೆಯಲ್ಲಿ ಶಾಲಾ ಕಾಲೇಜಿಗೆ ಒಂದು ವಾರದ ರಜಾ ಘೋಷಿಸಲಾಗಿತ್ತು. ಬೆಂಗಳೂರಿನಲ್ಲಿ ರಾಜ್ಯಪಾಲರ ಮನೆ ಮುಂದೆ ಪ್ರತಿಭಟನೆ ಮುಗಿಸಿ 20ನೇ ಆಗಸ್ಟ್ ಹೊಸಪೇಟೆಗೆ ಜಂಬಯ್ಯನಾಯಕ್ ವಾಪಾಸಾಗುತ್ತಿದ್ದಂತೆ ಹುಸೇನ್ ತಂಬ್ರಳ್ಳಿ, ಎಂ. ಜಬಯ್ಯನಾಯಕ್‍ರನ್ನು ಬಂಧಿಸಿ ಪೊಲೀಸರು ಬಡಿದರು. 1981 ರಲ್ಲಿ ವಿಜಯನಗರ ಕಾಲೇಜಿನ ಕನ್ನಡ ಅಧ್ಯ್ಯಾಪಕರಾದ ಪ್ರೊ.ಎಸ್.ಎಸ್. ಹಿರೇಮಠ್ ರವರನ್ನು ದುರುದ್ದೇಶಪೂರ್ವಕವಾಗಿ ವರ್ಗಾವಣೆ ಮಾಡಿದ್ದನ್ನು ವಿರೋಧಿಸಿ ಪ್ರತಿಭಟನೆ ನಡೆಯಿತು. ಭಾಗವಹಿಸಿದ ಅಂದಿನ ಎಸ್.ಎಫ್.ಐ. ರಾಜ್ಯ ಕಾರ್ಯದರ್ಶಿ ಎಸ್.ಆರ್. ಆರಾಧ್ಯರನ್ನು ಒಳಗೊಂಡು ಹಿತ್ಯೆಷಿಗಳಾಗಿದ್ದ ರತನ್‍ಸಿಂಗ್, ಬಿ.ವೆಂಕೋಬ ನಾಯಕ್, ಯುಮನಪ್ಪ ರವರನ್ನು ಪೋಲೀಸರು ಠಾಣೆಯಲ್ಲಿ ಹಣಿದರು. ವಿಶೇಷವಾಗಿ, ಆರಾಧ್ಯರನ್ನು ಗುರಿಯಾಗಿಸಿ ಇಡೀ ಮೈಯ ಒಂದಿಚೂ ಬಿಡದೇ ಲಾಠಿ, ಬೂಟುಗಳಿಂದ (ಸ್ವತಃ ಅಂದು ಪ್ರೊಬೆಷನರಿ DySP ಯಾಗಿ ಬಂದಿದ್ದ ಎಂ. ವಿಷ್ಣುಮೂರ್ತಿ (IPS) ಅಮಾನವೀಯವಾಗಿ ಬಡಿದಿದ್ದರು. ಇದಾದ ನಂತರವೂ ಎಸ್.ಎಫ್.ಐ ಮತ್ತು ಸಮುದಾಯಕ್ಕೆ ಸೇರದಂತೆ ಭಯ ಹುಟ್ಟಿಸಲಾಗುತ್ತಿತ್ತು. ಹೀಗೆ ದೌರ್ಜನ್ಯ ತಾರಕ್ಕೇರಿತ್ತು. ಬಳ್ಳಾರಿ ಜಿಲ್ಲೆಯಲ್ಲಿ SFI ಬೆಳೆಯದಂತೆ ತಡೆಯುವ ದಮನದ ವಿರುದ್ಧ ಪ್ರತಿರೋಧ ಒಡ್ಡಲೇಬೇಕು, ಅದಕ್ಕಾಗಿ ಬಾಂಬೆಯಲ್ಲಿ ನಡೆಯಲಿರುವ ಅಖಿಲ ಭಾರತ ಸಮ್ಮೇಳಕ್ಕೆ ಪೂರ್ವಭಾವಿಯಾಗಿ ರಾಜ್ಯ ಸಮಾವೇಶವನ್ನು ಹೊಸಪೇಟೆಯಲ್ಲೇ ಸಂಘಟಿಸಬೇಕೆಂದು ಗಂಗಾವತಿಯಲ್ಲಿ ಸೇರಿದ್ದ ಎಸ್.ಎಫ್.ಐ. ನ ರಾಜ್ಯ ಸಮಿತಿ ಸಭೆ 1981ರಲ್ಲಿ ನಿರ್ಧರಿಸಿದಂತೆ ನಾವು ತಯಾರಿ ಆರಂಭಿಸಿದ್ದೆವು.

ಎಸ್.ಎಫ್.ಐ. ರಾಜ್ಯ ಸಮಾವೇಶ

ಇದೇ ಅವಧಿಯಲ್ಲಿ ಬಳ್ಳಾರಿಯಲ್ಲಿ 1981 ರಲ್ಲಿ ಅಲ್ಲಿನ ನಮ್ಮ ಹಿತ್ಯಷಿಗಳಾದ ಪ್ರದೀಪ್ ಕುಮಾರ್ ಬೆಳಗಲ್ ಮುಂತಾದವರ ಮುತುವರ್ಜಿಯಿಂದ ವಿದ್ಯಾರ್ಥಿಗಳ ಸಭೆ ನಡೆದು ಸದಸ್ಯತ್ವ ಆರಂಭಗೊಂಡಿತು. ಇದರ ಮೊದಲ ಕೆಲಸವೆಂದರೆ ಹೊಸಪೇಟೆಯ ರಾಜ್ಯ ಸಮಾವೇಶದ ಪ್ರಚಾರಕ್ಕಾಗಿ ಗೋಡೆ ಬರಹ ಬಳ್ಳಾರಿಯಲ್ಲಿ ಮಾಡುವುದು. ಅದರಂತೆ ರಾತ್ರಿ ಗೋಡೆ ಬರಹ ಮಾಡುತ್ತಿದ್ದ ಐದು ಜನ ವಿದ್ಯಾರ್ಥಿಗಳ ಈ ತಂಡವನ್ನು ಮಧ್ಯರಾತ್ರಿಯಲ್ಲಿ ಪೊಲೀಸರು ಬಂಧಿಸಿ ಗ್ರಾಮೀಣ ಠಾಣೆಗೆ ಕರೆದೊಯ್ದು ಚೆನ್ನಾಗಿ ಹೊಡೆದರು. ಇದು ರಾಜ್ಯ ಮಟ್ಟದ ಸುದ್ದಿಯೂ ಆಯಿತು, ದಬ್ಬಾಳಿಕೆಯ ವಿರುದ್ಧವೂ ಪ್ರತಿಭಟಿಸಿದೆವು.

ಈ ಮೊದಲ ತಂಡದಲ್ಲಿದ್ದವರೇ ಎಸ್.ಪ್ರಸನ್ನಕುಮಾರ್, ಸಿ.ರಘುನಾಥ್, ಬಿಂದು ಮಾಧವ, ಮಧುಸೂಧನ್ ಕಾಡ್ಲೂರು ಇತರರು. ಇದಕ್ಕೆ ನೇತೃತ್ವ ಪ್ರಸನ್ನನದೇ. ಈ ಘಟನೆಯಿಂದಾಗಿ ಅವರಲ್ಲೂ, ನಮ್ಮಲ್ಲೂ ಸವಾಲನ್ನು ಎದುರಿಸುವ ದೃಢ ಸಂಕಲ್ಪ ಮತ್ತಷ್ಟು ಗಟ್ಟಿಯಾಯಿತು. ರಾಜ್ಯ ಸಮಾವೇಶದ ತಯಾರಿ ಬಿರುಸುಗೊಳಿಸಿದೆವು. ಇದನ್ನು ವಿಫಲಗೊಳಿಸಿ ಹಾಳು ಮಾಡಲು ಪೊಲೀಸರು ಹೊಸಪೇಟೆಯಾದ್ಯಂತ ಸೆಕ್ಷನ್ 35 ಹೇರಿ, ಸಮಾವೇಶ ರದ್ದುಗೊಳಿಸಲು ಆದೇಶಿದರು. ಇದನ್ನು ಪ್ರತಿಭಟಸಿ ಅಖಿಲ ಭಾರತ ಅ ಧ್ಯಕ್ಷರಾಗಿದ್ದ ಕಾಂ. ಎಂ.ಎ. ಬೇಬಿ ಕಾಂ. ಎಸ್.ಆರ್. ಆರಾ ಧ್ಯ ಮತ್ತು ನಾನು ಎಸ್.ಪಿ. ಯವರನ್ನು ಕಾಣಲು ಬಳ್ಳಾರಿಗೆ ಹೋದೆವು. ಅವರಿಬ್ಬರು ಒಳಗೆ ಹೋದಾಗ ಹೊರಗೆ ನಾನು ಕಾವಲು ವೀಕ್ಷಕ. ಆಗ ಪ್ರಸನ್ನ ಬೇಬಿಯವರನ್ನು ಕರೆದು ತರಲು ಗುಂತಕಲ್‍ಗೆ ಆರಾಧ್ಯರೊಂದಿಗೆ ತೆರಳಿದ ನೆನಪು. ಬಳಿಕ ಹೊಸಪೇಟೆ ಮತ್ತು ಇತರೆ ಭಾಗಗಳ ಸಂಗಾತಿಗಳು ಅವಿಶ್ರಾಂತವಾಗಿ ಶ್ರಮಿಸಿದರು. ಅಂತೂ ಸವಾಲಿನ ನಡುವೆ ರಾಜ್ಯ ಸಮಾವೇಶ ಯಶಸ್ವಿಯಾಯಿತು. ಅಂದು ನಡೆದ ಪ್ರತಿ ಕಲಾಪಗಳು, ಮೆರವಣಿಗೆ, ಬಹಿರಂಗ ಸಭೆ ಐತಿಹಾಸಿಕ, ಅವಿಸ್ಮರಣೀಯ.

ಹೇಗೆಲ್ಲಾ ಪೊಲೀಸರು ದೌಜ್ಯನ ನಡೆಸಿ ನಮ್ಮ ಚಳುವಳಿಯ ಬೆಳವಣಿಗೆಯನ್ನು ತಡೆಯಲು ಪ್ರಯ ತ್ನ ನಡೆಸಿದರೂ ಅದು ಸಾಧ್ಯವಾಗಲೇ ಇಲ್ಲ. ಒಂದೊಂದು ದೌಜನ್ಯ ನಡೆದ ಬಳಿಕ ಮತ್ತೊಂದು ತಾಲೂಕುಗಳಿಗೆ ವಿಸ್ತಾರಗೊಂಡಿತು. ಹಿರೇಮಠ್ ರವರ ವರ್ಗಾವಣೆಯಾದಂತೆ ಆ ಊರುಗಳಲ್ಲಿ ಎಸ್.ಎಫ್.ಐ. ಮತ್ತು ಪ್ರಗತಿಪರ ಸಂಘಟನೆಗಳು ಆರಂಭಗೊಂಡವು. ಹೂವಿನ ಹಡಗಲಿ, ಹರಪನಹಳ್ಳಿ, ಹಗರಿಬೊಮ್ಮನಹಳ್ಳಿಯತ್ತ ಎಸ್.ಎಫ್.ಐ. ಕುಡಿ ಚಾಚಿತು. ಹೀಗೆ ಎಸ್.ಎಫ್.ಐ. ಸಂಘನೆಗೆ ಜಿಲ್ಲಾ ಸ್ವರೂಪ ಬರ ತೊಡಗಿತು. ಆಗ 1982ರಲ್ಲಿ ಹೊಸಪೇಟೆಯಲ್ಲಿ ಸಮಾವೇಶ ನಡೆದು ಒಂದು ಜಿಲ್ಲಾ ಸಂಘಟನಾ ಸಮಿತಿ ರಚನೆಯಾಗಿ ಕಾಂ.ಕೆ. ಶಾಂತಕುಮಾರಿ ಸಂಚಾಲಕಿಯಾಗಿ, ನಾನು ಸಹ ಸಂಚಾಲಕನಾಗಿ ಜವಾಬ್ದಾರಿ ಪಡೆದೆವು. ಆಗಲೇ ನೆಲೆಗೊಂಡಿದ್ದ ಸಮುದಾಯ, ಬಂಡಾಯ ಸಾಹಿತ್ಯ ಸಂಘಟನೆ ಜೊತೆಗೆ 1982 ಡಿ.ವೈ.ಎಫ್.ಐ. (ಮೊದಲು ಡಿ.ವೈ.ಓ ಅಂತಾ) ಹುಲುಗಪ್ಪ ಗುಜ್ಜಲ್, ಜಂಬಯ್ಯನಾಯಕ್, ತಾಯಪ್ಪನಾಯಕ್, ರಾಮಚಂದ್ರ ನಾವಡ ಮುಂತಾದವರು ವಹಿಸಿದ್ದರು.

ಸಮರಶೀಲ ವಿದ್ಯಾರ್ಥಿ ನಾಯಕ

1981 ರಲ್ಲಿ ಬಳ್ಳಾರಿಯಲ್ಲಿ ಪ್ರಸನ್ನರಿದ್ದ ತಂಡ ಸದಸ್ಯತ್ವ ನೊಂದಣಿ, ಅದ್ಯಯನ ವೃಂದ, ಕಾಲೇಜಿನ ಸಮಸ್ಯೆಗಳ ವಿರುದ್ದ ಹೋರಾಟ, ವಿವಿಧ ಸ್ಪರ್ಧೆಗಳ ಮುಂತಾದವುಗಳ ಮೂಲಕ ಚಳುವಳಿ ವಿಸ್ತರಿಸಿತು. ಈ ತಂಡ ಬೆಳಯುತ್ತಲೇ ಉಮೇಶ್, ಸುರೇಶ್, ಎ.ಜಿ. ಗಂಗಾಧರ, ಯರಿಸ್ವಾಮಿ ಮುಂತಾದವರು ಸೇರಿದರು. ಇದು ಬೆಳೆಯುತ್ತಾ ಹೋಯಿತು. ಇವರ ತಾತ್ವಿಕ ತಿಳವಳಿಕೆ, ಕ್ರಿಯಾಶೀಲತೆಗಳಿಂದ ಉಪನ್ಯಾಸಕರು, ವಕೀಲರೂ, ವಿವಿಧ ನೌಕರರು ಹಿತೈಷಿಗಳಾದರು.

ವೀರಶೈವ ಕಾಲೇಜಿನಲ್ಲಿ ವಿವಿಧ ವಿಧ್ಯಾರ್ಥಿ ಗುಂಪುಗಳೂ ಇವರ ಸನಿಹಕ್ಕೆ ಬಂದರು. ಇದನ್ನು ಸಹಿಸದ ಕೆಲ ಗುಂಪುಗಳು ಗೂಂಡಾಗಿರಿ ಮಾಡಲು ಬಂದು ಸರಿಯಾಗಿ ಏಟುಗಳನ್ನು ತಿಂದರು. ಇದರಲ್ಲಿ ಪ್ರಸನನ್ನ ನೇರ ನುಗ್ಗುವ ಗುಣದಿಂದಾಗಿ ಅನೇಕರು ತಂಟೆಗೆ ಬರದೇ ದೂರ ಉಳಿದರು. ಹೀಗಿತ್ತು ಪ್ರಸನ್ನನ ಧೈರ್ಯ. ಇವರ ನೇತೃತ್ವದಲ್ಲಿ ಎಸ್.ಎಫ್.ಐ. ಅನೇಕ ಮಹತ್ವದ ದಾಖಲೆಯ ಹೋರಾಟಗಳನ್ನು ನಡೆಸಿತು. 1984 ರ ಜುಲೈನಲ್ಲಿ ಆರಂಭಗೊಂಡ ಅಲ್ಲಿಪುರ ವಿಧ್ಯಾರ್ಥಿಗಳ ಹಾಸ್ಟೆಲ್ ಹೋರಾಟ. ಅಲ್ಲಿನ ಪ್ರಶ್ನೆಗಳನ್ನು ಎತ್ತಿಕೊಂಡ ಕೂಡಲೇ ಅಲ್ಲಿನ ಆಡಳಿತ ಮತ್ತು ಪೊಲೀಸರು ಜೊತೆಗೂಡಿ ಕುತಂತ್ರ ಮಾಡಿದರು. ಈ ನಾಯಕರಾರೂ ಅಲ್ಲಿಗೆ ಬರದಂತೆ ನಿಷೇಧ ಹೇರಿದರು. ಆದರೂ ಕತ್ತಲೆಯಲ್ಲಿ ವಿಧ್ಯಾರ್ಥಿಗಳನ್ನು ಕಂಡು ಧೈರ್ಯ ತುಂಬಿ ಸಮಸ್ಯೆಗಳು ಮತ್ತು ಅವ್ಯವಹಾರಗಳ ವಿರುದ್ದ ಜಾಗೃತಗೊಳಿಸಿ ಹೋರಾಟ ಮುಂದುವರಿಸಲಾಯಿತು. ಇದನ್ನರಿತ ಪೊಲೀಸರು ವಿಧ್ಯಾರ್ಥಿಗಳಂತೆ ಸೋಗು ಹಾಕಿ ಇವರನ್ನು ಕರೆಸಿಕೊಂಡು ಬಂಧಿಸಿ ಠಾಣೆಗೆ ಒಯ್ದು ದೌರ್ಜನ್ಯ ನಡೆಸಿದರು. ಇದರಲ್ಲಿ ಪ್ರಸನ್ನ, ಸಿ ರಘುನಾಥ್, ಎ.ಜಿ. ಗಂಗಾಧರ, ಯರಿಸ್ವಾಮಿ ಕಂಬಳಿಮಠ ಮುಂತಾದ ವರಿಗೆ ತುಂಬಾ ಏಟುಗಳಾದವು. ಜಿಲ್ಲೆಯಲ್ಲಿ ಪ್ರತಿಭಟನೆಗಳಾದ ಬಳಿಕ ಇವರನ್ನು ಬಿಡಲಾಯಿತು. ಆದರೆ ಗಂಗಾ ಧರ್ (ಗಾಂಧಿ) ರವರ ಕೈಯನ್ನು ಸಬ್ ಇನ್ಸೆಪ್ಟರ್ ತಿರುವಿದ್ದರಿಂದ ತೋಳಿನ ಜಾಯಿಂಟ್ ತಪ್ಪಿತು. ಹೀಗೆ ಗಾಯಾಳುಗಳನ್ನು ಪ್ರಸನ್ನ ಅವರ ಮನೆಗೆ ಕರೆ ತಂದಿದ್ದ. ಇದನ್ನು ಕಂಡ ಪ್ರಸನ್ನರ ತಾಯಿ ಶ್ರೀಮತಿ ಲಕ್ಷ್ಮಿದೇವಮ್ಮ ಮಮ್ಮುಲ ಮರುಗಿ ಪೊಲೀಸರಿಗೆ ಶಾಪ ಹಾಕಿ ಉಪಚರಿಸಿದಳು. ಮುಂದೆ ಅವರು ಚಳುವಳಿಯಲ್ಲಿ ತೊಡಗಿ ಎಲ್ಲರ ಪ್ರೀತಿಯ ‘ತಾಯಿ ಯಾಗಿ ಬೆಳಗಿದಳು.

ವಿಶೇಷವೆಂದರೆ ಇವರನ್ನು ಹೊಡೆದಿದ್ದ ಎಸ್.ಐ (ಸುಭಾಷ್ ಗುಡಿಮನಿ) ವಿರುದ್ದವೇ ಪ್ರಸನ್ನ, ರಘು ಮತ್ತಿತರರು ಆತನಿಗೇ ದೂರು ನೀಡಿ ಎಫ್.ಐ.ಆರ್ ಹಾಕಲೇಬೇಕೆಂದು ಪಟ್ಟು ಹಿಡಿದು ಪೊಲೀಸ್ ಠಾಣೆಯಲ್ಲಿ ಧರಣಿ ನಡೆಸಿದ್ದು. ಇಂತಹ ಹಲವಾರು ಹೋರಾಟಗಳ ಕಂತೆಗಳೇ ಇವೆ.

ಅದರಲ್ಲಿ ಡಿ.ವೈ.ಎಫ್.ಐ. ನೇತೃತ್ರದಲ್ಲಿ ತಿಂಗಳು ಗಟ್ಟಲೇ ನಡೆದ ಮಹಾನಂದಿಕೊಟ್ಟಂ ಸ್ಲಂ ವಾಸಿಗಳ ಧೀರೋದ್ದಾತ ಹೋರಾಟ. (ರೌಡಿಸಂ ಎದುರಿಸಿ). ‘ವಿಜಯನಗರ ಉಕ್ಕು ಕರ್ನಾಟಕದ ಹಕ್ಕು’ ಗಾಗಿ ನಡೆದ ಜಿಲ್ಲಾ ಜಾಥಾ ಸಂದರ್ಭದಲ್ಲಿ 10 ಸಾವಿರ ವಿಧ್ಯಾರ್ಥಿಗಳು ಹಾಗೂ ಯುವಜನರಿಂದ ಜಿಲ್ಲಾಧಿಕಾರಿಗಳ ಕಛೇರಿ ಮುತ್ತಿಗೆ-ಲಾಠಿಚಾರ್ಚು ಘರ್ಷಣೆ. ಬಂಡಿ ಮೋಟು, ಅಂದ್ರಾಳು ಹೋರಾಟಗಳು ಸ್ಮರಣಿಯ. ಅಂದ್ರಾಳುವಿನ ಡಿವೈಎಫ್‍ಐ ನಾಯಕ ಗಂಗಾಧರ ಹುತಾತ್ಮನಾದದ್ದೂ ಮರೆಯದ ಗಟನೆ.

ಹೀಗೆ ಸಂಘಟನೆಯ ಮುಂಚೂಣಿಯಲ್ಲಿ ಪ್ರಸನ್ನ ತೊಡಗಿಸಿ ಕೊಂಡರು. ಎಸ್.ಎಫ್.ಐ. ನ ಮೊದಲ ಜಿಲ್ಲಾ ಸಮ್ಮೇಳನ 1983 ಜನವರಿ 9, 10ರಂದು ಹರಪನಹಳ್ಳಿಯಲ್ಲಿ ನಡೆದು ನಾನು ಜಿಲ್ಲಾ ಕಾರ್ಯದರ್ಶಿಯಾಗಿ, ಆಯ್ಕೆಯಾಗಿದ್ದೆ. 2ನೇ ಜಿಲ್ಲಾ ಸಮ್ಮೇಳನ ಬಳ್ಳಾರಿಯಲ್ಲಿ 1983ರ ಸಪ್ಟಂಬರ್‍ನಲ್ಲಿ ನಡೆದು ಕಾಂ ಪ್ರಸನ್ನ ಅದ್ಯಕ್ಷರಾಗಿ ನಾನು ಕಾರ್ಯದರ್ಶಿಯಾಗಿ ಕಾಂ. ವಿ.ಎಸ್.ಕೋದಂಡರಾಮ್ ಖಜಾಂಚಿಯಾಗಿ ಜಿಲ್ಲಾ ಸಮಿತಿ ಆಯ್ಕೆಯಾಯಿತು. ಈ ತಂಡದ ಕಾರ್ಯ ವಿಧಾನ ಅದರ ಸೈದಾಂತಿಕ ಸಂಘಟನಾ ಬಲವು ಉಲ್ಲೇಖನೀಯ. ಅತ್ಯಂತ ಶಿಸ್ತುಬದ್ಧ ಕಾರ್ಯನಿರ್ವಹಣಿ, ಸಾಮೂಹಿಕ ನಿರ್ಧಾರಗಳು-ವೈಯುಕ್ತಿಕ ಹೊಣೆಗಾರಿಕೆ, ಸ್ವಯಂ ವಿಮರ್ಶೆ-ವಿಮರ್ಶೆ, ವಿವಿಧ ಪ್ರಶ್ನೆಗಳ ಆಧಾರದಲ್ಲಿ ವಿವಿಧ ವಿಭಾಗಗಳ ವಿದ್ಯಾರ್ಥಿಗಳ ಹೋರಾಟ ಕಟ್ಟುವಲ್ಲಿ, ಸಂಘಟನೆಯನ್ನು ವಿಸ್ತರಿಸುವಲ್ಲಿ, ಸಂಘಟನಾ ಸಮಸ್ಯೆಗಳನ್ನು ಬಗೆಹರಿಸುವಲ್ಲಿ ಈ ತಂಡದ ಕೆಲಸ (ಹಾಸ್ಟೆಲ್, ಐ.ಟಿ.ಐ., ಹೈಸ್ಕೂಲ್, ವಿದ್ಯಾರ್ಥಿನಿಯರ ಸಮಾವೇಶಗಳು ಹಾಗೂ ಹೋರಾಟಗಳು, ಗುಲಬರ್ಗಾ ವಿಶ್ವವಿದ್ಯಾಲಯ ಕೇಂದ್ರಕ್ಕಾಗಿ, ಇತ್ಯಾದಿ) ಗಮನಾರ್ಹ. ಸಾಮೂಹಿಕ ನಾಯಕತ್ವ ರೂಪಿಸಲು, ಬೆಂಬಲಿಸಲು ಅಂದಿನಿಂದಲೂ ಪ್ರಸನ್ನರವರು ನೀಡುತ್ತಿದ್ದ ಒತ್ತು ಪ್ರಶಂಸನೀಯ. ಸಂಘಟನೆಯ ಅಗತ್ಯಗಳಿಗೆ ಅನುಗುಣವಾಗಿ ಹೊಸ ವಿಧಾನಗಳನ್ನು ಅಳವಡಿಸಿಕೊಳ್ಳುತ್ತಿದ್ದೆವು. ಉದಾ: ಪ್ರತಿ ಜಿಲ್ಲಾ ಸಮಿತಿ ಸಭೆಗಳಲ್ಲಿಯೂ ಸೈದ್ಧಾಂತಿಕ ತರಗತಿಗಳು ಕಡ್ಡಾಯ. ಅದನ್ನು ಪದಾಧಿಕಾರಿಗಳು ಸರತಿ ಸುತ್ತಿನಂತೆ ಮಾಡಬೇಕು. ಹಾಗೆಯೇ ಕಾಲೇಜಿನಲ್ಲಿ ಸದಸ್ಯತ್ವ ಹೆಚ್ಚಾದಾಗ ಕ್ಲಾಸ್-ಸೆಕ್ಷನ್‍ವಾರು ಸಮಿತಿಗಳ ರಚನೆ ಹೀಗೆ. ನಂತರ ಪ್ರಸನ್ನ ಕಾರ್ಮಿಕ ಸಂಘಟನೆಯ, ಪಕ್ಷದ ನಾಯಕನಾದಾಗಲೂ ಇಂತಹ ಪ್ರಯೋಗಗಳು ನಡೆಯುತ್ತಿದ್ದವು. ಇದು ಅವರ ವಿಶೇಷತೆ.

ಕಾರ್ಮಿಕ ಸಂಘಟನೆಯತ್ತ

ಬಳ್ಳಾರಿಯಲ್ಲಿ ನಿಧಾನಕ್ಕೆ ವಿದ್ಯಾರ್ಥಿ ರಂಗದಿಂದ ನಮ್ಮ ಚಟುವಟಿಕೆಗಳು ಪ್ರದೇಶ ಆಧರಿಸಿ ಜನತೆಯ ನಿವಾಸಗಳ ಕಡೆಗೆ ವಿಸ್ತರಿಸಿತು. ಯುವಜನ ಸಂಘಟನೆಯಲ್ಲಿ ಒಬ್ಬ ಪದಾಧಿಕಾರಿಯಾಗಿದ್ದರೂ ಪ್ರಧಾನವಾಗಿ ಕಾಂ. ಪ್ರಸನ್ನ ವಿದ್ಯಾರ್ಥಿ ರಂಗದಿಂದ ಕಾರ್ಮಿಕರ ಸಂಘಟನೆಯತ್ತ ಗಮನಹರಿಸ ತೊಡಗಿದರು. ಕಾರ್ಮಿಕರ ವರ್ಗವನ್ನು ಸಂಘಟಿಸು ವುದು ಅತೀ ಮಹತ್ವದ್ದೆಂದು ಮನಗಂಡ ಕಾಂ. ಪ್ರಸನ್ನರವರು ಆರಂಭದಲ್ಲಿ ಶಾಪ್ಸ್ ಅಂಡ್ ಎಸ್ಟಾಬ್ಲಿಷ್ ವರ್ಕರ್ಸ್ ಯೂನಿಯನ್, ಹಮಾಲಿಗಳ ಸಂಘ, ಹೀಗೆ ಬಳ್ಳಾರಿ ಪ್ರದೇಶದಲ್ಲಿ ವಿವಿಧ ಕಾರ್ಮಿಕರ ಸಂಘಟನೆಗಳತ್ತ ಗಮನ ಕೇಂದ್ರಕರಿಸಿದರು. ಸಿಐಟಿಯುವಿನ ಬೆಳವಣಿಗೆಗೆ ಗಮನ ನೀಡಿದರು. ಇಂತಹ ಪ್ರಯತ್ನಗಳು ಬೇರೆ ತಾಲೂಕಿನಲ್ಲಿ ನಡೆಯ ತೊಡಗಿದ್ದವು. ಪ್ರಾಂತ ರೈತ ಸಂಘವೂ ಹರಪನಹಳ್ಳಿ, ಹಡಗಲಿ, ಹಗರಿಬೊಮ್ಮನಹಳ್ಳಿ ತಾಲೂಕುಗಳಲ್ಲಿ ಬೆಳೆಯ ತೊಡಗಿತ್ತು. ಜಿಲ್ಲೆಯ ಒಟ್ಟು ಪ್ರಜಾಸತ್ತಾತ್ಮಕ ಚಳುವಳಿಯ ಬೆಳವಣಿಗೆಗೆ ಕಾರ್ಮಿಕ ವರ್ಗದ ನಡುವಿನ ಕೆಲಸ ಸಹಕಾರಿಯಾಯಿತು. ಪಕ್ಷದ ಪ್ರಭಾವ ವಿಸ್ತರಿಸತೊಡಗಿತು. ಇದು ಪಕ್ಷದ ವರ್ಗ ಸಂಯೋಜನೆ ಯಲ್ಲಿಯೂ ಬದಲಾವಣೆ ತಂದಿತಲ್ಲದೇ ಕೇವಲ ವಿಧ್ಯಾರ್ಥಿ ಯುವಜನ ಹಾಗೂ ಮಧ್ಯಮ ವರ್ಗದ ನಡುವೆ ಮಾತ್ರ ಸೀಮಿತ ವರ್ಗದ ಪಕ್ಷ ದುಡಿಯುವ ವರ್ಗದ ಪ್ರವೇಶದಿಂದ ಹೊಸ ಚೈತನ್ಯ ಪಡೆಯಿತು. ಈ ಪ್ರಕ್ರಿಯೆಯ ಸಂದರ್ಭದಲ್ಲಿಯೇ ಕಾಂ. ಪ್ರಸನ್ನ ರವರು ಪಕ್ಷದ ಜಿಲ್ಲಾ ಕಾರ್ಯದರ್ಶಿ ಯಾಗಿ ಜವಾಬ್ದಾರಿ ವಹಿಸಿಕೊಳ್ಳಬೇಕಾಯಿತು. ನಮ್ಮ ನೆಲೆ ಬಲ ಆಧರಿಸಿ ಪಕ್ಷವು ರಾಜಕೀಯವಾಗಿ ಮಧ್ಯಪ್ರವೇಶಿಸುವುದಕ್ಕೆ ಸಾಧ್ಯವಾಯಿತು. ಬಹುತೇಕ ಈ ಅವಧಿಯಲ್ಲೇ ಹೊಸಪೇಟೆಯಲ್ಲಿ ಸಕ್ರಿಯವಾಗಿದ್ದ ಕಾಂ.ಯು.ಬಸವರಾಜ್ ಬಳ್ಳಾರಿ ಟೀಮನ್ನು ಸೇರಿಕೊಂಡರು.

ವಿಶೇಷವಾಗಿ ಬಳ್ಳಾರಿ ನಗರದಲ್ಲಿ ಆಗೆಲ್ಲಾ ರಾಜಕೀಯವಾಗಿ ಬಿಗಿ ಹಿಡಿತವಿದ್ದದ್ದು ಅಂದಿನ ರಾಜ್ಯ ಸರಕಾರದ ಮಂತ್ರಿ ಮಂಡ್ಲೂರು ರಾಮಪ್ಪನವರ ಕೈಯಲ್ಲಿ, ಬಳಿಕ ಮಂಡ್ಲೂರು ದಿವಾಕರ್ ಅದನ್ನು ವಹಿಸಿಕೊಂಡಿದ್ದರು. ಅವರು ಬಳ್ಳಾರಿಯಲ್ಲಿ ಜನರ ನಡುವೆ ಯಾರೂ ರಾಜಕೀಯವಾಗಿ-ಸಂಘಟನಾತ್ಮಕವಾಗಿ ಪ್ರವೇಶಿಸಿದಂತೆ, ಪ್ರಶ್ನಿಸದಂತೆ ಬೇರಾವ ಶಕ್ತಿಗಳೂ ಇರಬಾರದೆಂದು ಕ್ರಿಮಿನಲ್ ಗೂಂಡಾಗಿರಿ ಮತ್ತು ಸರಕಾರಿ ಆಡಳಿತ ಮೂಲಕ ನಿಯಂತ್ರಿಸುತ್ತಿದ್ದರು. ಇದರಿಂದ ಬಳ್ಳಾರಿ ನಗರದ ಜನ ಬೇಸತ್ತು ಹೋಗಿದ್ದರೂ ಎದುರಿಸುವ ಶಕ್ತಿ ಇರಲಿಲ್ಲ ಇಂತಹ ಸಂದರ್ಭದಲ್ಲಿ ಜನರ ಪ್ರಶ್ನೆಗಳನ್ನೆತ್ತಿ ಹೋರಾಡುತ್ತಿದ್ದ ನಮ್ಮ ಮೇಲೆ ದಾಳಿ ಆರಂಭಿಸಿದ್ದರು. ಇಂತಹ ಸಂದರ್ಭದಲ್ಲಿ ರಾಜಕೀಯವಾಗಿ, ಸಂಘಟನಾತ್ಮಕವಾಗಿ ಸಿಪಿಐ (ಎಂ) ಪಕ್ಷ ಹೋರಾಟ ನಡೆಸುವಲ್ಲಿ ಕಾಂ. ಪ್ರಸನ್ನರವರು ವಹಿಸಿದ ಮುತುವರ್ಜಿ, ಮುಂಚೂಣಿ ಪಾತ್ರವೇ ಪ್ರಧಾನವಾದುದು. ಹಲವು ಬಾರಿ ಕೊಲೆ ಬೆದರಿಕೆಗಳು, ರೌಡಿಗಳ ಧಾಳಿ, ಪೊಲೀಸರ ಮೂಲಕ ದಮನಿಸುವ ಪ್ರಯತ್ನಗಳು ನಡೆದ ಬಳ್ಳಾರಿ ಸ್ಟೀಲ್ ಅಲಾಯ್ಸ್ ಕಾರ್ಮಿಕರ ಹೋರಾಟ ಸಂದರ್ಭದಲ್ಲಿ ಭೂಗತವಾಗಿಯೇ ಹೋರಾಟ ಮುಂದುವರೆಸ ಬೇಕಾಯಿತು. ಇವೆಲ್ಲವುಗಳಿಂದ ಪಕ್ಷದ ಪ್ರತಿಷ್ಠೆ, ಪ್ರಭಾವ ಬೆಳೆಯಿತು. ಮುಂದೆಯೂ ಗಣಿಗಳ್ಳರಾದ ರೆಡ್ಡಿಗಳ ಗಣಿ ಮಾಫಿಯಾ ಗ್ಯಾಂಗ್‍ನ್ನು ಎದುರಿಸುವಲ್ಲಿ ಪ್ರಸನ್ನರ ಮುತುವರ್ಜಿ ಉಲ್ಲೇಖನೀಯ.

ರಾಜ್ಯ ನಾಯಕತ್ವಕ್ಕೆ

ಹೀಗೆ ಸಕ್ರಿಯವಾಗಿ ತೋಡಗಿದ್ದ ಕಾಂ. ಪ್ರಸನ್ನರವರು ಪಕ್ಷದ ರಾಜ್ಯ ಸಮಿತಿಯ ತೀರ್ಮಾನದಂತೆ ರಾಜ್ಯ ಕೇಂದ್ರ ಬೆಂಗಳೂರಿಗೆ ಬರಬೇಕಾಯಿತು. ವೈಯುಕ್ತಿಕವಾಗಿ ಅವರಿಗೆ ಇಷ್ಟವಿರದಿದ್ದರೂ ಚಳುವಳಿಯ ಅಗತ್ಯಗಳನ್ನು ಮನಗಾಣಿಸಿ ಕರೆದು ತರಲಾಯಿತು. ಜಿಲ್ಲಾ ಮಟ್ಟದ ಅನುಭವದಿಂದ ರಾಜ್ಯ ಮಟ್ಟದ ಅನುಭವ ಪಡೆಯಲು ಇದು ಸಹಾಯಕವಾಯಿತು. ಕಾಂ.ಪ್ರಸನ್ನರವರು ರಾಜ್ಯ ಸಮಿತಿ ಸದಸ್ಯರಾಗಿದ್ದವರು ಮುಂದೆ ರಾಜ್ಯ ಕಾರ್ಯದರ್ಶಿ ಮಂಡಳಿಯ ಸದಸ್ಯರಾಗಿದರು. ಈ ಮೂಲಕ ಹಿರಿಯರ ಮಾರ್ಗದರ್ಶನದಲ್ಲಿ ಪಕ್ಷದ ರಾಜ್ಯ ಕೇಂದ್ರದ ಭಾಗವಾಗಿ, ನಾವು ಪುನಃ ಒಡನಾಡಿಗಳಾಗಿ ಕೆಲಸ ಮಾಡುವ ಅವಕಾಶ ಲಭ್ಯವಾಯಿತು. ನಂತರ ದಿನಗಳಲ್ಲಿ ಅವರು ಸಿಐಟಿಯುವಿನ ಜವಾಬ್ದಾರಿಗಳನ್ನು ಹೊರಬೇಕಾಯಿತು. ಹಿರಿಯ ಚೇತನಗಳಾದ ಕಾಂ.ಪಿ. ರಾಮಚಂದ್ರರಾವ್, ಕಾಂ. ಸೂರಿ, ಕಾಂ.ಎನ್.ಕೆ.ಉಪಾಧ್ಯಾಯ. ಕಾಂ.ಸಿ ನಂಜುಂಡಪ್ಪ ನವರ ಅಗಲಿಕೆ ಪಕ್ಷದಲ್ಲೂ, ಕಾರ್ಮಿಕ ಚಳುವಳಿಯಲ್ಲಿ ಅಘಾತಕರವಾಗಿ ಒದಗಿ ಬಂದಾಗ ಹಿರಿಯರಾದ ಕಾಂ. ವಿಜೆಕೆ ನಾಯರ್ ಅವರಿಗೂ, ಉಳಿದಂತೆ ಯುವ ಕಾರ್ಯಕರ್ತರ ಹೆಗಲಿಗೆ ಟ್ರೇಡ್ ಯೂನಿಯನ್ ಹೊಣೆಗಳು ಬಿದ್ದವು. ವಿವಿಧ ಜವಾಬ್ದಾರಿ ವಹಿಸಿಕೊಂಡತೆ ಕಾಂ. ಪ್ರಸನ್ನ ಆ ಸ್ಥಾನಕ್ಕೆ ಅಗತ್ಯವಾದ ಅಧ್ಯಯನ, ಕಠಿಣ ಕಾರ್ಯ ವಿಧಾನಗಳ ಮೂಲಕ ಸಾಮಥ್ರ್ಯವನ್ನು ಮೇಲ್ ಮಟ್ಟಕ್ಕೆ ಎತ್ತರಿಸಿಕೊಂಡರು. ಪ್ರಾಯೋಗಿಕ ಅನುಭವಗಳ ಮೂಲಕ ಮಾಕ್ರ್ಸ್‍ವಾದಿ ಲೆನಿನ್‍ವಾದಿ ತಿಳುವಳಿಕೆಯನ್ನು ಮತ್ತಷ್ಟು ಸ್ಪಷ್ಟಗೊಳಿಸಕೊಂಡು ಬೆಳೆದರು. ಹೀಗೆ ಹತ್ತಾರು ಸಣ್ಣ ಮತ್ತು ಮೈಕೋ, ಐಟಿಸಿ, ಹಿಂಡಾಲ್ಕೋ, ಪೇಪರ್ ಮಿಲ್‍ನಂತಹ ಬೃಹತ್ ಕಾರ್ಮಿಕ ಸಂಘಗಳಿಗೆ, ರಕ್ಷಣೆ, ಎಲೆಕ್ಟ್ರಾನಿಕ್ಸ್, ಸಾರಿಗೆ ಒಳಗೊಂಡು ವಿವಿಧ ಸಾರ್ವಜನಿಕ ಉದ್ಯಮಗಳ ರಂಗದಲ್ಲಿ ನೇತೃತ್ವ ಕೊಡಬೇಕಾಯಿತು. ರಾಜ್ಯದ, ರಾಷ್ಟದ ಉದ್ದಿಮೆ ಕ್ಷೇತ್ರಗಳನ್ನು ಪ್ರವೇಶಿಸಬೇಕಾಯಿತು. ಅದು ಬೀಡಿ ಕಾರ್ಮಿಕರೇ ಇರಲಿ, ದಿನಗೂಲಿಗಳಾಗಿರಲಿ ಅಥವಾ ವಿಮಾನ ತಯಾರಿಕಾ ನೌಕರರಿರಲಿ ಸದಾ ಕಾರ್ಮಿಕ ವರ್ಗದ ಹಿತ ಕಾಯಲು, ಕಾರ್ಮಿಕ ವರ್ಗದ ಕ್ರಾಂತಿಕಾರೀ ನೈತಿಕತೆಯನ್ನು ಎತ್ತಿ ಹಿಡಿಯಲು ಸದಾ ಬದ್ಧವಾಗಿದ್ದುದು ಸ್ಪೂರ್ತಿದಾಯಕ. ಇಂತಹ ಕೆಲ ವಿಶೇಷಗಳು, ಜನತೆಗಾಗಿ ಪೂರ್ಣ ಪ್ರಾಮಾಣಿಕವಾಗಿ ಸಮರ್ಪಿಸಿ ಕೊಂಡ ರೀತಿ ಅನುಕರಣೀಯ. ಆರಂಭದ ದಿನಗಳಿಂದಲೂ ನಿಸ್ವಾರ್ಥತೆ, ತ್ಯಾಗ ಮನೋಭಾವ, ಕಠಿಣ ಪರಿಶ್ರ್ರಮದ ಗುಣವನ್ನು ಸತತವಾಗಿ ಕಾಣುತ್ತಲೇ ಬಂದಿದ್ದೇನೆ. ನಿಷ್ಟುರ ಸ್ವಭಾವ ಹೊಂದಿದ್ದ ಪ್ರಸನ್ನ ಕೆಲ ವಿಷಯಗಳಲ್ಲಿ ತೀವ್ರ ಭಿನ್ನಾಭಿಪ್ರಾಯಗಳನ್ನು ವ್ಯಕ್ತ ಪಡಿಸಿದರೂ ವ್ಯಕ್ತಿಗತ ಸಂಬಂಧಗಳಿಗೆ ಅದೆಂದೂ ಚ್ಯುತಿ ತರಲಿಲ್ಲ. ಮಾತ್ರವಲ್ಲ, ಅದನ್ನು ಹಾಗೆ ಅರ್ಥೈಸಿ ಕೊಂಡದ್ದು ಇಲ್ಲ.

ಸಂಕಷ್ಟಮಯ ಜೀವನ

ಕಾಂ. ಪ್ರಸನ್ನ ಬೆಳದು ಬಂದ ಕುಟುಂಬದ ಹಿನ್ನೆಲೆಯೂ ತೀರಾ ಸಂಕಷ್ಟಮಯವೇ ಆಗಿದೆ. ಹುಟ್ಟಿದ್ದು ಸೆಪ್ಟಂಬರ್ 14, 1965 ರಲ್ಲಿ. ಕಾಂ. ಪ್ರಸನ್ನ ಇನ್ನೂ ತಾಯಿ ಶ್ರೀಮತಿ ಲಕ್ಷ್ಮಿದೇವಮ್ಮನವರ ಗರ್ಭದಲ್ಲಿ 5 ತಿಂಗಳ ಬೆಳೆವ ಭ್ರೂಣವಾಗಿರುವಾಗಲೇ ಅವರ ತಂದೆ ಕಂಡಕ್ಟರ್ ಆಗಿದ್ದ ಶ್ರೀರಾಮ್ ರವರು ಬಸ್ ನಿಲ್ದಾಣದ ಅಪಘಾತದಲ್ಲಿ ದುರಂತ ಮರಣವನ್ನು ಅಪ್ಪುತ್ತಾರೆ. ತೀರಾ ಸಾಧಾರಣ ಆರ್ಥಿಕ ಹಿನ್ನೆಲೆಯ ಈ ಕುಟುಂಬದಲ್ಲಿ ತಾಯಿಯ ಮೇಲೆಯೇ ಪೂರ್ಣ ಭಾರ. ಈ ತಾಯಿ ಹಸುಗೂಸು ಕಂಕುಳಲ್ಲಿ ಇಟ್ಟುಕೊಂಡೇ ಹೊಲಿಗೆ ಕೆಲಸ, ಹೂ ಕಟ್ಟಿ ಮಾರುವ ಕೆಲಸಗಳಿಂದ ಜೀವನ ನಿರ್ವಹಣೆ ಮಾಡುತ್ತಾಳೆ. ಮುಂದೆ ಪ್ರಸನ್ನ ಬಿ.ಕಾಂ. ವಿಧ್ಯಾರ್ಥಿ ಯಾಗಿದ್ದಾಗ ಬಳ್ಳಾರಿಯ ಬದ್ರಿ ಅಂಡ್ ಕೋ ಚಾರ್ಟಡ್ ಅಕೌಂಟೆಂಟ್ ಆಗಿ ಪಾರ್ಟ ಟೈಂ ದುಡಿದು ಮನೆಗೆ ನೆರವಾಗುತ್ತಾರೆ. ಎಸ್.ಎಫ್.ಐ. ಮತ್ತಿತರ ಚಳುವಳಿಯಲ್ಲಿ ತೊಡಗುವಿಕೆ ಹೆಚ್ಚಾದಂತೆ ಅದೂ ಖೋತಾ. ಹೀಗಿದ್ದರೂ ಅವರ ಮನೆ ನಮಗೆ ನಮ್ಮದೇ ಮನೆ. ಹೇಗೆ ಇರಲಿ ಮಧ್ಯ ರಾತ್ರಿ ಕಳೆದು ಹೋದರೂ ‘ಅಮ್ಮನ ಅಡಿಗೆ, ಮನೆಯ ಮಾಳಿಗೆಯಲ್ಲಿ ಕೌದಿ ಹಾಸಿಗೆ’ ನಮ್ಮ ಪಾಲಿಗೆ ಕಾಯಂ.

ಹಾಗೆಯೇ ಪ್ರಸನ್ನನ ವೈಯುಕ್ತಿಕ ಬದುಕಿನ ಕೆಲ ನಿರ್ಧಾರಗಳು ನನಗೆ ಚೇತೋಹಾರಿ ಶಾಕ್ ತಂದಿವೆ ಕೂಡ. ನಾವು ಈಗ ಮದುವೆ ಆಗಬಾರದು ಅದು ಚಳುವಳಿಗೆ ಅಡ್ಡಿಯಾಗಬಹುದು ಎಂದು ಯೋಚಿಸುತ್ತಿರುವಾಗಲೇ ದಿಡೀರನೇ ಮದುವೆ ನಿರ್ಧಾರ ಪ್ರಕಟಸಿ, ಸರಳ ಸಮಾರಂಭದಲ್ಲಿ ಪಾರ್ವತಿ ಮಾರಾ ರವರನ್ನು ಮದುವೆಯಾಗಿಯೇ ಬಿಟ್ಟ! ಮುಂದೆ ಕುಟುಂಬಕ್ಕಾಗಿ ಸಮಯ ನೀಡಿದ್ದು ಕಡಿಮೆ. ಆದಾಗ್ಯೂ ಅವರ ಜೀವನ ಸಂಗಾತಿಯೂ ಸಹ ಪ್ರಸನ್ನರನ್ನು ಸರಿಯಾಗಿ ಅರಿತು ಅವರ ಕೆಲಸ ಕಾರ್ಯಗಳಿಗೆ ಸಂಪೂರ್ಣ ನೆರವು ನೀಡುತ್ತಾ ಬಂದವರು. ಕುಟುಂಬದ ಇಡೀ ಹೊಣೆ ನಿರ್ವಹಿಸುತ್ತಾ ಬಂದವರು. ಅವರ ಇಬ್ಬರು ಮಕ್ಕಳು ರಾಜು ಮತ್ತು ರವಿ ಇಂಜನೀಯರಿಂಗ್ ಓದುತ್ತಿರುವ ಪ್ರತಿಭಾನ್ವಿತರು. ಇವರೆಲ್ಲರೂ ಪಕ್ಷದ ಬೆಳವಣಿಗೆ ಕಾಳಜಿಯಿಟ್ಟು ಹಲವು ರೀತಿಯಲ್ಲಿ ನೆರವಾದವರು.

ಕಠಿಣ ಶ್ರಮಜೀವಿ

ಕಾಂ. ಪ್ರಸನ್ನ ಕಠಿಣ ಶ್ರಮಜೀವಿ. ಹೊಸ ಹೊಸ ವಿಷಯಗಳನ್ನು ಅನ್ವೇಷಿಸುತ್ತಾ ಕಲಿಯುವ ಗುಣ ಹೊಂದಿದ್ದರು. ಬಿಕಾಂ ಆದ ಬಳಿಕ ಎಸ್.ಎಫ್.ಐ. ನಾಯಕರು ವಿದ್ಯಾಭ್ಯಾಸ ಮಾಡಬೇಕು, ಸಮೂಹದೊಂದಿಗೇ ಇರಬೇಕು ಎಂಬ ಹಿರಿಯರಾದ ವೈ. ಭೀಮಸೇನಾಚಾರ್ ರವರ ಸಲಹೆ ಹಿನ್ನೆಲೆಯಲ್ಲಿ ಕಾನೂನು ಪದವಿಗೆ ಬಳ್ಳಾರಿಯಲ್ಲಿ ನಾವು ಸೇರಿದೆವು. ಆಗ ಮುಗಿಸಲಾಗದಿದ್ದರೂ ನಂತರದಲ್ಲಿ ಅದನ್ನು ಪ್ರಸನ್ನ ಮುಗಿಸಿದರು. ಬಳಿಕ ಇತ್ತೀಚೆಗೆ ಎಲ್.ಎಲ್.ಎಂ. ಗೆ ಸೇರಿ ಅವರು ಅಗಲುವ ಕೇವಲ ಒಂದು ತಿಂಗಳ ಒಳಗೆ ಅಂತಿಮ ಪರೀಕ್ಷೆಯನ್ನೂ ಬರೆದರು. ಕಲಿಕೆ ಪ್ರಸನ್ನರಲ್ಲಿ ಸದಾ ಜೀವಂತ. ಕಾರ್ಮಿಕ ಪ್ರಶ್ನೆಗಳಿಗೆ ಉತ್ತರ ಹುಡುಕುವ, ಸಂಘಟನೆ ಮತ್ತು ಪಕ್ಷದ ದಸ್ತಾವೇಜುಗಳನ್ನು, ಮನವಿಪತ್ರಗಳನ್ನು ಸಿದ್ದಗೊಳಿಸುವ ಅಥವಾ ಪಕ್ಷದ ಕೆಲಸಗಳಿಗಾಗಿ ರಾತ್ರಿಯಿಡೀ ಓದುವ, ಬರೆಯುವ ಕೆಲಸದಲ್ಲಿ ತೊಡಗಿರುತ್ತಿದ್ದರು. ಸಿಪಿಐ(ಎಂ) ನ ರಾಜ್ಯ ಕಾರ್ಯದರ್ಶಿ ಮಂಡಳಿಯ ಸದಸ್ಯನಾಗಿ, ಸಿಐಟಿಯುವಿನ ರಾಜ್ಯ ಪ್ರಧಾನ ಕಾರ್ಯದರ್ಶಿಯಾಗಿ, ಅಖಿಲ ಭಾರತ ಕಾರ್ಯದರ್ಶಿಗಳಲ್ಲೊಬ್ಬರಾಗಿ ರಾಜಕೀಯ, ಸಂಘಟನಾ ಹೊಣೆಗಳೂ ಅಧಿಕವಿದ್ದವು. ನಿರಂತರ ಪ್ರವಾಸಗಳು ಸಭೆಗಳು ಅವಿರತ. ಒಟ್ಟು ಎಲ್ಲಾ ಒತ್ತಡಗಳೂ ಅವರ ಆರೋಗ್ಯದ ಮೇಲೆ ಪರಿಣಾಮ ಬೀರಿರುವುದರಲ್ಲಿ ಅನುಮಾನವಿಲ್ಲ.

ಕಾಂ.ಪ್ರಸನ್ನ ಕಮ್ಯೂನಿಸ್ಟ್ ನೈತಿಕತೆಗೆ, ತತ್ವಗಳಿಗೆ ಬದ್ಧವಾಗಿದ್ದವರು. ಸ್ವತಃ ಅವಿರತ ಶ್ರಮಜೀವಿಯಾಗಿ, ಶ್ರಮಿಕ ವರ್ಗದ ವಿಮೋಚನೆಗೆ ಪೂರ್ಣ ತೊಡಗಿಸಿಕೊಂಡ ಸಮರ್ಪಣಾ ಮನೋಭಾವದ ಮುಖ್ಯವಾಗಿ ಮಾನವೀಯ ತೆಯ ಮಿಡಿತವಿದ್ದ, ತೀರಾ ಸರಳತೆ ಮತ್ತು ಪ್ರಾಮಾಣಿಕತೆಯ ಸ್ನೇಹಮಯಿ ವ್ಯಕ್ತಿತ್ವದ ನೈಜ ಕಮ್ಸೂನಿಸ್ಟ್ ಕಾಂ. ಪ್ರಸನ್ನಕುಮಾರವರು. ಕಾಂ. ಎಸ್.ಪಿ. ದುಡಿಯುವ ವರ್ಗದ ಐಕ್ಯತೆಗೆ ಶ್ರಮಿಸಿದವರು. ಕಾಂ.ಪ್ರಸನ್ನರವರ ಅವರ ಅಗಲಿಕೆ ಸಿಪಿಐ(ಎಂ) ಪಕ್ಷಕ್ಕೆ ಶ್ರಮಜೀವಿ ಬೆಳವಣಿಗೆ ಆದ ಅಪಾರ ನಷ್ಟ.

ಕಾಂ.ಪ್ರಸನ್ನ ರವರಿಗೆ, ಕಾಲಿಗೆ ಚಕ್ರ ಕಟ್ಟಿಕೊಂಡಿದ್ದೀರಾ ಎಂದು ವಿನೋದವಾಗಿ ಕೇಳಲಾಗುತ್ತಿತ್ತು. ಅನಾರೋಗ್ಯದ ನಡುವೆ ನಾಲ್ಕಾರು ಕೆಲಸದ ಯೋಜನೆ ಮಾಡಿದ್ದರು.ಶುದ್ಧ ಗಾಳಿಗಾಗಿ, ಜೀವದುಸಿರಿಗಾಗಿ ಬೆಳಗಿನ ಜಾವ ಅಡಿ ಇಡುತ್ತಾ ಸಾಗಿರುವಾಗಲೇ ಮಿಡಿವ ಹೃದಯ ನಿಂತು ನಿಶ್ಚಲವಾದುದು ದುರಂತ ಹಾಗೂ ಸಂಕೇತ. ಸದಾ ಓಡಾಡುತ್ತಾ, ಮಾತನಾಡುತ್ತಾ ಸುಳಿದಾಡುತ್ತಿದ್ದ ಸಂಗಾತಿ ಪ್ರಸನ್ನ ಇನ್ನು ಇಲ್ಲ ಎಂಬುದನ್ನು ನನ್ನ ಮನಸ್ಸು ಒಪ್ಪುತ್ತಲೇ ಇಲ್ಲ. ಈತ ಸಾವಿನಲ್ಲೂ ಸಾಯದ ಸಂಗಾತಿಗಳ ಪರಂಪರೆಯಲ್ಲಿ ಬೆಳಗುವ ಒಂದು ನಕ್ಷತ್ರ.

ವೈಯಕ್ತಿಕ ಹಿತ ಗಣಿಸದೇ…

‘ಸಾರ್, ನಾನೀಗ ನಿಮ್ಮ ಹಾರ್ಟ್ ಕ್ಲಬ್ ಮೆಂಬರ್.’ ಹೀಗೆಂದು ದೂರವಾಣಿಯಲ್ಲಿ ಪ್ರಸನ್ನ ಹೇಳಿದಾಗ ನಾನೆಂದೆ.’ತಮಗೆ ಆದರದ ಸ್ವಾಗತ. ಆದರೆ ನಾನು ಇದೀಗ ಹೊಸ ಕ್ಲಬ್ ಮೆಂಬರ್. ನಿಮಗೆ ಸ್ವಾಗತವಿಲ್ಲ’ ಎಂದು ನಗುತ್ತಲೇ ಹೇಳಿದೆ.

ಒಂದು ವಾರದ ಕೆಳಗೆ ನಾನು ತುರ್ತು ಚಿಕಿತ್ಸೆಗಾಗಿ ಆಸ್ಪತ್ರ್ರೆಗೆ ಸೇರಿದ್ದಾಗ ಐಸಿಯು ವಿನಲ್ಲಿ ಮಾತನಾಡಿಸಿ ಹೊದ ಪ್ರಸನ್ನ ರವರು ಮರುದಿನ ತೆರಳಿದ್ದು ಜಯದೇವ ಆಸ್ಪತ್ರೆಯ ಆವರಣದಲ್ಲಿನ ಡಯಾಬಿಟೀಸ್ ಆಸ್ಪತ್ರೆಗೆ. ಅಲ್ಲಿ ಹಿಂಭಾಗದ ಹೃದಯಕ್ಕೆ ಹೃದಯಾಘಾತವಾಗಿದ್ದರಿಂದ ಅದರ ಪಂಪಿಂಗ್ ಬಲ ಕುಸಿತವಾಗಿದೆಯೆಂದು ತಿಳಿದ ಬಳಿಕ ತಪಾಸಿಸಿದ ವೈದ್ಯರು ಔಷದೋಪಚಾರಗಳ ಜೊತೆಗೆ ಒಂದು ಆಧುನಿಕ ಸಲಕರಣೆ ಅಳವಡಿಸಬೇಕೆಂದರು.

ಅದಕ್ಕಾಗಿ ಹಣ ಸಮಯ ಹೊಂದಿಸಿಕೊಳ್ಳುವ ತಯಾರಿಯಲ್ಲಿರುವಾಗಲೇ, ವಾಯು ವಿಹಾರದ ಸಂಧರ್ಭದಲ್ಲಿ ಹೃದಯ ಸ್ಥಂಬನವಾಗಿ ಬಿಟ್ಟಿದೆ. ಕೂಡಲೇ ಆ ಸಲಕರಣೆ ಅಳವಡಿಸಿಕೊಂಡಿದ್ದರೆ ಈ ದುರಂತ ತಪ್ಪುತ್ತಿತ್ತೇ ಎಂಬ ಪ್ರಶ್ನೆ ಕಾಡುತ್ತದೆ. ಈ ಸಲಕರಣೆಗೆ ಸುಮಾರು 6 ಲಕ್ಷ ರೂ ತಗುಲಬಹುದೆಂದು ನಾರಾಯಣ ಹೃದಯಾಲಯದ ವೈದ್ಯರು ಹೇಳಿದ್ದರು. ಇದನ್ನು ಅವರು ಕಾರ್ಮಿಕ ನಾಯಕರಾಗಿರುವ ಮ್ರೈಕೋ ಕಂಪನಿ ಆಡಳಿತ ವರ್ಗ ಭರಿಸುವುದಾಗಿ ತಿಳಿಸಿತು. ಆದರೆ ಇದನ್ನು ಪಡೆಯಬಾರದು, ಆಡಳಿತ ವರ್ಗದ ಹಂಗೇಕೆ ಎಂದು ಕಾಂ.ಪ್ರಸನ್ನ ನಿರಾಕರಿಸಿದ್ದರು. ಕಾಂ. ಬೈಯ್ಯರೆಡ್ಡಿಯವರು ಜಯದೇವ ಆಸ್ಪತ್ರೆಯ ಮುಖ್ಯಸ್ಥರೊಂದಿಗೆ ಭೇಟಿ ಮಾಡಿಸಿ ಮಾತನಾಡಿಯೂ ಆಗಿತ್ತು. ಕಾರ್ಮಿಕ ವರ್ಗವನ್ನು ನೆಚ್ಚಿ ಪರ್ಯಾಯ ನೆರವಿನ ಪ್ರಯತ್ನ ನಡೆದಿತ್ತು. ಆದರೆ..?

ಇಂತಹ ಸಂದರ್ಭದಲ್ಲಿಯೂ ವೈಯಕ್ತಿಕ ಹಿತ ಗಣಿಸದೇ ಕಾರ್ಮಿಕ ವರ್ಗದ ಹಿತ, ಬದ್ಧತೆ ಎತ್ತಿ ಹಿಡಿದ ಕಾಂ. ಪ್ರಸನ್ನ ನಿಮಗಿದೋ ನಿಜಕ್ಕೂ ಲಾಲ್ ಸಲಾಮ್!

ಟಿಪ್ಪು ವಿರೋಧದ ನೆಪ: ಸೌಹಾರ್ದತೆಗೆ ಕಿಚ್ಚು ಹಚ್ಚುವ ಹಲವು ಕುತಂತ್ರಗಳು

ಈ. ವಾರ  – ಎಸ್.ವೈ. ಗುರುಶಾಂತ್ 

ಸಂಪುಟ 9 ಸಂಚಿಕೆ 47, 22 ನವೆಂಬರ್ 2015

ಟಿಪ್ಪು ಜಯಂತಿಯೀಗ ಮುಗಿದಿದೆ. ಆದರೆ ಆ ಸುತ್ತ ಎದ್ದ ವಿವಾದದ ಕಿಡಿಗಳು ಬೆಂಕಿಯಾಗಿ ರಾಜ್ಯದ ಅನೇಕ ಕಡೆ ನಾಲಿಗೆ ಚಾಚುತ್ತಿವೆ. ಕಿಚ್ಚು ಹಚ್ಚುತ್ತಿರುವವರಿಗೆ ಶಾಂತಿ ಅಥವಾ ಅವರೆತ್ತುವ ಪ್ರಶ್ನೆಗಳಿಗೆ ಉತ್ತರ ಬೇಕಿಲ್ಲ. ಹೀಗಾಗಿಯೇ ಇತಿಹಾಸ, ಪರಂಪರೆ ಬಲ್ಲವರ ಮಾತುಗಳು ರುಚಿಸುವುದಿಲ್ಲ, ಸತ್ಯ ಅರಿಯುವ ಮನಸ್ಸೇ ಇಲ್ಲದ, ಅನುಮಾನಗಳು ಮತ್ತು ಸುಳ್ಳುಗಳ ಹುತ್ತ ಕಟ್ಟುವುದರಿಂದಲೇ ಅಧಿಕಾರದ ಉತ್ತುಂಗಕ್ಕೆ ಏರ ಬಯಸುವವರಿಗೆ ವಿವೇಕ, ವಿವೇಚನೆ ಎಲ್ಲಿಂದ ಬರಬೇಕು?

Tippu sulthan1

ಗತಕಾಲವನ್ನು ಇತಿಹಾಸವಾಗಿಯೇ ನೋಡಬೇಕು. ಭವಿಷ್ಯವನ್ನು ರೂಪಿಸಿಕೊಳ್ಳುವ ಆಶಯದಲ್ಲಿ ಅಲ್ಲಿಂದ ಅಗತ್ಯ ಇರುವುದನ್ನು ಕಲಿಯಬೇಕು. ನಮಗೆ ಇತಿಹಾಸದಿಂದ ಪಾಠಗಳನ್ನು ಕಲಿಯಬಹುದೇ ಹೊರತು ಆ ಕಾಲದಲ್ಲಿ ನಡೆಯಿತೆಂಬ ಘಟನೆಗಳಿಗೆ ವರ್ತಮಾನದಲ್ಲಿ ಉತ್ತರ ಹೇಳುವುದು, ಅದನ್ನು ಸರಿಪಡಿಸುತ್ತೇವೆಂಬುದಲ್ಲ. ಇದು ಅಸಾಧ್ಯ, ಅಸಹಜವೂ ಕೂಡ. ವರ್ತಮಾನದ ರಾಜಕೀಯ ಗುರಿಗಳಿಗೆ ಗತಕಾಲದ ಕುರಿತು ಬೆಳೆಸಲಾಗುವ ಪೂರ್ವಗ್ರಹಗಳು ಮತ್ತು ಅವುಗಳ ಹೇರಿಕೆ ತಂದೊಡ್ಡುತ್ತಿರುವ ಆವಾಂತರಗಳ ಕುರಿತು ಖ್ಯಾತ ಇತಿಹಾಸಕಾರ್ತಿ ಪ್ರೊ.ರೋಮಿಲಾ ಥಾಪರ್ ಎಚ್ಚರಿಸಿದ್ದಾರೆ.

ಇತಿಹಾಸದ ಯಾವುದೇ ಪ್ರಮುಖ ವಿದ್ಯಮಾನಗಳಿಗೆ ತನ್ನದೇ ಆದ ಹಲವು ಮಗ್ಗಲುಗಳಿರುತ್ತವೆ. 17 ನೆಯ ಶತಮಾನದ ಆದಿ ಮತ್ತು ಅದರ ಅಂತ್ಯ ಭಾಗದಲ್ಲಿ ಬದುಕಿ ಬಾಳಿ, ಅಳಿದ ಹೈದರಾಲಿ, ಟಿಪ್ಪು ಸುಲ್ತಾನ್ ರವರ ಆಡಳಿತಾವಧಿಯೇ ಸಂಕೀರ್ಣವಾದುದು. ಬ್ರಿಟನ್‍ನ ಈಸ್ಟ್ ಇಂಡಿಯಾ ಕಂಪನಿ ಭಾರತದಲ್ಲಿ ಪೂರ್ಣವಾಗಿ ಬೇರೂರಲು ತಡೆಯೊಡ್ಡಿದ ಒಂದು ರಾಜಪ್ರಭುತ್ವ ಹೈದರಾಲಿ, ಟಿಪ್ಪುಗಳದ್ದೇ. ಟಿಪ್ಪುವಿನ ಬಹುತೇಕ ಜೀವಿತಾವಧಿ ಬ್ರಿಟೀಶರ ಆಕ್ರಮಣಕ್ಕೆ ಎದುರಾಗಿ ಹೋರಾಡುವುದರಲ್ಲೇ ಕಳೆಯಿತು. ಹೀಗೆ ವಸಾಹತುಶಾಹಿಯ ಮುನ್ನಡೆಗೆ ಪ್ರತಿರೋಧದ ಒಂದು ಪ್ರಬಲ ಶಕ್ತಿ ರಣಾಂಗಣದಲ್ಲಿ ಹುತಾತ್ಮನಾದ ಟಿಪ್ಪುವೇ.

ಟಿಪ್ಪುವಿನ ಆಳ್ವಿಕೆ, ಆಡಳಿತ ವೈಖರಿ, ರಾಜಪ್ರಭುತ್ವವನ್ನು ಕಾಯ್ದುಕೊಂಡ ಬಗೆಯ ಬಗ್ಗೆ ಹಲವಾರು ವಿಭಿನ್ನ ಅಭಿಪ್ರಾಯಗಳಿವೆ. ತದ್ವಿರುದ್ಧ ಎನ್ನಿಸುವ ವ್ಯಾಖ್ಯಾನಗಳೂ ಇವೆ. ಟಿಪ್ಪುವನ್ನು ನಕಾರಾತ್ಮಕವಾಗಿ ಚಿತ್ರಿಸುವವರಿಗೆ ವಸಾಹತುಶಾಹಿಗಳ ಇತಿಹಾಸದ ವ್ಯಾಖ್ಯಾನ ವಸ್ತುವೇ ಆಧಾರ. ಅದನ್ನು ಪರಿಹರಿಸಿಕೊಳ್ಳುವ ಇಚ್ಛೆ ಅವರಿಗೆ ಖಂಡಿತ ಇಲ್ಲ.
ತ್ವೇಷದ ಸೃಷ್ಟಿ

ಹೀಗಾಗಿಯೇ ಟಿಪ್ಪುವಿನ ಕುರಿತು ಮಾತನಾಡಿದಾಗಲೆಲ್ಲಾ ಒಂದು ತೀವ್ರ ವೈಚಾರಿಕ ಸಂಘರ್ಷ ಏರ್ಪಡುತ್ತದೆ. ಇನ್ನು ಕರ್ನಾಟಕ ಸರಕಾರ ಜಯಂತಿ ಆಚರಿಸುವ ನಿರ್ಧಾರ ಪ್ರಕಟವಾದಂದಿನಿಂದಲೇ ಅದನ್ನು ತಡೆಯುವ ಘೋಷಣೆಗಳು ಕೇಳಿ ಬಂದವು. ಇಂತಹ ತೀರ್ಮಾನವನ್ನು ಕಾಂಗ್ರೆಸ್ ಸರಕಾರ ಕೈಗೊಂಡದ್ದರ ಉದ್ದೇಶದ ಬಗ್ಗೆ ಪ್ರಶ್ನೆಯೆತ್ತುವುದು ಇಲ್ಲಿ ಅಪ್ರಸ್ತುತ. ಟಿಪ್ಪುವಿಗೆ ಸೂಕ್ತ ಸ್ಥಾನ, ಗೌರವ ಒದಗಿಸಬೇಕಾದುದು ಸರಿಯಾದ ನಿರ್ಧಾರ. ಇವೆಲ್ಲವನ್ನೂ ದೇಶದಲ್ಲಿ ಸಂಘಪರಿವಾರ ಪ್ರಜಾಪ್ರಭುತ್ವ, ಧರ್ಮನಿರಪೇಕ್ಷತೆ, ವೈಚಾರಿಕತೆಯ ವಿರುದ್ಧ ನಡೆಸುತ್ತಿರುವ ಅಸಹಷ್ಣುತೆಯ ಧಾಳಿಗಳ ಹಿನ್ನೆಲೆಯಲ್ಲೇ ಅರ್ಥ ಮಾಡಿಕೊಳ್ಳಬೇಕು. ಈ ಸನ್ನಿವೇಶದಲ್ಲಿ ಸಂಘಪರಿವಾರದ ನಡವಳಿಕೆ, ಅದರ ಧಾಳಿಗಳು ಮತ್ತು ಶಾಂತಿ ಕದಡಿ ತ್ವೇಷದ ವಾತಾವರಣ ಸೃಷ್ಟಿಸುವ ವರ್ತನೆಗಳು ಭಿನ್ನಾಭಿಪ್ರಾಯಗಳನ್ನು ಇರಿಸಿಕೊಂಡೂ ಬಾಳಬೇಕು ಎಂಬ ಪ್ರಜಾತಂತ್ರದ ಕನಿಷ್ಟ ತಿಳುವಳಿಕೆಗೆ ವ್ಯತಿರಿಕ್ತವಾದುದು. ಅಲ್ಲಿ ದೂರದ ಲಂಡನ್‍ನಲ್ಲಿ ಸಂಘ ಪರಿವಾರದ ಸ್ವಯಂಸೇವಕ ನರೇಂಧ್ರ ಮೋದಿ ಸಹಿಷ್ಣುತೆಯೇ ತಮ್ಮ ಜೀವಾಳವೆಂದೆಲ್ಲಾ ಭಾಷಣ ಮಾಡು ತ್ತಿರುವಾಗಲೇ ಇಲ್ಲಿ ಆ ಪರಿವಾರ ಬೀದಿಗಳಲ್ಲಿ ಹಿಂಸೆಯ ಪ್ರದರ್ಶನ, ಜ್ಷಾನಪೀಠ ಪ್ರಶಸ್ತಿ ಪುರಸ್ಕøತ ಸಾಹಿತಿ ಗಿರೀಶ್ ಕಾರ್ನಾಡ್‍ರವರಿಗೆ ಕೊಲೆ ಬೆದರಿಕೆ-ಕೋಮು ಪ್ರಚೋದನೆಯ ಮೊಕದ್ದಮೆ, ಮುಖ್ಯಮಂತ್ರಿ ಸಿದ್ಧರಾಮಯ್ಯ, ಡಾ.ಬರಗೂರು ಮುಂತಾದವರ ಮೇಲೆ ಕೇಸ್ ದಾಖಲೆ ‘ಶಾಂತಿ’ ಕಾಪಾಡುವ ಹೆಸರಿನಲ್ಲಿ ನಡೆದವು. ಅವರು ಹುಟ್ಟು ಹಾಕಿದ ತ್ವೇಷದ ವಾತಾವರಣದಿಂದ ಇಲ್ಲಿಯವರೆಗೆ ಮೂರು ಜೀವಗಳು ಬಲಿಯಾದವು. ಇಷ್ಟಾದರೂ ವಿವೇಕ ಮೂಡದ ಈ ಪರಿವಾರ ಮತ್ತಷ್ಟೂ ರಾಜ್ಯದೆಲ್ಲೆಡೆ ಗಲಭೆಯ ಕಿಚ್ಚು ಹಚ್ಚಲು ಹೊರಟಿದೆ.

ಕುತಂತ್ರ ಕೇಂದ್ರಿತ ಯೋಜನೆ

ವಿಶೇಷವಾಗಿ ಟಿಪ್ಪು ಜಯಂತಿಯನ್ನು ವಿರೋಧಿಸಲು ಕದನದ ಕಣವನ್ನಾಗಿ ಬಿಜೆಪಿ-ಆರೆಸ್ಸೆಸ್ ಆರಿಸಿಕೊಂಡದ್ದು ಕೊಡಗು ಜಿಲ್ಲೆಯನ್ನು. ಅದಕ್ಕೆ ಮತೀಯ ವಿಭಜನೆಯ ಧೃವೀಕರಣಕ್ಕೆ ವಸ್ತು ಬೇಕಿತ್ತು. ದೇಶದಲ್ಲಿ ಮೋದಿಯ ಕಾರ್ಪೋರೇಟ್ ಹವಾ ನೆಲ ಕಚ್ಚುತ್ತಿರುವಾಗ, ರಾಜ್ಯದಲ್ಲಿ ನೆಲೆ ಉಳಿಸಿಕೊಳ್ಳಲು ಪರದಾಡುತ್ತಿರುವಾಗ ಅದು ಕೋಮುದ್ರೇಕವನ್ನು ನೆಚ್ಚದೇ ಬೇರೇನು ಮಾಡೀತು? ಆದ್ದರಿಂದಲೇ ಜಯಂತಿ ನಿರ್ಧಾರ ಪ್ರಕಟವಾಗುವ ಸಂದರ್ಭದಲ್ಲೇ ಟಿಪ್ಪುವಿನ ವಿರುದ್ಧ ಅಪಪ್ರಚಾರವನ್ನು ಅತ್ಯಂತ ವ್ಯವಸ್ಥಿತವಾಗಿ ಆರಂಭಿಸಿತು. ಇಲ್ಲಿ ಆರಂಭದಲ್ಲಿ ಸಂಘಪರಿವಾರ ತಾನು ನೇರ ಇಳಿಯಲಿಲ್ಲ. ಬದಲಾಗಿ ಜನಾಂಗೀಯವಾದದ ನೆಲೆಯಲ್ಲಿ ಶಬ್ದ ಮಾಡುವ ಕೊಡಗು ಪ್ರತ್ಯೇಕತಾವಾದಿ ಸಂಘಟನೆಯನ್ನು ಬಳಸಿತು. ಅದರ ನಾಯಕ ಎಸ್.ಯು.ನಾಚಪ್ಪನವರ ಮೂಲಕ ಹಿಂದೆ ಟಿಪ್ಪು ಕಾಲದಲ್ಲಿ ಕೊಡಗಿನ ದೇವಟಿ ಪರಂಬು ಎಂಬಲ್ಲಿ ಟಿಪ್ಪು 30,000 ಕೊಡವರನ್ನು ಕೊಂದಿರುವುದಾಗಿ ಅದರ ನೆನಪಿನಲ್ಲಿ ಒಂದು ಕಾರ್ಯಕ್ರಮ ಆಯೋಜಿಸುವುದಾಗಿ ಪ್ರಚಾರ ಆರಂಭಿಸಿತು. ಈ ಸಂಖ್ಯೆ ಬರಬರುತ್ತಾ 60 ಸಾವಿರದಿಂದ 70-90 ಸಾವಿರವೂ ತಲುಪಿದ್ದು, ಲಕ್ಷಾಂತರ ಜನರನ್ನು ಮತಾಂತರ ಮಾಡಲಾಯಿತೆಂದು ಹೇಳುತ್ತಾ ಹೋದದ್ದು ಅದರ ನಿಜ ಉದ್ದೇಶವನ್ನು ತೋರಿಸುತ್ತದೆ. ಕೊಡವರನ್ನು ಟಿಪ್ಪು ಅರ್ಥಾತ್ ಮುಸ್ಲಿಂರ ವಿರುದ್ಧ ಪ್ರಚೋದಿಸುವ ಅದರ ಪ್ರಯತ್ನ ಒಂದು ಹಂತದಲ್ಲಿ ಸಾಧಿತವಾದ ಮೇಲೆ ಅದು ವಿಶ್ವ ಹಿಂದೂ ಪರಿಷತ್, ಹಿಂದೂ ಜಾಗರಣಾ ವೇದಿಕೆ, ಬಜರಂಗದಳ ಕೊನೆಗೆ ಬಿಜೆಪಿಗಳ ಮೂಲಕ ನೇರ ಕಣಕ್ಕೆ ಇಳಿಯಿತು.

ಕೊಡಗು ಕೋಮು ಸೂಕ್ಷ್ಮ ಪ್ರದೇಶವೆಂಬುದು ನಿಜ. ಆದರೆ ಹಿಂದಿನ ಗಲಭೆಗಳ ಅನುಭವ ಮತ್ತು ಹೊಸ ವಿದ್ಯಮಾನಗಳ ಹಿನ್ನೆಲೆಯಲ್ಲಿ ಕೋಮುವಾದೀ ಪ್ರಚೋದನೆಗಳಿದ್ದರೂ ಇತ್ತೀಚಿನ ವರುಷಗಳಲ್ಲಿ ಗಲಭೆಗಳಾಗಿ ಸಿಡಿದಿರಲಿಲ್ಲ. ಕೊಡವರು ಕೈತಪ್ಪದಂತೆ ಉಳಿಸಿಕೊಂಡು ಕ್ರೋಢೀಕರಿಸಿ ಕೊಂಡೇ ಅಲ್ಲಿ ತನ್ನ ರಾಜಕಾರಣ ಮಾಡಬೇಕಾದ ಒತ್ತಡದಲ್ಲಿ ಬಿಜೆಪಿ ಇದೀಗ ಈ ಸಂದರ್ಭವನ್ನು ಬಳಸುವ ಹವಣಿಕೆಯಲ್ಲಿದೆ. ಯಾಕೆಂದರೆ ಮುಂದೆ ಸ್ಥಳೀಯ ಸಂಸ್ಥೆಗಳಿಂದ ವಿಧಾನಪರಿಷತ್ ಸದಸ್ಯತ್ವಕ್ಕೆ ಚುನಾವಣೆಯಿದೆ, ಜಿಲ್ಲಾ, ತಾಲೂಕು ಪಂಚಾಯತ್ ಚುನಾವಣೆಗಳೂ ಇವೆ. ಬಿಜೆಪಿಗಿರುವಂತೆ ಕಾಂಗ್ರೆಸ್‍ಗೂ ಜಿಲ್ಲಾ ನಾಯಕತ್ವದಲ್ಲಿ ಕೊಡವ ಸಮುದಾಯದಿಂದಲೇ ಇದ್ದಾರೆ.

ದುರ್ಘಟನೆ

2015ರ ನವೆಂಬರ್ 10ರಂದಿನ ಜಯಂತಿಯನ್ನು ವಿರೋಧಿಸುವ, ತಡೆಯುವ ಬೆದರಿಕೆಗಳನ್ನು ಅವರು ಒಡ್ಡುತ್ತಲೇ ಬಂದರು. ಆದರೆ ಸರಕಾರ ಅದನ್ನು ಆಚರಿಸುವ ಸಿದ್ಧತೆಯನ್ನು ಮಾಡಿಕೊಳ್ಳುತ್ತಿತ್ತು. ಅಂದು ಸುತ್ತಲಿನ ವಿವಿಧ ಪ್ರದೇಶಗಳಿಂದ ಜನರು ದೊಡ್ಡ ಪ್ರಮಾಣದಲ್ಲಿ ಜಯಂತಿಯಲ್ಲಿ ಭಾಗವಹಿಸಲು ಆಗಮಿಸುತ್ತಿದ್ದರು. ಇದನ್ನು ವಿರೋಧಿಸಲು ಸಂಘಪರಿವಾರವೂ ರಸ್ತೆಯಲ್ಲಿ ಜಮಾಯಿಸಿತ್ತು. ಆಚರಣೆಯತ್ತ ತೆರಳುತ್ತಿದ್ದವರ ಜೊತೆ ಮಾತಿನ ಚಕಮಕಿ, ಅವರ ಮೇಲೆ ಕಲ್ಲು ತೂರಾಟಗಳು, ಪೋಲೀಸರ ಲಾಠಿ ಚಾರ್ಚ್ ಘಟನೆಗಳು ನಡೆದು ಹೋಗಿವೆ. ವರದಿಯಾದಂತೆ ಈ ಸಂದರ್ಭದಲ್ಲಿ ತಪ್ಪಿಸಿಕೊಳ್ಳಲು ಓಡುವ ಭರದಲ್ಲಿ ವಿ.ಹೆಚ್.ಪಿ.ಯ ಜಿಲ್ಲಾ ಮುಖಂಡರಾದ ಕುಟ್ಟಪ್ಪನವರು(60) ಮೇಲಿನಿಂದ ಬಿದ್ದು ಸಾವನ್ನಪ್ಪಿದ ದಾರುಣ ಘಟನೆ ನಡೆದಿದೆ. ಹಾಗೆಯೇ ಆ ಪ್ರದೇಶದಲ್ಲಿಯೇ ರಾಜು ಎಂಬಾತನೂ ಬಿದ್ದು ಸಾವನ್ನಪ್ಪಿದ್ದಾನೆ. ಅಲ್ಲದೇ ಜಯಂತಿ ಆಚರಣೆ ಮುಗಿಸಿಕೊಂಡು ವಾಪಾಸಾಗುವಾಗ ಚೆಟ್ಟಳ್ಳಿ ಬಳಿಯಲ್ಲಿ ಯಾರೋ ಹಾರಿಸಿದ ಗುಂಡು ಶಾಹುಲ್ ಎಂಬ ಯುವಕನ ತಲೆ ಹೊಕ್ಕಿದ್ದರಿಂದ ಚಿಕಿತ್ಸೆ ಫಲಕಾರಿಯಾಗದೇ ಮೈಸೂರು ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ್ದಾನೆ. ಈ ಸಂದರ್ಭದಲ್ಲಿ ಶಾಂತಿ ಕದಡುವ ಹಲವಾರು ದುರ್ಘಟನೆಗಳು ನಡೆದ ವರದಿ ಇದೆ.

ನಿಷ್ಕ್ರಿಯತೆ-ವೈಫಲ್ಯತೆ

ಇಲ್ಲಿ ನಡೆದ ಈ ಎಲ್ಲಾ ಘಟನೆಗಳ ಮೂಲ ಹೊಣೆ ಬಿಜೆಪಿ-ಸಂಘರಿವಾರದ ಮೇಲೆ ಇದೆ. ಹಾಗೆಯೇ ಮುಂದಾಗಬಹುದಾದ ದುರ್ಘಟನೆಗಳನ್ನು ಅಂದಾಜಿಸಿ ತಡೆಯುವ ಅಗತ್ಯ ಕ್ರಮಗಳನ್ನು ಕೈಗೊಳ್ಳುವಲ್ಲಿ ಜಿಲ್ಲಾಡಳಿತ, ರಾಜ್ಯ ಸರಕಾರ ವಿಫಲವಾಗಿವೆ. ಕಾರ್ಯಕ್ರಮ ಸ್ಥಳದ ಆಯ್ಕೆಯಿಂದ ಹಿಡಿದು ಬರುವವರನ್ನು ನಿರ್ವಹಿಸುವಲ್ಲಿ, ರಕ್ಷಣಾತ್ಮಕ ಕ್ರಮ ವಹಿಸುವಲ್ಲಿಯೂ ಕೊರತೆಗಳು ಕಾಣುತ್ತವೆ. ಮೇಲಾಗಿ ಜಯಂತಿಗೆ ಬಂದವರನ್ನೇ ಪೋಲೀಸರು ಬಡಿದಟ್ಟಿದ್ದಾರೆ, ಇವರೊಂದಿಗೆ ಸಂಘಪರಿವಾರದ ಪುಂಡರು ಪೋಲಿಸರೊಂದಿಗೆ ಸಮಾನವಾಗಿ ನಿಂತು ಸಾಥ್ ನೀಡಿ ಅಲ್ಪಸಂಖ್ಯಾತ ಯುವಕರಿಗೆ ಬಡಿಗೆಯಿಂದ ಚಚ್ಚುತ್ತಿದ್ದುದು ಕಾಣ ಬರುತ್ತಿತ್ತು! ಇದನ್ನು ತಡೆಯುವ ಕ್ರಮಗಳೇ ಇರಲಿಲ್ಲ. ಮತ್ತೊಂದು ಕಡೆ ಟಿಪ್ಪು ಜಯಂತಿ ಒಂದು ರಾಜಕೀಯ ಆಯಾಮವನ್ನು ಪಡೆದು ಕೊಳ್ಳುತ್ತಿರುವಾಗಲೂ ಜಿಲ್ಲೆಯ ಕಾಂಗ್ರೆಸ್ ಮುಖಂಡತ್ವ ಅದನ್ನು ಎದುರಿಸುವ ಗೋಜಿಗೇ ಹೋಗದೇ ಹಾಸಿ ಕಾಲು ಚಾಚಿ ಮಕಾಡೆ ಮಲಗಿದ್ದು ಅದು ತಲುಪಿರುವ ತಾತ್ವಿಕ, ರಾಜಕೀಯ ದಿವಾಳಿತನಕ್ಕೆ ಜ್ವಲಂತ ಉದಾಹರಣೆ. ಕೊಡಗಿನಲ್ಲಿ ಕಾಂಗ್ರೆಸ್ ಪಕ್ಷ ಬಹುತೇಕ ಭಾಗ ಕಮಲ ಕಾಂಗ್ರೆಸ್, ಇನ್ನೊಂದು ಸಣ್ಣ ಬಣ ಕೈ ಕಾಂಗ್ರೆಸ್ ಎಂದು ಹಿರಿಯ ನಾಯಕ ಏ.ಕೆ.ಸುಬ್ಬಯ್ಯನವರು ಟೀಕಿಸುವುದರಲ್ಲಿ ಅತಿಶಯ ಅನ್ನಿಸದು. ಕೋಮುವಾದಿಗಳೆದುರು ಜನರ ನಡುವೆ ರಾಜಕೀಯವಾಗಿ. ತಾತ್ವಿಕವಾಗಿ ಕಾಂಗ್ರೆಸ್ ನಾಯಕತ್ವ ನಿರಾಯುಧರಾಗಿ ಬಾಯಿ ವರಸೆಗೆ ಸೀಮಿತವಾಗಿರುವುದನ್ನು ರಾಜ್ಯ ಮಟ್ಟದಲ್ಲೂ ಕಾಣಬಹುದು. ಆದರೆ ಇದಕ್ಕೆ ಭಿನ್ನವಾಗಿ ಬೆಳೆಯುತ್ತಿರುವ ವಿದ್ಯಮಾನಗಳನ್ನು ಗಮನಿಸಿ ರಾಜ್ಯದ ಹಲವು ಕಡೆಗಳಲ್ಲಿ ಸಿಪಿಐ(ಎಂ) ಪಕ್ಷವು ಮೂರು ದಿನಗಳ ಮೊದಲು ಟಿಪ್ಪು ಪಾತ್ರ, ಕೊಡುಗೆಗಳ ಬಗ್ಗೆ ಜನರನ್ನು ಜಾಗೃತಿ ಮಾಡಲು ಯತ್ನಿಸಿದ್ದು ಶ್ಲಾಘನೀಯ.

ಗಲಭೆಗಳ ವಿಸ್ತರಣೆಗೆ ಯತ್ನ

ಕೊಡಗಿನ ಘಟನೆಗಳ ಬಳಿಕ ಗಲಭೆಗಳನ್ನು ರಾಜ್ಯಾದ್ಯಂತ ಹಬ್ಬಿಸಲು ಸಂಘಪರಿವಾರ ಪ್ರಯತ್ನಕ್ಕೆ ಮುಂದಾಗಿದೆ. ಶುಕ್ರವಾರ (ನವಂಬರ್ 13) ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಎಲ್ಲಾ ಕಡೆ ಬಂದ್‍ಗೆ ಕರೆ ನೀಡಲಾಗಿದೆ. ಬಂಟ್ವಾಳದ ಬಿಸಿ ರೋಡ್‍ನÀಲ್ಲಿ ಚೂರಿ ಇರಿತಕ್ಕೆ ಯುವಕನೊಬ್ಬ ಬಲಿಯಾಗಿದ್ದಾನೆ. ಮತ್ತೊಬ್ಬನಿಗೂ ಗಾಯವಾಗಿದೆ. ಹಿಂದುತ್ವದ ಶಕ್ತಿಗಳ ಜೊತೆಗೆ ಪಾಪುಲರ್ ಫ್ರಂಟ್, ಎಸ್.ಡಿ.ಪಿ.ಐ ನಂತಹ ಮುಸ್ಲಿಂ ಮೂಲಭೂತವಾದಿಗಳು ಸಕ್ರಿಯವಾಗಿರುವ ಕರಾವಳಿಯಲ್ಲಿ ಸಂಘರ್ಷ ಹೆಚ್ಚಿದರೆ ಪರಿಸ್ಥಿತಿ ವಿಕೋಪಕ್ಕೂ ಹೋಗಬಹುದು. ವಿಹೆಚ್‍ಪಿ ಕರ್ನಾಟಕ ಬಂದ್‍ಗೆ ನೀಡಿದ್ದ ಕರೆಯನ್ನು ಹಿಂತೆಗೆದುಕೊಂಡಿದೆ ಎಂದು ಹೇಳಿದ್ದರೂ ಜಿಲ್ಲೆಗಳಲ್ಲಿ ಬಂದ್‍ಗಳನ್ನು ನಡೆಸಲಾಗುತ್ತಿದೆ. ಬಂದ್‍ನ ಹಿಂದಿನ ದಿನ ಹಾಸನ, ಚಿಕ್ಕಮಗಳೂರಿನಲ್ಲಿ ಪ್ರಕ್ಷುಬ್ದ ಸ್ಥಿತಿ ನಿರ್ಮಾಣವಾಗಿತ್ತು. ವಿಜಯಪುರ ಇತ್ಯಾದಿ ಕಡೆ ಇದನ್ನು ಬಳಸುತ್ತಿದೆ. ರಾಜ್ಯದಲ್ಲಿ ಕೋಮು ತ್ವೇóಷ ನಿರ್ಮಾಣಗೊಳ್ಳಲು ಇವೆಲ್ಲಾ ಭೂಮಿಕೆಯಾಗಿವೆ. ಆದರೆ ಕೋಮುವಾದವನ್ನು ವಿರೋಧಿಸಿ ಕೋಮುಸೌಹಾರ್ಥತೆಗೆ ಶ್ರಮಿಸುವವರನ್ನೇ ಕೊಮುಗಲಭೆಗೆ ಪ್ರಚೋದಿಸುತ್ತಿದ್ದಾರೆಂದು ಆರೋಪಿಸಲಾಗುತ್ತಿದೆ!

ಹೊಣೆ ಮರೆತ ತುತ್ತೂರಿ ಮಾಧ್ಯಮಗಳು

ಈ ಸಂದರ್ಭದಲ್ಲಿ ಸಂಘಪರಿವಾರ ಮತ್ತು ಅದರ ಭಂಟರು ವಿಶೇಷವಾಗಿ ಮಾಧ್ಯಮ ಕ್ಷೇತ್ರದಲ್ಲಿರುವ ಕೆಲವು ಕರಸೇವಕರು ಪ್ರತಿಯೊಂದನ್ನೂ ತಿರುಚಿ ಉದ್ವಿಗ್ನತೆ ಸೃಷ್ಟಿಸುವಲ್ಲಿ ಪೂರ್ಣ ಮಗ್ನರಾಗಿದ್ದಾರೆ.

ಬೆಂಗಳೂರಿನ ಸಮಾರಂಭದಲ್ಲಿ ಪ್ರಸ್ತಾವಿಕವಾಗಿ ಟಿಪ್ಪುವಿನ ಕೊಡುಗೆ, ವಸಾಹತುಶಾಹಿ ವಿರೋಧಿ ಹೋರಾಟದಲ್ಲಿ ಆತನ ಪಾತ್ರದ ಬಗ್ಗೆ ಮಾತನಾಡಿದ ಜ್ಚಾನಪೀಠ ಪ್ರಶಸ್ತಿ ಪುರಸ್ಕೃತ್ ಗಿರೀಶ್ ಕಾರ್ನಾಡ್‍ರ ಮಾತುಗಳನ್ನು ವಿಪರೀತ ಅರ್ಥ ಬರುವಂತೆ ತಿರುಚಿ ವರದಿ ಮಾಡಿ ವಿವಾದ ಸೃಷ್ಟಿಸಿದ ಪರಿಣಾಮವಾಗಿ ಒಕ್ಕಲಿಗರನ್ನು, ಇತರೆ ಸಾರ್ವಜನಿಕರನ್ನು ಎತ್ತಿಕಟ್ಟುವ ಪ್ರಯತ್ನಗಳು ನಡೆದವು. ದೇವನಹಳ್ಳಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಹೆಸರಿಡುವ ವಿಷಯದಲ್ಲಿ ಯಾರೂ ತಮ್ಮ ಅಭಿಪ್ರಾಯ ಹೊಂದಿರಲು ಹಕ್ಕು ಇದೆ. ಅದು ಅಕ್ಷಮ್ಯ ಅಪರಾಧವೇನೂ ಅಲ್ಲ. ಕಾರ್ನಾಡ್‍ರು ತಮ್ಮ ಅಭಿಪ್ರಾಯ ಹೇಳಿದ್ದಾರೆ. ಅವರು ಹಾಗೆ ಹೇಳುವ ಮೊದಲು ಈಗಾಗಲೇ ಕೆಂಪೇಗೌಡರ ಹೆಸರನ್ನು ಇಡಲಾಗಿದೆ, ಸದ್ಯ ಅದು ಮುಗಿದ ವಿಷಯ ಎಂಬುದನ್ನು ಗಮನದಲ್ಲಿರಿಸಿ ವಿಷಯ ಕೈಬಿಡಬಹುದಾಗಿತ್ತು. ಈ ಹಂತದಲ್ಲಿ ಪುನಃ ಹೇಳುವ ಅಗತ್ಯ ಇರಲಿಲ್ಲ. ಇದನ್ನೂ ವಿವಾದವಾಗಿಸಿ ಜಾತಿಯೊಂದಿಗೆ ಸಮೀಕರಿಸಿ ಅದನ್ನೇ ಸಂಕುಚಿತ ರಾಜಕೀಯಕ್ಕೆ ಬಳಸಲು ಬಿಜೆಪಿ ಮುಖಂಡರು ಯತ್ನಿಸಿದ್ದು ಹೇಸಿಗೆ ತರುವ ಸಂಗತಿ.

ಟಿಪ್ಪು ತಂದ ಸುಧಾರಣೆಗಳು ದಕ್ಷಿಣ ಕರ್ನಾಟಕ ಅಭಿವೃದ್ಧಿ ಹೊಂದಲು ಭೂಮಿಕೆಯಾಯಿತು ಎಂಬಂಶವನ್ನು ಜನ ನೆನಪಿನಲ್ಲಿ ಇಟ್ಟುಕೊಂಡಿದ್ದಾರೆ. ಹಾಗಾಗಿಯೇ ಬಿಜೆಪಿ ತನ್ನ ಆಟವನ್ನು ಹೆಚ್ಚು ಲಂಬಿಸಲು ಸಾಧ್ಯವಾಗಲಿಲ್ಲ. ತಮ್ಮ ಇಂಗಿತವನ್ನು ಹೇಗೆಲ್ಲಾ ವಿಕೃತಗೊಳಿಸಿ ದುರುಪಯೋಗ ಪಡಿಸಿಕೊಳ್ಳಲಾಗುತ್ತಿದೆ ಎಂದರಿತ ಕಾರ್ನಾಡ್‍ರು ಜನರ ಮನಸ್ಸಿಗೆ ನೋವು ತಂದಿದ್ದಲ್ಲಿ ಕ್ಷಮಿಸಬೇಕೆಂದು ವಿನಂತಿಸಿ ವಿನಯ ತೋರಿದರು. ಆದರೆ ಸಂಘಪರಿವಾರದ ಭಯೋತ್ಪಾದಕ ಸಂತತಿ ಡಾ.ಕಲಬುರ್ಗಿಯವರಿಗಾದ ಗತಿಯೇ ಆದೀತೆಂದು ಅವರನ್ನು ಕೊಲ್ಲುವ ಬೆದರಿಕೆ ಒಡ್ಡಿದೆ. ಆದರೆ ಮೋದಿಯವರು ಲಂಡನ್‍ನಲ್ಲಿ ಭಯೋತ್ಪಾದನೆಯ ವಿರುದ್ಧ ಗುಡುಗಿ ಅದಕ್ಕೆ ಬ್ರಿಟನ್ ಪ್ರಧಾನಿ ಕ್ಯಾಮರೋನ್‍ರ ಸಹಾಯವನ್ನೂ ಕೇಳಿ ಸಹಿಷ್ಣುತೆಯೇ ತಮ್ಮ ಉಸಿರೆಂದು ಭಾಷಣ ಮಾಡಿ ಮುಗಿಸಿದ್ದಾರೆ!

ಈ ಒಟ್ಟು ಬೆಳವಣಿಗೆಗಳನ್ನು ಗಮನಿಸಿದಾಗ ಸಂಘಪರಿವಾರ ಭಾವನಾತ್ಮಕ ವಿಷಯಗಳನ್ನೇ ಕೆದಕಿ, ಉದ್ರೇಕಿಸಿ ಜನರ ಗಮನವನ್ನು ನಿಜ ಸಮಸ್ಯೆಗಳಿಂದ ಹಾದಿ ತಪ್ಪಿಸಿ ಶಕ್ತಿಯ ಕ್ರೋಢೀಕರಣಕ್ಕೆ ಇನ್ನಷ್ಟು ತೀವ್ರವಾಗಿ ಇಳಿಯುವ ಸಂಭವವಿದೆ. ಈ ಸವಾಲನ್ನು ಎದುರಿಸಲೇ ಬೇಕಿದೆ.

ತಲೆ ಕಡಿಯುವ ಬಿಜೆಪಿ ಸಹಿಷ್ಣುತೆಯ ಸಂಸ್ಕೃತಿ ತಂದೀತೇ?

ಈ ವಾರ – ಎಸ್. ವೈ. ಗುರುಶಾಂತ್
ಸಂಪುಟ 9 ಸಂಚಿಕೆ 46, 15 ನವೆಂಬರ್ 2015

ದೇಶದಲ್ಲಿ ಹೆಚ್ಚುತ್ತಿರುವ ಅಸಹನೆ, ಹಿಂಸೆಯ ವಿರುದ್ಧ ಸಮಾಜದ ವಿವಿಧ ರಂಗಗಳ ಪ್ರಮುಖರ ಪ್ರತಿಭಟನೆ ವ್ಯಾಪಕಗೊಳ್ಳುತ್ತಿದೆ. ಈ ವಾರದಲ್ಲಿ ಖ್ಯಾತ ವಿಜ್ಞಾನಿ ಭಾರ್ಗವ ರವರು ತಮ್ಮ ಪದ್ಮಭೂಷಣ ಪ್ರಶಸ್ತಿಯನ್ನು ಹಿಂತಿರುಗಿಸಿದ್ದಾರೆ. ಪ್ರಶಿದ್ದ ಲೇಖಕಿ ಅರುಂಧತಿ ರಾಯ್ ತಮ್ಮ ಪ್ರಶಸ್ತಿಯೊಂದನ್ನು ಮರಳಿಸಿದ್ದಾರೆ. ಡಾ. ರೋಮಿಲಾ ಥಾಪರ್, ಪ್ರೊ.ಇರ್ಫಾನ್ ಹಬೀಬ್ ಒಳಗೊಂಡು ಹಲವಾರು ಖ್ಯಾತ ಇತಿಹಾಸಕಾರರು ಜೊತೆಗೂಡಿ ಪ್ರತಿಭಟನೆಯನ್ನು ಮತ್ತಷ್ಟು ಮೊನಚುಗೊಳಿಸಿದ್ದಾರೆ. ನಟ ಶಾರುಖ್ ಖಾನ್ ಸಹ ದನಿ ಎತ್ತಿದ್ದಾರೆ. 24 ಕಲಾವಿದರು ತಮ್ಮ ರಾಷ್ಟ್ರೀಯ ಪ್ರಶಸ್ತಿಗಳನ್ನು ಹಿಂದಿರುಗಿಸಿದ್ದಾರೆ ಇದು ಅಂತರಾಷ್ಟ್ರೀಯ ಮಟ್ಟದಲ್ಲೂ ವಿಸ್ತರಿಸಿದೆ. ಇಂಗ್ಲೆಂಡ್, ಅಮೇರಿಕಾ ದೇಶಗಳಲ್ಲಿರುವ ಅನೇಕರು ಸಾಥ್ ನೀಡಿದ್ದಾರೆ. ಪಾಕಿಸ್ತಾನದ ಸುಪ್ರಶಿದ್ಧ ಗಜಲ್ ಗಾಯಕ ಗುಲಾಂ ಅಲಿಯವರು ಭಾರತದ ಎಲ್ಲಾ ಕಾರ್ಯಕ್ರಮಗಳನ್ನು ರದ್ದುಗೊಳಿಸುವುದಾಗಿ ಪ್ರಕಟಿಸಿದರೂ ಕೂಡ. ಬಹುತೇಕ ಸರಕಾರದ ಸವಲತ್ತಿಗೆ ಮಾತ್ರ ಗೊಣಗುತ್ತಿದ್ದ ಇನ್ಫೋಸಿಸ್‍ನ ಮುಖ್ಯಸ್ಥ ನಾರಾಯಣಮೂರ್ತಿ, ರಿಸರ್ವ್ ಬ್ಯಾಂಕಿನ ಗವರ್ನರ್ ರಘುರಾಮನ್ ಸಹ ತಮ್ಮ ತೀಕ್ಷ್ಣ ಪ್ರತಿಕ್ರಿಯೆ ನೀಡಿದ್ದು, ಭಾರತದ ರಾಷ್ಟ್ರಪತಿ ಪ್ರಣವ ಮುಖರ್ಜಿಯವರೇ ಬಹಿರಂಗವಾಗಿ ಮಾತನಾಡಿ ಎಚ್ಚರಿಸಿದ್ದು ಸನ್ನಿವೇಶದ ಗಂಭೀರತೆಯನ್ನು ತೋರುವಂತಹುದು. ಈ ಪ್ರತಿರೋಧದ ಪ್ರತಿಕ್ರಿಯೆ ಇಲ್ಲಿಗೆ ನಿಲ್ಲದು, ಇದು ಸ್ವಯಂಸ್ಪೂರ್ತಿಯಿಂದ ಇನ್ನಷ್ಟೂ ವಿಸ್ತರಿಸುವ ಸೂಚನೆಗಳು ಇವೆ.

Behead1

ಈ ಎಲ್ಲಾ ರಂಗಗಳ ಸಾಧಕರು ಪ್ರಶಸ್ತಿಗಳನ್ನು ಮರಳಿಸುವುದಕ್ಕೆ ಅತ್ಯಂತ ಮಹತ್ವವಿದೆ. ಸಾಮಾನ್ಯವಾಗಿ ಜನತೆಯಿಂದ ಒಂದು ಹಂತದ ಪ್ರತಿಭಟನೆಗಳು ನಡೆದ ಅದೆಷ್ಟೋ ದಿನಗಳ ನಂತರ ಅವರ ಪ್ರತಿಕ್ರಿಯೆಗಳು ಬರುವುದನ್ನು ಕಂಡಿದ್ದೇವೆ. ಆದರೆ ಈಗ ಹಾಗಿಲ್ಲ. ಕಾರಣ ದೇಶದಲ್ಲಿ ಬೆಳೆಯುತ್ತಿರುವ ಅಸಹಿಷ್ಣುತೆ, ಹಬ್ಬುತ್ತಿರುವ ಹಿಂಸಾಪ್ರವೃತ್ತಿಗಳ ಘಟನೆಗಳು ಏನೋ ತಾತ್ಪೂರ್ತಿಕ ಸಿಡಿದ ಬಿಡಿ ಘಟನೆಗಳಾಗಿರದೇ ಅತ್ಯಂತ ವ್ಯವಸ್ಥಿತವಾದ, ಒಂದು ನಿರ್ದಿಷ್ಟ ‘ರಾಜಕೀಯ’ ಗುರಿ ಇಡಲಾದ ಘಟನೆಗಳಾಗಿವೆ. ಮುಖ್ಯವಾಗಿ ಇಡೀ ಭಾರತೀಯ ಸಮಾಜ ಬಹುಸಂಸ್ಕೃತಿ, ವೈವಿದ್ಯತೆ, ಮತನಿರಪೇಕ್ಷತೆ, ಸಾಮಾಜಿಕ ನ್ಯಾಯದ, ಪ್ರಜಾಸತ್ತಾತ್ಮಕ ಮೌಲ್ಯಗಳ ಅಡಿಪಾಯವುಳ್ಳ ಒಂದು ಪ್ರಬಲವಾದ ಆಧುನಿಕ ವ್ಯವಸ್ಥೆಯಾಗಿರುವ ಬದಲಾಗಿ ಅತ್ಯಂತ ದ್ವೇಷದ, ಹಿಂಸೆ-ದಂಗೆ, ಅರಾಜಕತೆಗಳ ರಣರಂಗವಾಗಿ ಪ್ರಜಾಪ್ರಭುತ್ವವನ್ನೇ ಬುಡಮೇಲು ಮಾಡಿದ ಅಸಹಿಷ್ಣತೆ, ಸರ್ವಾಧಿಕಾರದ ಆಧಾರದ ಒಂದು ಫ್ಯಾಶಿಸ್ಟ್ ಸ್ವರೂಪದ ವ್ಯವಸ್ಥೆಯನ್ನಾಗಿ ಮಾರ್ಪಡಿಸುವ ಎಲ್ಲಾ ಅಪಾಯಗಳನ್ನು ಸ್ಪಷ್ಟವಾಗಿ ಕಂಡಿದ್ದರಿಂದಲೇ ಅವರೆಲ್ಲಾ ಬೀದಿಗಿಳಿದು ಮಾತನಾಡುತ್ತಿದ್ದಾರೆ. ಡಾ.ಎಂ.ಎಂ. ಕಲಬುರ್ಗಿಯವರ ಅಮಾನುಷ ಹತ್ಯೆ ಪ್ರತಿಭಟನೆಯ ಕಿಡಿ ಹಬ್ಬಲು ಒಂದು ಸಂದರ್ಭವಾಯಿತು.

ಹಿಂದೆ ಇಂತಹ ಕೆಲ ಘಟನೆಗಳು ನಡೆಯುತ್ತಲೇ ಇರಲಿಲ್ಲ ಎಂದೇನಲ್ಲ. ಆದರೆ ಈಗ ಅದನ್ನು ಯೋಜಿಸಲಾಗುತ್ತಿದೆ ಮತ್ತು ಅವು ಸಾಮಾಜಿಕ, ಧಾರ್ಮಿಕ, ರಾಜಕೀಯ ಸಿದ್ಧಾಂತವಾಗಿ ಸ್ಥಾಪಿಸಲಾಗುತ್ತಿದೆ. ಇದನ್ನು ದೇಶದಲ್ಲಿ ಅಧಿಕಾರದಲ್ಲಿರುವವರೇ ನಡೆಸುತ್ತಿದ್ದಾರೆ. ಮತ್ತು ಸಂಘಪರಿವಾರದ ಸಂವಿಧಾನೇತರ ಶಕ್ತಿಗಳು ನೇರವಾಗಿ ಕೃತ್ಯಗಳನ್ನು ಎಸಗಿ ಸಮರ್ಥಿಸಿಕೊಳ್ಳುತ್ತಿವೆ. ದೇಶದೊಳಗಿನ ತೀವ್ರ ಪ್ರತಿಗಾಮಿ ಫ್ಯಾಶಿಸ್ಟ್ ಶಕ್ತಿಗಳು ಅದರೊಟ್ಟಿಗೆ ದೇಶದ ಭಾರೀ ಬಲವಿರುವ ಪ್ರಭುತ್ವ ಮತ್ತು ಭಾರೀ ಕಾರ್ಪೋರೇಟ್ ಕಂಪನಿಗಳ ಆರ್ಥಿಕ ಬಲದ ಬೆಂಬಲ, ಸಮೂಹ ಮಾಧ್ಯಮಗಳೂ ಸೇರಿದಾಗ ಆಗಬಹುದಾದ ಅಪಾಯ ಊಹೆಗೂ ನಿಲುಕಲಾರದ್ದು. ಇದನ್ನು ನಮ್ಮ ಚಿಂತಕರು ಸರಿಯಾಗಿಯೇ ಗ್ರಹಿಸಿದ್ದಾರೆ, ಪ್ರತಿಕ್ರಿಯಿಸುತ್ತಾ ದೇಶದ ಜನತೆಯನ್ನು ಎಚ್ಚರಿಸುತ್ತಾ ಮಹತ್ವದ ಐತಿಹಾಸಿಕ ಪಾತ್ರವನ್ನು ನಿರ್ವಹಿಸುತ್ತಿದ್ದಾರೆ.

ಈ ಎಲ್ಲಾ ಪ್ರತಿಕ್ರಿಯೆ, ಪ್ರತಿಭಟನೆಗಳನ್ನು ಪರಿಗಣಿಸದೇ ಅವನ್ನೆಲ್ಲಾ ನಿರಾಕರಿಸಲಾಗುತ್ತಿದೆಯಲ್ಲದೇ ಅತ್ಯಂತ ಕುತ್ಸಿತ ನಿಂದನೆಗಳನ್ನು ಮಾಡಲಾಗುತ್ತಿದೆ. ಅವರೆಲ್ಲಾ ಕಾಂಗ್ರೆಸ್‍ನ ಏಜಂಟ್‍ರೆಂದು ಕರೆಯಲೂ ಹೇಸಿಲ್ಲ. ಹಿಂದೆ 1984 ರಲ್ಲಿ ದೆಹಲಿಯಲ್ಲಿ ಸಿಖ್‍ರ ಮೇಲೆ ಧಾಳಿ ನಡೆದು ಹತ್ಯೆಗಳಾಗಿದ್ದಾಗ ಏನು ಮಾಡುತ್ತಿದ್ದರು? ಎಂಬಂತಹ ವಿತಂಡವಾದಗಳನ್ನು ಮಂಡಿಸಿ ತಮ್ಮ ಹತಾಶೆ ತೋರಿಸಿಕೊಂಡಿದ್ದಾರೆ. ವಿಚಿತ್ರವೆಂದರೆ ಹೀಗೆ ಕೇಳುವ ಆರೆಸ್ಸೆಸ್ ಆಗ ಏನೂ ಮಾಡಿರಲಿಲ್ಲ, ಜನಾಂಗೀಯ ನೆಲೆಯ ಧಾಳಿಗಳ ಬಗ್ಗೆ ಅದರ ನಿಲುವು ಗೊತ್ತೇ ಇದೆಯಲ್ಲಾ. ಆದರೆ ರೋಮಿಲಾ ಥಾಪರ್‍ರಂತಹ ಈ ಚಿಂತಕರು ಪ್ರತಿಭಟನೆಯನ್ನು, ಶಾಂತಿ ಸ್ಥ್ಥಾಪನೆಯ ಕಾರ್ಯಕ್ರಮಗಳನ್ನು ನಡೆಸಿದರು.

ಈಗ ಬಿಹಾರದ ಚುನಾವಣೆಯ ಮೇಲೆ ಕಣ್ಣಿರಿಸಿ ಕೋಮು ವಿಭಜನೆಯ ಆಧಾರದಲ್ಲಿ ಮತ ವಿಭಜಿಸಿ ಕ್ರೋಢಿಕರಿಸಿಕೊಳ್ಳಲು ಬಿಜೆಪಿ- ಸಂಘಪರಿವಾರ ನಡೆಸುತ್ತಿರುವ ಕೃತ್ಯಗಳನ್ನು ಕಂಡಿದ್ದೇವೆ. ಆಹಾರ ಸಂಸ್ಕತಿಯ ಮೇಲೆ ತೀವ್ರ ಧಾಳಿಯನ್ನು ಮಾಡುತ್ತಾ ಅದನ್ನು ಕೋಮುವಾದೀಕರಿಸಲಾಗುತ್ತಿದೆ. ಇದಕ್ಕೆ ದನದ ಮಾಂಸವನ್ನು ಬಿರುಸಿನಿಂದ ಎಳೆದು ತರಲಾಗಿದೆ. ಇದನ್ನು ದೇಶದಾದ್ಯಂತ ಕಲಹಗಳ ಕಣಕ್ಕೆ ಒಂದು ಪ್ರಮುಖ ವಿಷಯವಾಗಿಸಲು ಅದಕ್ಕೆ ವಿಶೇಷ ಯೋಜನೆಯಿದೆ.

ಇದರ ವಿರುದ್ಧ ನಡೆಯುತ್ತಿರುವ ಪ್ರತಿಭಟನೆಗಳಿಗೆ ದನಿಗೂಡಿಸಿ, ಆಹಾರದ ಆಯ್ಕೆಯ ಹಕ್ಕನ್ನು ಪ್ರತಿಪಾದಿಸಿದ ಕರ್ನಾಟಕದ ಮುಖ್ಯಮಂತ್ರಿ ಸಿದ್ಧರಾಮಯ್ಯನವರ ನಿಲುವು ಸ್ವಾಹತಾರ್ಹ, ‘ನಾನು ಇದುವರೆಗೂ ದನದ ಮಾಂಸವನ್ನು ತಿಂದಿಲ್ಲ, ಈಗ ತಿನ್ನುತ್ತೇನೆ ನಿಮ್ಮದೇನು?’ ಎಂದು ಚೆಡ್ಡಿ ಪಡೆಗೆ ತಿರುಗೇಟು ನೀಡಿದ ಸಿದ್ಧರಾಮಯ್ಯನವರ ಮೇಲೆ ಇಡೀ ಸಂಘ ಪರಿವಾರವೇ ಎಗರಿ ಬಿದ್ದಿದೆ. ಆರೆಸ್ಸೆಸ್ ಪರಿವಾರದ ಸನ್ಯಾಸಿ ರಾಜಕಾರಣಿಯಾಗಿರುವ ಪೇಜಾವರ ಮಠದ ವಿಶ್ವೇಶ್ವರಸ್ವಾಮಿಗಳು ‘ಮಸೀದಿಯ ಮುಂದೆ ಹಂದಿ ಮಾಂಸದ ಸಮಾರಾಧನೆ ಮಾಡುವ ಧೈರ್ಯವಿದೆಯೇ?’ ಎಂದು ಕೆಣಕಿ ತಾವು ಪರಿವಾರದ ಸ್ವಯಂ ಸೇವಕರೆಂದು ತೋರಿಸಿದ್ದಾರೆ. ಅದಕ್ಕೆ ‘ನಾನು ಬೇಕೆಂದರೆ ದನದ ಮಾಂಸವನ್ನು, ಬೇಕಾದರೆ ಹಂದಿ ಮಾಂಸವನ್ನು ತಿನ್ನುತ್ತೇನೆ, ಅದನ್ನು ಕೇಳಲು ಹೇಳಲು ನೀವ್ಯಾರು?’ ಎಂದು ಮರು ಸವಾಲು ಎಸೆದಿದ್ದಾರೆ ಸಿದ್ದರಾಮಯ್ಯ. ಮನುಷ್ಯರನ್ನು ವಿಭಜಿಸುವ ಸಿದ್ಧಾಂತವನ್ನೇ ಉಸಿರಾಡುವ ಪೇಜಾವರು ಆಹಾರ ಪದ್ಧತಿಯಲ್ಲೂ ವಿಭಜನೆಯ ಮಾಡುವ ಅಪಾಯಕಾರಿ ಬುದ್ಧಿ ತೋರಿಸಿದ್ದು ಯತಿಗಳಿಗೆ ಒಪ್ಪುವುದಲ್ಲ, ಅದನ್ನೇ ಬಿಜೆಪಿಯ ಜಗದೀಶ್ ಶೆಟ್ಟರ್, ಈಶ್ವರಪ್ಪ, ಯಡ್ಯೂರಪ್ಪ, ಸಿ.ಟಿ. ರವಿ ಮುಂತಾದವರು ಪ್ರಸಾದಂತೆ ನೆಕ್ಕಿ ಉಗುಳಿದ್ದು ಜನ ಕಂಡರು. ಇದರಿಂದ ಉತ್ತೇ ಜಿತರಾದ ಯಡಿಯೂರಪ್ಪ ಮತ್ತು ಈಶ್ವರಪ್ಪನವರ ಶಿಷ್ಯ ಶಿವಮೊಗ್ಗದ ಚನ್ನಬಸಪ್ಪ ಎಂಬುವಾತ ಸಿದ್ಧರಾಮಯ್ಯನವರ ತಲೆ ಕಡಿಯುವುದಾಗಿ ಹೇಳಿದ್ದು ಸಹಿಷ್ಣುತೆಯ ಅವರ ಕೊಲೆಗಡುಕ ಸಂಸ್ಕೃತಿಯನ್ನು ತೋರಿಸುತ್ತದೆ.

ಹೀಗಿರುವಾಗಲೂ ಮೋದಿ ಮತ್ತು ಅರುಣ ಜೇಟ್ಲಿ ಯಂತಹ ನಾಯಕರು ಸಂಘ ಪರಿವಾರದ ಕುಕೃತ್ಯಗಳನ್ನು ಸಮರ್ಥಿಸಿಕೊಳ್ಳುತ್ತಲೇ ಇದ್ದಾರೆ. ಮೋದಿಗೆ ಮುಜುಗರ ಉಂಟು ಮಾಡಿ ಅಭಿವೃದ್ಧಿಯ ಕ್ರಮಗಳಿಗೆ ಅಡ್ಡಿ ಮಾಡಲೆಂದೇ ಪ್ರಶಸ್ತಿಗಳನ್ನು ಹಿಂತಿರುಗಿಸಲಾಗುತ್ತಿದೆ ಎಂದೂ ನಾಚಿಕೆ ಬಿಟ್ಟು ಹೇಳಿಕೊಂಡಿದ್ದಾರೆ. ಅಸಹಿಷ್ಣುತೆಯನ್ನು ಪ್ರಶ್ನಿಸಿದರೆ ಅವರನ್ನು ದೇಶದ್ರೋಹಿಗಳೆಂದು ಘೋಷಿಸಲಾಗುತ್ತಿದೆ. ಇಷ್ಟೆಲ್ಲಾ ನಡೆಯುತ್ತಿರುವುದು ಜೇಟ್ಲಿಯಂತಹ ನಾಯಕರು ‘ಸಹಿಷ್ಣತೆಯೇ ತಮ್ಮ ಉಸಿರು’ ಎಂದು ಬಾಯಿ ಬಡಿಯುತ್ತಿರುವಾಗಲೇ! ಸಹಿಷ್ಣುತೆಯೇ ತಮ್ಮ ಸಂಸ್ಕೃತಿ ಎನ್ನುವ ಮೋದಿ – ಭಾಗವತ್ ಗ್ಯಾಂಗ್ ದಾದ್ರಿಯಲ್ಲಿ ಮಾಡಿದ್ದೇನು? ಸಿದ್ಧರಾಮಯ್ಯನವರಿಗೆ ಮಾಡಬಯಸಿರುವುದೇನನ್ನು? ಅಸಹಿಷ್ಣತೆಯನ್ನು ವಿರೋಧಿಸಿದ ನಟ ಶಾರುಖ್ ಖಾನ್‍ರು ದೇಶ ಬಿಟ್ಟು ಪಾಕಿಸ್ತಾನಕ್ಕೆ ಹೋಗಬೇಕೆಂದು ಇವರು ಫರ್ಮಾನು ಹೊರಡಿಸಿದ್ದೇಕೆ? ಈಗಲೂ ರಾಜ್ಯದಲ್ಲಿ ಒಂದಿಲ್ಲೊಂದು ನೆಪ ಹೇಳಿ ನಿತ್ಯವೂ ಗಲಭೆ, ಕೊಲೆ, ಅಲ್ಪಸಂಖ್ಯಾತರ ಮೇಲೆ ಹಲ್ಲೆಗಳ ಘಟನೆಗಳಿಗೆ ಕಾರಣವಾಗುತ್ತಿರುವ ಪರಿವಾರ ಎಂತಹ ಸಂಸ್ಕøತಿಯನ್ನು ಹೇರಬಯಸುತ್ತಿದೆ? ಇದು ಸಹನೆಯ ಪ್ರತೀಕವೇ?

ಇವೆಲ್ಲವನ್ನೂ ಗಮನಿಸಿದರೆ ಕೇಂದ್ರದಲ್ಲಿ ಅಧಿಕಾರದಲ್ಲಿರುವ, ರಾಜ್ಯದಲ್ಲಿ ವಿರೋಧ ಪಕ್ಷವಾಗಿರುವ ಬಿಜೆಪಿಗೆ ಜನತೆಯ ನೈಜ ಪ್ರಶ್ನೆಗಳ ಬಗ್ಗೆ ಕಾಳಜಿಯೇ ಇಲ್ಲ. ಬವಣೆಗಳಿಗೆ ಕಾರಣರಾದವರನ್ನು, ಆ ನೀತಿಗಳನ್ನು ಜನ, ಅದರ ವಿರುದ್ಧ ದ್ವನಿಯೆತ್ತಬಾರದು. ಇವನ್ನೆಲ್ಲಾ ಮರೆ ಮಾಚುವ ಹವಣಿಕೆಯೇ ಅದಕ್ಕೆ ಮುಖ್ಯ. ಮೇಲಾಗಿ ಮುಂಬರುವ ಪಂಚಾಯತ್ ಚುನಾವಣೆಯ ಚಿಂತೆ!

ಹಾಗೆಯೇ ಬಿಜೆಪಿಯ ಧಾಳಿಗೆ ತಿರುಗೇಟು ನೀಡಿದ ಸಿದ್ಧರಾಮಯ್ಯನವರೂ ಗಮನಿಸಬೇಕಾದ ಅಂಶವೂ ಇದೇ ಆಗಿದೆ. ಕೋಮುವಾದಿಗಳು ನಿತ್ಯವೂ ನಡೆಸುವ ಕೃತ್ಯಗಳನ್ನು ಅಡಗಿಸಲು ದೃಢ ಕ್ರಮಗಳನ್ನು ಕೈಗೊಳ್ಳುವುದೂ ಸಹ ಅಷ್ಟೇ ಮಹತ್ವದ್ದು. ಅಂತಹ ಕ್ರಮಗಳಿಗೆ ಸರಕಾರ ಮುಂದಾಗುತ್ತಿಲ್ಲ. ಕಾಂಗ್ರೆಸ್ ಪಕ್ಷ ರಾಜಕೀಯವಾಗಿ ಎದುರಿಸುವುದೂ ತೀರಾ ಕಡಿಮೆಯೇ. ಆದ್ದರಿಂದ ಧೃಡ ಕ್ರಮಗಳು ಇಲ್ಲವಾದಲ್ಲಿ ಅವರಾಡುವ ಗುರುತಿಸಬಾರದು ಮಾತುಗಳು ಕೇವಲ ಸಾಂದರ್ಭಿಕ ವೀರಾವೇಶದ ಪ್ರದರ್ಶನವಾಗುತ್ತವೆ. ಕೇವಲ ಮಾತುಗಳಿಂದ ಕೋಮುವಾದಿಗಳನ್ನು, ಮತೀಯ ಮೂಲಭೂತವಾದಿಗಳನ್ನು ಎದುರಿಸಲು ಸಾಧ್ಯವಿಲ್ಲ.

ಒತ್ತಡಗಳೇನೇ ಬರಲಿ, ಫ್ಯಾಶಿಸ್ಟ್ ಪ್ರವೃತ್ತಿಗಳಿಗೆ ಕಡಿವಾಣ ಹಾಕಿ, ಅಸಹಿಷ್ಣತೆ ಹಬ್ಬಿಸುವ ಶಕ್ತಿಗಳ ವಿರುಧ್ಧ ಇನ್ನಷ್ಟು ಪ್ರಬಲ, ವಿಶಾಲ ಪ್ರತಿರೋಧ ಬೆಳೆಯಲೇ ಬೇಕು. ಇದು ಕಾಲದ ಕರೆ.

ಸಂಪುಟದ ವಿಸ್ತರಣೆ: ಕಾಂಗ್ರೆಸ್ ಒಳಗಿನ ಕದನಕ್ಕೆ ಪೂರ್ಣ ವಿರಾಮವಲ್ಲ

ಈ ವಾರ – ಎಸ್.ವೈ. ಗುರುಶಾಂತ್
ಸಂಪುಟ 9 ಸಂಚಿಕೆ 45, 8 ನವೆಂಬರ್ 2015

ಈ ಗುರುವಾರ (29 ಅಕ್ಟೋ. 2015) ನಡೆದ ಸಂಪುಟ ವಿಸ್ತರಣೆಯಿಂದಾಗಿ ರಾಜ್ಯದ ಸಿದ್ಧರಾಮಯ್ಯನವರ ಸಚಿವ ಸಂಪುಟದ ಎಲ್ಲಾ 34 ಸ್ಥಾನಗಳು ಭರ್ತಿಯಾದವು. ಹಾಗಂತ ಆಕಾಂಕ್ಷಿಗಳ ತಳಮಳಕ್ಕೇನೂ ತಡೆಯಿಲ್ಲ. ಸದ್ಯಕ್ಕಂತೂ ಸಚಿವ ಸ್ಥಾನದ ಸುತ್ತಲಿನ ಚರ್ಚೆ, ಲಾಬಿ ಸುತ್ತಾಟಗಳಿಗೆ ತಾತ್ಕಾಲಿಕ ವಿರಾಮ ಸಿಕ್ಕಿದೆ ಅಷ್ಟೇ. ಅದು ಯಾವಾಗ ಬೇಕಾದರೂ ಸ್ಪೋಟಗೊಳ್ಳಬಹುದು.

ಇದೀಗ ಖಾಲಿ ಇದ್ದ 4 ಸ್ಥಾನಗಳಿಗೆ ಕೆಪಿಸಿಸಿ ಅದ್ಯಕ್ಷರಾದ ಡಾ.ಜಿ. ಪರಮೇಶ್ವರ್, ಮನೋಹರ್ ತಹಶೀಲ್ದಾರ್ ಕ್ಯಾಬಿನೆಟ್ ದರ್ಜೆ, ಎ.(ವಾಲೆ) ಮಂಜು, ವಿನಯ್ ಕುಲಕರ್ಣಿ ಅವರನ್ನು ಸ್ವತಂತ್ರ ಖಾತೆ ನೀಡಿ ಸಂಪುಟಕ್ಕೆ ಸೇರಿಸಿಕೊಂಡು ವಿಸ್ತರಿಸಲಾಗಿದೆ. ಆದರೆಇಡೀ ಸಂಪುಟವೇ ಪುನರ್ ರಚನೆಯಾಗುವ ನಿರೀಕ್ಷೆಗಳಿದ್ದವು. ಸ್ವತಃ ಮುಖ್ಯಮಂತ್ರಿಯವರೇ ಅದನ್ನು ಬಯಸಿದ್ದರು. ಹೀಗಾದಲ್ಲಿ ‘ಅಸಮರ್ಥರು’ ಎಂದು ಹೇಳಲಾದವರನ್ನು ಕೈ ಬಿಟ್ಟು ಹೊಸಬರನ್ನು ತರುವುದು, ಖಾತೆಗಳ ಪುನರ್ ಹಂಚಿಕೆಯನ್ನೂ ಮಾಡುವುದು, ಈ ಮೂಲಕ ಆಡಳಿತದಲ್ಲಿ ಚುರುಕು ತರಬಹುದು, ಒಂದರ್ಥದಲ್ಲಿ ಆಕಾಂಕ್ಷಿಗಳನ್ನು ಸಹ ತಣಿಸಬಹುದು ಎಂಬ ವ್ಯಾಖ್ಯಾನಗಳಿದ್ದವು. ಆದರೆ ಅದಕ್ಕೆ ಹೈ ಕಮಾಂಡ್ ಅವಕಾಶ ನೀಡಿಲ್ಲ. ಮುಂಬರುವ ಜಿಲ್ಲಾ ಹಾಗೂ ತಾಲೂಕು ಪಂಚಾಯ್ತಿ ಚುನಾವಣೆ ದೃಷ್ಟಿಯಿಂದ ಇಂತಹ ಸಾಹಸಕ್ಕೆ ಕೈ ಹಾಕಬಾರದೆಂದು ವಿಸ್ತರಣೆಗೆ ಒತ್ತು ನೀಡಿದೆ ಎಂಬ ವರದಿಗಳಿವೆ. ಇಲ್ಲವಾದಲ್ಲಿ ಸಂಪುಟದಿಂದ ಕೈ ಬಿಡಲಾದವರು, ಸಚಿವ ಸ್ಥಾನ ಸಿಗದ ಅತೃಪ್ತರೂ ಎಲ್ಲರೂ ಸೇರಿತಮ್ಮದೇ ಪಕ್ಷಕ್ಕೆ ‘ಬುದ್ದಿ’ ಕಲಿಸಬಹುದು ಎಂಬ ಹೈ ಕಮಾಂಡ್ನ ಆತಂಕ ವಾಸ್ತವವೇ. ಇದು 125 ವರುಷಗಳ ಇತಿಹಾಸವಿರುವ ಆ ಪಕ್ಷ ತಲುಪಿರುವ ಸ್ಥಿತಿ! ಹೀಗಾಗಿಯೇ ಸಂಪುಟದ ಪುನರ್ ರಚನೆಯೇನಿದ್ದರೂ ಆ ಚುನಾವಣೆಗಳ ನಂತರವೇ ಅರ್ಥಾತ್ 2016 ರ ಜನವರಿ ನಂತರವೇ. ಈ ಕುರಿತು ಸಿ.ಎಂ. ಸಿದ್ಧರಾಮಯ್ಯನವರೇ ‘ಇಂಗಿತ’ವನ್ನು ತಿಳಿಸಿದ್ದಾರೆ.

ಸಿದ್ದು ಪರಮೇಶಿ (2)

ಈ ಹೇಳಿಕೆ ಸಚಿವ ಸ್ಥಾನದ ಆಕಾಂಕ್ಷಿಗಳಲ್ಲಿ ಕಾದು ನೋಡುವ ಮನೋಭಾವ ಸೃಷ್ಟಿಸಬಹುದಾದರೂ ಆತಂಕ, ಅತೃಪ್ತಿ ಇದ್ದೇ ಇರುತ್ತದೆ. ಮೇಲಾಗಿ ಅವರು ತಮ್ಮ ‘ಅರ್ಹತೆ’ಯ ಬಗ್ಗೆ ಆಗಾಗ ನೆನಪಿಸಬೇಕಾಗುತ್ತದೆ, ಸಾಬೀತು ಮಾಡಬೇಕಾಗುತ್ತದೆ. ಇಂತಹ ನಿರೀಕ್ಷೆಯಒಂದು ಸಂದರ್ಭವನ್ನು ಕಣ್ಣೆದುರು ಸೃಷ್ಟಿಸಿ ಕಾಲ ತಳ್ಳುವುದು ಕಾಂಗ್ರೆಸ್ನಲ್ಲಿ ಹೊಸದೇನಲ್ಲ. ಕಣ್ಣೆದುರು ಕಟ್ಟಿದ ಅಧಿಕಾರದ ಹುಲ್ಲು ಮೇಯಲು ಜಟಕಾ ಎಳೆದೊಯ್ಯಲು ಹೆಣಗುವ ಕುದುರೆಯಂತೆ ಅವರ ಸ್ಥಿತಿ. ಇಂತಹವರ ಸಾಲಿನಲ್ಲಿ ಹಲವಾರು ಘಟಾನುಘಟಿಗಳೇ ಇದ್ದಾರೆ. ಅವರು ಪ್ರಬಲ ಆಕಾಂಕ್ಷಿಗಳಾಗಿದ್ದರೂ ಅಂತಹ ಆಸೆಯೇ ತಮಗಿಲ್ಲ ಎಂದು ಹೇಳುತ್ತಿರುವುದನ್ನು ನಂಬಲೂ ಸಾಧ್ಯವಿಲ್ಲ. ಮಾಲೀಕಯ್ಯ ಗುತ್ತೇದಾರ್ ರಂತಹವರು ಅತೃಪ್ತಿ ನೇರ ಮಾತುಗಳಲ್ಲಿ ಹೊರ ಹಾಕಿದ್ದಾರೆ. ಆದರೆ ಕಾಗೋಡು ತಿಮ್ಮಪ್ಪನವರು, ರಮೇಶ್ ಕುಮಾರ್, ರಾಯರೆಡ್ಡಿ, ಮಾಲಕರೆಡ್ಡಿಯಂಥವರು ಜನ ಸೇವೆಯಲ್ಲಿ ತೊಡಗಿ ‘ಕಾದು’ ನೋಡುತ್ತಾರೆ!

ಒಟ್ಟಾರೆ ಸಂಪುಟದ ವಿಸ್ತರಣೆ ಮತ್ತು ಅದರ ಸುತ್ತ ನಡೆಯುತ್ತಿರುವ ವಿದ್ಯಾಮಾನಗಳನ್ನು ಗಮನಿಸಿದರೆ ಕಾಂಗ್ರೆಸ್ ಪಕ್ಷದಲ್ಲಿ ನಿರಂತರವಾಗಿ ಬಾಧಿಸುತ್ತಿರುವ ಆಂತರಿಕ ಬಿನ್ನಾಭಿಪ್ರಾಯಗಳಿಗೆ ವಿರಾಮ ಎಂಬುದು ಇಲ್ಲ, ಅದು ಕೊಂಚ ಮುಂದೂಡಲಟ್ಟಿರುವುದು ಸ್ಪಷ್ಟ. ಕಾಂಗ್ರೆಸ್ ಪಕ್ಷದೊಳಗಿನ ‘ಮೂಲ ಕಾಂಗ್ರೆಸ್’ ಛಾವಣಿಯಲ್ಲಿ ನಿಂತು ಮುಖ್ಯಮಂತ್ರಿಯನ್ನೇ ಬದಲಾಯಿಸಬೇಕೆನ್ನುತ್ತಿದ್ದವರಿಗೆ ಸದ್ಯಕ್ಕೆ ಇಂಬು ಸಿಕ್ಕಿಲ್ಲ. ಹೈಕಮಾಂಡ್ ಅಂತಹ ಸಾಧ್ಯತೆಗಳನ್ನು ಹಲವು ಇಂಗಿತಗಳ ಮೂಲಕ ನಿರಾಕರಿಸಿತ್ತು. ಕೆಪಿಸಿಸಿ ಅದ್ಯಕ್ಷರು ಉಪ ಮುಖ್ಯಮಂತ್ರಿ ಹುದ್ದೆಗೆ ಪಟ್ಟು ಹಿಡಿದರಾದರೂ ಅದನ್ನು ಸಿದ್ಧರಾಮಯ್ಯನವರು ಒಪ್ಪಲಿಲ್ಲ, ಹೈಕಮಾಂಡ್ ಸಹ ಸಂಪುಟ ಸೇರಲು ಮಾತ್ರ ಸೂಚಿಸಿತು. ಒಂದೆಡೆ ಸಿ.ಎಂ. ಮಾತೇ ನಡೆಯಿತು ಎಂದರೂ ಪರಮೇಶ್ವರ್ ಅವರನ್ನು ಸಂಪುಟದಿಂದ ಹೊರಗಿಡಲೂ ಆಗಲಿಲ್ಲ. ಈ ವಿಸ್ತರಣೆಯಿಂದ ಸದ್ಯಕ್ಕೆ ದಲಿತ ಮುಖ್ಯಮಂತ್ರಿ ಬೇಡಿಕೆಯು ಸ್ವಲ್ಪ ಹಿನ್ನೆಲೆಗೆ ಸರಿಯಿತು. ಖಾತೆಗಳ ಹಂಚಿಕೆಯಲ್ಲೂ ಜಗ್ಗಾಟಗಳು ಇರುವಂತಹವೇ.

ಈಗಿನ ಸಂಪಟದ ವಿಸ್ತರಣೆಯ ಕಸರತ್ತು ಕಾಂಗ್ರೆಸ್ ಪಕ್ಷದೊಳಗೆ ಐಕ್ಯತೆಯನ್ನು ತರುವಲ್ಲಿ ಯಶಸ್ವಿಯಾಗಿಲ್ಲ, ಒಗ್ಗಟ್ಟು ಮೂಡಿಸಿಲ್ಲ ಎಂದು ಖಚಿತವಾಗಿ ಹೇಳಬಹುದು. ಸಂಪುಟ ಪುನರ್ ರಚನೆಗಿಂತ ಸಂಪುಟ ವಿಸ್ತರಣೆಗೆ ಒತ್ತು ನೀಡಿದ್ದರಲ್ಲಿ ಮುಂಬರುವ ಚುನಾವಣೆಗಳ ಫಲಿತಾಂಶದ ಲೆಕ್ಕಾಚಾರ ಇರುವಂತೆಯೇ ಆ ಬಳಿಕ ಹಾಲಿ ಮುಖ್ಯಮಂತ್ರಿಯನ್ನು ಬದಲಿಸುವ ಕೂಗು ಕೇಳಿಬಂದರೆ ಆಶ್ಚರ್ಯವಿಲ್ಲ. ಹಾಗಂತ ಕೇಂದ್ರದ ನಾಯಕರಾದ ಮಲ್ಲಿಕಾರ್ಜುನ ಖರ್ಗೆಯವರೇ ದೂರಾಲೋಚನೆ ಮಾಡಿದ್ದಾರೆ ಎಂಬ ಮಾತುಗಳಿವೆ. ಮೇ ಸುಮಾರಿನಲ್ಲಿ ಮತ್ತೇ ದಲಿತ ಸಿ ಎಂ ಪ್ರಶ್ನೆ ಜೋರಾಗಿ ಕೇಳಿ ಬಂದು ಖರ್ಗೆ ಸಿ.ಎಂ. ಆಗುವ ಆಶೆ ಅವರ ಬೆಂಬಲಿಗರದು. ಅಲ್ಲಿಯವರೆಗೆ ಅವರಿಗೆ ಈ ವಿರಾಮದ ಅವಧಿ ಸಿದ್ಧತೆಯ ಅವಧಿಯೂ ಕೂಡ. ಸಂಪುಟ ವಿಸ್ತರಣೆಯ ಇಂಗಿತ ಹೇಳಿರುವುದರಿಂದ ಚುನಾವಣೆ ಬಳಿಕ ಸ್ಥಾನಾಕಾಂಕ್ಷಿಗಳ ಕೂಗನ್ನು ತಡೆಯಲು ಸಾಧ್ಯವೂ ಇಲ್ಲ. ಹೀಗೆ ಕಾಂಗ್ರೆಸ್ ಒಳಗಿನ ಕದನ ಮರೆಯಾಗುವ ಲಕ್ಷಣಗಳೇ ಇಲ್ಲ. ಸದ್ಯ ಅದು ಬೂದಿ ಮುಚ್ಚಿದ ಕೆಂಡವಷ್ಟೇ.

ಕಾಂಗ್ರೆಸ್ ಪಕ್ಷದೊಳಗಿನ ಈ ವಿದ್ಯಮಾನಗಳೇನೇ ಇರಲಿ ಇಡೀ ಸರಕಾರ, ಸಚಿವರು- ಆಡಳಿತ ವ್ಯವಸ್ಥೆ ಜನರಿಗೆ ಪರಿಹಾರ ನೀಡಬಹುದೇ, ಉತ್ತಮ ಆಡಳಿತ ನೀಡಬಹುದೇ ಎಂಬುದು ನಮ್ಮ ಪ್ರಶ್ನೆ. ಸಂಪುಟ ವಿಸ್ತರಣೆಯಾದ ಈ ಸಂದರ್ಭದಲ್ಲೂ ಈಗಿನ ಆಡಳಿತ ಜಡ ಸ್ಥಿತಿ ಬದಲಾಗದಿದ್ದರೆ ಫಲವೇನು? ಈ ಕಸರತ್ತುಗಳ ಬಳಿಕವೂ ಉಳಿಯುವ ಪ್ರಶ್ನೆಯಿದು.

ಕಾಂಗ್ರೆಸ್: ಅಧಿಕಾರದ ಕಿತ್ತಾಟ ಕೊನೆಯಾಗಲಿ

ಈ ವಾರ – ಎಸ್.ವೈ. ಗುರುಶಾಂತ್

ಸಂಪುಟ 9 ಸಂಚಿಕೆ 44 – ನವೆಂಬರ್ 01, 2015

ಅಧಿಕಾರಕ್ಕಾಗಿ ಕಾಂಗ್ರೆಸ್ ಒಳಗೆ ನಡೆಯುತ್ತಿರುವ ಗುದ್ದಾಟವೇನೂ ನಿಂತಿಲ್ಲ. ಮಂತ್ರಿ, ಮುಖ್ಯಮಂತ್ರಿ ಯಾರಾಗಬೇಕೆಂಬುದು ಅವರ ಆಂತರಿಕ ವಿಚಾರ.ಆದರೆ ಈ ಕಿತ್ತಾಟ ಆಡಳಿತವನ್ನು ಶಿಥಿಲಗೊಳಿಸಬಾರದು. ಜನತೆ ಸಮಸ್ಯೆಗಳ ಬಾಧೆಯಲ್ಲಿ ಬೇಯುತ್ತಿದ್ದಾರೆ. ಮೇಲಾಗಿ ಬಿಜೆಪಿ ರಾಜಕೀಯವಾಗಿ ಬಲಗೊಳ್ಳಲು ಹೊಂಚು ಹಾಕಿದ್ದರೆ, ಸಂಘ ಪರಿವಾರ ನಮ್ಮ ಸಮಾಜದ ಮೂಲ ಅಡಿಪಾಯವನ್ನೇ ಧ್ವಂಸಗೊಳಿಸಲು ಯೋಜಿತ ಧಾಳಿಯನ್ನು ತೀವ್ರಗೊಳಿಸುತ್ತಿದೆ. ಜನಾದೇಶ ಮರೆತ ಹೊಣೆಗೇಡಿತನಗಳು ತರುವ ಅಪಾಯಗಳ ಬಗ್ಗೆ  ರಾಜಕೀಯ ಎಚ್ಚರ ಎಲ್ಲರಿಗೂ ಅಗತ್ಯವಿದೆ.

congress infighting

ದೆಹಲಿಗೆ ಹೋಗಿದ್ದ ಎಸ್.ಎಂ.ಕೃಷ್ಣರವರು ಹಿಂತಿರುಗಿದ್ದಾರೆ. ’ತಾವು ಯಾರ ಮೇಲೂ ದೂರು ಹೇಳಲು ಹೋಗಿಲ್ಲ, ಚಾಡಿ ಹೇಳುವುದು ನನ್ನ ಗುಣದಲ್ಲಿಯೇ ಇಲ್ಲ’ ಎಂದು ಸ್ಪಷ್ಟನೆ ನೀಡಿದ್ದಾರೆ. ’ಮುಖ್ಯಮಂತ್ರಿ ಹುದ್ದೆ ಖಾಲಿ ಇಲ್ಲದ ಮೇಲೆ ಮತ್ಯಾಕೆಬದಲಾವಣೆಯ ಮಾತು? ಇವೆಲ್ಲಾ ಮಾಧ್ಯಮಗಳ ಸೃಷ್ಟಿ’ ಎಂದೂ ಸೇರಿಸಿದ್ದಾರೆ. ತಮ್ಮದೇ ಸರಕಾರದ ಬಗ್ಗೆ ಕೃಷ್ಣರಿಗೆ ಇರುವ ಬೇಸರ, ಭಿನ್ನಮತ ತಿಳಿಯದ್ದೇನಲ್ಲ. ಹೀಗಾಗಿಯೇ ಕೃಷ್ಣರ ಹೊರ ಮಾತುಗಳನ್ನು ನಂಬುವ ಸ್ಥಿತಿಯಲ್ಲಿ ಯಾರೂ ಇಲ್ಲ. ನಿಜ, ಇದು ಕರ್ನಾಟಕ ಕಾಂಗ್ರೆಸ್‌ನ ಹಾಲತ್ತು! ಕಾಂಗ್ರೆಸ್ ಒಳಗೆ ಎರಡು ಪಕ್ಕಾ ಗುರುತಿಸುವ ಗುಂಪು, ಹೋಳುಗಳಿವೆ. ಅದರೊಳಗೂ ಹಲವು ಟಿಸಿಲುಗಳಿವೆ. ಭಿನ್ನಮತ, ಅಧಿಕಾರಕ್ಕಾಗಿ ಬಡಿದಾಟ ಇಲ್ಲದೇ ಕಾಂಗ್ರೆಸ್‌ನಂತಹ ಪಕ್ಷಗಳು ಇರಲು ಸಾಧ್ಯವೇ?

ಮೇಲಾಗಿ ದೇಶದಲ್ಲಿ ಹೈಕಮಾಂಡ್ ಯಾವುದೇ ಸ್ಥಳೀಯ ನಾಯಕತ್ವ ಬಲವಾಗಿ ಬೆಳೆಯಲು ಬಿಡುವುದಿಲ್ಲ. ದುರ್ಬಲವಾಗಿದ್ದಷ್ಟೂ ಅವಲಂಬನೆ, ಕೃಪಾಕಟಾಕ್ಷದ ಗೋಗರೆತ ಹೆಚ್ಚಿ ವ್ಯವಹಾರಗಳು ಸುಗಮವಾಗಲು ಅಗತ್ಯವೆಂಬ ನೀತಿ ಪಾಲಿಸುತ್ತಿದೆ.

ಅಧಿಕಾರದ ಸುತ್ತ

ರಾಹುಲ್ ಗಾಂಧಿ ರಾಜ್ಯದ ಭೇಟಿಯ ಬೆನ್ನಲ್ಲೇ ಕೃಷ್ಣರವರು ಕಳೆದ ವಾರ ಹೈಕಮಾಂಡ್‌ನ ಬುಲಾವ್‌ನಂತೆ ದೆಹಲಿಗೆ ಹೋಗಿದ್ದರು. (ಮಂಡ್ಯ ಕಾಂಗ್ರೆಸ್ ಒಳಗೆ ಕೃಷ್ಣ ಮತ್ತು ಅಂಬರೀಶ್ ಬಣಗಳ ಜಗಳದಿಂದಾಗಿ ರಮ್ಯಾಗೆ ಮಂತ್ರಿ ಪದವಿ ಮತ್ತು ಅದರ ಪರಿಣಾಮ ಇತ್ಯಾದಿಗಳ ಚರ್ಚೆಗೆ ಅಂತಾ ನಟಿ ರಮ್ಯಾ ಸಹ ಹೋಗಿ ಬಂದದ್ದಾಯ್ತು ) ಆಗ ಬಹುತೇಕ ಕೃಷ್ಣರವರು ಸಿದ್ಧರಾಮಯ್ಯನವರ ಮೇಲೆ ದೂರುಗಳ ಸುರಿಮಳೆ ಗೈಯ್ಯಲೆಂದೆ ದೆಹಲಿಗೆ ತೆರಳಿದ್ದಾರೆ ಎಂದೆಲ್ಲಾ ವರ್ಣಿಸಿದಾಗ ತುಟಿ ಪಿಟ್ ಎಂದಿರಲಿಲ್ಲ. ಅವರ ಬಣ. ಏನಿಲ್ಲಾ ಎಂದರೂ ಸಚಿವ ಸಂಪುಟ ಪುನರ್‌ರಚನೆ ಮಾಡುವ ಇಂಗಿತಇದ್ದುದರಿಂದ ಬಣಗಳ ಬಲ ಪ್ರದರ್ಶನಕ್ಕೆ ರಾಹುಲ್ ಯಾತ್ರೆ ಚಾಲನೆ ನೀಡಿದಂತಾಗಿತ್ತು. ’ಸಿದ್ಧರಾಮಯ್ಯನವರು ತಮ್ಮ ಸಂಪುಟದಲ್ಲಿ ಮೂಲ ಕಾಂಗ್ರೆಸ್‌ನವರನ್ನು ಮೂಲೆಗುಂಪು ಮಾಡಿದ್ದಾರೆ, ಇದು ಬದಲಾಗಬೇಕು ಇಲ್ಲವಾದರೆ ಅವರನ್ನೇ ಬದಲಾಯಿಸಿ’ ಎಂಬ ಬೇಡಿಕೆ ಮತ್ತೆ ಮತ್ತೇ ಚಾಲ್ತಿಗೆ ಬರುತ್ತಲೇ ಇದೆ.ಈ ಸುತ್ತಿನಲ್ಲಿ ಪ್ರಮುಖರಿಂದ ಅಷ್ಟಾಗಿ ಬಹಿರಂಗವಾಗಿ ಕೇಳದಿದ್ದರೂ ಅವರ ಹಿಂಬಾಲಕರ ಬಾಯಲ್ಲಿ ಮೂಲ ಕಾಂಗ್ರೆಸ್ಸಿಗರಿಗೆ ಮುಖ್ಯ ಸ್ಥಾನಗಳು, ದಲಿತ ಮುಖ್ಯಮಂತ್ರಿ ಬೇಡಿಕೆಗಳನ್ನು ಜೀವಂತ ವಾಗಿರಿಸಲಾಗಿದೆ.

ಇದಕ್ಕಾಗಿ ಸಿಗುವ ಯಾವುದೇ ಅವಕಾಶವನ್ನು ಯಾರೂ ಬಿಟ್ಟುಕೊಡಲು ಸಿದ್ಧರಿಲ್ಲ. ಇದೀಗ ಡಾ.ಪರಮೇಶ್ವರ್‌ರವರು ಕೆಪಿಸಿಸಿ ಅಧ್ಯಕ್ಷರಾಗಿ ’ಅಧಿಕಾರ’ ಸ್ವೀಕರಿಸಿ ಐದು ವರುಷಗಳನ್ನು ಪೂರೈಸುತ್ತಿರುವ ಸಂದರ್ಭವನ್ನು ನೆಪವಾಗಿರಿಸಿ ಒಂದು ಅದ್ದೂರಿ ಸಮಾರಂಭ ನಡೆಸಲು ಸರ್ವ ಸಿದ್ಧತೆಗಳು ಆರಂಭಗೊಂಡಿವೆ. ಇತ್ತೀಚಿನ ದಿನಗಳಲ್ಲಿ ಯಾರೂ ಐದು ವರುಷಗಳನ್ನು ಹೀಗೆ ಪೂರೈಸಿದ್ದು ಇಲ್ಲವೆಂಬುದು ಸಹ ಗಮನಿಸಬೇಕಾದ ಸಂಗತಿಯೇ. ಕಾಂಗ್ರೆಸ್ ಪಕ್ಷದೊಳಗಿನ ’ಐಕ್ಯತೆ’ಯ ಅರ್ಥ, ಅಧಿಕಾರದ ’ಅನುಭೋಗ’ದ ಬಲವನ್ನು ತೋರಬಲ್ಲುದು. ಕೆಪಿಸಿಸಿ ಅದ್ಯಕ್ಷರಾದ ಡಾ.ಪರಮೇಶ್ವರ್‌ರವರು ಯೋಜಿಸುತ್ತಿರುವ ಈ ಸಮಾರಂಭ ಸಹ ಈಗಿರುವ ದಲಿತ ಮುಖ್ಯಮಂತ್ರಿ ಸ್ಥಾನಕ್ಕೆ ನಡೆದಿರುವ ಸ್ಪರ್ಧೆಎನ್ನಲಾಗದಿದ್ದರೂ ಸಂಪುಟ ವಿಸ್ತರಣೆಯಲ್ಲಿ ಉಪ ಮುಖ್ಯಮಂತ್ರಿ ಅಥವಾ ಪ್ರಮುಖಖಾತೆ ಪಡೆಯುವ ಗುರಿಯ ಒತ್ತುಇಲ್ಲದಿಲ್ಲ. ಹಾಗಾಗಿ ಕೇಂದ್ರದಮಾಜಿ ಮಂತ್ರಿಗಳಾದ ಎಂ.ವಿ.ರಾಜಶೇಖರನ್ ಬಹಿರಂಗವಾಗಿಯೇ ಪರಮೇಶ್ವರ್‌ರವರ ಪರ ಈ ಬೇಡಿಕೆಯನ್ನು ಪ್ರತಿಪಾದಿಸುತ್ತಿದ್ದಾರೆ.

ಕಿತ್ತಾಟ ಮತ್ತಷ್ಟೂ ಮುಂದಕ್ಕೆ

ಈ ಬಣಗಳ ಬಡಿದಾಟದ ರಾಜಕೀಯ ಇತ್ತೀಚೆಗೆ ಹೊಸ ಆಯಾಮ ಪಡೆಯುತ್ತಿರುವುದನ್ನು ಗಮನಿಸಬೇಕಿದೆ. ಬಿಬಿಎಂಪಿ ಚುನಾವಣೆಯಂತಹ ಮಹತ್ವದ ರಾಜಕೀಯ ಸಂದರ್ಭದಲ್ಲಿಯೇ ಸಿದ್ಧರಾಮಯ್ಯನವರನ್ನು ಬದಲಾಯಿಸುವ ಇಂಗಿತವನ್ನು ಜೋರಾಗಿಯೇ ಹರಿಬಿಡಲಾಯಿತು. ಇದರಲ್ಲಿ ಕೇಂದ್ರ ನಾಯಕರೂ ಆಗಿರುವ ಮಲ್ಲಿಕಾರ್ಜುನ ಖರ್ಗೆಯವರೇ ಇಳಿದದ್ದು ಹೈ ಕಮಾಂಡ್‌ನ ಆಶೀರ್ವಾದ ಸಿಕ್ಕಿದೆ ಎಂದು ಅರ್ಥ ಹೆಚ್ಚಿಸಿ ಬಲವನ್ನು ಪಡೆಯಿತು. ಅದುಚುನಾವಣಾ ಫಲಿತಾಂಶದ ಮೇಲೆ ಬೀರಬಹುದಾದ ಪರಿಣಾಮಗಳ ಬಗ್ಗೆ ತಲೆ ಕೆಡಿಸಿಕೊಳ್ಳದ ಕಾಂಗ್ರೆಸ್ ಬಹುಮತವಿಲ್ಲದ ಫಲವನ್ನು ಅನುಭವಿಸಿತು.ಕೊನೆಗೆ ತ್ಯಾಪೆ ರಾಜಕಾರಣದಿಂದ ಮುಖ ಉಳಿಸಿಕೊಳ್ಳುವ ಯತ್ನ ನಡೆಯಿತು. ಈ ಎಲ್ಲವೂ ಸಿದ್ದು ಬಣವನ್ನು ಬಡಿಯುವ ಸಂದರ್ಭಗಳಂತೆ ಕಂಡವು.

ಈಗಲೂ ಮುಖ್ಯಮಂತ್ರಿಗಳ ಬದಲಾವಣೆಗೆ ಖರ್ಗೆಯವರಲ್ಲದೇ, ಕೃಷ್ಣ, ತಮ್ಮದೇ ಕಾರಣಕ್ಕೆ ದೇಶಪಾಂಡೆ, ಶಾಮನೂರು, ಅಲ್ಲದೇ ಜಾಫರ್ ಷರೀಫ್‌ರಂತಹವರೂ ಕೈ ಹಚ್ಚಿದ ಬಗ್ಗೆ ವಾರ್ತೆಗಳಿವೆ. ಈ ಬಲ ಸಂಯೋಜನೆ ಖಂಡಿತಕ್ಕೂ ಹೆಚ್ಚಿನತೂಕವನ್ನು ಹೊಂದಿರುವುದರಲ್ಲಿ ಅನುಮಾನವಿಲ್ಲ. ಸಿದ್ಧರಾಮಯ್ಯನವರ ಬಣವೂ ಎಲ್ಲರನ್ನೂ ಕೂಡಿಸಿಕೊಂಡು ಹೋಗುವ ಲಕ್ಷಣಗಳನ್ನೂ ತೋರಿಸುತ್ತಿಲ್ಲ ಎಂಬ ದೂರುಗಳಿವೆ. ಅದೇ ಹೊತ್ತಿನಲ್ಲಿ ’ಅಹಿಂದ’ದ ಸಿದ್ಧರಾಮಯ್ಯನವರನ್ನು ಬಿಟ್ಟು ಮುಂದೆ ಹೋಗುವ ಸ್ಥಿತಿಯಲ್ಲೂ ಕಾಂಗ್ರೆಸ್ ಹೈಕಮಾಂಡ್‌ಇಲ್ಲ. ಜಾತಿ ಸೂತ್ರ ಮತ್ತು ಸಂಖ್ಯಾಬಲದಲ್ಲೂ ಈ ಸಮಸ್ಯೆಯನ್ನು ಅದು ಎದುರಿಸುತ್ತಿದೆ. ಅರ್ಧ ಅವಧಿ ಕಳೆದಿದೆ, ಇನ್ನರ್ಧ ಉಳಿದಿದೆ. ಇರುವ ಅಧಿಕಾರ ಕಳೆದುಕೊಂಡು ಮಾಡುವುದಾದರೂ ಏನು ಎಂಬ ಚಿಂತೆ ನಾಯಕರನ್ನು ಕಾಡುತ್ತಿದೆಯಂತೆ! ಈ ಜಿದ್ದಾಜಿದ್ದಿ ಕಾಂಗ್ರೆಸ್‌ನಲ್ಲಿ ಹೊಸತಲ್ಲವಾದರೂ ಅದು ತರುವ ಹಾನಿಯ ಬಗ್ಗೆ ಯಾರೂ ತಲೆ ಕೆಡಿಸಿಕೊಳ್ಳುತ್ತಿಲ್ಲ. ಆಡಳಿತ ಪಕ್ಷದೊಳಗೆ ಒಂದು ವಿರೋಧ ಪಕ್ಷವೂ ಇರಬೇಕು ಎಂಬುದು ಕಾಂಗ್ರೆಸ್, ಬಿಜೆಪಿ ಪಕ್ಷಗಳೊಳಗಿನ ರಾಜಕೀಯ ಸೂತ್ರ ಎಂಬಂತಿದೆ. ಉದಾರೀಕರಣದ ಈ ದಿನಗಳಲ್ಲಿ ಸುಸೂತ್ರ ಸುಲಿಗೆಗೆ ಸಂದರ್ಭಸಾಧಕ ಲಾಭಿಗಳ ಒಗ್ಗೂಡುವಿಕೆಯೂ ತರುತ್ತಿರುವ ರಾಜಕೀಯ ರಸಾಯನವೂ ಇದಾಗಿದೆ.

ಶಿಥಿಲವಾದ ಆಡಳಿತ

ಇವುಗಳೇನೆ ಇರಲಿ, ಅದೆಲ್ಲಾಕಾಂಗ್ರೆಸ್ ಪಕ್ಷದೊಳಗಿನ ಆಂತರಿಕ ಸಂಘಟನಾ ವಿದ್ಯಮಾನಗಳು. ಅವರು ಯಾರನ್ನೇ ಮಂತ್ರಿ, ಮುಖ್ಯಮಂತ್ರಿ ಮಾಡಿಕೊಳ್ಳಲು ಸರ್ವ ಸ್ವತಂತ್ರರು. ಹೊರಗಿನವರ ಮಧ್ಯಪ್ರವೇಶ ಅಗತ್ಯವಿಲ್ಲ, ಅವಕಾಶವೂ ಇಲ್ಲ ನಿಜ. ಆದರೆ ನಮ್ಮ ಪ್ರಶ್ನೆ ಎಂದರೆ ಈ ಎಲ್ಲಾ ಅಧಿಕಾರದ ಶಕ್ತಿ ರಾಜಕಾರಣದ ಆಟದಲ್ಲಿ ಜನತೆಯ ಹಿತಗಳನ್ನು ಕಾಪಾಡಲು ಸರಕಾರಕ್ಕೆ ಸಾಧ್ಯವೆಲ್ಲಿ? ಆಂತರಿಕ ಕಿತ್ತಾಟ ಬಲವಾಗಿರುವಾಗ ಆಡಳಿತ ಯಂತ್ರ, ಅಧಿಕಾರಶಾಹಿ ಜನಪರವಾಗಿ ಪರಿಣಾಮಕಾರಿ ಕೆಲಸ ಮಾಡೀತೇ? ಹಿಂದಿನ ಅನುಭವಗಳು, ಇಂದಿನ ಅನುಭವಗಳೂ ತೋರಿಸಿದಂತೆ ಅಧಿಕಾರಶಾಹಿ ಅಂಕುಶವೇ ಇಲ್ಲದೇ ವರ್ತಿಸುವುದು, ಜನರ ಪಾಲಿಗೆ ಇಲ್ಲವಾದ ಆಡಳಿತವಾಗುವುದು ನಿಶ್ಚಿತ. ಅದರ ಹತ್ತಾರು ಉದಾಹರಣೆಗಳು ಜೀವಂತ ಇವೆ. ಇದು ಒಂದೆಡೆಯಾದರೆ ಶಾಸಕರು  ಕ್ಷೇತ್ರಗಳಲ್ಲಿ ಕೆಲಸ ಮಾಡದೇ ನಿರಾಳವಾಗಿರುವುದು ಎದ್ದು ಕಾಣುತ್ತಿದೆ. ಹಾಗಂತ ಬಾಯಿ ಬಿಟ್ಟು ಕೆಲವರು ಹೇಳಿಕೊಂಡಿದ್ದು ನಾಚಿಕೆಗೇಡು. ಯಾರ ಮಾತನ್ನೂ ಯಾರು ಕೇಳದ ಸ್ಥಿತಿ ಗತಿಯಾದರೆ ಅರಾಜಕತೆ ಸೃಷ್ಟಿಯಾದೀತು.

ಪರಿಹಾರಕಾಣದ ಬವಣೆಗಳು

ರಾಜ್ಯವೇ ಈಗ ಬಹುತೇಕ ಬರದಲ್ಲಿದೆ. ಕೇಂದ್ರಕ್ಕೆ ಸರಕಾರ ವರದಿಯನ್ನು ರವಾನಿಸಿ ಆಗಿದೆ. ಆದರೆ ಪರಿಹಾರದ ಕಾರ್ಯಕ್ರಮಗಳು ಎಲ್ಲಿವೆ? ಈ ಎಲ್ಲವುಗಳ ಬಗ್ಗೆ ಕೇಂದ್ರವನ್ನೂ ಆಗ್ರಹಿಸುವ ಗಟ್ಟಿ ದನಿಯಾದರೂ ಎಲ್ಲಿದೆ? ನಮ್ಮ ಸರಕಾರ, ನಮ್ಮ ಸಂಸದರು ಏನು ಮಾಡುತ್ತಿದ್ದಾರೆ?

ರಾಜ್ಯದಲ್ಲಿ ಕಾನೂನು ಸುವ್ಯವಸ್ಥೆ ಶಿಥಿಲವಾಗುತ್ತಿದೆ. ಕಳ್ಳತನ, ದರೋಡೆ, ಹತ್ಯೆಗಳು, ಅತ್ಯಾಚಾರ, ದಲಿತರು, ಆದಿವಾಸಿಗಳು, ಮಹಿಳೆಯರು ಮತ್ತು ದುರ್ಬಲರ ಮೇಲಿನ ದೌರ್ಜನ್ಯಗಳು ನಡೆಯುತ್ತಲೇ ಇವೆ. ಸಂಘ ಪರಿವಾರದ ಅನೈತಿಕ ಪೋಲೀಸ್‌ಗಿರಿ, ಕೋಮು ದ್ವೇಷದ ಕೃತ್ಯಗಳು, ಅಲ್ಪಸಂಖ್ಯಾತರ ಮೇಲೆ ಹಲ್ಲೆಗಳು, ಕೋಮು ಗಲಭೆಗಳಿಗೆ ತಡೆಯಿಲ್ಲ. ರೈತರ ಆತ್ಮಹತ್ಯೆಗಳು ನಿಂತಿಲ್ಲ, ಕಾರ್ಮಿಕರ ಬವಣೆ ತಪ್ಪಿಲ್ಲ. ನೀರು ಹಂಚಿಕೆ, ಶಾಶ್ವತ ನೀರಾವರಿ ಕೂಗಿಗೆ ಸ್ಪಂದನವಿಲ್ಲ. ನಿತ್ಯದ ಭ್ರಷ್ಟಾಚಾರಕ್ಕೆ ಕಡಿವಾಣವಿಲ್ಲ. ಹೀಗೆ ಇಲ್ಲವಾದವುಗಳನ್ನು ಪಟ್ಟಿ ಮಾಡುತ್ತಲೇ ಹೋಗಬಹುದು.

ಬಿಜೆಪಿಯ ಭ್ರಷ್ಟತೆ, ಹಗರಣಗಳು, ದುರಾಡಳಿತದಿಂದ ಬೇಸತ್ತು ತತ್ತರಿಸಿ ಹೋಗಿದ್ದ ಜನತೆಗೆ ಅಧಿಕಾರಕ್ಕೆ ಬಂದ ಕಾಂಗ್ರೆಸ್ ಸರಕಾರ ಕನಿಷ್ಟ ಪರಿಹಾರವನ್ನು ದೊರಕಿಸಿ ಕೊಡುವಲ್ಲಿ ವಿಫಲವಾಗುತ್ತಿದೆ. ರಾಜಕೀಯವಾಗಿಯೂ, ಆಡಳಿತಾತ್ಮಕವಾಗಿಯೂ ಕಾಂಗ್ರೆಸ್ ಸರಕಾರ ನಿರೀಕ್ಷಿಸಿದಷ್ಟು ಕೆಲಸ ಮಾಡುತ್ತಿಲ್ಲ. ಜನಾದೇಶವನ್ನು ನಿರ್ಲಕ್ಷಿಸಲಾಗಿದೆ.

ಅಪಾಯಕಾರಿ ಸನ್ನಿವೇಶ

ರಾಜ್ಯದಲ್ಲಿ ಸಂಘ ಪರಿವಾರವು ತನ್ನ ಅಖಿಲ ಭಾರತ ಯೋಜನೆಯಂತೆ ಕೋಮುವಾದೀ ಆಕ್ರಮಣದ ಚಟುವಟಿಕೆಗಳನ್ನು ಹಲವು ಪಟ್ಟು ಹೆಚ್ಚಿಸುತ್ತಿದೆ. ಬಿಜೆಪಿ ಹೇಗಾದರೂ ಮಾಡಿ ಮತ್ತೇ ಅಧಿಕಾರಕ್ಕೆ ಬರಲು ಸರ್ವ ತಂತ್ರಗಳನ್ನು ಮಾಡುತ್ತಿದೆ. ಒಂದು ಅಂದಾಜಿನಂತೆ ಅದು 100 ಕ್ಷೇತ್ರಗಳಲ್ಲಿ ಬಹುಮತ ಪಡೆಯುವ ಲೆಕ್ಕಾಚಾರದಲ್ಲಿದೆ. ಇದು ಗದ್ದುಗೆ ಏರಲು ಸಾಲದೆಂದು ಯಾರ ಅವಲಂಬನೆಯಿಲ್ಲದೇ ಸ್ವಂತ ಬಲದಿಂದಲೇ ಅಧಿಕಾರ ಪಡೆಯಲು ಬೇಕಾದಂತೆ ಇನ್ನು ಕನಿಷ್ಟ 40 ಕ್ಷೇತ್ರಗಳನ್ನು ಗುರುತಿಸಿ ವಿಶೇಷ ಕಾರ್ಯತಂತ್ರ ಹೆಣೆದಿದೆ.ಇತ್ತೀಚೆಗೆ ರಾಜ್ಯದಲ್ಲಿಯೂ ನಡೆದ ಆರೆಸ್ಸೆಸ್ ಮತ್ತು ಬಿಜೆಪಿ ನಾಯಕರ ಸಮನ್ವಯ ಸಮಿತಿ ಸಭೆಯಲ್ಲಿ ವಿವರವಾದ ಕಾರ್ಯತಂತ್ರ ರೂಪಿಸಲಾಗಿದೆ.ಅಂದರೆ ಸಂಘ ಪರಿವಾರ ಎಲ್ಲಾ ದಿಕ್ಕುಗಳಿಂದಲೂ ತನ್ನ ಧಾಳಿಯನ್ನು ನಡೆಸಲು ಇನ್ನಷ್ಟೂ ಮುಂದಾಗಲಿದೆ.

ಈ ಹಿನ್ನೆಲೆಯಲ್ಲಿ ಮುಂಬರುವ ಜಿಲ್ಲಾ ಹಾಗೂ ತಾಲೂಕು ಪಂಚಾಯತ್ ಚುನಾವಣೆಗಳು ನಿರ್ಣಾಯಕವಾಗಲಿವೆ.

ಎಚ್ಚರವಿರಲಿ

ಒಂದೆಡೆ ಹೆಚ್ಚುತ್ತಿರುವ ಜನರ ಅತೃಪ್ತಿ (ಕೇಂದ್ರ ಸರಕಾರದ ಪಾಲೂ ಇದೆ), ಚುರುಕಾಗಿಲ್ಲದ ಆಡಳಿತ ಇವೆಲ್ಲಕ್ಕೂ ಕಳಸವಿಟ್ಟಂತೆ ಅಧಿಕಾರದಲ್ಲಿರುವ ಕಾಂಗ್ರೆಸ್ ಪಕ್ಷದೊಳಗೆ ನಡೆದಿರುವ ತೀವ್ರ ಕಿತ್ತಾಟ ಇವೆಲ್ಲವನ್ನೂ ಬಳಸಿಕೊಳ್ಳಲು ಬಿಜೆಪಿ ಹೊಂಚು ಹಾಕಿರುವಾಗ ಇದರತ್ತ ಕನಿಷ್ಠ ಎಚ್ಚರ, ಎದುರಿಸುವ ಕ್ರಮಗಳತ್ತ ಕಾಂಗ್ರೆಸ್ ಚಿಂತಿಸದೇ ಇರುವುದು ಕಾಣಿಸುತ್ತದೆ.

ಆದ್ದರಿಂದ ಜನತೆಗೆ ಬೇಕಿರುವುದು ಯಾರು ಮುಖ್ಯಮಂತ್ರಿ ಎಂಬುದಲ್ಲ. ಬೇಕಿರುವುದು ಜನಪರ ಆಡಳಿತ. ಕಾಂಗ್ರೆಸ್ ತನ್ನ ಆಂತರಿಕ ಸಮಸ್ಯೆಗಳನ್ನು ಕೂಡಲೇ ಬಗೆಹರಿಸಿಕೊಂಡು ಜನತೆಗೆ ಪರಿಹಾರ ನೀಡುವಂತಾಗಬೇಕೆಂಬುದು ನಮ್ಮ ಆಗ್ರಹ. ಇಲ್ಲವಾದಲ್ಲಿ ಆ ಜನದ್ರೋಹಕ್ಕೆ ತಕ್ಕ ಪ್ರತಿಫಲ ಸಿಗುವುದು ನಿಶ್ಚಿತ.

ರಾಹುಲ್ ಗಾಂಧಿ ಭೇಟಿ: ಸತ್ವವಿಲ್ಲದ ಸಾಂತ್ವನ !

ಈ ವಾರ – ಎಸ್.ವೈ. ಗುರುಶಾಂತ್?

ಸಂಪುಟ 9 ಸಂಚಿಕೆ 43, 25 ಅಕ್ಟೋಬರ್ 2015

ರಾಜ್ಯವನ್ನು ತೀವ್ರವಾಗಿ ಬಾಧಿಸುತ್ತಿರುವ ಕೃಷಿ ಬಿಕ್ಕಟ್ಟು ಈ ವಾರವೂ ರಾಜಕೀಯ ಚಟುವಟಿಕೆಗಳ ಒಂದು ಕೇಂದ್ರ ಬಿಂದುವಾಗಿತ್ತು. ಬಿಜೆಪಿ ಪಕ್ಷ ಎರಡನೆಯ ಹಂತದ ರೈತ ಚೈತನ್ಯ ಯಾತ್ರೆಯನ್ನು ಸಮಾರೋಪಗೊಳಿಸಿದರೆ, ಕಾಂಗ್ರೆಸ್ ಪಕ್ಷ ಎ.ಐ.ಸಿ.ಸಿ. ಉಪಾದ್ಯಕ್ಷ ರಾಹುಲ್ ಗಾಂಧಿಯನ್ನು ಕರೆಸಿ ಆತ್ಮಹತ್ಯೆಗೀಡಾದ ರೈತರ ಕುಟುಂಬಗಳಿಗೆ ಸಾಂತ್ವನ ಹೇಳಿಸಿತು. ವಿಶೇಷವೆಂದರೆ ರೈತರನ್ನು ಕಾಪಾಡಲು ಇನ್ನಷ್ಟು ಪರಿಹಾರಾತ್ಮಕ ಕ್ರಮ ವಹಿಸಬೇಕೆಂಬ ಸಲಹೆ ಆಧರಿಸಿ ರಾಜ್ಯ ಸರಕಾರ ಕೆಲವು ’ಸಾಂತ್ವನದ ಪ್ಯಾಕೇಜ್’ ಘೋಷಿಸಿದ್ದು. ಇದೇ ಕೆಲವು ಸಂದರ್ಭದಲ್ಲಿ ನಡೆದ ಕೆಲವು ವಿದ್ಯಮಾನಗಳು ಕಾಂಗ್ರೆಸ್ ಪಕ್ಷದೊಳಗಿನ ಒಳ ಬೇಗುದಿಗಳಿಗೆ ಹೊಸ ಹೊಳಹು ತಂದಿರುವುದು ಮತ್ತೊಂದು ವಿಶೇಷ!

ಭರವಸೆಗಳ ಪ್ಯಾಕೇಜ್

ಕರ್ನಾಟಕದಲ್ಲಿ ರೈತರ ಆತ್ಮಹತ್ಯೆಗಳ ಧಾರುಣ ಸರಣಿ ಸ್ಪೋಟಗೊಂಡ ಎಷ್ಟೋ ದಿನಗಳ ನಂತರ ಎಚ್ಚರಗೊಂಡ ಕಾಂಗ್ರೆಸ್ ಪಕ್ಷ ತನ್ನ ಸರಕಾರದ ಮೂಲಕ ಆದ ರಾಜಕೀಯ ಹಾನಿಯನ್ನು ತುಂಬಲು ಕಸರತ್ತು ನಡೆಸಿತಾದರೂ ಜನರ ವಿಶ್ವಾಸವನ್ನು ಗಳಿಸಲಾಗಲಿಲ್ಲ. ಆತ್ಮಹತ್ಯೆಗಳೂ ನಿಲ್ಲಲಿಲ್ಲ. ರಾಜ್ಯ ಸರಕಾರ ಪ್ರಕಟಿಸಬೇಕೆಂದಿದ್ದ ಕೆಲವು ಕ್ರಮಗಳನ್ನು ರಾಹುಲ್ ಗಾಂಧಿ ಮೂಲಕವೇ ಹೇಳಿಸಬೇಕು (ಹಾಗಾದರೆ ಯುವ ನಾಯಕನಿಗೆ ಇಮೇಜ್ ಬರುತ್ತೇ)  ಅಂತಾ ನಿರ್ಧರಿಸಿದ್ದೂ ಆಯ್ತು. ತನ್ನ ಆ ಕಸರತ್ತಿನ ಭಾಗವಾಗಿಯೇ ರಾಹುಲ್ ಗಾಂಧಿಯನ್ನು ಕರೆಸಿದ್ದೂ ಈ ಹಿನ್ನೆಲೆಯಲ್ಲೇ. ಪರಿಹಾರ ಸಿಗುವುದು ವಿಳಂಬವಾದರೇನೂ ತೊಂದರೆ ಇಲ್ಲವಲ್ಲ! ಹೇಗೂ ಆತ್ಮಹತ್ಯೆಗಳು ಸರ್ವಕಾಲಿಕವಾಗಿ ನಿತ್ಯವೂ ನಡೆಯುತ್ತವಲ್ಲವೇ? ಹೀಗಾಗಿ ಯುವ ನಾಯಕನ ಆಗಮನ ’ಸಕಾಲಿಕ’ವೆಂದೇ ಹೇಳಬೇಕು!

ರಾಹುಲ್‌ಗಾಂಧಿಯ ಭೇಟಿ ಮತ್ತ ರಾಜ್ಯ ಸರಕಾರದ ಮೂಲಕ ಕಾಂಗ್ರೆಸ್ ಪಕ್ಷ ಕೊಡ ಮಾಡಿದ ಸಾಂತ್ವನದ ಪರಿಹಾರಾತ್ಮಕ ಕ್ರಮಗಳು ನಿಜಕ್ಕೂ ಪರಿಹಾರವನ್ನು ತಂದುಕೊಟ್ಟವೇ?, ಕೊಡಬಲ್ಲವೇ? ಎಂದು ವಿಮರ್ಶಿಸಬೇಕಿದೆ. ಅವರು ಇದೇ ಅಕ್ಟೋಬರ್ 9, 10 ರಂದು ಅತೀ ಹೆಚ್ಚು ಆತ್ಮಹತ್ಯೆಗಳು ನಡೆದ ಮಂಡ್ಯ ಜಿಲ್ಲೆ, ಹಾವೇರಿ ಜಿಲ್ಲೆಗಳಿಗೆ ಭೇಟಿ ನೀಡಿದರು. ಮಂಡ್ಯದಲ್ಲಿ ರೈತರ ಮನೆಗಳಿಗೆ ತೆರಳಿ ಸಾಂತ್ವನವನ್ನೂ ಹೇಳಿದರು. ರಾಹುಲ್ ಅಲ್ಲಿರುವಾಗಲೇ ಪಾಂಡವಪುರದ ಸಣಬದ ಕೊಪ್ಪಲಿನಲ್ಲಿ ರೈತ ಲೋಕೇಶ್ ಆತ್ಮಹತ್ಯೆ ಮಾಡಿಕೊಂಡ ಸುದ್ದಿಯಿಂದ ಅಲ್ಲಿಗೂ ಹೋದರು. ಸಾಂತ್ವನವಾಗಿ ಕೂಡಲೇ ಎಐಸಿಸಿಯಿಂದ ಒಂದು ಲಕ್ಷ ರೂ.ಗಳ ಚೆಕ್ ನೀಡಿದರೂ ಕೂಡ. ಹಾಗೆಯೇ ಬರದಿಂದಲೂ ಬಾಧಿತವಾಗಿರುವ ಉತ್ತರ ಕರ್ನಾಟಕದ ಹಾವೇರಿ ಜಿಲ್ಲೆಯ ಕೆಲ ಗ್ರಾಮಗಳಿಗೂ ಭೇಟಿ ನೀಡಿದ್ದಾಗಿದೆ. ಅಲ್ಲಿ ಮೈದೂರು ನಿಂದ ಗುಡಗೂರು ವರೆಗೆ 7 ಕಿ.ಮೀ. ಪಾದಯಾತ್ರೆ ಮಾಡಿ ಲಮಾಣಿ ತಾಂಡಾದಲ್ಲಿ ಬಹಿರಂಗ ಸಭೆ ನಡೆಸಿದರು. ಇದರ ಬಳಿಕ ಮುಖ್ಯಮಂತ್ರಿ ಸಿದ್ಧರಾಮಯ್ಯನವರು ಸರಕಾರದಿಂದ ಪರಿಹಾರದ ಹೊಸ ಅಂಶಗಳನ್ನು ಘೋಷಿಸಿದರು. ಅದರಂತೆ ಬೆಳೆ ನಷ್ಟ, ಸಾಲದ ಬಾಧೆಯಿಂದ ಆತ್ಮಹತ್ಯೆ ಮಾಡಿಕೊಂಡ ರೈತನ ಕುಟುಂಬಕ್ಕೆ 5 ಲಕ್ಷ ರೂ.ಗಳಿಗೆ ಪರಿಹಾರ ಏರಿಕೆ, ಸುಸ್ತಿ ಬಡ್ಡಿ ಮನ್ನಾ, ಆತನ ಪತ್ನಿಗೆ 2000ರೂ.ಗಳ ಮಾಸಾಶನ ನೀಡಿಕೆ, ಮಕ್ಕಳ ವಿದ್ಯಾಭ್ಯಾಸಕ್ಕೆ ನೆರವು, ಮೃತ ಕುಟುಂಬದ ಎಲ್ಲರಿಗೂ ಆರೋಗ್ಯ ವಿಮೆ ಸೇರಿವೆ.

ನಿರ್ಲಕ್ಷಿತ ಮೂಲ ಪ್ರಶ್ನೆಗಳು

ಇವು ಹಿಂದೆ ಸರಕಾರ ಘೋಷಿಸಿದ್ದ ಕ್ರಮಗಳಿಂತ ಸ್ವಲ್ಪ ಹೆಚ್ಚಿನ ಪರಿಹಾರವೆಂದು ಕಾಣುತ್ತದೆ. ಆದರೆ ಹತಾಶೆಗೆ ಕಾರಣವಾದ ಸಾಲದ ಹೊರೆ ತಗ್ಗಿಸುವಲ್ಲಿ ಸರಕಾರ ಸಾಲ ಮನ್ನಾವನ್ನು ಅಸಾಧ್ಯವೆಂದಿದೆ. ಕೇಂದ್ರ ಸರಕಾರ ಅರ್ಧದಷ್ಟು ವಹಿಸಿಕೊಂಡರೆ ನಾವು ಉಳಿದದ್ದು ವಹಿಸಿಕೊಳ್ಳಬಹುದು ಎಂದೂ ಹೇಳಿದ್ದಾರೆ. ಹಾಗೆ ನೋಡಿದರೆ ಕೇಂದ್ರ ಸರಕಾರ ಹೆಚ್ಚಿನ ಆರ್ಥಿಕ ಹೊಣೆ ಹೊರಬೇಕಾದುದು ಆದ್ಯ ಕರ್ತವ್ಯ ಎಂಬುದರಲ್ಲಿ ಅನುಮಾನವಿಲ್ಲ. ಮಾಡಿದ ಖಾಸಗಿ, ಸಹಕಾರಿ ಮತ್ತು ರಾಷ್ಟ್ರೀಕೃತ ಬ್ಯಾಂಕ್‌ಗಳ ಎಲ್ಲಾ ಬಗೆಯ ಸಾಲಗಳನ್ನು ಮನ್ನಾ ಮಾಡುವುದು ಮತ್ತು ಹೊರೆಯಿಲ್ಲದ ಹೊಸ ಸಾಲವನ್ನು ನೀಡುವುದೂ ಕೂಡ ಅತೀ ಅಗತ್ಯವಾಗಿದೆ. ಇದಕ್ಕೆ ಎರಡೂ ಸರಕಾರಗಳ ಪೂರ್ಣ ಬೆಂಬಲವೇ ಆಧಾರವಾಗಬೇಕು. ಇದು ಅನಿವಾರ್ಯ. ಆದ್ದರಿಂದಲೇ ಕೇರಳದ ಎಲ್.ಡಿ.ಎಫ್.ಸರಕಾರ ಮಾಡಿದಂತೆ ಸಾಲ ಋಣಮುಕ್ತ ಆಯೋಗವನ್ನು ರಚಿಸಿ ಸಾಲ ಮನ್ನಾಕ್ಕೂ, ಹೊಸ ಸಾಲ ನೀಡಿಕೆಗೂ ಕ್ರಮ ವಹಿಸಬೇಕು. ಇದರೊಂದಿಗೆ ಫಸಲಿಗೆ ಬೆಂಬಲಿತ ಬೆಲೆ, ಮಾರುಕಟ್ಟೆ ಒದಗಿಸಲು ಕ್ರಮ ವಹಿಸಬೇಕು. ಈ ಕ್ರಮಗಳನ್ನು ವಹಿಸದೇ ಕೃಷಿಯನ್ನೂ ರೈತರನ್ನು ಉಳಿಸುವುದು ಅಸಾಧ್ಯ. ಕೇವಲ ಸಾಂತ್ವನ ಹಾಗೂ ಆತ್ಮವಿಶ್ವಾಸ ತುಂಬುವ ಒಣ ಮಾತುಗಳಿಂದ ಕಾರ್ಷಿಕ ಬಿಕ್ಕಟ್ಟು ನಿವಾರಣೆ ಅಸಾಧ್ಯ. ಆಧ್ದರಿಂದಲೇ ರಾಹುಲ್ ಇರುವಾಗಲೇ ಆತ್ಮಹತ್ಯೆಗಳು ನಡೆದಿವೆ, ನಡೆಯುತ್ತಲೇ ಇರುತ್ತವೆ. ಈಗಾಗಲೇ ಅಲ್ಪಾವಧಿಯ ಸಾಲವನ್ನಾದರೂ ಮನ್ನಾ ಮಾಡಿ, ಹಾಲಿಗೆ ಲಾಭದಾಯಕ ಬೆಲೆ ನೀಡಿ ಎಂಬಿತ್ಯಾದಿ ಬೇಡಿಕೆಗಳ ಮನವಿಯನ್ನು ಪುರಸ್ಕರಿಸದ ಬಗ್ಗೆ ಮಂಡ್ಯ ಜಿಲ್ಲೆಯ ರೈತರು ತೀವ್ರ ಅಸಮಧಾನ, ಆಕ್ರೋಶ ವ್ಯಕ್ತಪಡಿಸಿರುವುದು ಗಮನಿಸಬೇಕಾದ ಸಂಗತಿ.

 

Rahul

ಇಲ್ಲದ ಕಾಳಜಿ

ವಿಚಿತ್ರವೆಂದರೆ, ಈ ಬಡ್ಡಿ ಮನ್ನಾ ಮಾಡಲು ಕೂಡ ಸಹಕಾರಿ ಸಚಿವರು ಇನ್ನಷ್ಟು ಕಠಿಣ ನಿರ್ಬಂಧಗಳನ್ನು ಘೋಷಿಸಿದ್ದಾರೆ. ಬಡ್ಡಿ ಕಟ್ಟಲೇ ಹಣವಿಲ್ಲದವರು ಅಸಲು ಪಾವತಿಸುವುದಾದರೂ ಹೇಗೆ? ಪರಿಹಾರದ ಮೊತ್ತವನ್ನು ಪಡೆಯಲು ನಿಯಮಗಳು ಸರಳವೂ ಇಲ್ಲ. ಸಹಕಾರಿ ಸಾಲದ ಮೇಲಿನ ಬಡ್ಡಿಯ ಮನ್ನಾವೂ ನಿರ್ಬಂಧಗಳಿಗೆ ಒಳಗಾಗಿದೆ. ಬಹು ಕಾಲದಿಂದ ಬಾಕಿ ಇರುವ ಸಹಕಾರಿ ಸಾಲದ ಮೇಲಿನ ಬಡ್ಡಿಯನ್ನು ಮಾತ್ರವೇ ಮನ್ನಾಕ್ಕೆ ಗಣಿಸಲಾಗುವುದು. ರಾಜ್ಯದಲ್ಲಿ 78 ಲಕ್ಷ ರೈತರಿದ್ದು, ಅದರಲ್ಲಿ ಸುಮಾರು 21 ಲಕ್ಷ ರೈತರು ಸಹಕಾರಿ ಸಾಲ ಪಡೆದಿರುವ ವರದಿ ಇದೆ. ಈಗಿನ ಪ್ರಕಟಣೆಯಂತೆ 220 ಕೋಟಿ ರೂ.ಗಳನ್ನು ಗಣಿಸಿದರೆ ಒಟ್ಟು ಸರಕಾರ ಬಡ್ಡಿ ಮನ್ನಾಕ್ಕೆ  516 ಕೋಟಿ ಮೀಸಲಿಟ್ಟಂತಾಗುವುದು. ಆದರೆ ಇದು ಹಸಿದ ಹೊಟ್ಟೆಗೆ ಅರೆ ಕಾಸಿನ ಮಜ್ಜಿಗೆಯಂತಾಗುವುದರಲ್ಲಿ ಅನುಮಾನವಿಲ್ಲ. ಪ್ರಮುಖವಾಗಿ ಉದಾರೀಕರಣದ ನೀತಿಗಳನ್ನು ಬದಲಾಯಿಸಿಕೊಳ್ಳಲು  ಬಿಜೆಪಿ ಮತ್ತು ಕಾಂಗ್ರೆಸ್ ಪಕ್ಷಗಳು ಸಿದ್ಧವೇ ಇಲ್ಲದಿರುವುದು ಸ್ಪಷ್ಟ. ಈ ಪಾತಕಗಳಿಗೆ ಹೊಣೆಯಾಗಿರುವ ಇವರು ತಮ್ಮ ಮೂಲಭೂತ ನೀತಿಗಳನ್ನು ಬದಲಾಯಿಸಿಕೊಳ್ಳದೇ ಇಂತಹ ಕಸರತ್ತುಗಳನ್ನು ನಡೆಸುವುದು ವಂಚನೆಯಿಂದ ಕೂಡಿದ್ದಾಗಿವೆ.

ಈ ಕಸರತ್ತುಗಳ ಹಿನ್ನೆಲೆ ಏನು? ರಾಹುಲ್‌ಗಾಂಧಿಯ ಭೇಟಿ ಮತ್ತು ಪರಿಹಾರದ ಘೋಷಣೆಗಳ ಮೂಲಕ ಕಾಂಗ್ರೆಸ್ ಪಕ್ಷ ಗ್ರಾಮೀಣ ಪ್ರದೇಶದಲ್ಲಿ ತನ್ನ ನೆಲೆಯನ್ನು ಉಳಿಸಿಕೊಳ್ಳುವ ಪ್ರಯತ್ನ ನಡೆಸಿದೆ. ಇಲ್ಲಿ ಮುಂಬರುವ ತಾಲೂಕು ಮತ್ತು ಜಿಲ್ಲಾ ಪಂಚಾಯತ್ ಚುನಾವಣೆಗಳ ಫಲಿತಾಂಶದ ಕಾಳಜಿಯಿರುವುದನ್ನು  ಮರೆಯುವಂತಹುದಲ್ಲ.

ಒಳ ಜಗಳ ಹೊರಕ್ಕೆ

ಈ ಹಿನ್ನೆಲೆಯಲ್ಲಿಯೂ  ಕಾಂಗ್ರೆಸ್ ಪಕ್ಷ ಇತರೆ ಕಾರ್ಯಕ್ರಮಗಳನ್ನು ಆಯೋಜಿಸಿತ್ತು. ಬೆಂಗಳೂರಿನಲ್ಲಿ ಚುನಾಯಿತ ಸ್ಥಳೀಯ ಸಂಸ್ಥೆಗಳ ಪ್ರತಿನಿಧಿಗಳ ಸಭೆಯೂ ನಡೆದಿದೆ. ಮುಖ್ಯವಾಗಿ ಪಕ್ಷದ ಸಂಘಟನೆಯೊಳಗಿನ ಪ್ರಶ್ನೆಗಳಿಗಾಗಿ ಖುದ್ದಾಗಿ ರಾಹುಲ ಗಾಂಧಿ ಕೆಲವರೊಂದಿಗೆ ಸಮಾಲೋಚನೆ ಮಾಡಿದ್ದಾರೆ. ಈಗಾಗಲೇ ತಿಳಿದಂತೆ ಕಾಂಗ್ರೆಸ್ ಒಳಗೆ ತೀವ್ರ ಭಿನ್ನಮತ, ಗುಂಪುಗಾರಿಕೆ ಇರುವುದು ಮತ್ತಷ್ಟೂ ಬಯಲಿಗೆ ಬಂದಿದೆ. ರಾಹುಲ್ ಗಾಂಧಿ ಬಹಿರಂಗ ಸಭೆಯಲ್ಲಿ ಮಾತನಾಡಿದಾಗ ಸಿದ್ಧರಾಮಯ್ಯನವರ ಸರಕಾರ ಉತ್ತಮವಾಗಿ ನಡೆದಿರುವುದನ್ನು ಪ್ರಶಂಸಿದ್ದೇನೋ ನಿಜ. ಬಿಬಿಎಂಪಿ ಚುನಾವಣೆ ಬಳಿಕ ಸಿದ್ದು ಬದಲಾಗಲಿದ್ದಾರೆ ಎಂಬ ವದಂತಿಗೆ ಇದು ತೆರೆ ಎಳೆದಂತೆ ಎಂದೂ ವ್ಯಾಖ್ಯಾನಿಸಲಾಗಿತ್ತು.

ಆದರೆ ಈಗಿನ ವಿದ್ಯಮಾನಗಳು ಹೊಸ ಚಿತ್ರಣ ನೀಡುತ್ತಿವೆ. ಇದೀಗ ಮತ್ತೆ ಮೂಲ ಮತ್ತು ವಲಸಿಗ ಕಾಂಗ್ರೆಸ್ ಎಂಬ ನೆಲೆಯಲ್ಲಿ ತಮ್ಮ ಅತೃಪ್ತಿಯನ್ನು ಹಿರಿಯ ಕಾಂಗ್ರೆಸ್ ನಾಯಕರೇ ತೋಡಿಕೊಂಡಿದ್ದಾರೆ. ಮೇಲಾಗಿ ದಲಿತ ಮುಖ್ಯಮಂತ್ರಿ ಬೇಡಿಕೆಯೂ ಪುನರುಚ್ಛಾರಗೊಂಡಿದೆ. ಈ ಬೆನ್ನಲ್ಲೇ ಹಿರಿಯ ನಾಯಕ ಎಸ್.ಎಂ.ಕೃಷ್ಣರವರನ್ನು ಹೈಕಮಾಂಡ್ ದೆಹಲಿಗೆ ಕರೆಸಿಕೊಂಡಿದೆ. ಸಿನಿಮಾ ನಟಿ, ಮಂಡ್ಯದ ಮಾಜಿ ಸಂಸದೆ ರಮ್ಯಾ ಸೋನಿಯಾಗಾಂಧಿ ಯೊಂದಿಗೆ ಮಾತುಕತೆಯೂ ಆಗಿದೆ. ಇನ್ನೊಂದು ವಿಶೇಷವೆಂದರೆ ರಾಹುಲ ಗಾಂಧಿಯ ರ‍್ಯಾಲಿಗೆ ಗೈರು ಹಾಜರಾದ ಹಲವಾರು ಸಚಿವರಿಗೆ ಎಐಸಿಸಿ ನಿರ್ಧೇಶನದಂತೆ ಕೆಪಿಸಿಸಿ ಷೋಕಾಸ್ ನೋಟೀಸ್ ನೀಡಿರುವುದು ಈ ಮಂತ್ರಿಗಳ ಸ್ಥಾನಕ್ಕೆ ಕುತ್ತು ಬರಲಿರುವ ಸೂಚನೆಯೆಂದೂ ಹೇಳಲಾಗುತ್ತಿದೆ.

ಇನ್ನು ಮಂಡ್ಯದಲ್ಲಿ ಕೆಪಿಸಿಸಿ ರೈತನ ಕುಟುಂಬಕ್ಕೆ ನೀಡಿದ ಚೆಕ್‌ನ್ನು ಸಚಿವ ಅಂಬರೀಶ್ ರವರು ಅವರಿಗೆ ನೀಡದೇ ಜೆಡಿ(ಎಸ್) ಸಂಸದ ಪುಟ್ಟರಾಜುಗೆ ನೀಡಿದ್ದು, ಅದು ಎಲ್ಲೆಲ್ಲೋ ಸುತ್ತಿದ್ದು ಇದರ ಹೊಣೆಯನ್ನು ರಮ್ಯಾ ಅವರ ತಲೆಗೆ ಕಟ್ಟಿ ರಾದ್ಧಾಂತವಾದದ್ದು ಮಂಡ್ಯ ಕಾಂಗ್ರೆಸ್ ಕದನ ಕಣ ಎಂಬುದನ್ನು ತೋರಿಸಿತು. ಇದರ ಜೊತೆಗೆ ಬಿಬಿಎಂಪಿ ಯಲ್ಲಿ ಜೆಡಿ(ಎಸ್) ನೊಂದಿಗೆ ಕೈ ಜೋಡಿಸಿರುವ ಕಾಂಗ್ರೆಸ್ ಪಕ್ಷದ ಮೇಲೆ ದೇವೇಗೌಡರ ಟೀಕಾ ಪ್ರಹಾರಕ್ಕೆ ಉತ್ತರಿಸುವಂತೆ ಸ್ವತಃ ಕಾಂಗ್ರೆಸ್ ನಾಯಕರೇ ಸಿದ್ಧರಾಮಯ್ಯನವರಿಗೆ ತಾಕೀತು ಮಾಡುತ್ತಿದ್ದಾರೆ!

ಇವೆಲ್ಲವುಗಳ ಹಿನ್ನೆಲೆಯಲ್ಲಿ ಮುಖ್ಯಮಂತ್ರಿಯ ಬದಲಾವಣೆ ಕೂಡಲೇ ಆಗದಿದ್ದರೂ ಸಚಿವ ಸಂಪುಟದ ಪುನರ್ ರಚನೆ ಆಗಬಹುದು. ಹೀಗಾದರೂ ಕಾಂಗ್ರೆಸ್ ಪಕ್ಷವು ಗುಂಪುಗಾರಿಕೆಯ ಜಗಳದಿಂದ ಮುಕ್ತವಾಗುವುದು ಅಸಾಧ್ಯ.

ಹೋರಾಟವೊಂದೇ

ಒಟ್ಟಾರೆ ರಾಹುಲ್ ಭೇಟಿ, ರಾಜ್ಯ ಸರಕಾರದ ಪರಿಹಾರ ಘೋಷಣೆಗಳು ಪ್ರಸಕ್ತವಾಗಿರುವ ಕಾರ್ಷಿಕ ಬಿಕ್ಕಟ್ಟನ್ನೇನೂ ನಿವಾರಿಸುವುದಿಲ್ಲ. ಹೀಗಾಗಿ ಸಂಕಷ್ಟದಲ್ಲಿರುವ ರೈತರೊಂದಿಗೆ ನಾವಿದ್ದೇವೆ ಎಂಬ ಸಂದೇಶವೂ ಬಹು ದಿನ ಉಳಿಯದೂ ಕೂಡ. ಈ ಎರಡು ತಿಂಗಳ ಹಿಂದೆ ರಚಿಸಲಾದ ಖ್ಯಾತ ಕೃಷಿ ತಜ್ಞ ಡಾ, ಸ್ವಾಮಿನಾಥನ್ ರವರ ನೇತೃತ್ವದಲ್ಲಿ ರಚಿಸಲಾದ ಅಧ್ಯಯನ ಸಮಿತಿಯನ್ನೇ ಸರಕಾರ ಮರೆತು ಬಿಟ್ಟಿರುವುದು ಅದರ ನಿಜ  ಕಾಳಜಿಯನ್ನು ಬಯಲುಗೊಳಿಸುತ್ತದೆ. ಇಂತಹ ಸನ್ನಿವೇಶವನ್ನೇ ಬಳಸಿಕೊಳ್ಳಲು ಕೋಮುವಾದಿ, ಭ್ರಷ್ಟ ಬಿಜೆಪಿ ಕಾರ್ಯನಿರತವಾಗಿರುವುದನ್ನೂ ಗಮನಿಸದೇ ಇರಲಾಗದು. ಆಧ್ದರಿಂದ ಬದಲಾಗದ ಸ್ಥಿತಿ, ಆವರಿಸುತ್ತಿರುವ ಬರದ ಗಂಭೀರ ಪರಿಸ್ಥಿತಿ ಎದುರು ಪರ್ಯಾಯಕ್ಕಾಗಿ ಜನತೆ ಹೋರಾಟ ನಡೆಸಬೇಕು.  ರಾಹುಲ್, ಮೋದಿ ಕೇವಲ ಬಂದು ಹೋದರೆ ಅದೊಂದು ಪ್ರವಾಸವಾಗುವುದು ಅಷ್ಟೇ. ಇಂತಹ ಪ್ರವಾಸಗಳು ಜನತೆಯ ಬದುಕಿಗೆ ಪ್ರಯಾಸ ತರುತ್ತವೆ ಅಷ್ಟೇ.

ವ್ಯಾಪಕ ಕೋಮುವಾದೀಕರಣಕ್ಕೆ ಸಂಘಪರಿವಾರದ ಸಿದ್ಧತೆ

ಈ ವಾರ – ವಾಎಸ್.ವೈ.ಗುರುಶಾಂತ್

ಸಂಪುಟ 9 ಸಂಚಿಕೆ 42, 18 ಅಕ್ಟೋಬರ್ 2015

ದೇಶದಲ್ಲಿ ಹಾಗೇ ಕರ್ನಾಟಕದಲ್ಲಿ ಮೆಲ್ಲ, ಮಲ್ಲನೇ ಹೆಚ್ಚುತ್ತಿರುವ ತ್ವೇಷದ ವಾತಾವರಣ ಕಂಡು ಬರುತ್ತಿದೆ. ದೇಶದ ಭದ್ರತೆಯ ಹೆಸರಿನಲ್ಲಿ ಜಮ್ಮು-ಕಾಶ್ಮೀರದ ವಿಷಯಗಳನ್ನೂ ಒಳಗೊಂಡು ಅಲ್ಪಸಂಖ್ಯಾತರ ನಡುವಿನಲ್ಲಿ ಅಭದ್ರತೆ, ಆತಂಕ ಹುಟ್ಟು ಹಾಕಲಾಗುತ್ತಿದೆ. ಕೋಮು ಗಲಭೆಗಳ ಕಿಚ್ಚು ನಾಲಿಗೆ ಚಾಚಿ ಸಾಮರಸ್ಯ, ಶಾಂತಿ, ಸೌಹಾರ್ಧತೆಯನ್ನು ಸುಡತೊಡಗಿದೆ. ಪ್ರಧಾನಿ ಮೋದಿಯವರು ಆಯ್ಕೆಯಾದ ಸಾಮರಸ್ಯಕ್ಕೆ ಹೆಸರುವಾಸಿಯಾಗಿದ್ದ ವಾರಣವಾಸಿಯಲ್ಲೇ ಮತ್ತೆ ಕೋಮು ಗಲಭೆಗಳು ಭುಗಿಲೆದ್ದಿವೆ. ಗುಜರಾತ್‌ನ ಪಟೇಲ್ ಸಮುದಾಯ ತಮಗೆ ಮೀಸಲಾತಿ ಬೇಕೆಂದು ಕೇಳುತ್ತಲೇ ಅದರ ಮೂಲವನ್ನೇ ನಾಶಗೊಳಿಸುವ ಕ್ರಿಯೆ ಇದೀಗ ದೇಶವ್ಯಾಪಿಯಾಗಿಯೇ ಸಾಮಾಜಿಕ ನ್ಯಾಯದ ವಿರುದ್ಧ ಎತ್ತಿ ಕಟ್ಟುವ ಸ್ವರೂಪವನ್ನು ಪಡೆಯುವ ಸೂಚನೆಗಳು, ಸಿದ್ಧತೆಗಳೂ ಇವೆ. ಕೋಮುದ್ವೇಷ ಹಬ್ಬಿಸಲು ಗೋವನ್ನು ರಾಜಕೀಯ ಅಸ್ತ್ರವನ್ನಾಗಿ ಬಳಸಲಾಗುತ್ತಿದೆ. ಗೋಮಾಂಸ ಇದೆಯೆಂದು ಆರೋಪಿಸಿ ಅಲ್ಪಸಂಖ್ಯಾತನನ್ನು ಕೊಂದ ದಾದ್ರಿ ಘಟನೆ ಈ ಅಮಾನವೀಯತೆಯ ಅನಾವರಣ.

ಕರ್ನಾಟಕದಲ್ಲಿಯೂ ಕರಾವಳಿಯಲ್ಲಿ ಅದರಲ್ಲೂ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಅನೈತಿಕ ಪೋಲೀಸ್‌ಗಿರಿ ನಡದೇ ಇದೆ. ಗಣೇಶ, ಈದ್ ಹಬ್ಬಗಳಂತಹ ಸಂಭ್ರಮದ ಸಂದರ್ಭಗಳೂ ಕೂಡ ದುಷ್ಟ ಸಂಚಿನ ಅವಕಾಶಗಳಾಗಿ ಬಳಸಲಾಗುತ್ತಿದೆ. ಗಣೇಶ್ ಹಬ್ಬದ ಆಚರಣೆಯ ಸಂದರ್ಭದಲ್ಲಿ ಬೆಳಗಾವಿಯಲ್ಲಿ, ಮುಧೋಳದಲ್ಲಿಯೂ ಗಲಭೆಗಳಾಗಿವೆ, ಮುಸ್ಲಿಂ ಅಲ್ಪಸಂಖ್ಯಾತರ ಮೇಲೆ ದಾಳಿಯಲ್ಲದೇ ಅವರ ಆಸ್ತಿ ನಾಶವೂ ನಡೆದಿದೆ. ಈ ಬಾರಿ ಆಯ್ದ ಕೆಲವು ಪ್ರದೇಶಗಳಲ್ಲಿ ಗಣೇಶನ ಉತ್ಸವವನ್ನು ಯುವಜನರಲ್ಲಿ ಆವೇಶ ಹುಟ್ಟಿಸುವ ರೀತಿಯಲ್ಲೇ ಇದ್ದದ್ದನ್ನು ನಾನು ಕಂಡಿದ್ದೇನೆ. ಮಹದಾಯಿ ನೀರಿಗಾಗಿ ಹೋರಾಟ ನಡೆದಿರುವ ಹುಬ್ಬಳ್ಳಿಯಲ್ಲಿ ‘ಗೋಹತ್ಯಾ ವಿರೋಧಿ’ ಮೇಟಾರ್‌ಬೈಕ್ ರಾಲಿಯಲ್ಲಿ ಭಾಗವಹಿಸಿದ ಯವಜನರ ಮನಸ್ಸಿನೊಳಗೆ ಎಂತಹ ಉದ್ವೇಗವಿತ್ತು ಎಂಬುದನ್ನು ಗ್ರಹಿಸಿದ್ದೇನೆ. ಡಾ.ಕಲಬುರ್ಗಿಯವರ ಹತ್ಯೆ ಪ್ರಕರಣ ಮತ್ತು ತನಿಖೆಯಲ್ಲಿ ದೊರೆಯುತ್ತಿರುವ ಮಾಹಿತಿಗಳಂತೂ ಕರ್ನಾಟಕದಲ್ಲಿ ಕೋಮುವಾದವು ಕಾರ್ಯಾಚರಣೆಯಲ್ಲಿ ಅದು ಹೊಂದಿರುವ ಫ್ಯಾಶಿಸ್ಟ್ ಸ್ವರೂಪವನ್ನು ತೋರಿಸಿತು. ಈಗಲೂ ಬಹುಸಂಸ್ಕೃತಿ, ಪ್ರಜಾಪ್ರಭುತ್ವ, ವೈಚಾರಿಕತೆಯನ್ನು ಪ್ರತಿಪಾದಿಸುವವರನ್ನು ಬೆದರಿಸುವ ಕೋಮುವಾದಿಗಳ ಕೃತ್ಯಗಳು ನಿಂತಿಲ್ಲ.

ಇವೆಲ್ಲಾ ಏನೋ ಬಿಡಿಬಿಡಿಯಾಗಿ ನಡೆಯುತ್ತಿರುವ ಘಟನೆಗಳಲ್ಲ ಎಂಬುದು ಸ್ಪಷ್ಟ. ಇಡೀ ಅಖಿಲ ಭಾರತ ಮಟ್ಟದಲ್ಲಿ ಎಲ್ಲವೂ ಸಮನ್ವಯ ಹೊಂದಿರುವುದು ಕಾಣುತ್ತದೆ. ಇತ್ತೀಚಿನ ವಿದ್ಯಾಮಾನಗಳು ಅದನ್ನು ಧೃಡಪಡಿಸುತ್ತವೆ.

ಸೆಪ್ಟಂಬರ್ 1, 2015 ರಿಂದ 3ನೇ ತಾರೀಕಿನವರೆಗೆ ನವದೆಹಲಿಯಲ್ಲಿ ಆರ್.ಎಸ್.ಎಸ್. ಮತ್ತು ಬಿಜೆಪಿ ಅಂದರೆ ಕೇಂದ್ರ ಸರಕಾರದ ಪ್ರಮುಖರೊಡನೆ ಸಮಾಲೋಚನಾ ಸಭೆ ನಡೆಯಿತು. ಜನತೆಯಿಂದ ಚುನಾಯಿತವಾದ ಸರಕಾರದ ಪ್ರಧಾನಿ ಮತ್ತು ಸಚಿವರುಗಳು ಭಾರತೀಯ ಸಂವಿಧಾನವನ್ನೇ ಒಪ್ಪದ, ಪ್ರಜಾಪ್ರಭುತ್ವಕ್ಕೆ ವ್ಯತಿರಿಕ್ತವಾದ ಫ್ಯಾಶಿಸ್ಟ್ ಮಾದರಿಯನ್ನೇ ಅಳವಡಿಸಿಕೊಂಡಿರುವ ಸಂವಿಧಾನೇತರ ಸಂಸ್ಥೆಯೊಂದರ ಮುಂದೆ ಹಾಜರಾಗಿ ವರದಿ ಒಪ್ಪಿಸಿ ಸಂಘಾದೇಶಗಳನ್ನು ತಲೆ ಮೇಲೆ ಹೊತ್ತು ಬರುವುದು ಎಷ್ಟು ಸರಿ? ’ಹಾಗಿಲ್ಲ, ಒಂದು ಕುಟುಂಬದವರೆಲ್ಲಾ ವರುಷಕ್ಕೊಮ್ಮೆ ಸೇರಿ ಮುಕ್ತ ಮನಸ್ಸಿನಿಂದ ಚಿಂತನೆಗಳನ್ನು ಹಂಚಿಕೊಂಡಿದ್ದೇವೆ ಅಷ್ಟೇ, ನಮ್ಮದು ಸೈದ್ಧಾಂತಿಕತೆಯ ಮನೆ, ಅದನ್ನಷ್ಟೇ ವಿನಿಮಯ ಮಾಡಲಾಗುತ್ತದೆ.’ ಎಂದು ಸ್ಪಷ್ಟನೆ ನೀಡಿದರು ಸಂಘದ ವಕ್ತಾರ ರಾಮ್‌ಮಾಧವ್‌ರವರು. ಇದು ಸಂಘದ ವಿಶೇಷ ಭಾಷಾ ಕೌಶಲ್ಯಕ್ಕೆ ಒಂದು ಉದಾಹರಣೆ ಅಷ್ಟೇ. ನೇರ ನೋಟಕ್ಕೆ ಅಲ್ಲಿ ಸಂಪುಟದಲ್ಲಿರುವ ಸಂಘದ ಸ್ವಯಂಸೇವಕರು ವರದಿ ಮಂಡಿಸುವುದು, ಚರ್ಚಿಸುವುದು ಇರಲಿಕ್ಕಿಲ್ಲ. (ಅಂತರಂಗದ ಸಭೆಯಾಗಿರುವುದರಿಂದ ಅವರಿಗೇ ಗೊತ್ತು) ಆದರೆ ಏನು ಮಾಡಬೇಕು ಎಂಬ ನಿರ್ದೇಶನದ ದಿಕ್ಕನ್ನು ಆರೆಸ್ಸೆಸ್ ನೀಡಿರುವುದು ಅಲ್ಲಿನ ವಿವರ ತಿಳಿದಾಗ  ಖಾತ್ರಿಯಾಗುತ್ತದೆ. ಅಲ್ಲಿ ಆಂತರಿಕ ’ಭದ್ರತೆ’, ಆರ್ಥಿಕ ನೀತಿಗಳು, ಭೂಸ್ವಾಧೀನ ಕಾಯ್ದೆ ಮತ್ತು ಕಾರ್ಮಿಕ ಕಾನೂನುಗಳ ತಿದ್ದುಪಡಿ, ಶಿಕ್ಷಣ ಮತ್ತು ಸಂಸ್ಕೃತಿ ನೀತಿ, ಮೀಸಲಾತಿ ವಿಷಯಗಳು, ಗುಜರಾತ್‌ನ ಪಟೇಲ್‌ರ ಚಳುವಳಿ, ನಕ್ಸಲ್ ಚಳುವಳಿ, ಜಮ್ಮು-ಕಾಶೀರ ಸ್ಥಿತಿ, ಮುಂಬರುವ ಚುನಾವಣೆಗಳು, ಇತ್ಯಾದಿ ಪ್ರಸ್ತಾಪವಾಗಿರುವುದು ಅದಕ್ಕೆ ಸೈದ್ಧಾಂತಿಕ ಮಾರ್ಗದರ್ಶನ ನೀಡಿರುವುದರ ಅರ್ಥವೇನು?

ಕರ್ನಾಟಕದಲ್ಲಿಯೂ ಆರೆಸ್ಸೆಸ್ ಮತ್ತು ಬಿಜೆಪಿ ನಾಯಕರ ಸಮನ್ವಯ ಸಭೆಯೊಂದು ಸೆಪ್ಟಂಬರ್ 14 ರಂದು ಬೆಂಗಳೂರಿನ ಖಾಸಗಿ ಹೋಟೆಲ್‌ನಲ್ಲಿ ನಡೆಯಿತು. ತಿಳಿದು ಬಂದಂತೆ ಇಲ್ಲಿ ಬಿಜೆಪಿಯ ಭವಿಷ್ಯ, ವರ್ತಮಾನದ ಚಟುವಟಿಕೆಗಳ ಕುರಿತು ಚರ್ಚೆಯಾಗಿವೆ. ಇದರಲ್ಲಿ ಮಹದಾಯಿ ಹೋರಾಟ, ಬಿಬಿಎಂಪಿ ಚುನಾವಣೆ ಫಲಿತಾಂಶ, ಪಂಚಾಯತ್ ಚುನಾವಣೆ ಮುಂತಾದವು ಚರ್ಚಿತವಾಗಿವೆ.

ಬಿಜೆಪಿ ಮತ್ತೇ ಕರ್ನಾಟಕದಲ್ಲಿ ಮುಂದಿನ ಚುನಾವಣೆಯಲ್ಲಿ ಹೇಗಾದರೂ ಅಧಿಕಾರ ಹಿಡಿಯಲೇಬೇಕು. ಅದಕ್ಕಾಗಿ ಈಗಿನಿಂದಲೇ ತಂತ್ರ ರೂಪಿಸಿ ಕೆಲಸ ಮಾಡುವುದು ಅದರ ಮುಂದಿರುವ ಕೆಲಸ. ಈ ವಲಯದಿಂದಲೇ ಕೇಳಿದಂತೆ ಮಹದಾಯಿ ವಿಷಯದಲ್ಲಿ ಕೇಂದ್ರದ ಸರಕಾರ ವರ್ತಿಸಿದ ರೀತಿ ಅದಕ್ಕೆ ವ್ಯಕ್ತವಾದ ಜನತೆಯ ಆಕ್ರೋಶ ಉತ್ತರ ಕರ್ನಾಟಕದಲ್ಲಿ ಬಲವಾಗಿದ್ದ ಬಿಜೆಪಿ ನೆಲೆ ಅಲುಗಾಡುವಂತೆ ಆಗಿದೆ. ಹಾಗೇ ಐಐಟಿ ವಿಚಾರದಲ್ಲಿಯೂ ಕೇಂದ್ರ ಸರಕಾರ ಹೈದ್ರಾಬಾದ್ ಕರ್ನಾಟಕದ ಭಾಗದಲ್ಲೂ ತೀವ್ರ ಸಿಟ್ಟಿಗೆ ಕಾರಣವಾಗಿದೆ. ಇದರ ಹಾನಿಯನ್ನು ನಿರ್ವಹಿಸಲು ಈ ಹೋರಾಟಗಳನ್ನು ದುರ್ಬಲಗೊಳಿಸುವುದುರ ಜೊತೆಗೆ ಜನರ ಭಾವೋದ್ರೇಕಗೊಳಿಸುವ ಗೋಹತ್ಯೆಯಂತಹ ವಿಷಯಗಳನ್ನು ಎತ್ತುವುದು ರೂಪಿಸಲಾದ ತಂತ್ರದ ಬಾಗ. ಅದೇ ರೀತಿ ಕೋಮುಗಲಭೆಗಳು-ವಿವಾದಗಳನ್ನು ಬೆಳೆಸುವುದು ಜನರ ಗಮನ ಬೇರೆಡೆಗೆ ಸೆಳೆಯುವುದರ ಭಾಗ. ಕೆಲವು ಕೋಮು ಸೂಕ್ಷ್ಮ ಪ್ರದೇಶಗಳಲ್ಲಿ ಗಮನ ಕೇಂದ್ರೀಕರಿಸುವುದೂ ರಾಜಕೀಯವಾಗಿ ಮೇಲುಗೈ ಸಾಧಿಸುವ ಗುರಿಯುಳ್ಳದ್ದಾಗಿದೆ. ಶಿರಾದಂತೆಡೆ ಗಲಭೆಯಾಗಿರುವಲ್ಲಿ ಪ್ರಮೋದ್ ಮುತಾಲಿಕನ ಭೇಟಿ, ಸಭೆ ಮುಂದಿನ ದಿನಗಳಲ್ಲಿ ಗಂಭೀರ ಪರಿಣಾಮ ತರಬಹುದು.

ಸಂಘದ ವಕ್ತಾರರೇ ಹೇಳಿಕೊಂಡಂತೆ ಶಿಕ್ಷಣದ ಪ್ರೀತಿಯ ಭಾಗವಾಗಿ ಎಬಿವಿಪಿ ಸಂಘಟನೆಯು ಇತ್ತೀಚೆಗೆ ರಾಜ್ಯದಲ್ಲಿ ಶಿಕ್ಷಣಕ್ಕಾಗಿ  ರ‍್ಯಾಲಿ ನಡೆಸಿತು. ಅದು ರಾಜ್ಯದ ಕಾಂಗ್ರೆಸ್ ಸರಕಾರದ ವಿರುದ್ಧ ವಿದ್ಯಾರ್ಥಿ ಯುವಜನರಲ್ಲಿರುವ ಅತೃಪ್ತಿ,  ಆಕ್ರೋಶವನ್ನು ಕ್ರೋಢಿಕರಿಸುವುದರ ಜೊತೆಗೆ ಕೇಂದ್ರ ಸರಕಾರ ತರಲಿರುವ ಶಿಕ್ಷಣದ ತೀವ್ರ ಕೋಮುವಾದೀಕರಣಕ್ಕೆ ಮನೋಹದಗೊಳಿಸುವ ದಿಕ್ಕಿನಲ್ಲಿದೆ.  ಒಂದೆಡೆ ಜನತೆ ತೀವ್ರ ಬರದ ಬವಣೆಗಳತ್ತ ಸಾಗುತ್ತಿದ್ದಾರೆ.  ಕಾಂಗ್ರೆಸ್- ಬಿಜೆಪಿ ನಾಯಕರ ’ಪ್ರವಾಸ’ದ ಬಳಿಕವೂ ರೈತರ ಆತ್ಮಹತ್ಯಾ ಸರಣಿ ನಿಂತಿಲ್ಲ. ಬೆಲೆ ಏರಿಕೆಯ ಬಾಧೆ, ದುಸ್ತರ ಜೀವನ ನಿರ್ವಹಣೆ, ನಿಲ್ಲದ ದಲಿತರು, ಆದಿವಾಸಿಗಳು, ಮಹಿಳೆಯರ ಮೇಲಿನ ದೌರ್ಜನ್ಯ, ಅಲ್ಪಸಂಖ್ಯಾತರ ಮೇಲೆ ಹೆಚ್ಚುತ್ತಲೇ ಇರುವ ದಾಳಿಗಳು, ಇವು ಅಧಿಕಾರಸ್ತ ಪಕ್ಷಗಳಿಗೆ ವಿಷಯಗಳೇ ಅಲ್ಲ. ಇವುಗಳ ವಿರುದ್ಧ ಹೋರಾಟ ನಡೆಸುವುದು ಅತ್ಯಗತ್ಯ. ಹಾಗೆಯೇ ಜನತೆಯನ್ನು ವಿಭಜಿಸಿ, ದುಡಿಯುವ ವರ್ಗದ ಐಕ್ಯತೆಯನ್ನು ಮುರಿಯುವ ಕೋಮುವಾದ, ಮತೀಯ ಮೂಲಭೂತವಾದ, ಭಯೋತ್ಪಾದನೆಯ ವಿರುದ್ಧವೂ ಆಂದೋಲನ ನಡೆಸಬೇಕು. ಆದ್ದರಿಂದಲೇ ಬರದ ವಿರುದ್ಧ, ಕೋಮುವಾದದ ವಿರುದ್ಧ, ಮೌಢ್ಯಾಚರಣೆಗಳ ವಿರುದ್ಧ ನಡೆದಿರುವ ಆಂದೋಲನಗಳಲ್ಲಿ ಜನತೆ ಸಕ್ರಿಯವಾಗಿ ತೊಡಗಬೇಕಿದೆ. ಮುಂಬರುವ ಜಿಲ್ಲಾ ಮತ್ತು ತಾಲೂಕು ಪಂಚಾಯತ್ ಚುನಾವಣೆಗಳಲ್ಲಿ ಎಡ, ಪ್ರಜಾಸತ್ತಾತ್ಮಕ ಶಕ್ತಿಗಳು ಮುನ್ನಡೆ ಸಾಧಿಸಬೇಕಿದೆ.

ಪಶ್ಚಿಮ ಘಟ್ಟ: ಕಸ್ತೂರಿ ರಂಗನ್ ವರದಿ: ಮರು ಅಧಿಸೂಚನೆ ಜನರನ್ನು ವಂಚಿಸುವ ಮರು ವರಸೆ

ಈ. ವಾರ – ಎಸ್.ವೈ.ಗುರುಶಾಂತ್
ಸಂಪುಟ 9 ಸಂಚಿಕೆ 40, 04 ಅಕ್ಟೋಬರ್ 2015 

westernghatsmap1

ಭಾರತದ ಪಶ್ಚಿಮ ಕರಾವಳಿಗೆ ಪರ್ಯಾಯವಾಗಿ ಹಬ್ಬಿರುವ ಪರ್ವತ ಶ್ರೇಣಿಯೇ ಪಶ್ಚಿಮ ಘಟ್ಟಗಳ ಸರಣಿ. ಸಹ್ಯಾದ್ರಿ ಪರ್ವತ ಶ್ರೇಣಿಯೆಂದೂ ಕರೆಯಲಾಗುವ ಇವು ಅತ್ಯಂತ ನಿಸರ್ಗ ಸುಂದರ ಮಾತ್ರವಲ್ಲ ಹಲವು ಜೀವ ವೈವಿದ್ಯತೆ, ವೈಶಿಷ್ಠ್ಯತೆಗಳನ್ನು ಒಡಲಲ್ಲಿ ಹುದುಗಿಸಿಕೊಂಡ ಜೀವ ಪಾಲನಿ. ಮಹರಾಷ್ಟ್ರ-ಗುಜರಾತ್‌ಗಳ ಗಡಿ ತಪತಿ ನದಿಯಿಂದ ಮೊದಲ್ಗೊಂಡು ಮಹಾರಾಷ್ಟ್ರ, ಗೋವಾ, ಕರ್ನಾಟಕ, ತಮಿಳುನಾಡು, ಕೇರಳ ಹೀಗೆ ಆರು ರಾಜ್ಯಗಳಗುಂಟ ಕನ್ಯಾಕುಮಾರಿಯವರೆಗೆ ಮೈಚಾಚಿದ ಪಶ್ಚಿಮ ಘಟ್ಟಗಳು ಹಲವು ನದಿಗಳ ಉಗಮ ಸ್ಥಾನವೂ ಹೌದು. ಸುಮಾರು ೩೬೦ ಕೋಟಿ ವರುಷಗಳ ತಾರುಣ್ಯವಿರುವ ಈ ಶ್ರೇಣಿ ಮಾನವನೂ ಒಳಗೊಂಡು ಅಸಂಖ್ಯಾತ ಗಿಡ, ಮರ ಬಳ್ಳಿ, ಪ್ರಾಣಿ -ಪಕ್ಷಿ, ಜೀವ ಜಂತುಗಳಿಗೆ ಜೀವ ನೀಡಿದ, ಪೊರೆದು ಪೋಷಿಸುವ ಮಹಾ ತಾಯಿ. 5000 ಕ್ಕೂ ಹೆಚ್ಚಿನ ಗಿಡ, ಮರ ತಳಿಗಳು, 139 ಬಗೆಯ ಸಸ್ತನಿಗಳು, 508 ಪ್ರಭೇದದ ಪಕ್ಷಿಗಳು, 179 ಪ್ರಕಾರದ ದ್ವಿಚರಿಗಳ ನೆಲೆಯಿಲ್ಲಿ. ಸುಮಾರು 1,29,037 ಚ.ಕಿ.ಮೀ.ನ ಈ ಪ್ರದೇಶದಲ್ಲಿ ಸುಮಾರು 25 ಕೋಟಿ ಜನ ಜೀವಿಸಿದ್ದಾರೆ. ಅಳಿವಿನಂಚಿನಲ್ಲಿರುವ ತಳಿಗಳ ಪೈಕಿ 325 ತಳಿ ಜೀವಿಗಳು ಇಲ್ಲಿರುವುದಾಗಿ ವರದಿಯಿದೆ. ಘಟ್ಟಗಳ ವಿಸ್ತೀರ್ಣ ಸುಮಾರು 1600 ಕಿ.ಮೀ. (ಡಾ.ಮಾಧವ ಗಾಡ್ಗೀಳರ ವರದಿಯಂತೆ 1490 ಕಿ.ಮೀ) ಉದ್ದ, ಎತ್ತರ 1200 ಮೀ, 48 ರಿಂದ 210 ಕಿ.ಮೀ.ವರೆಗೆ ಅಗಲವಿದೆ. ಹೀಗೆ ಸಮೃದ್ಧವಾಗಿರುವ ಪಶ್ಚಿಮಘಟ್ಟಗಳು ಜಗತ್ತಿನಲ್ಲಿಯೂ ಮಹತ್ವದ ಸ್ಥಾನವನ್ನು ಪಡೆದಿವೆ. ಆದ್ದರಿಂದಲೇ ವಿಶ್ವ ಜೀವ ವೈವಿಧ್ಯತೆಯ ತಾಣವಾಗಿರುವ ಇವನ್ನು ವಿಶ್ವ ಪರಂರೆಯ ತಾಣವೆಂದು ಯುನೆಸ್ಕೋ 2012 ರ ಜುಲೈ 1 ರಂದು ಘೋಷಿಸಿತು. ಅದರಂತೆ ಪಶ್ಚಿಮ ಘಟ್ಟದ 39 ವಿಶಿಷ್ಠ ಪ್ರದೇಶಗಳನ್ನು ಗುರುತಿಸಲಾಯಿತು.

ಇಂತಹ ಅಮೂಲ್ಯವಾದ ನಿಸರ್ಗ ಸಂಪತ್ತನ್ನು ರಕ್ಷಿಸಿಕೊಳ್ಳಬೇಕಾದುದು ಎಲ್ಲರ ಆದ್ಯ ಕರ್ತವ್ಯ. ಮಾನವ ಜನಾಂಗದ ಉಳಿವಿಗೆ ಇದು ಅತ್ಯಗತ್ಯ ಎಂಬುದರಲ್ಲಿ ಅನುಮಾನವಿಲ್ಲ. ಅದರಲ್ಲೂ ಎಡ ಚಳುವಳಿಯಂತೂ ನಿರಂತರ ಇದನ್ನು ಪ್ರತಿಪಾದಿಸುತ್ತಾ, ಹೋರಾಡುತ್ತಾ ಬಂದಿದೆ. ಜಾಗತಿಕ ತಾಪಮಾನದ ಹೆಚ್ಚಳದ ಸಂದರ್ಭದಲ್ಲಂತೂ ಈ ಜತನಕ್ಕೆ ಇನ್ನಷ್ಟೂ ಮಹತ್ವ ಬಂದಿದೆ.

ವಿನಾಶದ ಹೊಣೆಗಾರರು

ಇಲ್ಲಿ, ಇದೀಗ ಪಶ್ಚಿಮ ಘಟ್ಟ ಕುರಿತಂತೆ ಎದ್ದಿರುವ ಚರ್ಚೆಗಳು ಗಮನಾರ್ಹ. ಈ ಬಗ್ಗೆ ಹಿಂದೆ ಹಲವಾರು ಲೇಖನಗಳಲ್ಲಿ ಚರ್ಚಿತವೂ ಆಗಿವೆ. ಪ್ರಸಕ್ತವಾಗಿ ಈ ಪಶ್ಚಿಮ ಘಟ್ಟಗಳ ಅನನ್ಯತೆಯನ್ನು, ಜೀವ ವೈವಿಧ್ಯತೆಯನ್ನು ಕಾಪಾಡಲೆಂದು ಕೇಂದ್ರ ಸರಕಾರ ಆರಂಭಿಸಿರುವ ಪ್ರಕ್ರಿಯೆಗಳು ಹತ್ತಾರು ವಿವಾದಕ್ಕೆ ಕಾರಣವಾಗಿವೆ. ಈ ನಿಸರ್ಗ ಜೀವ ತಾಣದ ಅಸ್ತಿತ್ವಕ್ಕೆ ಸಂಚಕಾರ ಬಂದಿದೆ, ಅದನ್ನು ಉಳಿಸಲೇಬೇಕು ಎಂದು ಈಗ ದೊಡ್ಡ ದನಿಯಲ್ಲಿ ಮಾತನಾಡುವ, ಇವನ್ನು ಉಳಿಸಲೆಂದೇ ಅಪಾರ ಹಣ, ಆಡಳಿತ ಸಿಬ್ಬಂದಿ, ನೀತಿ, ಕಾನೂನು ಕಟ್ಟಳೆಗಳನ್ನು ಹೊಂದಿದ್ದ ಸರಕಾರಗಳು ಇಲ್ಲಿಯವರೆಗೂ ಮಾಡಿದ್ದೇನು? ಅರಣ್ಯ ಸಂಪತ್ತಿನ ಲೂಟಿ ನಡೆಸಿದ್ದು ಯಾರು? ಖಂಡಿತ ಅಲ್ಲಿ ಬದುಕು ಕಟ್ಟಿಕೊಂಡ ಜನರಲ್ಲ, ಬದಲಾಗಿ ಆಳುವವರು, ಕಾಡುಗಳ್ಳ ಮಾಫಿಯಾಗಳು, ಲೂಟಿ ಹೊಡೆಯುವ ಗಣಿಗಳ್ಳರು. ಅದರಲ್ಲೂ ಈಗಲೂ ಉದಾರೀಕರಣ, ಜಾಗತೀಕರಣದ ನೀತಿಗಳ ಅನುಷ್ಟಾನದಲ್ಲಿ ಈ ನಮ್ಮ ನಿಸರ್ಗ ಸಂಪತ್ತು ಮತ್ತಷ್ಟೂ ಲೂಟಿಗೆ, ಕಾರ‍್ಪೋರೇಟ್ ಕಂಪನಿಗಳ ಅಪೋಶನಕ್ಕೆ ನಿತ್ಯವೂ ಅನುವು ಮಾಡಿಕೊಡುತ್ತಿರುವುದ್ಯಾಕೆ ಎಂಬುದಕ್ಕೆ ಉತ್ತರಿಸಬೇಕಿದೆ.

agriculture

ಜನತೆಯ ಆಗ್ರಹಗಳು

ಆದ್ದರಿಂದಲೇ ಪಶ್ಚಿಮ ಘಟ್ಟಗಳನ್ನು ಉಳಿಸಬೇಕೆನ್ನುವ ಹೆಸರಿನಲ್ಲಿ ಹಿಂದೆ ಕಾಂಗ್ರೆಸ್‌ನ ಮನಮೋಹನ್ ಸಿಂಗ್ ರವರ ಯುಪಿಎ-2 ಸರಕಾರ 2010 ರ ಮಾರ್ಚ್, 4 ರಂದು ಪರಿಸರ ತಜ್ಞ ಡಾ ಮಾಧವ ಗಾಡ್ಗೀಳ್‌ರವರ ನೇತೃತ್ವದಲ್ಲಿ ರಚಿಸಲಾದ ಸಮಿತಿ ಮತ್ತು ಅದಕ್ಕೆ ಆಕ್ಷೇಪ ವ್ಯಕ್ತವಾದ ಹಿನ್ನೆಲೆಯಲ್ಲಿ 2012 ರ ಆಗಸ್ಟ್ 17 ರಂದು ರಚಿಸಿದ ಪ್ರೊ.ಕಸ್ತೂರಿ ರಂಗನ್ ಸಮಿತಿಗಳ ವರದಿಗಳ ಕುರಿತ ಕಾಳಜಿಯೇ ಪ್ರಶ್ನಾರ್ಹ. ಯಾಕೆಂದರೆ ಈ ಎರಡೂ ವರದಿಗಳ ಶಿಫಾರಸುಗಳು ಪರಿಸರ ಸಂರಕ್ಷಣೆಯ ಕುರಿತು ಮಾತನಾಡುವಾಗ ಇದೇ ಪರಿಸರದ ಭಾಗವಾಗಿರುವ ಮಾನವನ ಕುರಿತು ಅವು ದಿವ್ಯ ನಿರ್ಲಕ್ಷ್ಯ ವಹಿಸಿದ್ದವು. ಮೇಲಾಗಿ ಎರಡೂ ಸಮಿತಿಗಳೂ ನೇರವಾಗಿ ಜನರೊಂದಿಗೆ, ಜನ ಪ್ರತಿನಿಧಿಗಳು, ಜನ ಸಂಘಟನೆಗಳು, ಚುನಾಯಿತ ಸಂಸ್ಥೆಗಳ ಜೊತೆಗೆ ಮುಕ್ತ ಸಂವಾದವನ್ನು ನಡೆಸದೇ ಭೇಟಿಯ ಶಾಸ್ತ್ರ ಮುಗಿಸಿ ಅಧಿಕಾರಶಾಹಿ ರೂಪದಲ್ಲಿಯೇ ವರದಿಗಳನ್ನು ನೀಡಿದ್ದವು. ಮತ್ತು ಜನರ ಬದುಕಿಗೆ ಒಡ್ಡಿದ್ದ ಭಾರಿ ಬೆದರಿಕೆ ಮುಂದುವರಿದಿತ್ತು. ಇದಕ್ಕೂ ಸಹ ತೀವ್ರ ವಿರೋಧ ವ್ಯಕ್ತವಾಗಿ ಎಲ್ಲರನ್ನೂ ಒಳಗೊಳ್ಳುವ, ಜನರ ನಿಜ ಆತಂಕಗಳನ್ನು ಪರಿಗಣಿಸುವ ದೆಸೆಯಲ್ಲಿ ವಿಶಾಲವಾದ ಸಂವಾದ. ಒಳಗೊಳ್ಳುವಿಕೆಯನ್ನು ಆಗ್ರಹಿಸಲಾಗಿತ್ತು. ಪರಿಹಾರದ ಕ್ರಮಗಳನ್ನು ನಿರೀಕ್ಷಿಸಲಾಗಿತ್ತು. ಸಿಪಿಐ ಎಂ, ಮತ್ತು ಇತರೆ ಜನ ಸಂಘಟನೆಗಳು ವ್ಯಾಪಕ ಹೋರಾಟವನ್ನು ನಡೆಸಿದ್ದವು. ಕೊಡಗು, ಉತ್ತರ ಕನ್ನಡ ಜಿಲ್ಲಾ ಘಟಕಗಳು ಆಕ್ಷೇಪಣೆಗಳನ್ನು ಸಲ್ಲಿಸಿದ್ದವು.

ಕಡು ನಿರ್ಲಕ್ಷ್ಯ

ಕಾಂಗ್ರೆಸ್ ಸೋತು ಬಿಜೆಪಿ ನೇತೃತ್ವದ ಮೋದಿ ಸರಕಾರ ಅಧಿಕಾರಕ್ಕೆ ಬಂದ ಬಳಿಕ, ಎಲ್ಲಾ ಸಮಸ್ಯೆಗಳನ್ನು ಪರಿಹರಿಸುವುದಾಗಿ ಭರವಸೆ ನೀಡಿದ್ದ ಬಿಜೆಪಿಯ ಕ್ರಮಕ್ಕಾಗಿ ಕಾಯಲಾಗಿತ್ತು. ಆದರೆ ಇದೀಗ ಕೇಂದ್ರ ಸರಕಾರ ಹಿಂದಿನ ನೋಟಿಫಿಕೇಷನ್‌ನ್ನು ಹಿಂಪಡೆದು ಹೊಸದಾಗಿ ಮರು ನೋಟಿಫಿಕೇಷನ್‌ನ್ನು ಹೊರಡಿಸಿದೆ. ಆದರೆ ಇದರಲ್ಲಿ ಕೇರಳ ರಾಜ್ಯದಲ್ಲಿನ ಒಂದಿಷ್ಟು ಪ್ರದೇಶವನ್ನು ಮುಕ್ತ ಮಾಡಲಾಗಿದೆ ಎಂಬುದು ಬಿಟ್ಟರೆ ಉಳಿದ ರಾಜ್ಯಗಳ ಯಾವುದೇ ಜನ ವಸತಿ ಪ್ರದೇಶವನ್ನು ಪರಿಸರ ಸೂಕ್ಷ್ಮ ವಲಯ ಎಂದು ಘೋಷಿಸುವುದನ್ನು ಕೈ ಬಿಟ್ಟಿಲ್ಲ. ಇಲ್ಲಿ ಜನರ ಯಾವ ಆತಂಕಗಳನ್ನು ಪರಿಗಣಿಸದೇ ಇರುವುದು ಸ್ಪಷ್ಟವಾಗಿದೆ.

ಗಮನಿಸಬೇಕಾಧ್ದು ಪ.ಘಟ್ಟ ಪ್ರದೇಶದಲ್ಲಿ ಪರಿಸರ ಸೂಕ್ಷ್ಮ ಪ್ರದೇಶದ ಬಗ್ಗೆ ಕಸ್ತೂರಿ ರಂಗನ್ ವರದಿಯಲ್ಲಿ ಕೊಟ್ಟಿರುವ ಮಾಪನ ಮತ್ತು ವ್ಯಾಪಕತೆಯನ್ನು ಈ ಅಧಿಸೂಚನೆಯಲ್ಲಿ ಅದೇ ರೀತಿಯಲ್ಲಿ ಒಪ್ಪಿಕೊಳ್ಳಲಾಗಿದೆ. ಪರಿಸರ ಸೂಕ್ಷ್ಮ ಪ್ರದೇಶವೆಂದು ಗುರುತಿಸಿರುವ ಪ್ರದೇಶಗಳಲ್ಲಿ ಕೃಷಿ ಮತ್ತು ತೋಟಗಾರಿಕೆ(ಪ್ಲಾಂಟೇಷನ್) ಅಭಾಧಿತವಾಗಿ ಮುಂದುವರೆಯಲಿದೆ ಎಂದಿದೆ. (ಆದರೆ ಮುಂದೆ ಕೆಲವು ನಿರ್ಭಂಧಗಳ ವಿಧಿಗಳನ್ನು ವಿಧಿಸಬಹುದಾಗಿದೆ!) ವಾಶದ ಮನೆಗಳನ್ನು ದುರಸ್ತಿ ಮಾಡಲು ಮತ್ತು ವಿಸ್ತರಿಸಲು ಅಡ್ಡಿ ಇರುವುದಿಲ್ಲ. ಆದರೆ ಗಣಿಗಾರಿಕೆ, ಕಲ್ಲು ಕೋರೆ, ಮರಳು ತೆಗೆಯುವುದಕ್ಕೆ ಕಡ್ಡಾಯ ನಿರ್ಬಂಧ ವಿದೆ. ಟೌನ್‌ಶಿಪ್‌ಗಳ ನಿರ್ಮಾಣದ ಬಗ್ಗೆ ಇದ್ದ ಪರಿಮಿತಿ ಮುಂದುವರಿಯುತ್ತದೆ. ಕೆಂಪು ಪಟ್ಟಿಯಲ್ಲಿರುವ ಕೈಗಾರಿಕೆಗಳಿಗೆ ಅವಕಾಶವಿರುವುದಿಲ್ಲ. ಇದರಲ್ಲಿ ನಿಯಾಮಾನುಸಾರ ತೆರೆಯಲ್ಪಟ್ಟಿರುವ ಆಸ್ಪತ್ರೆಗಳು ಮುಂದುವರಿಯುತ್ತವೆ. ಪ್ರಾಥಮಿಕ ಆರೋಗ್ಯ ಕೇಂದ್ರಗಳನ್ನು ತೆರೆಯಲು ಅವಕಾಶವಿದೆ.

ಪರಿಣಾಮಗಳು

ಈ ಹಿಂದೆ ಉನ್ನತಾಧಿಕಾರದ ಸಮಿತಿಯಾದ ಕಸ್ತೂರಿ ರಂಗನ್ ವರದಿಯಲ್ಲಿ 4156 ಹಳ್ಳಿಗಳನ್ನು ಪರಿಸರ ಸೂಕ್ಷ್ಮ ಪ್ರದೇಶಗಳೆಂದು ಗುರುತಿಸಿತ್ತು. ಅದರಲ್ಲಿ ಗೋವಾ-99, ಗುಜರಾತ್-64 ಕೇರಳ-123, ಕರ್ನಾಟಕ-1576, ತಮಿಳುನಾಡು-135 ಇವೆ. ಇಲ್ಲೆಲ್ಲಾ ಭಾರತೀಯ ಪರಿಸರ ಕಾಯ್ದೆಯನ್ನು ಹೇರುವ ಹುನ್ನಾರ ತಾನಾಗಿ ಪ್ರಾಪ್ತವಾಗುತ್ತದೆ. ಅರಣ್ಯ ಮತ್ತು ಪರಿಸರ ಸಚಿವಾಲಯವು ಗಾಡ್ಗೀಳ್ ಸಮಿತಿಯಗೆ 7 ಮುಖ್ಯ ವಿಷಯಗಳ ಬಗ್ಗೆ ಅಧ್ಯಯನ ನಡೆಸಿ, ವರದಿ ಸಲ್ಲಿಸಲು ಸೂಚನೆ ನೀಡಿತ್ತು . ವಿಚಿತ್ರವೆಂದರೆ ಅಲ್ಲಿ ಜನ ನೀವನ, ಆರ್ಥಿಕ, ಸಾಮಾಜಿಕ ಸಂಗತಿಗಳು ಅದರಲ್ಲಿ ಇರಲೇ ಇಲ್ಲ! ಕೊಟ್ಟ ಶಿಫಾರಸುಗಳು ಪೂರ್ಣವಾಗಿ ಜನ ವಿರೋಧಿಯಾಗಿವೆ. ಈ ಸಮಿತಿಯು ಭೂ ಬಳಕೆ-ಪರಿವರ್ತನೆಗೆ ತೀವ್ರ ನಿರ್ಬಂಧ ವಿಧಿಸುತ್ತದೆ. ಕೃಷಿ ಬೂಮಿಯನ್ನು ಅರಣ್ಯಕ್ಕೆ ಪರಿವರ್ತಿಸಬಹುದೇ ಹೊರತು ಅರಣ್ಯ ಭೂಮಿಯನ್ನು ಕೃಷಿ ಮತ್ತಿತರೆ ಉದ್ದೇಶಗಳಿಗೆ ಪರಿವರ್ತಿಸುವಂತಿಲ್ಲ. ಸಾರ್ವಜನಿಕ ಭೂಮಿಯನ್ನು ಪರಿವರ್ತಿಸುವಂತೆಯೂ ಇಲ್ಲ. ಅಂದರೆ ತಲಾಂತರದಿಂದ ಅಲ್ಲಿಯೇ ಇದ್ದು ಬದುಕು ಕಟ್ಟಿಕೊಂಡು, ಭೂಮಿಯ ಹಕ್ಕೇ ಇಲ್ಲದೇ ದಿಕ್ಕೇಡಿಗಳಾಗಿ ಬದುಕುವ ನೆಲೆದ ಮಕ್ಕಳಾಧ ಆದಿವಾಸಿಗಳು, ಅರಣ್ಯವಾಸಿಗಳಿಗೆ ಇನ್ನು ಭೂಮಿಯ ಹಕ್ಕು ಕನಸೇ ಸರಿ, ಮಾತ್ರವಲ್ಲ ಅಲ್ಲಿಂದ ಎತ್ತಂಗಡಿಯಾಗಲೇ ಬೇಕು. ಇದು ಅರಣ್ಯ ಭೂಮಿ ಸಾಗುವಳಿ ಮಾಡಿಕೊಂಡು ಜೀವನ ನಡೆಸುವ ಲಕ್ಷಾಂತರ ಕುಟುಂಬಗಳಿಗೆ ಅತಂತ್ರರನ್ನಾಗಿಸುವ ಕ್ರಮ. ಹಾಗೇಯೇ ಗುರುತಿಸಲಾದ ಸೂಕ್ಷ್ಮ ವಲಯದ 10 ಕಿ.ಮೀ. ವ್ಯಾಪ್ತಿಯಲ್ಲಿ ಯಾವುದೇ ಕಟ್ಟಡ ಕಟ್ಟುವಂತಿಲ್ಲ. ರಸ್ತೆ, ರೈಲು ಮಾರ್ಗವನ್ನು ಮಾಡುವಂತಿಲ್ಲ.ಕೆಂಪು ಪಟ್ಟಿಯ ಕೈಗಾರಿಕೆಗಳಿಗೆ ಅವಕಾಶವಿಲ್ಲ. ಅರಣ್ಯ ಭೂಮಿಯನ್ನು ಅರಣ್ಯೇತರ ಉದ್ದೇಶಗಳಿಗೆ ಬಳಸುವಂತೆಯೂ ಇಲ್ಲ. ಅರಣ್ಯ ಹಕ್ಕಿನ ಕಾಯ್ದೆ ಪ್ರಕಾರ ಆದಿವಾಸಿಗಳಿಗೆ ಭೂಮಿ ಹಕ್ಕೂ ಸಿಗುವುದಿಲ್ಲ. ಇನ್ನು ಪ್ಲಾಂಟೇಶನ್‌ಗಳು, ಕೃಷಿಯಲ್ಲಿ ರಾಸಾಯನಿಕಗಳ ಬಳಕೆಯ ನಿಷೇಧ, ಸೂಕ್ಷ್ಮ ವಲಯದ ಗಡಿ ಗುರುತಿಸುವಿಕೆಯಲ್ಲಿ ಸಮಸ್ಯೆಗಳು ಇವೆ. ಎಲ್ಲರಿಗೂ ತಿಳಿದಿರುವಂತೆ ಕಸ್ತೂರಿ ರಂಗನ್ ವರದಿ ಜಾರಿ ಬಂದಲ್ಲಿ ಲಕ್ಷಾಂತರ ಜನ ಬೀದಿ ಪಾಲಾಗುವುದು ಖಚಿತ. ಇತ್ತೀಚೆಗೆ ಹೆಚ್ಚಿರುವ ಪ್ರಾಣಿ ಮತ್ತು ಮನುಷ್ಯರ ನಡುವಿನ ಸಂಘರ್ಷ ಮತ್ತು ಅಪಾರ ಮಾನವ ಸಾವುಗಳ ಬಗ್ಗೆ ಈ ವರದಿ ಚಕಾರವನ್ನೇ ಎತ್ತಿಲ್ಲ.

ಆಕ್ಷೇಪಾರ್ಹ

ಇವೆಲ್ಲವೂ ಯಥಾ ರೀತಿ ಇದ್ದು ಒಂದೆರಡು ಸಣ್ಣ ಮಾರ್ಪಾಡು ಮಾಡಿ ಹೊಸ ಕರಡು ಅಧಿಸೂಚನೆಯನ್ನು ಹೊರಡಿಸಲಾಗಿದೆ ನೋಡಿ ಎಂದು ಮೋದಿ ಸರಕಾರ ಹೇಳಿದರೆ ಅದನ್ನು ಒಪ್ಪಲಾದಿತೇ? ಖಂಡಿತ ಸಾಧ್ಯವಿಲ್ಲ. ಅದನ್ನು ಪೂರ್ಣವಾಗಿ ರದ್ದು ಪಡಿಸಿ ಎಲ್ಲರನ್ನು ಒಳಗೊಳಿಸುವ ಹೊಸ ಸಮಿತಿಯೇ ರಚಿತವಾಗಬೇಕು. ಹೀಗಾಗಿ ಈಗ ಹೊರಡಿಸಿದ ಆದೇಶಕ್ಕೆ ನಿಗದಿತ ಅವಧಿಯೊಳಗೆ ತೀವ್ರ ಆಕ್ಷೇಪಣೆಯನ್ನು ಸಲ್ಲಿಸಬೇಕು.

ವಂಚಕರು

ಜನತೆಗೆ ಆತಂಕದ ಸ್ಥಿತಿಯನ್ನು ತಂಡಿಡುವಲ್ಲಿ ಕಾಂಗ್ರೆಸ್ ಮತ್ತು ಬಿಜೆಪಿ ಎರಡೂ ಪಕ್ಷಗಳೇ ಪ್ರಧಾನ ಹೊಣೆಗಾರರು. ಇಬ್ಬರೂ ಪರಸ್ಪರ ದೂಷಾರೊಪಣೆಯಲ್ಲಿ ತೊಡಗಿ ಜನರನ್ನು ಹಾದಿ ತಪ್ಪಿಸಲು ಯತ್ನಿಸುತ್ತಿದ್ದಾರೆ. ಲೋಕಸಭಾ ಚುನಾವಣೆಯ ಸಂದರ್ಭದಲ್ಲಿ ತಮ್ಮನ್ನು ಆರಿಸಿದರೆ ಕಸ್ತೂರಿ ರಂಗನ್ ವರದಿಯನ್ನು ರದ್ದುಗೊಳಿಸುವುದಾಗಿ ಬಿಜೆಪಿ, ಮೋದಿ ಪ್ರಚಾರ ಮಾಡಿದ್ದರು. ಕಾಂಗ್ರೆಸ್ ಸಹ ಈ ವರದಿಗೆ ವಿರೋಧವನ್ನು ವ್ಯಕ್ತಪಡಿಸಿತ್ತು. ಚುನಾವಣೆ ಮುಗಿದ ಬಳಿಕ ಮೋದಿ ಸರಕಾರ ಸುಪ್ರಿಂ ಕೋರ್ಟ್‌ಗೆ ಅಫಿಡಾವಿಟ್ ಸಲ್ಲಿಸಿ ಕಸ್ತೂರಿ ರಂಗನ್ ವರದಿಯ ಜಾರಿಗೆ ಬದ್ಧವೆಂದು ತಿಳಿಸಿತ್ತು. ಹೀಗಿರುವಾಗಲೂ ಕೊಡಗು-ಮೈಸೂರು ಸಂಸದ ಪ್ರತಾಪಸಿಂಹ ಸಿದ್ದರಾಮಯ್ಯನವರು ಕೇಂಧ್ರಕ್ಕೆ ವರದಿ ಕಳಿಸಲಿ ಉಳಿದದ್ದು ನನಗೆ ಬಿಡಿ ಎಂದೂ ಉತ್ತರ ಪೌರುಷ ಕೊಚ್ಚಿಕೊಂಡಿದ್ದ! ಉಳಿದೆಡೆಯಲ್ಲೂ ಬಿಜೆಪಿ ಶೋಭಾ ಕರಂದ್ಲಾಜೆ, ಪ್ರಹ್ಲಾಧ ಜೋಷಿಯಂತಹ ನಾಯಕರು ಇತ್ತೀಚಿನ ಗ್ರಾಮ ಪಂಚಾಯತ್ ಚುನಾವಣೆಯಲ್ಲೂ ಹಾಗೇ ಹೇಳಿಕೊಂಡಿದ್ದರು. ಸಂಸದರ ಸಭೆಗಳು ಈ ವಿಷಯದಲ್ಲಿ ಸಂಸದ ಸಭೆ ಸೇರಿದ್ದಾಗ ಈ ಮಹಾಶಯರು ಏನು ಮಾಡಿದರು? ಇವರ ಬಾಯಿಗೆ ಬೀಗ ಜಡಿದವರು ಯಾರು? ಆದಾಗ್ಯೂ ಈಗಲೂ ಅದೇ ಧಾಟಿಯಲ್ಲಿ ಮಾತನಾಡುತ್ತಿರುವುದು ಭಯಂಕರ ಭಂಡತನ. ಪತ್ರ ಬರೆದ್ದೇ ದೊಡ್ಡ ಸಾಧನೆ ಎಂದು ಹೇಳುವ ಕಾಂಗ್ರೆಸ್‌ನ ಕ್ರಮವೂ ವಂಚನೆಯದ್ದು. ಇವರಿಬ್ಬರಿಗೂ ಕಸ್ತೂರಿ ರಂಗನ್ ವರದಿ ತಡೆಯಬೇಕು ಎಂಬ ಬಗ್ಗೆ ಪ್ರಾಮಾಣಿಕರೇ ಆಗಿಲ್ಲ. ಇಬ್ಬರೂ ಜನರಿಗೆ ಮತ್ತೇ ಮತ್ತೇ ದ್ರೋಹ ಬಗೆಯಲು ಸ್ಪರ್ಧೆ ನಡೆಸುತ್ತಿದ್ದಾರೆ ಅಷ್ಟೇ.

ಜನ ಈಗಲೂ ಎಚ್ಚೆತ್ತುಕೊಳ್ಳುವುದು, ಪ್ರತಿಭಟಿಸುವುದು, ಒತ್ತಡ ಹೇರುವುದು ಅಗತ್ಯ. ಇಲ್ಲವಾಧರೆ. . .

waterfalls_1371560709_540x540

ಬಿಜೆಪಿ ರೈತ ಚೈತನ್ಯ ಯಾತ್ರೆ ಎಂಬ ಮಹಾವಂಚನೆಯ ರಾಜಕೀಯ ನಾಟಕ

 

ಈ ವಾರ – ಎಸ್.ವೈ. ಗುರುಶಾಂತ್

ಸಂಪುಟ 9 ಸಂಚಿಕೆ 39, 27 ಸೆಪ್ಟೆಂಬರ್ 2015

yeddy-cartoon-250

ಎಲ್ಲೆಲ್ಲೂ ಕಟೌಟುಗಳು, ಅದರಲ್ಲಿ ಕೈ ಮುಗಿದು ಬೇಡಿಕೊಳ್ಳುವ ನಾಯಕರು! ಭರ್ಜರಿ ಬ್ಯಾನರ್, ಬಂಟಿಂಗ್ಸ್, ಎತ್ತರದ ವಿಶಾಲ ವೇದಿಕೆ, ಕುರ್ಚಿಗಳ ಸಾಲುಗಳು, ಅಬ್ಬರಿಸಿ ಬೊಬ್ಬಿರಿಯುವ ಮೈಕ್‌ಗಳು. ಇದನ್ನು ನೋಡಿದ ಯಾರಿಗಾದರೂ ಏನೋ ಚುನಾವಣೆಯೋ ಅಥವಾ ಭರ್ಜರಿ ಸಂಭ್ರಮದ ಕಾರ್ಯಕ್ರಮ ನಡೆಯಲಿದೆಯೆಂದು ಭಾಸವಾಸಗದಿರದು. ಅಂತಹ ಅನಿಸಿಕೆಯೇನೋ ಸರಿ, ಆದರೆ ಅದು ಸಂಭ್ರಮ ಆಚರಣೆಯದ್ದಲ್ಲ, ಅದರ ಸಂಘಟಕರು ಹೇಳಿಕೊಂಡಂತೆ ನಿತ್ಯವೂ ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವ ಅನ್ನದಾತನಿಗೆ ಸಾಂತ್ವನ ಹೇಳುವ ಬಿಜೆಪಿ ಚೈತನ್ಯ ಯಾತ್ರೆ!

ನಾನು ಈ ದೃಶ್ಯವನ್ನು ಕಂಡದ್ದು ಹೊಸಪೇಟೆಯಲ್ಲಿ. ಸಂಜೆ ಸೇರಿದ್ದ ಸಭೆಯಲ್ಲಿ ರೈತರು ಎಷ್ಟು ಜನರಿದ್ದರು ಎಂದು ಹುಡುಕಿ ತೆಗೆಯಬೇಕು ಅಷ್ಟೇ. ಊರೂರುಗಳಿಂದ ಒಂದಿಷ್ಟು ಜನರನ್ನು ಕರೆದು ತಂದು ಕೂಡಿಸಿದ್ದು ನಿಚ್ಚಳವಾಗಿತ್ತು. ಅಲ್ಲಿ ಸಾಂತ್ವನ ಹೇಳಲೆಂದು ಬಂದ ನಾಯಕರು ಓತಪ್ರೋತವಾಗಿ ಕಾಂಗ್ರೆಸನ್ನು ನಿವಾಳಿಸಿ ತೆಗೆಯುತ್ತಿದ್ದರು. ಅಲ್ಲಿಯೂ ಒಣ ರಾಜಕೀಯ ಠೇಂಕಾರ! ಸತ್ವವಿಲ್ಲದ ಮಾತುಗಳು, ಅರ್ಥಾತ್ ಬರೀ ಬೈಗಳು! ಇದು ಹೇಗೆ ರೈತರಿಗೆ ಚೈತನ್ಯ ತಂದಿತೋ ಗೊತ್ತಿಲ್ಲ. ಆದರೆ ಜೈಲು ಸೇರಿ ಹೊರ ಬಂದಿದ್ದ ಶಾಸಕ, ಅಜ್ಞಾತರಾಗಿದ್ದ ನಾಯಕರಿಗೆ ರೈತ ಕಾಳಜಿಯಿಂದ ಮರು ಚೈತನ್ಯ ತಂದಿತ್ತು ಆ ಸಭೆ. ಇಂತಹದ್ದೇ ಸ್ಥಿತಿ ಉಡುಪಿಯಲ್ಲೂ ನಡೆಯಿತು. ಅದನ್ನು ರೈತರೇ ಇಲ್ಲದ ಸಭೆ ಎಂದು ವರದಿ ಮಾಡಿದವು ಮಾಧ್ಯಮಗಳು.

ಈ ಅವಧಿಯಲ್ಲಿ ಕರ್ನಾಟಕದಲ್ಲಿ ಸರಣಿಯೋಪಾಧಿಯಲ್ಲಿ ಮತ್ತೇ ಆರಂಭಗೊಂಡ ರೈತರ ಆತ್ಮಹತ್ಯೆಗಳ ಹಿನ್ನೆಲೆಯಲ್ಲಿ ಕೇಂದ್ರದಲ್ಲಿ ಅಧಿಕಾರದಲ್ಲಿರುವ ಬಿಜೆಪಿಯು ಅದನ್ನು ತಡೆಯಲು ಬೇಕಾದ ಯಾವುದೇ ಪರಿಹಾರದ ಕ್ರಮಗಳನ್ನು ಕೈಗೊಳ್ಳದೇ, ಕೇಂದ್ರದ ಮೇಲೆ ಒತ್ತಡವನ್ನೂ ಹಾಕದೇ ಈ ದುರಂತ ಸ್ಥಿತಿಗೆ ಕಾರಣವಾದ ನೀತಿಗಳು ಹಾಗೇ ಮುಂದುವರಿಯಲು ಬಿಟ್ಟು ಜನರೆದುರು ಬಿಜೆಪಿಯು ಆಗಸ್ಟ್ 31 ರಿಂದ ಸೆಪ್ಟಂ-13, 2015 ರವರೆಗೆ ಹಾವೇರಿಯಿಂದ ಮೈಸೂರು ವರೆಗೆ ರಾಜ್ಯದಾದ್ಯಂತ .

ತೀವ್ರ ಕಾರ್ಷಿಕ ಬಿಕ್ಕಟ್ಟಿನಿಂದ ರೈತರ ಆತ್ಮಹತ್ಯಾ ಸರಣಿ ಸ್ಪೋಟ ನಡೆದಿದೆ. ಮೇಲಾಗಿ ಈ ವರುಷ ಅತೀಯಾದ ಬರಗಾಲ. ಎಲ್ಲೆಲ್ಲೂ ನೀರು, ಮೇವಿನ ಕೊರತೆ. ವಿದ್ಯುತ್ ಅಭಾವ. ಕೆಲಸವಿಲ್ಲದೇ ರೈತರು, ಕೂಲಿಕಾರರು ಕಂಗಾಲು. ಅಷ್ಟಿಷ್ಟು ಕೃಷಿ ಮಾಡೋಣವೆಂದರೂ ಸಿಗದ ಸಾಲ, ವಸೂಲಿಗಾರರ ಕಾಟ. ಇಂತಹ ಸ್ಥಿತಿಯಲ್ಲಿ ಬೇಕಾಗಿರುವುದು ಬೈದಾಟವಲ್ಲ, ಒಣ ಸಾಂತ್ವನವೂ ಅಲ್ಲ. ಬೇಕಿರುವುದು ನಿಜ ನೆರವು, ನಿರ್ದಿಷ್ಟ ಸಹಾಯದ ಪರಿಹಾರ. ಇದರಲ್ಲಿ ರಾಜ್ಯ ಸರಕಾರಕ್ಕೆ ಹೊಣೆ ಇದೆಯಾದರೂ ಪ್ರಧಾನ ಪಾಲು ಇರುವುದು ಕೇಂದ್ರ ಸರಕಾರದ ಮೇಲೆ. ಅಂದರೆ ಒಟ್ಟು ಸ್ಥಿತಿಯ ಹೊಣೆ ಇರುವುದು ಬಿಜೆಪಿಯ ಮೇಲೆಯೇ.

`ರಾಜ್ಯಕ್ಕೆ ಸೋನಿಯಾಗಾಂಧಿ, ರಾಹುಲ ಗಾಂಧಿಯವರೇಕೆ ಬಂದು ಸಾಂತ್ವನ ಹೇಳಲಿಲ್ಲ’ ಎಂದು ಎಲ್ಲಾ ಕಡೆ ಪ್ರಶ್ನಿಸಿದ ಬಿಜೆಪಿ ನಾಯಕರು ತಮಗೂ ಒಂದು ಪ್ರಶ್ನೆ ಹಾಕಿಕೊಳ್ಳ ಬೇಕಿತ್ತು, ದೇಶ ಬಿಟ್ಟು ವಿದೇಶಗಳನ್ನು ಸುತ್ತುವ ಪ್ರಧಾನಿ ನರೇಂದ್ರ ಮೋದಿ ಕರ್ನಾಟಕದ ರೈತರ ಬಳಿ ಸುಳಿಯಲಿಲ್ಲ ಯಾಕೆ ಎಂದು! (ಸಮಾರೋಪಕ್ಕೂ ಅಮಿತ್ ಶಾ ಗೈರು ಹಾಜರಾದುದು ಯಾಕೆ ಎಂದು?) ಆತ್ಮಹತ್ಯೆಯ ಕಾರಣಗಳನ್ನು ಅರಿಯಲೆಂದೇ ಮತ್ತೆ, ಮತ್ತೇ ತಜ್ಞರ ಸಮಿತಿಗಳನ್ನು ರಚಿಸಿ ಕೈ ತೊಳೆದು ಕೊಳ್ಳುವ ಇಂತಹ ನಾಯಕರಿಗೆ, ಸರಕಾರಗಳಿಗೆ ನಿಜ ಕಾರಣಗಳು ಗೊತ್ತಿಲ್ಲವೆಂದು ಯಾರಾದರೂ ಭಾವಿಸಿದರೆ ಅದು ಅತೀ ಮೂರ್ಖತನ. ಇಂದಿನ ದುರಂತ ಸ್ಥಿತಿಗೆ ಕಾಂಗ್ರೆಸ್ ಕಾರಣವಾಗಿರುವಂತೆ ಬಿಜೆಪಿಯೂ ಅಷ್ಟೇ ಹೊಣೆಯಾಗಿದೆ. ಹಿಂದೆ ಉದಾರೀಕರಣ, ಜಾಗತೀಕರಣದ ನೀತಿಗಳನ್ನು ಕಾಂಗ್ರೆಸ್ ತಮ್ಮಿಂದ  ಅಪಹರಿಸಿದೆಯೆಂದೂ ಹೇಳಿ ಅವುಗಳನ್ನು ಇನ್ನಷ್ಟೂ ಬಿರುಸಾಗಿ ಜಾರಿ ಮಾಡಿದ್ದು ಇದೇ ಬಿಜೆಪಿ ಅಲ್ಲವೇ? ವಿಶ್ವ ವ್ಯಾಪಾರ ಸಂಘಟನೆಯ ಅಣತಿಯಂತೆ ಸುಮಾರು 1400 ಕೃಷಿ ಉತ್ಪನ್ನಗಳ ಆಮದಿಗೆ ಮುಕ್ತ ಅವಕಾಶ ನೀಡಿ ಆಗಲೇ ಸಬ್ಸಿಡಿ-ಸಾಲ-ಸಹಾಯ ಕಡಿತಗಳಿಂದ, ಬೀಜ, ಕ್ರಿಮಿ ನಾಶಕ ಉತ್ಪಾದಕ ಕಾರ್ಪೋರೇಟ್ ಕಂಪನಿಗಳ ಹೊಡೆತಗಳಿಂದ  ಹೈರಾಣಾಗಿದ್ದ ರೈತರ ಶವ ಪೆಟ್ಟಿಗೆಗೆ ಮೊಳೆ ಹೊಡೆದದ್ದು ಅದೇ ವಾಜಪೇಯಿ ಸರಕಾರ ಅಲ್ಲವೇ? ಈಗಲೂ ಹಿಡುವಳಿದಾರರನ್ನು ರಕ್ಷಿಸದೇ ಹತಾಶೆ ಸ್ಥಿತಿಯಲ್ಲಿರುವ ರೈತರ ಕೈಯಿಂದ ಇದ್ದ ಬದ್ದ ಭೂಮಿಯನ್ನು ಕಿತ್ತುಕೊಂಡು ಬೃಹತ್ ಕಾರ್ಪೋರೇಟ್ ಕಂಪನಿಗಳಿಗೆ ಭೂ ಪರಭಾರೆ ಮಾಡಿ ಕೃಷಿಯ ಕತ್ತು ಹಿಸುಕುವ ಭೂ ಸ್ವಾಧೀನ ತಿದ್ದುಪಡಿ ಕಾಯ್ದೆ-2015ನ್ನು ತರಲು ಹಠ ಹಿಡಿದು ಮುಂದಾದದ್ದು ಇದೇ ಬಿಜೆಪಿಯ ಮೋದಿ ಸರಕಾರ ಅಲ್ಲವೇ?

ಇದೀಗ ಬಿಜೆಪಿ ನಾಯಕರು ’ರಾಜ್ಯ ಸರಕಾರವು ಕೇಂದ್ರದ ನೆರವನ್ನು ಪಡೆಯಲು ಏನೊಂದನ್ನೂ ಮಾಡುತ್ತಿಲ್ಲ, ಕೇಳಿದ್ದರೆ ಮೋದಿಯವರು ಧಾರಾಳವಾಗಿ ಹಣ ಕೊಡುತ್ತಿದ್ದರು’ ಎಂದು ಕೀರ್ತನೆ ಹೇಳುವುದಕ್ಕೆ ಏನಾದರೂ ಬೆಲೆ ಇದೆಯೇ? ಈ ನಡುವೆ ವಿಪತ್ತು ನಿರ್ವಹಣೆ ನಿಧಿಯ ಹಂಚಿಕೆಯಲ್ಲೂ ಮೋದಿ ಸರಕಾರ ರಾಜ್ಯಕ್ಕೆ ಅನ್ಯಾಯ ಮಾಡಿದೆ. ಮಹಾರಾಷ್ಟ್ರಕ್ಕೆ 1,112 ಕೋಟಿ ನೀಡಿದ್ದರೆ, ಮ.ಪ್ರದೇಶಕ್ಕೆ 657 ಕೋಟಿ, ಗುಜರಾತ್‌ಗೆ 528 ಕೋಟಿ, ತಮಿಳುನಾಡು- 509 ಕೋಟಿ, ರಾಜಸ್ಥಾನಕ್ಕೆ 822 ಕೋಟಿ, ಆದರೆ ಕರ್ನಾಟಕಕ್ಕೆ 207 ಕೋಟಿ ರೂಪಾಯಿಗಳು. ಒಣ ಬೇಸಾಯ, ಪ್ರಕೃತಿ ವಿಕೋಪಗಳಿಗೆ ಹೆಚ್ಚಾಗಿ ಸಿಕ್ಕಿ ಕೊಳ್ಳುವ ರಾಜ್ಯಗಳಲ್ಲಿ ಕರ್ನಾಟಕ ಮತ್ತು ರಾಜಸ್ಥಾನ ಮೇಲಿನ ಸ್ಥಾನದಲ್ಲಿವೆ. ಇದೇಕೆ ತಾರತಮ್ಯ? ಈಗಲೂ ಬರ ರಾಜ್ಯದಲ್ಲಿ ತೀವ್ರವಿದೆ. ಕೇಂದ್ರಕ್ಕೆ ವರದಿಯೂ ಹೋಗಿದೆ. ಸರಕಾರ ಸಲ್ಲಿಸಿದ ವರದಿಯಂತೆ ಬರದಿಂದಾಗಿ 25 ಲಕ್ಷ ಹೆಕ್ಟೇರ್ ಎಕರೆ ಬೆಳೆ ನಾಶವಾಗಿದೆ, ಅಂದಾಜು 11 ಸಾವಿರ ಕೋಟಿ ರೂ.ಗಳು ಎಂದಿದೆ. ಈ ಹಂತದಲ್ಲಿ ಕೇಂದ್ರ 3050 ಕೋಟಿ ರೂ.ಗಳ ಅನುದಾನದ ನೆರವಿಗೆ ಮನವಿ ಮಾಡಿದ್ದರೂ ಅದಕ್ಕೆ ಉತ್ತರವೇ ಇಲ್ಲ. ಇನ್ನೂ ಕೇಂದ್ರದ ತಂಡಗಳನ್ನು ಅಧ್ಯಯನಕ್ಕೆ ಕಳಿಸುವ ವಿಳಂಬ. 14ನೆಯ ಹಣಕಾಸು ಯೋಜನೆಯಲ್ಲೂ ನೀಡುತ್ತಿರುವ ಅನುದಾನದಲ್ಲಿ ರಾಜ್ಯಕ್ಕೆ 5,500 ಕೋಟಿ ನಷ್ಟವಾದ ವರದಿ ಇದೆ. ಹಾಗೆಯೇ ವಿದ್ಯುತ್ ಅಭಾವ ಸೃಷ್ಟಿಸುವಲ್ಲಿ ಕೇಂದ್ರದ ಪಾಲೂ ಮರೆಯುವಂತಿಲ್ಲ. ಇನ್ನು ಸಿದ್ಧರಾಮಯ್ಯನವರ ಸರಕಾರ ಸಾಲ ಮನ್ನಾ ಮಾಡಲೇ ಬೇಕೆಂದಿರುವ ಬಿಜೆಪಿಯು ಇದರ ಪ್ರಧಾನ ಹೊಣೆಯಿರುವುದೂ ಕೇಂದ್ರ ಸರಕಾರದ ಮೇಲೆಯೇ ಎಂಬುದನ್ನು ಮರೆಸುತ್ತಿದೆ.

ಅದು ಒಂದು ಕಡೆಯಾದರೆ, ಇಲ್ಲಿ ಕರ್ನಾಟಕದಲ್ಲಿ ಬಿಜೆಪಿ ಕಥೆಯೇನು? ಹಿಂದೆ ಯಡಿಯೂರಪ್ಪನವರು ಮುಖ್ಯಮಂತ್ರಿಯಾಗಿರುವಾಗ ಹಾವೇರಿಯಲ್ಲಿ ರೈತರ ಮೇಲೆ ಗೋಲಿಬಾರ್ ನಡೆಸಿ ಇಬ್ಬರು ರೈತರನ್ನು ಬಲಿ ತೆಗೆದುಕೊಳ್ಳಲಿಲ್ಲವೇ? ಅವರ ಅವಧಿಯಲ್ಲೇ ರೈತರು ಆತ್ಮಹತ್ಯೆ ಮಾಡಿಕೊಂಡು ಸಾಯುವಾಗ ಇವರು ಮಾಡಿದ್ದಾರೂ ಏನು? ಪರಿಹಾರ ಧನಕ್ಕಾಗಿ ಸಾಯುವರೆಂದೂ, ಸತ್ತವರು ರೈತರೇ ಅಲ್ಲವೆಂದೂ ದೂಷಿಸಲಿಲ್ಲವೇ? ರೈತರ ಬಜೆಟ್ ಎಂದು ಮಾಡಿದರಾದರೂ ಫಲ ಅವರಿಗೆ ಸಿಕ್ಕಿದ್ದುಂಟೇ?

ಈ ಯಾತ್ರೆ ಆಗ-31 ರಂದು ಆರಂಭಗೊಂಡದ್ದು ಉತ್ತರ ಕರ್ನಾಟಕದಿಂದ. ಅಲ್ಲೀಗ ಮಹದಾಯಿ, ಕಳಸಾ-ಬಂಡೂರಿ ನೀರಿಗಾಗಿ ಸಾಮಾನ್ಯ ಜನತೆ, ವಿಶೇಷವಾಗಿ ರೈತರು  ನಿರಂತರ ಚಳುವಳಿಯಲ್ಲಿ ತೊಡಗಿದ್ದಾರೆ. ಈ ಸಮಸ್ಯೆಯನ್ನು ಇತ್ಯರ್ಥ ಪಡಿಸಲು ಎಳ್ಳಷ್ಟೂ ಆಸಕ್ತಿ ವಹಿಸದೇ, ಅದು ಮತ್ತಷ್ಟೂ ಕಗ್ಗಂಟಾಗಿಸಿ ಮೋದಿಯವರ ಕೇಂದ್ರ ಸರಕಾರ ಮತ್ತು ರಾಜ್ಯದ ಬಿಜೆಪಿಗಳು ರೈತರಿಗೆ ದ್ರೋಹ ಎಸಗುತ್ತಿಲ್ಲವೇ? ಇದರಿಂದ ರೈತರ ವಿಶ್ವಾಸವನ್ನೇ ಕಳೆದು ಕೊಂಡ  ಬಿಜೆಪಿ ತನ್ನ ಯಾತ್ರೆಯ ಬದಲು ಕ್ಷಮೆಯಾಚಿಸಿ ಕೇಂದ್ರದ ಮೇಲೆ ಒತ್ತಡ ಹೇರಬೇಕಿತ್ತು. ಬೇಡಿಕೆ ಈಡೇರಿ ನೀರು ಸಿಗುವಂತಾಗಿದ್ದರೆ ನಿಜಕ್ಕೂ ರೈತರಿಗೆ ಚೈತನ್ಯ ದೊರೆಯುತ್ತಿತ್ತು. ಆದರೆ ಇವಾವುದನ್ನೂ ಮಾಡದೇ ಮೋದಿ ಸರಕಾರದ ಮತ್ತು ಬಿಜೆಪಿಯ ವೈಫಲ್ಯಗಳನ್ನು ಮುಚ್ಚಿಕೊಳ್ಳಲು ಈ ಚೈತನ್ಯ ಯಾತ್ರೆ ಯ ಢೋಂಗಿ ನಾಟಕವಾಡಿದರೆ ಮೋಸವನ್ನು ನಂಬಲಾದೀತೆ?

ಹೀಗಾಗಿ ಬಿಜೆಪಿಯ ಈ ಯಾತ್ರೆ ಒಂದು ರಾಜಕೀಯ ಕು-ತಂತ್ರದ ಕ್ರಮ. ಬಿಜೆಪಿ ಏನೋ ಮಾಡಿತು ಎಂದು ತೋರಿಸಿಕೊಳ್ಳುವುದು, ಆದರೆ ವಾಸ್ತವದಲ್ಲಿ ಏನೂ ಆಗಲಾರದು. ಇದರಿಂದಾಗಿ ಮುಂಬರುವ ತಾಲೂಕು ಮತ್ತು ಜಿಲ್ಲಾ ಪಂಚಾಯತಿ ಚುನಾವಣೆಗಳಲ್ಲಿ ಗ್ರಾಮಾಂತರ ಪ್ರದೇಶದಲ್ಲಿ ತಮ್ಮ ಬೆಂಬಲ ಕಾಯ್ದುಕೊಳ್ಳುವುದು, ಪಡೆಯುವುದು ಅದರ ಹಿಂದಿನ ಲೆಕ್ಕಾಚಾರ. ಮಾತ್ರವಲ್ಲ, ಬಿಜೆಪಿಯೊಳಗಿನ ನಾಯಕತ್ವದ ಮೇಲುಗೈ ಪ್ರಶ್ನೆಯೂ ಇಲ್ಲಿ ಇಲ್ಲದಿಲ್ಲ. ’ರೈತರ ಸಾಲ ಮನ್ನಾ ಆಗುವವರೆಗೂ ಹೋರಾಟ ಮುಂದುವರಿಸುತ್ತೇನೆ, ಎರಡನೇ ಹಂತದ ಚೈತನ್ಯ ಯಾತ್ರೆ ಅಕ್ಟೋಬರ್‌ನಲ್ಲಿ ನಡೆಯಲಿದೆ’ ಎಂದಿರುವ ಸಂಸದ ಯಡಿಯೂರಪ್ಪನವರು ’ಇನ್ನು ಅದು ಈಡೇರುವವರೆಗೂ,  ಬಿಜೆಪಿಯನ್ನು ರಾಜ್ಯದಲ್ಲಿ ಅಧಿಕಾರಕ್ಕೆ ತರುವವರೆಗೂ ರಾಷ್ಟ್ರೀಯ ರಾಜಕಾರಣದತ್ತ ಮುಖ ಮಾಡುವುದಿಲ್ಲ’ ಎಂದೂ ಸೂಚಿಸಿರುವುದು ಆ ಹಿನ್ನೆಲೆಯಲ್ಲೇ. ಆದ್ದರಿಂದಲೇ ನಾಯಕರು ಎರಡು ಭಿನ್ನ ದಿಕ್ಕುಗಳಿಂದಲೇ ವೇದಿಕೆಗೆ ಬಂದು ತಮ್ಮ ವಿಭಿನ್ನತೆಯನ್ನು ತೋರಿಸಿದರು! ಇದೇ ಅವಧಿಯಲ್ಲಿ ನಡೆದ ಬಿಬಿಎಂಪಿ ಚುನಾವಣೆಯಲ್ಲಿ ಡಾ. ಯಡ್ಯೂರಪ್ಪನವರು ನಾಯಕತ್ವದ ವಿಷಯದಲ್ಲಿ ತಕರಾರು ತೆಗೆದಿದ್ದನ್ನು ನೆನಪಿಸಿಕೊಳ್ಳಬೇಕು.

ರಾಜ್ಯದಲ್ಲಿಯೂ ಕಾಂಗ್ರೆಸ್ ಸರಕಾರ ಜನತೆಯ ಜೀವನದ ಪ್ರಶ್ನೆಗಳಿಗೆ ಪರಿಹಾರಾತ್ಮಕ ಕ್ರಮಗಳನ್ನು ಕೈಗೊಳ್ಳದೇ ನಿರ್ಲಕ್ಷ್ಯದಿಂದ ಸಾಗಿರುವಾಗ ಜನರಲ್ಲಿ ಅತೃಪ್ತಿಯೂ ಹೆಚ್ಚುತ್ತಿದೆ. ಅದರ ಲಾಭ ಹೊಡೆಯಲು ಬಿಜೆಪಿಯು ಹಲವು ಪ್ರಯತ್ನಗಳನ್ನು ಮಾಡುತ್ತಿದೆ. ಈ ಯಾತ್ರೆಯೂ ಅದರ ಒಂದು ಪ್ರಯತ್ನವೇ ಹೊರತು ನಿಜ ಕಾಳಜಿಯಿಂದಲ್ಲ. ಹೀಗೆ ಈ ಯಾತ್ರೆ ಅಧಿಕಾರದ ಹಪಾಹಪಿಯಲ್ಲಿರುವ ಬಿಜೆಪಿ ವೈಫಲ್ಯಗಳನ್ನು ಮುಚ್ಚಿಕೊಳ್ಳುವ, ಅದರ ನಾಯಕರ ಮುಖ ಉಳಿಸಿಕೊಳ್ಳುವ ಜೀವದಾನದ ಯಾತ್ರೆ ಯೇ ಹೊರತು ಬೇರೇನೂ ಅಲ್ಲ.